Asian Games: ಬಲಿಷ್ಠ ದಕ್ಷಿಣ ಕೊರಿಯಾ ಮಣಿಸಿ ನಾಕೌಟ್ ಸುತ್ತು ಪ್ರವೇಶಿಸಿದ ಭಾರತ ವಾಲಿಬಾಲ್ ತಂಡ

ಚೀನಾದ ಹ್ಯಾಂಗ್‌ಝೌನಲ್ಲಿ (Hangzhou) ನಡೆಯುತ್ತಿರುವ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತ ಪುರುಷರ ವಾಲಿಬಾಲ್ ತಂಡವು (Indian men's volleyball) ಅದ್ಧೂರಿ ಗೆಲುವು ಸಾಧಿಸಿದೆ. ಬುಧವಾರ (ಸೆಪ್ಟೆಂಬರ್‌ 20) ನಡೆದ ಪಂದ್ಯದಲ್ಲಿ ಕಳೆದ ಆವೃತ್ತಿಯ ಬೆಳ್ಳಿ ಪದಕ ವಿಜೇತ ದಕ್ಷಿಣ ಕೊರಿಯಾವನ್ನು ಭಾರತ ರೋಚಕವಾಗಿ ಮಣಿಸಿದೆ. ಐದು ಸೆಟ್‌ಗಳ ರೋಚಕ ಹೋರಾಟದ ಬಳಿಕ ಗೆದ್ದ ಭಾರತವು, ಗುಂಪು ಹಂತದಲ್ಲಿ ಅಗ್ರಸ್ಥಾನ ಪಡೆಯುವುದರೊಂದಿಗೆ ನಾಕ್‌ಔಟ್ ಹಂತಕ್ಕೆ ಲಗ್ಗೆ ಹಾಕಿದೆ.

ಬರೋಬ್ಬರಿ ಎರಡು ಗಂಟೆ 38 ನಿಮಿಷಗಳ ಕಾಲ ನಡೆದ C ಗುಂಪಿನ ಅಂತಿಮ ಪಂದ್ಯದಲ್ಲಿ, ಭಾರತೀಯರು ರೋಚಕ ಫೈಪೋಟಿ ನೀಡಿದರು. ತನಗಿಂತ ಉನ್ನತ ಶ್ರೇಯಾಂಕದ ದಕ್ಷಿಣ ಕೊರಿಯಾವನ್ನು ಕೊನೆಗೂ 3-2 ಸೆಟ್‌ಗಳ ಅಂತರದಿಂದ ಮಣಿಸುವಲ್ಲಿ ಭಾರತೀಯರು ಯಶಸ್ವಿಯಾದರು. ರೋಚಕ ಹೋರಾಟದಲ್ಲಿ ಅಂತಿಮವಾಗಿ ಭಾರತ 25-27, 29-27, 25-22, 20-25, 17-15 ಅಂತರಗಳಿಂದ ಗೆಲುವು ಸಾಧಿಸಿತು.

ಮಂಗಳವಾರ ನಡೆದ ಪಂದ್ಯದಲ್ಲಿ ಕಾಂಬೋಡಿಯಾವನ್ನು 3-0 ಸೆಟ್‌ಗಳಿಂದ ಸೋಲಿಸಿದ್ದ ಭಾರತ, ಇದೀಗ ಐದು ಅಂಕ ಕಲೆಹಾಕಿ ಗುಂಪಿನಲ್ಲಿ ಅಗ್ರಸ್ಥಾನಕ್ಕೇರಿದೆ. ಅಮಿತ್ ಗುಲಿಯಾ ಮತ್ತು ಅಶ್ವಲ್ ರೈ ಭಾರತದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ತಂಡವು ಹಲವಾರು ನಿರ್ಣಾಯಕ ಅಂಕಗಳನ್ನು ಗಳಿಸಲು ಸಹಾಯ ಮಾಡಿದರು.

ಮುಂದಿನ ಸುತ್ತಿನಲ್ಲಿ ಭಾರತವು ಚೈನೀಸ್ ತೈಪೆ ಅಥವಾ ಮಂಗೋಲಿಯಾ ತಂಡದ ವಿರುದ್ಧ ಆಡಲಿದೆ.

ಭಾರತದ ಪುರುಷರ ವಾಲಿಬಾಲ್‌ ತಂಡವು ಇದುವರೆಗೆ ಒಟ್ಟು ಮೂರು ವಾಲಿಬಾಲ್ ಪದಕಗಳನ್ನು ಗೆದ್ದಿದೆ. 1962ರಲ್ಲಿ ರನ್ನರ್ ಅಪ್ ಆಗಿರುವ ಭಾರತ, ತನ್ನ‌ ಅತ್ಯುತ್ತಮ ಪ್ರದರ್ಶನ ನೀಡಿತ್ತು. ಅದರ ಹೊರತಾಗಿ 1958 ಮತ್ತು 1986ರಲ್ಲಿ ಕಂಚಿನ ಪದಕಗಳನ್ನು ಗೆದ್ದಿತ್ತು. ಭಾರತವು ಕೊನೆಯ ಪದಕವನ್ನು ಗೆದ್ದು 37 ವರ್ಷಗಳಾಗಿವೆ.

ಕಾಂಬೋಡಿಯಾ ಮಣಿಸಿದ ಭಾರತ ವಾಲಿಬಾಲ್ ತಂಡ; ಏಷ್ಯನ್‌ ಗೇಮ್ಸ್‌ನಲ್ಲಿ ಶುಭಾರಂಭ

ಏಷ್ಯನ್ ಗೇಮ್ಸ್‌ನ ಪುರುಷರ ವಾಲಿಬಾಲ್ ಸ್ಪರ್ಧೆಯ ಮೊದಲ ಪಂದ್ಯದಲ್ಲಿ ಭಾರತ ತಂಡವು 3-0 ಗೋಲುಗಳಿಂದ ಕಾಂಬೋಡಿಯಾವನ್ನು ಮಣಿಸಿತ್ತು. ಚೀನಾದ ಹ್ಯಾಂಗ್‌ಝೌನಲ್ಲಿ ಮಂಗಳವಾರ ನಡೆದ ಪೂಲ್ ಸಿ ಪಂದ್ಯದಲ್ಲಿ ಭಾರತವು 25-14, 25-13, 25-19 ಅಂಕಗಳೊಂದಿಗೆ ತನಗಿಂತ ಕೆಳ ಶ್ರೇಯಾಂಕದ ಕಾಂಬೋಡಿಯಾವನ್ನು ಸೋಲಿಸಿತು.

ಹ್ಯಾಂಗ್‌ಝೌ ಕ್ರೀಡಾಕೂಟದಲ್ಲಿ ಪುರುಷರ ವಾಲಿಬಾಲ್‌ ವಿಭಾಗದಲ್ಲಿ ಒಟ್ಟು 19 ತಂಡಗಳು ಭಾಗವಹಿಸುತ್ತಿವೆ. ಜಪಾನ್, ಚೀನಾ ಮತ್ತು ದಕ್ಷಿಣ ಕೊರಿಯಾ ತಂಡಗಳನ್ನು ಬಲಿಷ್ಠ ತಂಡಗಳೆಂದು ಪರಿಗಣಿಸಲಾಗಿದೆ. ಏಷ್ಯನ್ ಗೇಮ್ಸ್‌ನಲ್ಲಿ ಪುರುಷರ ವಾಲಿಬಾಲ್‌ನಲ್ಲಿ ಜಪಾನ್ 16 ಚಿನ್ನದೊಂದಿಗೆ 27 ಬಾರಿ ಪೋಡಿಯಂ ಫಿನಿಶ್‌ ಮಾಡಿದೆ. ಆತಿಥೇಯ ಚೀನಾ 11 ಚಿನ್ನದೊಂದಿಗೆ ಎರಡನೇ ಮತ್ತು ಕೊರಿಯಾ ಐದು ಚಿನ್ನದ ಪದಕಗಳೊಂದಿಗೆ ಮೂರನೇ ಸ್ಥಾನದಲ್ಲಿದೆ.