ಕೆಕೆಆರ್​​ ಆಲ್​ರೌಂಡ್ ಆಟಕ್ಕೆ ನೆಲಕಚ್ಚಿದ ಡೆಲ್ಲಿ ಕ್ಯಾಪಿಟಲ್ಸ್; ತವರಿನಲ್ಲಿ ಶ್ರೇಯಸ್ ಪಡೆಗೆ ಸುಲಭ ಗೆಲುವು

ಕಳೆದ ಐದು ಪಂದ್ಯಗಳಲ್ಲಿ 4 ಗೆಲುವು ಸಾಧಿಸಿ ಪ್ಲೇಆಫ್​ ಹಾದಿಯನ್ನು ಸುಗಮ ಮಾಡಿಕೊಳ್ಳುತ್ತಿದ್ದ ಡೆಲ್ಲಿ ಕ್ಯಾಪಿಟಲ್ಸ್ (Delhi Capitals), ಈಗ ಆಘಾತಕಾರಿ ಸೋಲು ಕಂಡಿದೆ. ಕೋಲ್ಕತ್ತಾ ನೈಟ್ ರೈಡರ್ಸ್ (Kolkata Knight Riders) ವಿರುದ್ಧ 7 ವಿಕೆಟ್​ಗಳ ಪರಾಜಯ ಅನುಭವಿಸಿದೆ. 154 ರನ್​ಗಳ ಸುಲಭ ಗುರಿ ಬೆನ್ನಟ್ಟಿದ ಶ್ರೇಯಸ್ ಅಯ್ಯರ್ (Shreyas Iyer) ಪಡೆ, 16.3 ಓವರ್​​ಗಳಲ್ಲಿ ಗೆಲುವಿನ ಗೆರೆ ದಾಟಿತು. ಇದರೊಂದಿಗೆ ಪ್ಲೇಆಫ್​ ಸನಿಹಕ್ಕೂ ಬಂದು ನಿಂತಿತು. ಆದರೆ ಡೆಲ್ಲಿ ಪ್ಲೇಆಫ್​ ರೇಸ್​ನಲ್ಲಿ ಸಂಕಷ್ಟಕ್ಕೆ ಸಿಲುಕಿತು.

ಕೊಲ್ಕತ್ತಾದ ಈಡನ್ ಗಾರ್ಡನ್​ನಲ್ಲಿ ನಡೆದ ಐಪಿಎಲ್​ನ 47ನೇ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಡೆಲ್ಲಿ ಕ್ಯಾಪಿಟಲ್ಸ್ ಅತ್ಯಂತ ಕಳಪೆ ಬ್ಯಾಟಿಂಗ್ ಪ್ರದರ್ಶನ ನೀಡಿತು. 9ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಸ್ಪಿನ್ನರ್ ಕುಲ್ದೀಪ್ ಯಾದವ್ ಅಜೇಯ 35 ರನ್ ಗಳಿಸಿದ್ದೇ ಗರಿಷ್ಠ ಸ್ಕೋರ್ ಆಗಿದೆ. ಕೆಕೆಆರ್​ ಬೌಲರ್​ಗಳ ದಾಳಿಗೆ ಬೆದರಿದ ಡಿಸಿ, 20 ಓವರ್​​ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 153 ರನ್​ಗಳ ಸಾಧಾರಣ ಮೊತ್ತ ಕಲೆ ಹಾಕಿತು.

ಉಳಿದಂತೆ ಪೃಥ್ವಿ ಶಾ (13), ಜೇಕ್​ ಫ್ರೇಸರ್ ಮೆಕ್​ಗುರ್ಕ್ (12), ಅಭಿಷೇಕ್ ಪೊರೆಲ್ (18), ಶಾಯ್ ಹೋಪ್ (6), ರಿಷಭ್ ಪಂತ್ (27), ಅಕ್ಷರ್ ಪಟೇಲ್ (15), ಟ್ರಿಸ್ಟಾನ್ ಸ್ಟಬ್ಸ್ (4), ಕುಮಾರ್ ಕುಶಾಗ್ರಾ (1), ರಸಿಕ್ ದಾರ್​ (8) ತೀವ್ರ ನಿರಾಸೆ ಮೂಡಿಸಿದರು. ಕೆಕೆಆರ್ ಪರ ವರುಣ್ ಚಕ್ರವರ್ತಿ ಮೂರು ವಿಕೆಟ್ ಪಡೆದರೆ, ವೈಭವ್ ಆರೋರಾ ಮತ್ತು ಹರ್ಷಿತ್ ರಾಣಾ ತಲಾ ಎರಡು ವಿಕೆಟ್ ಪಡೆದರು. ಉಳಿದಂತೆ ಸುನಿಲ್ ನರೇನ್ ಮತ್ತು ಮಿಚೆಲ್ ಸ್ಟಾರ್ಕ್​ ಒಂದು ವಿಕೆಟ್ ಮಾತ್ರ ಪಡೆದರು.

ಇದನ್ನೂ ಓದಿ: ಹಾರ್ದಿಕ್ ಪಾಂಡ್ಯ ಉಪನಾಯಕತ್ವಕ್ಕೆ ಕುತ್ತು; 26 ವರ್ಷದ ಈ ಆಟಗಾರನಿಗೆ ಭಾರತ ತಂಡದ ವೈಸ್ ಕ್ಯಾಪ್ಟನ್ಸಿ ಪಟ್ಟ!

ಸಾಧಾರಣ ಗುರಿ ಹಿಂಬಾಲಿಸಿದ ಕೋಲ್ಕತ್ತಾ ತಂಡ, ಪವರ್​​ಪ್ಲೇನಲ್ಲೇ 79 ರನ್ ಕಲೆ ಹಾಕಿತು. ಪವರ್​ಪ್ಲೇ ಮುಗಿದ ಮೊದಲ ಓವರ್​​ನಲ್ಲೇ ಸುನಿಲ್ ನರೇನ್ ವಿಕೆಟ್ ಒಪ್ಪಿಸಿದರು. ಆದರೆ, ಫಿಲ್ ಸಾಲ್ಟ್, ಡೆಲ್ಲಿ ಬೌಲರ್​ಗಳಿಗೆ ಬೆಂಡೆತ್ತಿದರು. 33 ಎಸೆತಗಳಲ್ಲಿ 7 ಬೌಂಡರಿ, 5 ಸಿಕ್ಸರ್ ಸಹಿತ 68 ರನ್ ಬಾರಿಸಿದರು. ಅಬ್ಬರದ ಬ್ಯಾಟಿಂಗ್ ಮೂಲಕ ಡೆಲ್ಲಿಯ ಗೆಲುವಿನ ಕನಸನ್ನು ಕಸಿದುಕೊಂಡರು. 10 ಓವರ್​ಗಳಲ್ಲಿ 100 ರನ್ ಗಳಿಸಿದ ಕೊಲ್ಕತ್ತಾ, 16.3 ಓವರ್​ಗಳಲ್ಲಿ ಗೆಲುವಿನ ಗೆರೆ ದಾಟಿತು. ಶ್ರೇಯಸ್ ಅಯ್ಯರ್ 33 ಮತ್ತು ವೆಂಕಟೇಶ್ ಅಯ್ಯರ್ 26 ರನ್​ಗಳ ಕಾಣಿಕೆ ನೀಡಿ ಅಜೇಯರಾಗಿ ಉಳಿದರು.

ಇದನ್ನೂ ಓದಿ: ಜನರು ಕೊಹ್ಲಿಯನ್ನು ದೇವರೆಂದು ಭಾವಿಸುತ್ತಾರೆ, ಆದರೆ ಆತನೂ ಮನುಷ್ಯನೇ: ವಿರಾಟ್ ನೆರವಿಗೆ ಧಾವಿಸಿದ ಕೈಫ್-ಸಿಧು

ಅಂಕಪಟ್ಟಿಯಲ್ಲಿ ಉಭಯ ತಂಡಗಳು ಯಾವ ಸ್ಥಾನದಲ್ಲಿವೆ?

ಐಪಿಎಲ್​ ದ್ವಿತಿಯಾರ್ಧದ ಬಳಿಕ ಹಲವು ತಂಡಗಳ ನಡುವೆ ಪ್ಲೇಆಫ್​ ರೇಸ್​ಗೆ ಪೈಪೋಟಿ ನಡೆಯುತ್ತಿದೆ. ಡೆಲ್ಲಿ ವಿರುದ್ಧ ಕೆಕೆಆರ್​, ಆಡಿರುವ 9 ಪಂದ್ಯಗಳಲ್ಲಿ 6 ಗೆಲುವು ಸಾಧಿಸಿ, 3ರಲ್ಲಿ ಸೋತಿದೆ. 12 ಅಂಕ ಪಡೆದು ಎರಡನೇ (+1.096) ಸ್ಥಾನದಲ್ಲಿದೆ. ಪ್ಲೇಆಫ್ ಸಮೀಪಕ್ಕೆ ಬಂದು ನಿಂತಿದೆ. ಮತ್ತೊಂದೆಡೆ ಸೋತ ಡೆಲ್ಲಿ 11 ಪಂದ್ಯಗಳಲ್ಲಿ 6 ಸೋಲು ಕಂಡಿದೆ. 5 ರಲ್ಲಿ ಗೆದ್ದಿದ್ದು, 10 ಅಂಕ ಪಡೆದು 6ನೇ (-0.442) ಸ್ಥಾನದಲ್ಲಿದೆ. ಉಳಿದ ಮೂರು ಪಂದ್ಯಗಳಲ್ಲೂ ಗೆದ್ದರೆ ಪ್ಲೇಆಫ್​​​​​ಗೆ ಪ್ರವೇಶಿಸುವ ಸಾಧ್ಯತೆ ಇದೆ. ಆದರೆ ಇದು ಉಳಿದ ತಂಡಗಳ ಫಲಿತಾಂಶದ ಮೇಲೂ ನಿರ್ಧಾರವಾಗುತ್ತದೆ.

ಇನ್ನಷ್ಟು ಕ್ರಿಕೆಟ್ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.