Shahid Afridi: ಪಾಕಿಸ್ತಾನದಲ್ಲಿ ಭದ್ರತಾ ಆತಂಕ ಎಂದಿದ್ದ ಜಯ್ ಶಾಗೆ ಶಾಹೀದ್ ಅಫ್ರಿದಿ ತಿರುಗೇಟು
Sep 08, 2023 01:17 PM IST
ಜಯ್ ಶಾ ಮತ್ತು ಶಾಹೀದ್ ಅಫ್ರಿದಿ.
- Shahid Afridi-Jay Shah: ಪಾಕಿಸ್ತಾನದಲ್ಲಿ ಭದ್ರತೆಯ ಆತಂಕದ ಕಾರಣ, ನಾವು ಈ ನಿರ್ಧಾರಕ್ಕೆ ಬರಲಾಯಿತು. ಅಲ್ಲದೆ, ಪ್ರಸಾರಕರು ಸಹ ಹಿಂದೇಟು ಹಾಕಿದರು. ಆರ್ಥಿಕ ಪರಿಸ್ಥಿತಿಗೆ ಸಂಬಂಧಿಸಿದ ಕಳವಳಗಳಿಂದ ಉದ್ಭವಿಸಿದೆ ಎಂದು ಜಯ್ ಶಾ ಇತ್ತೀಚೆಗೆ ಹೇಳಿಕೆ ನೀಡಿದ್ದರು.
ಪಾಕಿಸ್ತಾನ ದೇಶದಲ್ಲಿ ಭದ್ರತಾ ಆತಂಕದಿಂದ ಈ ಬಾರಿಯ ಏಷ್ಯಾಕಪ್ ಟೂರ್ನಿಯನ್ನು (Asia Cup 2023) ಹೈಬ್ರಿಡ್ ಮಾದರಿಯಲ್ಲಿ ಆಯೋಜಿಸಲಾಗಿದೆ ಎಂದು ಬಿಸಿಸಿಐ ಕಾರ್ಯದರ್ಶಿ ಜಯ್ ಶಾ (Jay Shah) ನೀಡಿದ್ದ ಹೇಳಿಕೆಗೆ ಪಾಕ್ ಮಾಜಿ ನಾಯಕ ಶಾಹೀದ್ ಅಫ್ರಿದಿ (Shahid Afridi) ತಿರುಗೇಟು ನೀಡಿದ್ದಾರೆ. ಅಂಕಿ-ಅಂಶಗಳ ಸಮೇತ ಜಯ್ ಶಾಗೆ ತಿರುಗೇಟು ಕೊಟ್ಟಿದ್ದಾರೆ.
ಸದ್ಯ ಶ್ರೀಲಂಕಾದಲ್ಲಿ ವಿಪರೀತ ಮಳೆ ಸುರಿಯುತ್ತಿದೆ. ಹಾಗಾಗಿ ಏಷ್ಯಾಕಪ್ ಸೂಪರ್ 4 ಪಂದ್ಯಗಳು ರದ್ದಾಗುವ ಸಂಭವ ಹೆಚ್ಚಾಗಿದೆ ಎನ್ನಲಾಗಿದೆ. ಈಗಾಗಲೇ ಭಾರತ-ಪಾಕಿಸ್ತಾನ ನಡುವಿನ ಪ್ರಮುಖ ಪಂದ್ಯವು ರದ್ದಾಗಿದೆ. ಇದೀಗ ಮುಂದಿನ ಪಂದ್ಯವು ಮಳೆಗೆ ಆಹುತಿ ಆಗುವ ಲಕ್ಷಣಗಳೇ ಹೆಚ್ಚಿದ್ದು ಪಿಸಿಬಿ ಅಸಮಾಧಾನ ವ್ಯಕ್ತಪಡಿಸಿತ್ತು.
ಇದಕ್ಕೆಲ್ಲಾ ಜಯ್ ಶಾ ಕಾರಣ
ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ ಅಧ್ಯಕ್ಷ ಜಯ್ ಶಾ ತೆಗೆದುಕೊಂಡ ಕಠಿಣ ನಿರ್ಧಾರದಿಂದ ಪಾಕಿಸ್ತಾನ-ಶ್ರೀಲಂಕಾದಲ್ಲೂ ಏಷ್ಯಾಕಪ್ ಆಯೋಜಿಸಬೇಕಾಯಿತು. ಇದಕ್ಕೆಲ್ಲಾ ಕಾರಣ ಬಿಸಿಸಿಐ ಅಧ್ಯಕ್ಷರೂ ಆಗಿರುವ ಜಯ್ ಶಾ ಎಂದು ಪಾಕಿಸ್ತಾನ್ ಕ್ರಿಕೆಟ್ ಮಂಡಳಿ ಆರೋಪಿಸಿತ್ತು. ನಮಗೆ ನಷ್ಟವನ್ನೂ ಭರಿಸಬೇಕು ಎಂದು ತಿಳಿಸಿತ್ತು.
ಇದಕ್ಕೆ ಉತ್ತರಿಸಿದ್ದ ಜಯ್ ಶಾ, ಪಾಕಿಸ್ತಾನದಲ್ಲಿ ಭದ್ರತೆಯ ಆತಂಕದ ಕಾರಣ, ನಾವು ಈ ನಿರ್ಧಾರಕ್ಕೆ ಬರಲಾಯಿತು. ಅಲ್ಲದೆ, ಪ್ರಸಾರಕರು ಸಹ ಹಿಂದೇಟು ಹಾಕಿದರು. ಆರ್ಥಿಕ ಪರಿಸ್ಥಿತಿಗೆ ಸಂಬಂಧಿಸಿದ ಕಳವಳಗಳಿಂದ ಉದ್ಭವಿಸಿದೆ ಎಂದು ಜಯ್ ಶಾ ಇತ್ತೀಚೆಗೆ ಹೇಳಿಕೆ ನೀಡಿದ್ದರು. ಈಗ ಶಾಹೀದ್ ಅಫ್ರಿದಿ, ತಿರುಗೇಟು ನೀಡಿದ್ದಾರೆ.
ಪಾಕಿಸ್ತಾನದಲ್ಲಿ ಭದ್ರತಾ ಪರಿಸ್ಥಿತಿ ಕುರಿತು ಆತಂಕ ವ್ಯಕ್ತಪಡಿಸಿರುವ ಹೇಳಿಕೆಯನ್ನು ನಾನು ನೋಡಿದೆ. ಆದರೆ ಅವರಿಗೆ ಕೆಲವು ಅಂಶಗಳನ್ನು ನೆನಪಿಸಲು ಬಯಸುತ್ತೇನೆ ಎಂದಿರುವ ಅವರು, ಕಳೆದ 6 ವರ್ಷಗಳಲ್ಲಿ ಪಾಕಿಸ್ತಾನ ಯಾವೆಲ್ಲಾ ಸರಣಿಗಳನ್ನು ಆಯೋಜಿಸಿದ್ದೇವೆ. ಏನೆಲ್ಲಾ ಆಗಿದೆ ಎಂಬುದರ ಪಟ್ಟಿ ಇಲ್ಲಿದೆ ನೋಡಿ ಎಂದಿದ್ದಾರೆ.
- 2017ರಲ್ಲಿ ಐಸಿಸಿ ವಿಶ್ವ ಇಲೆವೆನ್ ಮತ್ತು ಶ್ರೀಲಂಕಾ ವಿರುದ್ಧದ ಸರಣಿ
- 2018ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ಸಿರೀಸ್
- 2019ರಲ್ಲಿ ವೆಸ್ಟ್ ಇಂಡೀಸ್ (ಮಹಿಳಾ ತಂಡ), ಬಾಂಗ್ಲಾದೇಶ (ಮಹಿಳಾ ತಂಡ) ಮತ್ತು ಶ್ರೀಲಂಕಾ ವಿರುದ್ಧದ ಸರಣಿ.
- 2020ರಲ್ಲಿ ಬಾಂಗ್ಲಾದೇಶ, ಪಾಕಿಸ್ತಾನ ಸೂಪರ್ ಲೀಗ್, ಎಂಸಿಸಿ ಮತ್ತು ಜಿಂಬಾಬ್ವೆ ಎದುರು ಸರಣಿ.
- 2021ರಲ್ಲಿ ವೆಸ್ಟ್ ಇಂಡೀಸ್, ಸೌತ್ ಆಫ್ರಿಕಾ ಮತ್ತು ವೆಸ್ಟ್ ಇಂಡೀಸ್ ವಿರುದ್ಧದ ಸರಣಿಗಳು ಹಾಗೂ ಪಾಕಿಸ್ತಾನ್ ಸೂಪರ್ ಲೀಗ್.
- 2022ರಲ್ಲಿ ಆಸ್ಟ್ರೇಲಿಯಾ, ಪಾಕಿಸ್ತಾನ, ವೆಸ್ಟ್ ಇಂಡೀಸ್, ಬಾಂಗ್ಲಾದೇಶ ಅಂಡರ್-19, ಐರ್ಲೆಂಡ್ (ಮಹಿಳಾ ತಂಡ) ಮತ್ತು ಇಂಗ್ಲೆಂಡ್ (2 ಬಾರಿ) ವಿರುದ್ಧ ಸಿರೀಸ್.
- 2023ರಲ್ಲಿ ನ್ಯೂಜಿಲೆಂಡ್ (2 ಬಾರಿ), ಪಿಎಸ್ಎಲ್, ವುಮೆನ್ಸ್ ಎಕ್ಸಿಬಿಷನ್ ಮ್ಯಾಚಸ್, ದಕ್ಷಿಣ ಆಫ್ರಿಕಾ ಮಹಿಳಾ ತಂಡದ ವಿರುದ್ಧದ ಸರಣಿ.
ಇದೀಗ ಏಷ್ಯಾಕಪ್ (ನೇಪಾಳ, ಶ್ರೀಲಂಕಾ, ಅಫ್ಘಾನಿಸ್ತಾನ ಮತ್ತು ಬಾಂಗ್ಲಾದೇಶ) ಆಯೋಜಿಸಿದ್ದೇವೆ. ಹಾಗಾಗಿ ಯಾವುದೇ ಸಂದೇಹ ಬೇಡ ಮಿಸ್ಟರ್ ಜಯ್ ಶಾ, 2025ರಲ್ಲಿ ನಡೆಯಲಿರುವ ಐಸಿಸಿ ಚಾಂಪಿಯನ್ಸ್ ಟ್ರೋಫಿಯನ್ನು ಆಯೋಜಿಸಲು ಪಾಕಿಸ್ತಾನ ಸಿದ್ಧವಾಗಿದೆ ಎಂದು ಎಕ್ಸ್ ಮೂಲಕ ಅಫ್ರಿದಿ ತಿರುಗೇಟು ನೀಡಿದ್ದಾರೆ.