World Richest Cricketer: ಸಚಿನ್, ಕೊಹ್ಲಿ, ಧೋನಿ ಅಲ್ಲ.. 15 ವರ್ಷಗಳ ಹಿಂದೆ ನಿವೃತ್ತಿ ಹೇಳಿದ್ದ ಈತನೇ ವಿಶ್ವದ ಶ್ರೀಮಂತ ಕ್ರಿಕೆಟಿಗ!
World Richest Cricketer: ಮ್ಯಾಗ್ಜಿನ್ವೊಂದು ವರದಿಯ ಪ್ರಕಾರ, 15 ವರ್ಷಗಳ ಹಿಂದೆ ಕ್ರಿಕೆಟ್ನಿಂದ ನಿವೃತ್ತಿ ಘೋಷಿಸಿದ ಆಸ್ಟ್ರೇಲಿಯಾದ ಮಾಜಿ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ಆ್ಯಡಂ ಗಿಲ್ಕ್ರಿಸ್ಟ್ 2023ರ ವಿಶ್ವದ ಶ್ರೀಮಂತ ಕ್ರಿಕೆಟಿಗ ಎಂಬ ಮಾಹಿತಿ ಲಭ್ಯವಾಗಿದೆ.
ಹಾಕಿ ನಮ್ಮ ರಾಷ್ಟ್ರೀಯ ಆಟ ಎಂದೆನಿಸಿದ್ದರೂ ನಿಜಕ್ಕೂ ಈ ಮನ್ನಣೆ ಸಲ್ಲಬೇಕಾಗಿರುವುದು ಕ್ರಿಕೆಟ್ಗೆ.! ಈ ನೆಲ ದೊಡ್ಡ ಸವ್ಯಸಾಚಿಗಳನ್ನು ಸೃಷ್ಟಿಸಿದೆ. ಗಲ್ಲಿ ಗಲ್ಲಿಗಳೂ ಕ್ರಿಕೆಟ್ ಕತೆ ಹೇಳುತ್ತವೆ. ಪುಟ್ಟ ಮಕ್ಕಳು ಬ್ಯಾಟು ಬಾಲು ದೀಕ್ಷೆ ಪಡೆದುಕೊಂಡು ದೊಡ್ಡವರಾಗುತ್ತಾರೆ. ಈ ದೃಷ್ಟಿಯಿಂದ ಭಾರತದಲ್ಲಿ ಕ್ರಿಕೆಟ್ ಒಂದು ಧರ್ಮವಾಗಿ ಬೆಳೆದು ನಿಂತಿದೆ. ಕ್ರಿಕೆಟಿಗರನ್ನು ಅಭಿಮಾನಿಗಳು ಆರಾಧಿಸುತ್ತಾರೆ.
ಭಾರತದ ಜನಪ್ರಿಯ ಕ್ರೀಡೆ ಎಂಬ ಖ್ಯಾತಿಗೂ ಒಳಗಾಗಿದೆ. ಅದರಲ್ಲೂ ಟೀಮ್ ಇಂಡಿಯಾದ ಕ್ರಿಕೆಟಿಗರಂತೂ ವರ್ಷದಿಂದ ವರ್ಷಕ್ಕೆ ಕೋಟಿ ಕೋಟಿಯ ಸಂಖ್ಯೆ ಹೆಚ್ಚಿಸಿಕೊಳ್ಳುತ್ತಲೇ ಇದ್ದಾರೆ. ಅಂತಾರಾಷ್ಟ್ರೀಯ ಕ್ರಿಕೆಟ್, ಐಪಿಎಲ್, ಜಾಹೀರಾತು.. ಹೀಗೆ ಈ ಎಲ್ಲದರಿಂದಲೂ ದುಡ್ಡಿನ ಹೊಳೆಯಲ್ಲಿ ಮಿಂದೇಳುತ್ತಿದ್ದಾರೆ. ಅದರಲ್ಲೂ ದಿಗ್ಗಜರಾದ ಸಚಿನ್ ತೆಂಡೂಲ್ಕರ್ (Sachin Tendulkar), ವಿರಾಟ್ ಕೊಹ್ಲಿ (Virat Kohli), ಎಂ.ಎಸ್ ಧೋನಿ (MS Dhoni) ಮನೆಯ ಮುಂದೆ ಜಾಹೀರಾತು ಕಂಪನಿಗಳು ಕ್ಯೂ ನಿಲ್ಲುತ್ತವೆ ಎಂಬುದು ವಿಶೇಷ.
ಹಾಗಾಗಿ, ಭಾರತದ ಅತ್ಯಂತ ಶ್ರೀಮಂತ ಕ್ರಿಕೆಟಿಗ ಯಾರು ಎಂಬುದು ಆಗಾಗ್ಗೆ ಕುತೂಹಲ ಕೆರಳಿಸುವ ವಿಷಯವಾಗಿದೆ. ಈ ವಿಷಯ ಕಿವಿಗೆ ಬಿದ್ದಾಗ ಸಚಿನ್ ತೆಂಡೂಲ್ಕರ್, ಮಹೇಂದ್ರ ಸಿಂಗ್ ಧೋನಿ ಹಾಗೂ ವಿರಾಟ್ ಕೊಹ್ಲಿ ಹೆಸರು ಥಟ್ ಅಂತ ಹೊಳೆಯುವುದು ಸಾಮಾನ್ಯ. ಆದರೆ, ವಿಶ್ವದ ಶ್ರೀಮಂತ ಕ್ರಿಕೆಟಿಗ (World Richest Cricketer) ಯಾರು..?
ಆದರೆ, ಮ್ಯಾಗ್ಜಿನ್ವೊಂದು ವರದಿಯ ಪ್ರಕಾರ, 15 ವರ್ಷಗಳ ಹಿಂದೆ ಕ್ರಿಕೆಟ್ನಿಂದ ನಿವೃತ್ತಿ ಘೋಷಿಸಿದ ಆಸ್ಟ್ರೇಲಿಯಾದ ಮಾಜಿ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ಆ್ಯಡಂ ಗಿಲ್ಕ್ರಿಸ್ಟ್ (Adam Gilchrist) 2023ರ ವಿಶ್ವದ ಶ್ರೀಮಂತ ಕ್ರಿಕೆಟಿಗ ಎಂಬ ಮಾಹಿತಿ ಲಭ್ಯವಾಗಿದೆ. ಅದಲ್ಲದೆ ಅವರ ಆದಾಯದ ಮೂಲವೇನು.? ಇಷ್ಟು ಆಸ್ತಿ ಸಂಪಾದನೆ ಮಾಡಿದ್ದು ಹೇಗೆ ಎಂಬುದರ ವಿವರಗಳನ್ನೂ ನೀಡಿದೆ.
'ಸಿಇಓ ವರ್ಲ್ಡ್ ಮ್ಯಾಗಜೀನ್' (CEOWORLD magazine) ವರದಿಯ ಪ್ರಕಾರ, ಈ ವಿಧ್ವಂಸಕ ಓಪನರ್ ಆ್ಯಡಂ ಗಿಲ್ಕ್ರಿಸ್ಟ್ ವಿಶ್ವದ ಶ್ರೀಮಂತ ಕ್ರಿಕೆಟಿಗ. ಅಂದಾಜು 3,130 ಕೋಟಿ ರೂಪಾಯಿ (380 ಮಿಲಿಯನ್ ಡಾಲರ್) ನಿವ್ವಳ ಮೌಲ್ಯ ಹೊಂದಿದ್ದಾರೆ. ಇನ್ನೂ 2ನೇ ಸ್ಥಾನದಲ್ಲಿ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡುಲ್ಕರ್ ಇದ್ದಾರೆ. ಸಚಿನ್ ನಿವ್ವಳ ಮೌಲ್ಯ 1400 ಕೋಟಿ (170 ಮಿಲಿಯನ್ ಡಾಲರ್) ಎಂದು ಹೇಳಲಾಗಿದೆ. ಇನ್ನೂ 3ನೇ ಸ್ಥಾನದಲ್ಲಿ ಟೀಮ್ ಇಂಡಿಯಾ ಮಾಜಿ ನಾಯಕ MS ಧೋನಿ ಇದ್ದು, ಮಾಹೀ ನಿವ್ವಳ ಮೌಲ್ಯ 947 ಕೋಟಿ ರೂಪಾಯಿ (115 ಮಿಲಿಯನ್ ಯುಎಸ್ ಡಾಲರ್) ಆಗಿದೆ.
ಇನ್ನೂ ಟೀಮ್ ಇಂಡಿಯಾದ ಮತ್ತೊಬ್ಬ ಮಾಜಿ ನಾಯಕ ವಿರಾಟ್ ಕೊಹ್ಲಿ, 4ನೇ ಸ್ಥಾನವನ್ನು ಅಲಂಕರಿಸಿದ್ದಾರೆ. ಕೊಹ್ಲಿ, ನಿವ್ವಳ ಮೌಲ್ಯ 922 ಕೋಟಿ ರೂಪಾಯಿ ಆಗಿದ್ದು 4ನೇ ಸ್ಥಾನದಲ್ಲಿದ್ದಾರೆ. ವಿಶೇಷ ಅಂದರೆ ಸಚಿನ್, ಕೊಹ್ಲಿ ಹಾಗೂ ಧೋನಿ ಪ್ರಸಿದ್ಧ ಬ್ರ್ಯಾಂಡ್ಗಳಿಗೆ ರಾಯಭಾರಿಯಾಗಿ ಕಾರ್ಯನಿರ್ವಹಿಸುತ್ತಿದ್ದರೂ ಗಿಲ್ಕ್ರಿಸ್ಟ್ಗಿಂತ ಕಡಿಮೆ ಮೌಲ್ಯ ಹೊಂದಿದ್ದಾರೆ.
ಗಿಲ್ಕ್ರಿಸ್ಟ್ಗೆ ಬರುವ ಆದಾಯ ಎಲ್ಲಿಂದ.?
ಕ್ರಿಕೆಟ್ನಿಂದ ಮಾತ್ರವಲ್ಲ, ಪ್ರಸಿದ್ಧ ಕಂಪನಿಗಳಿಂದಲೂ ಗಿಲ್ಕ್ರಿಸ್ಟ್ ಭಾರೀ ಸಂಪಾದನೆ ಮಾಡುತ್ತಿದ್ದಾರೆ. ಕಂಪನಿಗಳಲ್ಲಿ ಹಿರಿಯ ಹುದ್ದೆಗಳಲ್ಲಿ ಕೆಲಸ ಮಾಡುತ್ತಿದ್ದು, ದೊಡ್ಡ ಮೊತ್ತದ ವೇತನವನ್ನೇ ಪಡೆಯುತ್ತಿದ್ದಾರೆ ಎನ್ನಲಾಗಿದೆ. ಇದೇ ಕಾರಣಕ್ಕೆ ಕ್ರಿಕೆಟ್ ಲೀಗ್ಗಳಲ್ಲಿ ಹಾಗೂ ವಿಶ್ಲೇಷಕರಾಗಿ ಕೆಲಸ ಮಾಡುತ್ತಿಲ್ಲ ಎನ್ನಲಾಗಿದೆ. ಗಿಲ್ಕ್ರಿಸ್ಟ್ನ ನಿವ್ವಳ ಮೌಲ್ಯವನ್ನು ಹೆಚ್ಚಿಸುವಲ್ಲಿ ರಿಯಲ್ ಎಸ್ಟೇಟ್ ಕೂಡ ದೊಡ್ಡ ಪಾತ್ರವನ್ನು ವಹಿಸಿದೆ.
ಟಾಪ್ -10ರಲ್ಲಿ ಯುವಿ, ಸೆಹ್ವಾಗ್.!
ಭಾರತದ ಮಾಜಿ ಆಲ್ರೌಂಡರ್ ಯುವರಾಜ್ ಸಿಂಗ್ (Yuvraj Singh), ವೀರೇಂದ್ರ ಸೆಹ್ವಾಗ್ (Virender Sehwag) ವಿಶ್ವದ ಅಗ್ರ 10 ಶ್ರೀಮಂತ ಕ್ರಿಕೆಟಿಗರ ಪಟ್ಟಿಯಲ್ಲಿ ತಮ್ಮ ಹೆಸರನ್ನು ನೊಂದಾಯಿಸಿಕೊಂಡಿದ್ದಾರೆ. ಯುವರಾಜ್ ಸಿಂಗ್ 288 ಕೋಟಿ ಮೌಲ್ಯದೊಂದಿಗೆ 9ನೇ ಸ್ಥಾನದಲ್ಲಿದ್ದರೆ, ವೀರೇಂದ್ರ ಸೆಹ್ವಾಗ್ 329 ಕೋಟಿಯೊಂದಿಗೆ 8ನೇ ಸ್ಥಾನದಲ್ಲಿದ್ದಾರೆ.
ವಿಶ್ವದ ಟಾಪ್ -10 ಶ್ರೀಮಂತ ಕ್ರಿಕೆಟಿಗರು (2023ರವರೆಗೆ)
ಆಟಗಾರ | ದೇಶ | ಮೌಲ್ಯ |
ಆ್ಯಡಂ ಗಿಲ್ಕ್ರಿಸ್ಟ್ | ಆಸ್ಟ್ರೇಲಿಯಾ | 3130 ಕೋಟಿ |
ಸಚಿನ್ ತೆಂಡೂಲ್ಕರ್ | ಭಾರತ | 1400 ಕೋಟಿ |
ಎಂ.ಎಸ್.ಧೋನಿ | ಭಾರತ | 947 ಕೋಟಿ |
ವಿರಾಟ್ ಕೊಹ್ಲಿ | ಭಾರತ | 922 ಕೋಟಿ |
ರಿಕಿ ಪಾಂಟಿಂಗ್ | ಆಸ್ಟ್ರೇಲಿಯಾ | 576 ಕೋಟಿ |
ಜಾಕ್ ಕಾಲೀಸ್ | ಸೌತ್ ಆಫ್ರಿಕಾ | 576 ಕೋಟಿ |
ಬ್ರಿಯಾನ್ ಲಾರಾ | ವೆಸ್ಟ್ ಇಂಡೀಸ್ | 494 ಕೋಟಿ |
ವೀರೇಂದ್ರ ಸೆಹ್ವಾಗ್ | ಭಾರತ | 329 ಕೋಟಿ |
ಯುವರಾಜ್ ಸಿಂಗ್ | ಭಾರತ | 288 ಕೋಟಿ |
ಸ್ಟೀವ್ಸ್ಮಿತ್ | ಆಸ್ಟ್ರೇಲಿಯಾ | 247 ಕೋಟಿ |