Predator drone deal: 3 ಬಿಲಿಯನ್‌ ಡಾಲರ್‌ ಮೌಲ್ಯದ MQ-9B ಪ್ರಿಡೇಟರ್‌ ಡ್ರೋನ್‌ ಒಪ್ಪಂದ ಅಂತಿಮಗೊಳಿಸಲು ಭಾರತ, ಅಮೆರಿಕ ಉತ್ಸುಕ

ವಾಷಿಂಗ್ಟನ್‌: ಭಾರತ ಮತ್ತು ಅಮೆರಿಕಗಳು MQ-9B ಪ್ರಿಡೇಟರ್‌ ಡ್ರೋನ್‌ ಒಪ್ಪಂದ ಅಂತಿಮಗೊಳಿಸುವ ವಿಚಾರದಲ್ಲಿ ಉತ್ಸುಕತೆ ತೋರಿವೆ. ಇದು 3 ಬಿಲಿಯನ್‌ ಡಾಲರ್‌ ಮೌಲ್ಯದ ಒಪ್ಪಂದವಾಗಿದ್ದು, 30 MQ-9B ಪ್ರಿಡೇಟರ್‌ ಡ್ರೋನ್‌ ಖರೀದಿಗೆ ಸಂಬಂಧಿಸಿದ್ದಾಗಿದೆ. ಭಾರತ ಮತ್ತು ಅಮೆರಿಕಗಳು ಈ ಒಪ್ಪಂದಕ್ಕೆ ಸಂಬಂಧಿಸಿದ ಆರಂಭಿಕ ತೀರ್ಮಾನ ತೆಗೆದುಕೊಳ್ಳಲು ಉತ್ಸುಕವಾಗಿವೆ.

ಖರೀದಿ ಒಪ್ಪಂದದ ಪ್ರಸ್ತಾವನೆಯಲ್ಲಿ ಉಲ್ಲೇಖವಾಗಿರುವ 30 MQ-9B ಪ್ರಿಡೇಟರ್‌ ಸಶಸ್ತ್ರ ಡ್ರೋನ್‌ಗಳು ( ಮೂರು ಸೇವೆಗಳಿಗೆ ಅಂದರೆ ಭೂ, ನೌಕಾ ಮತ್ತು ವಾಯುಪಡೆಗಳಿಗೆ ತಲಾ 10 ಡ್ರೋನ್‌ಗಳು) ಭಾರತದ ರಾಷ್ಟ್ರೀಯ ಭದ್ರತೆ ಮತ್ತು ರಕ್ಷಣಾ ಅಗತ್ಯಗಳ ಪ್ರಮುಖ ಭಾಗವಾಗಿರಲಿದೆ.

ಈ ಖರೀದಿ ಒಪ್ಪಂದ ಏರ್ಪಟ್ಟರೆ ಹಿಂದು ಮಹಾಸಾಗರ ಮತ್ತು ಲೈನ್‌ ಆಫ್‌ ಆಕ್ಚುವಲ್‌ ಕಂಟ್ರೋಲ್‌ (ಎಲ್‌ಎಸಿ)ನಲ್ಲಿ ತನ್ನ ಒಟ್ಟಾರೆ ಕಣ್ಗಾವಲನ್ನು ಬಲಪಡಿಸುವುದಕ್ಕೆ ಈ ಡ್ರೋಣ್‌ಗಳು ನೆರವಾಗಲಿವೆ ಎಂಬುದು ಭಾರತ ಸರ್ಕಾರದ ಲೆಕ್ಕಾಚಾರ.

ವಿಳಂಬ ಯಾಕೆ?

ಈ ವಿಚಾರವಾಗಿ ಐದು ವರ್ಷಗಳಿಂದ ಮಾತುಕತೆ ನಡೆಯುತ್ತಿದೆ. ಈಗ ನಿರ್ಧಾರ ತೆಗೆದುಕೊಳ್ಳಬೇಕಾದ್ದು ಭಾರತ ಎಂಬುದನ್ನು ಈ ವಿದ್ಯಮಾನದ ಅರಿವು ಇರುವಂಥ ಅಮೆರಿಕದ ಅಧಿಕಾರಿಗಳು ಬುಧವಾರ ಹೆಚ್ಚು ವಿವರ ನೀಡದೇ ತಿಳಿಸಿದ್ದಾರೆ ಎಂದು ಪಿಟಿಐ ವರದಿ ಮಾಡಿದೆ.

ಅಧಿಕಾರಿಗಳು ಹೆಚ್ಚಿನ ವಿವರಗಳನ್ನು ನೀಡಲಿಲ್ಲ. ಆದರೆ ಇದರಲ್ಲಿ ಯಾವುದೇ ಅಧಿಕಾರಶಾಹಿ ಅಡಚಣೆ ಅಥವಾ ನಿಯಂತ್ರಕ ಸಮಸ್ಯೆಗಳಿವೆ ಎಂಬುದನ್ನು ತಳ್ಳಿಹಾಕಿದರು.

ಈ ಒಪ್ಪಂದದ ಘೋಷಣೆ 2017 ರ ಬೇಸಿಗೆಯಲ್ಲಿ ಆಗಿತ್ತು. ಆದಾಗ್ಯೂ ಒಪ್ಪಂದದ ವಿಳಂಬದ ಕುರಿತು ಕೇಳಿದಾಗ "ನಾನು ಅದನ್ನು ಪರಿಶೀಲಿಸಬೇಕಷ್ಟೆ" ಎಂದು ರಾಜಕೀಯ ಮಿಲಿಟರಿ ವ್ಯವಹಾರಗಳ ಸಹಾಯಕ ಕಾರ್ಯದರ್ಶಿ ಜೆಸ್ಸಿಕಾ ಲೂಯಿಸ್ ಇಲ್ಲಿ ಸುದ್ದಿಗಾರರಿಗೆ ತಿಳಿಸಿದರು.

ಸಾರ್ವಜನಿಕರಿಗೆ ತಿಳಿದಿಲ್ಲದ ಕಾರಣಗಳಿಗಾಗಿ ಇದು ಸ್ವಲ್ಪ ಸಮಯದಿಂದ ಬಾಕಿ ಉಳಿದಿದೆ. ಆದಾಗ್ಯೂ, ಭೇಟಿ ನೀಡಿದ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ಕೆ ದೋವಲ್ ಅವರು ಅಮೆರಿಕದ ಭದ್ರತಾ ಸಲಹೆಗಾರ ಜೇಕ್ ಸುಲ್ಲಿವನ್ ಸೇರಿ ಅಮೆರಿಕದ ಉನ್ನತ ನಾಯಕತ್ವದೊಂದಿಗೆ ನಡೆಸಿದ ಸಭೆಗಳಲ್ಲಿ ಈ ವಿಷಯಗಳನ್ನು ಚರ್ಚಿಸಿದ್ದಾರೆ ಎಂದು ನಂಬಲಾಗಿದೆ.

ಲೆಕ್ಕಾಚಾರಗಳು ಏನೇನು?

ಸಭೆಯ ಸಮಯದಲ್ಲಿ, ಡ್ರೋನ್ ಒಪ್ಪಂದವನ್ನು ತ್ವರಿತವಾಗಿ ಟ್ರ್ಯಾಕ್ ಮಾಡಲು ಎರಡೂ ಕಡೆಯವರು ತಮ್ಮ ಉತ್ಸುಕತೆಯನ್ನು ವ್ಯಕ್ತಪಡಿಸಿದ್ದಾರೆ ಎಂದು ನಂಬಲಾಗಿದೆ. ಮುಂಚಿನ ನಿರ್ಧಾರವು MQ-98 ಪ್ರಿಡೇಟರ್‌ ಸಶಸ್ತ್ರ ಡ್ರೋನ್‌ಗಳ ಆರಂಭಿಕ ವಿತರಣೆಯನ್ನು ಪಡೆಯಲು ಸಹಾಯ ಮಾಡುತ್ತದೆ ಎಂಬುದು ಭಾರತದ ಉತ್ಸುಕತೆ ಕಾರಣವಾಗಿದೆ. ಅದು ಹಿಂದೂ ಮಹಾಸಾಗರದಲ್ಲಿ ಮಾತ್ರವಲ್ಲದೆ ಎಲ್‌ಎಸಿ ಉದ್ದಕ್ಕೂ ತನ್ನ ರಾಷ್ಟ್ರೀಯ ಭದ್ರತೆ ಮತ್ತು ಕಣ್ಗಾವಲು ಬಲಪಡಿಸುತ್ತದೆ ಎಂಬುದು ಭಾರತದ ಲೆಕ್ಕಾಚಾರ.

ಬಿಡೆನ್ ಆಡಳಿತವು ಆದಷ್ಟು ಬೇಗ ಈ ಒಪ್ಪಂದವನ್ನು ಮಾಡಿಕೊಳ್ಳಲು ಉತ್ಸುಕವಾಗಿದೆ. ಇದು ಉದ್ಯೋಗಗಳನ್ನು ಸೃಷ್ಟಿಸುತ್ತದೆ ಮತ್ತು ಮುಂದಿನ ವರ್ಷದ ಅಧ್ಯಕ್ಷೀಯ ಚುನಾವಣೆಗೆ ಮುಂಚಿತವಾಗಿ ರಾಜಕೀಯವಾಗಿ ಪ್ರಯೋಜನಕಾರಿಯಾಗಿದೆ ಎಂಬುದು ಬೈಡೆನ್‌ ಆಡಳಿತದ ಲೆಕ್ಕಾಚಾರ ಎಂದು ಈ ವಿದ್ಯಮಾದ ಬಗ್ಗೆ ತಿಳಿದಿರುವವರು ಹೇಳಿದ್ದಾರೆ.

ಭಾರತ - ಅಮೆರಿಕ ರಕ್ಷಣಾ ಸಂಬಂಧದ ಸೂಕ್ಷ್ಮ ಚಿತ್ರಣ

ಇದಕ್ಕೂ ಮುನ್ನ ಬುಧವಾರ ಬೆಳಗ್ಗೆ ರಾಜಕೀಯ ಮಿಲಿಟರಿ ವ್ಯವಹಾರಗಳ ಸಹಾಯಕ ರಾಜ್ಯ ಕಾರ್ಯದರ್ಶಿ ಲೂಯಿಸ್, ಭಾರತ ಮತ್ತು ಯುಎಸ್ ರಕ್ಷಣಾ ಸಂಬಂಧವು ವೇಗವನ್ನು ಪಡೆದುಕೊಂಡಿದೆ ಎಂದು ಸುದ್ದಿಗಾರರಿಗೆ ತಿಳಿಸಿದರು.

ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯಿಸಿದ ವಿದೇಶಾಂಗ ಇಲಾಖೆಯ ಅಧಿಕಾರಿ, ಭಾರತಕ್ಕೆ ಅದರ ವೈವಿಧ್ಯಮಯ ರಕ್ಷಣಾ ಅಗತ್ಯಗಳನ್ನು ಪೂರೈಸುವುದಕ್ಕೆ ಸಹಾಯ ಮಾಡಲು ಯುಎಸ್ ಸಿದ್ಧವಾಗಿದೆ ಎಂದು ಹೇಳಿದರು.

ಭಾರತದ ವಿಷಯಕ್ಕೆ ಬಂದಾಗ, ಹಲವು ವಿಧದ ಆಯ್ಕೆಗಳಿವೆ ಎಂದು ನಾನು ಭಾವಿಸುತ್ತೇನೆ. ನಿಸ್ಸಂಶಯವಾಗಿ, ನಾವು ಭಾರತ ಸರ್ಕಾರದೊಂದಿಗೆ ಅದರ ಅಗತ್ಯಗಳು ಏನೆಂದು ಅರಿತುಕೊಂಡು ಕೆಲಸ ಮಾಡಬೇಕಾಗಿದೆ. ಆದರೆ ಹೆಚ್ಚುವರಿ ವ್ಯವಸ್ಥೆಗಳು, ಸಹಕರಿಸುವ ಮಾರ್ಗಗಳನ್ನು ಕಂಡುಹಿಡಿಯಲು ನಮಗೆ ಸಾಧ್ಯವಾಗುವ ವಿಷಯದಲ್ಲಿ ಹಲವು ವಿಧದ ಆಯ್ಕೆಗಳಿವೆ ಎಂದು ನಾನು ಭಾವಿಸುತ್ತೇನೆ. ನಿಸ್ಸಂಶಯವಾಗಿ ಅದು ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದರ ವಿಷಯದಲ್ಲಿ ಭಾರತದ ಸ್ವಂತ ರೀತಿಯ ಆಟದ ನಿಯಮಗಳನ್ನು ಗೌರವಿಸುತ್ತದೆ. ನಾವು ಒಟ್ಟಿಗೆ ಮಾಡಬಹುದಾದ ಇನ್ನೂ ಹೆಚ್ಚಿನ ವಿಚಾರಗಳು ಇವೆ ಮತ್ತು ನಾವು ಅದರಲ್ಲಿ ಕೆಲಸ ಮಾಡುವುದನ್ನು ಮುಂದುವರಿಸಬಹುದು ಎಂದು ಭಾವಿಸುವುದಾಗಿ ಲೆವಿಸ್ ಹೇಳಿದರು.