ಟಿ20 ಕ್ರಿಕೆಟ್​ ಇತಿಹಾಸದಲ್ಲಿ ವಿಶ್ವದಾಖಲೆಯ ರನ್ ಚೇಸ್; ಕೆಕೆಆರ್​ ವಿರುದ್ಧ 262 ರನ್ ಗುರಿ ಬೆನ್ನಟ್ಟಿ ಗೆದ್ದ ಪಂಜಾಬ್ ಕಿಂಗ್ಸ್

ಹೈಸ್ಕೋರಿಂಗ್ ಗೇಮ್​ನಲ್ಲಿ ಪಂಜಾಬ್ ಕಿಂಗ್ಸ್​ ತಂಡ ವಿಶ್ವದಾಖಲೆಯ ಜಯ ದಾಖಲಿಸಿದೆ. ಜಾನಿ ಬೈರ್​ಸ್ಟೋ ಮತ್ತು ಶಶಾಂಕ್ ಸಿಂಗ್ ಕ್ರೂರ ಬ್ಯಾಟಿಂಗ್ ನಡೆಸಿ ಕೋಲ್ಕತ್ತಾ ನೈಟ್​ ರೈಡರ್ಸ್ ವಿರುದ್ಧ 8 ವಿಕೆಟ್​​ಗಳ ಗೆಲುವಿನ ಕೇಕೆ ಹಾಕಿದ್ದು, 262 ರನ್​ಗಳ ಬೃಹತ್ ಮೊತ್ತವನ್ನು ಬೆನ್ನಟ್ಟಲು ಇನ್ನೂ 8 ಎಸೆತಗಳನ್ನು ಬಾಕಿ ಉಳಿಸಿದ್ದಾರೆ. ಇದು ಟಿ20 ಕ್ರಿಕೆಟ್​ ಇತಿಹಾಸದಲ್ಲಿ ದಾಖಲೆಯ ರನ್ ಚೇಸ್​ ಆಗಿದೆ. ಮೈದಾನದ ಅಷ್ಟ ದಿಕ್ಕುಗಳಿಗೂ ಚೆಂಡಿನ ದರ್ಶನ ಮಾಡಿದ ಉಭಯ ತಂಡಗಳು, ನೆರೆದಿದ್ದ ಫ್ಯಾನ್ಸ್​​ ಭರಪೂರ ಮನರಂಜನೆ ನೀಡಿದ್ದಾರೆ.

ಕೋಲ್ಕತ್ತಾದ ಈಡನ್ ಗಾರ್ಡನ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್​ಗಿಳಿದ ಕೆಕೆಆರ್​, ಮತ್ತೊಂದು ಬೃಹತ್ ಮೊತ್ತ ಪೇರಿಸಿತು. ಸುನಿಲ್ ನರೇನ್ (71) ಮತ್ತು ಫಿಲ್ ಸಾಲ್ಟ್ (75) ಅವರ ಬಿರುಸಿನ ಅರ್ಧಶತಕಗಳ ಸಹಾಯದಿಂದ ಕೋಲ್ಕತ್ತಾ, 20 ಓವರ್​​​ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 261 ರನ್ ಬಾರಿಸಿತು. ಈ ಗುರಿ ಬೆನ್ನಟ್ಟಿದ ಪಂಜಾಬ್ ಇನ್ನೂ 8 ಎಸೆತಗಳನ್ನು ಉಳಿಸಿ ರೋಚಕ ಗೆಲುವು ಸಾಧಿಸಿತು. ಜಾನಿ ಬೈರ್​ಸ್ಟೋ (108*), ಶಶಾಂಕ್ ಸಿಂಗ್ (68*) ಬಿರುಸಿನ ಆಟಕ್ಕೆ ಕೆಕೆಆರ್​ ಬೌಲರ್​ಗಳು ಚೆಲ್ಲಾಪಿಲ್ಲಿಯಾದರು.

ಟಿ20 ಕ್ರಿಕೆಟ್​ ಇತಿಹಾಸದಲ್ಲಿ ವಿಶ್ವದಾಖಲೆಯ ರನ್ ಚೇಸ್

ಟಿ20 ಕ್ರಿಕೆಟ್ ಇತಿಹಾಸದಲ್ಲಿ ಪಂಜಾಬ್ ಕಿಂಗ್ಸ್ ಹೊಸ ಇತಿಹಾಸ ನಿರ್ಮಿಸಿದೆ. ಇದರೊಂದಿಗೆ ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ದಕ್ಷಿಣ ಆಫ್ರಿಕಾ ನಿರ್ಮಿಸಿದ್ದ ದಾಖಲೆಯನ್ನು ಪುಡಿಗಟ್ಟಿದೆ. 2023ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ದಕ್ಷಿಣ ಆಫ್ರಿಕಾ 259 ರನ್​ಗಳ ಚೇಸ್ ಮಾಡಿತ್ತು. ಇದೀಗ 262 ರನ್​ಗಳ ಗುರಿ ಬೆನ್ನಟ್ಟಿ ಹೊಸ ಚರಿತ್ರೆ ಸೃಷ್ಟಿಸಿದೆ. ಐಪಿಎಲ್​ನಲ್ಲಿ ಆರ್​ಸಿಬಿ ದಾಖಲೆಯನ್ನು ಸರಿಗಟ್ಟಿದೆ. ಚೇಸಿಂಗ್​ನಲ್ಲಿ ಅತ್ಯಧಿಕ ಮೊತ್ತ ಕಲೆ ಹಾಕಿದ ಎರಡನೇ ತಂಡ ಎನಿಸಿದೆ. ಆರ್​ಸಿಬಿ ಚೇಸಿಂಗ್​ನಲ್ಲಿ 262 ರನ್ ಪೇರಿಸಿದೆ.

ಇದನ್ನೂ ಓದಿ: ಟಿ20 ವಿಶ್ವಕಪ್​ನಲ್ಲಿ ನಾಯಕನಾಗಲು ರೋಹಿತ್​ ಶರ್ಮಾ ಯೋಗ್ಯರಲ್ಲ; ಈತನಿಗೆ ಅವಕಾಶ ಕೊಡಿ ಎಂದ ಕೆಕೆಆರ್​ ಮಾಜಿ ಡೈರೆಕ್ಟರ್

ಜಾನಿ ಬೈರ್​ಸ್ಟೋ, ಶಶಾಂಕ್ ಸಿಂಗ್, ಪ್ರಭು ಬೆಂಕಿ ಆಟ

ಬೃಹತ್ ಮೊತ್ತ ಬೆನ್ನಟ್ಟಲು ಕ್ರೀಸ್​ಗೆ ಬಂದ ಪಂಜಾಬ್ ಸಹ ಭರ್ಜರಿ ಆರಂಭ ಪಡೆಯಿತು. ಪ್ರಭುಸಿಮ್ರಾನ್ ಸಿಂಗ್ ಮತ್ತು ಜಾನಿ ಬೈರ್​​ಸ್ಟೋ ಮೊದಲ ವಿಕೆಟ್​ಗೆ 6 ಓವರ್​​ಗಳಲ್ಲಿ 93 ರನ್ ಕಲೆ ಹಾಕಿದರು. ಬೌಲರ್​ಗಳ ಮೇಲೆ ಸವಾರಿ ಮಾಡಿದ ಪ್ರಭು, 20 ಎಸೆತಗಳಲ್ಲಿ 5 ಸಿಕ್ಸರ್​, 4 ಸಿಕ್ಸರ್​ ಸಹಿತ 54 ರನ್ ಸಿಡಿಸಿದರು. ಆದರೆ ಅನಗತ್ಯ ರನ್ ಕದಿಯಲು ಯತ್ನಿಸಿ ರನೌಟಾದರು. ಬಳಿಕ ರಿಲೀ ರೋಸೋ 28 ರನ್ ಗಳಿಸಿ ಔಟಾದರು.

ಆದರೆ, ಜಾನಿಯೊಂದಿಗೆ 85 ರನ್​ಗಳ ಪಾಲುದಾರಿಕೆ ನೀಡಿ ಗಮನ ಸೆಳೆದರು. ಬೈರ್​ಸ್ಟೋ ಮಧ್ಯಮ ಓವರ್​​ಗಳಲ್ಲೂ ರನ್ ಕೊರತೆ ಕಾಡದಂತೆ ನೋಡಿಕೊಂಡರು. ಅಲ್ಲದೆ, ಪಂದ್ಯವನ್ನು ಸೇಫ್ ಜೋನ್​ಗೆ ತಂದು ನಿಲ್ಲಿಸಿದರು. ರೋಸೋ ಔಟಾದಾಗ ಪಂಜಾಬ್ ಗೆಲುವಿಗೆ ಇನ್ನೂ 84 ರನ್​ಗಳ ಅಗತ್ಯ ಇತ್ತು. ಆದರೆ ಕಣಕ್ಕಿಳಿದ ಇನ್​ಫಾರ್ಮ್​ ಬ್ಯಾಟರ್ ಶಶಾಂಕ್ ಸಿಂಗ್​, ಅಕ್ಷರಶಃ ಬೌಲರ್​ಗಳ ಮೇಲೆ ದಂಡಯಾತ್ರೆ ನಡೆಸಿದರು. ಇದರ ಜಾನಿ ಐಪಿಎಲ್​ನಲ್ಲಿ 2ನೇ ಶತಕ ಪೂರೈಸಿದರು.

ಸುನಿಲ್ ನರೇನ್ ಓವರ್​​ನಲ್ಲಿ ಸಿಂಗಲ್ಸ್ ಆಡಿದ ಈ ಜೋಡಿ, ಉಳಿದ ಬೌಲರ್​ಗಳಿಗೆ ಸರಿಯಾಗಿ ದಂಡಿಸಿದರು. ಕೇವಲ 28 ಎಸೆತಗಳಲ್ಲಿ 8 ಭರ್ಜರಿ ಸಿಕ್ಸರ್, 2 ಬೌಂಡರಿ ಸಹಿತ ಅಜೇಯ 68 ರನ್ ಚಚ್ಚಿ ವಿಶ್ವದಾಖಲೆಯ ರನ್ ಚೇಸ್​ನಲ್ಲಿ ಪ್ರಮುಖ ಪಾತ್ರವಹಿಸಿದರು. ಮತ್ತೊಂದೆಡೆ ಜಾನಿ 48 ಎಸೆತಗಳಲ್ಲಿ 9 ಸಿಕ್ಸರ್, 8 ಬೌಂಡರಿ ಅಜೇಯ 108 ರನ್ ಗಳಿಸಿದರು. 18.4 ಓವರ್​​ಗಳಲ್ಲೇ 262 ರನ್​ಗಳ ಮುಟ್ಟಿದರು. ಒಟ್ಟಾರೆ ಪಂದ್ಯದಲ್ಲಿ 42 ಸಿಕ್ಸರ್​ಗಳು ದಾಖಲಾಗಿವೆ. ಸುನಿಲ್ ನರೇನ್ 4 ಓವರ್​ಗಳಲ್ಲಿ 24 ರನ್, 1 ವಿಕೆಟ್ ಪಡೆದರೆ, ಉಳಿದ ಬೌಲರ್​ಗಳ 14.4 ಓವರ್​​ಗಳಲ್ಲಿ 236 ರನ್​ ಹರಿದು ಬಂದಿದೆ.

ಇದನ್ನೂ ಓದಿ: ಟಿ20 ವಿಶ್ವಕಪ್​ಗೆ ನೆಚ್ಚಿನ 15 ಸದಸ್ಯರ ಭಾರತ ತಂಡ ಕಟ್ಟಿದ ಸಂಜಯ್ ಮಾಂಜ್ರೇಕರ್; ವಿರಾಟ್ ಕೊಹ್ಲಿ, ಹಾರ್ದಿಕ್ ಪಾಂಡ್ಯ ಔಟ್

ಕೆಕೆಆರ್​ ಮತ್ತೊಂದು ಬೃಹತ್ ಮೊತ್ತ

ಮೊದಲು ಬ್ಯಾಟಿಂಗ್ ನಡೆಸಿದ ಕೆಕೆಆರ್​ಗೆ ಸುನಿಲ್ ನರೇನ್ ಮತ್ತು ಫಿಲ್ ಸಾಲ್ಟ್ ಬಿರುಸಿನ ಆರಂಭ ಒದಗಿಸಿದರು. ಪಂಜಾಬ್ ಬೌಲರ್​ಗಳ ಬೆವರಿಳಿಸಿದ ಈ ಆರಂಭಿಕ ಜೋಡಿ ಮೊದಲ ವಿಕೆಟ್​ಗೆ 10.2 ಓವರ್​​ಗಳಲ್ಲಿ 138 ರನ್​​ಗಳ ಸ್ಫೋಟಕ ಜೊತೆಯಾಟವಾಡಿತು. ನರೇನ್ 32 ಎಸೆತಗಳಲ್ಲಿ 9 ಬೌಂಡರಿ, 4 ಸಿಕ್ಸರ್ ಸಹಿತ 71 ರನ್ ಬಾರಿಸಿದರು. ಸಾಲ್ಟ್ 37 ಎಸೆತಗಳಲ್ಲಿ 6 ಬೌಂಡರಿ, 6 ಸಿಕ್ಸರ್​ ಸಹಿತ 75 ರನ್ ಚಚ್ಚಿದರು. ಈ ಇಬ್ಬರ 3 ಕ್ಯಾಚ್​​ಗಳನ್ನು ಆರಂಭದಲ್ಲೇ ಕಿಂಗ್ಸ್ ಫೀಲ್ಡರ್ಸ್ ಕೈಚೆಲ್ಲಿದರು.

ಇವರಿಬ್ಬರ ಆಕ್ರಮಣಕಾರಿ ಆಟದ ನೆರವಿನಿಂದ ಬೃಹತ್ ಮೊತ್ತ ಕಲೆ ಹಾಕಲು ಸಾಧ್ಯವಾಯಿತು. ಇವರಿಗೆ ವೆಂಕಟೇಶ್ ಅಯ್ಯರ್ ಅಜೇಯ 39 ರನ್, ಆಂಡ್ರೆ ರಸೆಲ್ 24, ಶ್ರೇಯಸ್ ಅಯ್ಯರ್ 28 ರನ್​ಗಳ ಕೊಡುಗೆ ನೀಡಿದರು. ಪರಿಣಾಮ ಕೆಕೆಆರ್​ ಎರಡನೇ ಬಾರಿಗೆ 250ರ ಗಡಿ ದಾಟಲು ನೆರವಾಯಿತು. ಪಂಜಾಬ್ ಬೌಲರ್ಸ್ ಸಹ ತುಂಬಾ ದುಬಾರಿಯಾದರು. ವಿಕೆಟ್ ಪಡೆಯಲು ಪರದಾಡಿದರು. ಅರ್ಷದೀಪ್ ಸಿಂಗ್ 2, ಸ್ಯಾಮ್ ಕರನ್, ಹರ್ಷಲ್ ಪಟೇಲ್, ರಾಹುಲ್ ಚಹರ್ 1 ವಿಕೆಟ್ ಪಡೆದರು.

ಮತ್ತಷ್ಟು ಕ್ರಿಕೆಟ್ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ