ಬ್ಯಾಂಕ್‌ಗಳಲ್ಲಿ ಕಡಿಮೆ ಆಗ್ತಿದೆ ಭಾರತೀಯರ ಉಳಿತಾಯ; ಹಾಗಾದ್ರೆ ಎಲ್ಲಿಗೆ ಹೋಗುತ್ತಿದೆ ದುಡ್ಡು?

"ಹೆಚ್ಚು ಉಳಿಸಿ, ಕಡಿಮೆ ಖರ್ಚು ಮಾಡಿ" ಎಂಬುದಕ್ಕೆ ವಿರುದ್ಧವಾಗಿ ಭಾರತೀಯರು ನಡೆದುಕೊಳ್ಳುತ್ತಿದ್ದಾರಾ? ಕೆಲ ವರದಿಗಳು ಹೌದು ಎನ್ನುತ್ತಿವೆ. ಇತರ ಕೆಲ ದೇಶಗಳಿಗೆ ಹೋಲಿಸಿದರೆ ಭಾರತೀಯರು ಬ್ಯಾಂಕ್‌ಗಳಲ್ಲಿ ಉಳಿತಾಯ ಕಡಿಮೆ ಮಾಡುತ್ತಿದ್ದಾರೆ. ಹಾಗಾದ್ರೆ ದುಡಿದ ಹಣವೆಲ್ಲಾ ಎಲ್ಲಿಗೆ ಹೋಗುತ್ತಿದೆ ಎಂಬುದಕ್ಕೆ ಇಲ್ಲಿದೆ ಉತ್ತರ.

2023ರ ಸೆಪ್ಟೆಂಬರ್​ ತಿಂಗಳಲ್ಲಿ ಬಿಡುಗಡೆಯಾದ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಬುಲೆಟಿನ್‌ನ ಇತ್ತೀಚಿನ ಮಾಹಿತಿಯ ಪ್ರಕಾರ, ಬ್ಯಾಂಕ್ ಉಳಿತಾಯ, ನಗದು ಮತ್ತು ಹೂಡಿಕೆಗಳನ್ನು ಒಳಗೊಂಡಿರುವ ಭಾರತೀಯರ ಉಳಿತಾಯವು ಹಣಕಾಸು ವರ್ಷ 2023ರಲ್ಲಿ (FY23) ಒಟ್ಟು ದೇಶೀಯ ಉತ್ಪನ್ನ (ಜಿಡಿಪಿ)ದ 5.1 ಪ್ರತಿಶತಕ್ಕೆ ಕುಸಿದಿದೆ ಎಂದು ಬಹಿರಂಗಪಡಿಸಿದೆ. ಹಣಕಾಸು ವರ್ಷ 202ರಲ್ಲಿ ಈ ಪ್ರಮಾಣ ಶೇ. 7.1 ರಷ್ಟಿತ್ತು. ಇದೀಗ ಶೇ 2ರಷ್ಟು ಕುಸಿದಿದೆ.

ಹಾಗಾದರೆ, ಹಣ ಎಲ್ಲಿಗೆ ಹೋಗುತ್ತಿದೆ ಎಂಬುದಕ್ಕೆ ಹಣಕಾಸು ಸಚಿವಾಲಯ ಮಾಹಿತಿ ನೀಡಿದೆ. ಕೋವಿಡ್​ ಸಾಂಕ್ರಾಮಿಕ ಬಳಿಕ ಜನರು ಕಡಿಮೆ ಬಡ್ಡಿದರದ ಲಾಭವನ್ನು ಪಡೆದುಕೊಂಡು ಮನೆಗಳು ಮತ್ತು ವಾಹನಗಳಂತಹ ಭೌತಿಕ ಆಸ್ತಿಗಳಿಗಾಗಿ ಹೆಚ್ಚು ಖರ್ಚು ಮಾಡಲು ಪ್ರಾರಂಭಿಸಿದ್ದಾರೆ ಎಂದು ತಿಳಿಸಿದೆ.

ಇದೇ ವಿಚಾರವನ್ನು ಎಸ್‌ಬಿಐ ತನ್ನ ಸಂಶೋಧನಾ ವರದಿಯಲ್ಲಿ ಕೂಡ ಹೇಳಿದೆ. ಭೌತಿಕ ಸ್ವತ್ತುಗಳ ಮೇಲಿನ ಹೆಚ್ಚಿನ ಖರ್ಚು ಭಾರತೀಯ ಕುಟುಂಬಗಳಲ್ಲಿ ಆರ್ಥಿಕ ಬಾಧ್ಯತೆಗಳ ತೀವ್ರ ಏರಿಕೆಗೆ ಕಾರಣವಾಗಿದೆ. ಆದರೆ ಕೂಡ ಇದನ್ನು ಭೌತಿಕ ಮತ್ತು ಆರ್ಥಿಕ ಉಳಿತಾಯದ ಒಟ್ಟು ಮೊತ್ತವಾಗಿ ಪರಿಗಣಿಸಬೇಕು ಎಂದು ಹೇಳಿದೆ.

ಕಳೆದ ಎರಡು ವರ್ಷಗಳಲ್ಲಿ 50 ಪ್ರತಿಶತದಷ್ಟು ಚಿಲ್ಲರೆ ಸಾಲವು ಮನೆ, ವಸತಿ, ಶಿಕ್ಷಣ ಮತ್ತು ವಾಹನ ಖರೀದಿಗೆ ಹೋಗಿದೆ ಎಂದು ಎಸ್‌ಬಿಐ ವರದಿ ಎತ್ತಿ ತೋರಿಸಿದೆ. ಒಟ್ಟಾರೆಯಾಗಿ ಭೌತಿಕ ಆಸ್ತಿಗಳಿಗೆ ಹೆಚ್ಚು ವೆಚ್ಚ ಮಾಡುತ್ತಿರುವ ಕಾರಣ ಭಾರತೀಯ ಕುಟುಂಬಗಳು ಬ್ಯಾಂಕ್​​​ಗಳಲ್ಲಿ ನಗದು ಉಳಿತಾಯವು ತೀವ್ರವಾಗಿ ಕುಸಿದಿದೆ. ರಿಯಲ್ ಎಸ್ಟೇಟ್ ವಲಯದಲ್ಲಿ ಸುಧಾರಣೆ ಮತ್ತು ಆಸ್ತಿ ಬೆಲೆಗಳ ಹೆಚ್ಚಳದಿಂದೂ ಭೌತಿಕ ಆಸ್ತಿಗಳ ಸೃಷ್ಟಿಗೆ ಕಾರಣವಾಗಿದೆ.

ಈ ವರದಿಗಳ ಹೊರತಾಗಿ ನೋಡುವುದಾರೆ ಬಡ ಹಾಗೂ ಮಧ್ಯಮ ಕುಟುಂಬಗಳಿಗೆ ಆಸ್ಪತ್ರೆಯ ಖರ್ಚುಗಳೇ ಹೊರೆಯಾಗಿವೆ. ಮಕ್ಕಳ ಶಿಕ್ಷಣಕ್ಕೂ ಹೆಚ್ಚು ಖರ್ಚಾಗುತ್ತಿದೆ. ದುಡಿದಿದ್ದು ಸಾಲದೆ ಸಾಲದ ಮೊರೆ ಹೋಗಿದ್ದಾರೆ. ಹೀಗಿರುವಾಗ ಉಳಿತಾಯ ಹೇಗೆ ಸಾಧ್ಯ. ಶ್ರೀಮಂತರು ಚಿನ್ನ ಖರೀದಿ, ಐಷಾರಾಮಿ ಕಾರುಗಳ ಖರೀದಿಗೆ ಹೆಚ್ಚು ಹಣ ಸುರಿಯುತ್ತಾರೆ.

ಇದನ್ನೂ ಓದಿ: Study tips: ಎಂಬಿಎ ಪದವಿ ಪಡೆಯಲು ಸರಿಯಾದ ವಯಸ್ಸು ಯಾವುದು? ಹೀಗಿರಬೇಕು ನಿಮ್ಮ ತಯಾರಿ