Yashasvi Jaiswal: ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ನಿಂದ ಋತುರಾಜ್ ಗಾಯಕ್ವಾಡ್ ಔಟ್; ಯಶಸ್ವಿ ಜೈಸ್ವಾಲ್ಗೆ ಲಕ್ಕಿ ಚಾನ್ಸ್
ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ (WTC final 2023) ಪಂದ್ಯದಿಂದ ಋತುರಾಜ್ ಗಾಯಕ್ವಾಡ್ (Ruturaj Gaikwad) ಹಿಂದೆ ಸರಿದ ಕಾರಣ ರಾಜಸ್ಥಾನ್ ರಾಯಲ್ಸ್ ತಂಡದ ಆರಂಭಿಕ ಆಟಗಾರ ಯಶಸ್ವಿ ಜೈಸ್ವಾಲ್ (Yashasvi Jaiswal) ಅವರನ್ನು ಬದಲಿಯಾಗಿ ತಂಡಕ್ಕೆ ಆಯ್ಕೆ ಮಾಡಲಾಗಿದೆ.
ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ (WTC Final 2023) ಪಂದ್ಯಕ್ಕೆ ಕೆಲವೇ ದಿನಗಳಿರುವಾಗ, ಭಾರತ ತಂಡದಲ್ಲಿ (Team India) ಮಹತ್ವದ ಬದಲಾವಣೆಯಾಗಿದೆ. ಟೀಮ್ ಇಂಡಿಯಾ ನಾಯಕ ರೋಹಿತ್ ಶರ್ಮಾ (Rohit Sharma) ಮತ್ತು ಶುಭ್ಮನ್ ಗಿಲ್ (Shubman Gill) ಅವರಿಗೆ ಮೀಸಲು ಆಟಗಾರನಾಗಿ ತಂಡದಲ್ಲಿ ಸ್ಥಾನ ಪಡೆದಿದ್ದ ಚೆನ್ನೈ ಸೂಪರ್ ಕಿಂಗ್ಸ್ ಆರಂಭಿಕ ಆಟಗಾರ ಋತುರಾಜ್ ಗಾಯಕ್ವಾಡ್ (Ruturaj Gaikwad), ಈಗ ವೈಯಕ್ತಿಕ ಕಾರಣಗಳಿಂದ ಹಿಂದೆ ಸರಿದಿದ್ದಾರೆ.
ಹಾಗಾಗಿ ಐಪಿಎಲ್ನಲ್ಲಿ ಅಬ್ಬರಿಸಿದ ರಾಜಸ್ಥಾನ್ ರಾಯಲ್ಸ್ ತಂಡದ ಆರಂಭಿಕ ಆಟಗಾರ ಯಶಸ್ವಿ ಜೈಸ್ವಾಲ್ (Yashasvi Jaiswal) ಅವರನ್ನು ಬದಲಿಯಾಗಿ ತಂಡಕ್ಕೆ ಆಯ್ಕೆ ಮಾಡಲಾಗಿದೆ. ಡಬ್ಲ್ಯುಟಿಸಿ ಫೈನಲ್ ಪಂದ್ಯಕ್ಕೆ ಸ್ಟ್ಯಾಂಡ್ ಬೈ ಆಟಗಾರರಾಗಿ ಋತುರಾಜ್ ಗಾಯಕ್ವಾಡ್ ಜೊತೆಗೆ ಸೂರ್ಯಕುಮಾರ್ (Suryakumar Yadav), ಮುಖೇಶ್ ಕುಮಾರ್ (Mukesh Kumar) ಅವರು ಪ್ರಮುಖ ತಂಡದೊಂದಿಗೆ ಆಯ್ಕೆಯಾಗಿದ್ದರು. ಆದರೆ ಗಾಯಕ್ವಾಡ್, ತನ್ನ ಮದುವೆ ಕಾರಣದಿಂದ ಪ್ರಮುಖ ಪಂದ್ಯದಿಂದ ಹಿಂದೆ ಸರಿದಿದ್ದಾರೆ.
ಜೂನ್ 2ರಂದು ಮದುವೆ
26 ವರ್ಷದ ಋತುರಾಜ್ ಗಾಯಕ್ವಾಡ್ ವೈವಾಹಿಕ ಜೀವನಕ್ಕೆ (Ruturaj Gaikwad MarriageWorld Test Championship (WTC) fina) ಕಾಲಿಡಲು ಸಜ್ಜಾಗಿದ್ದಾರೆ. ಜೂನ್ 2 ಮತ್ತು 3ರಂದು ಮದುವೆ ಸಮಾರಂಭ ನಡೆಯಲಿರುವ ಕಾರಣದಿಂದ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ ಪಂದ್ಯಕ್ಕೆ ಅಲಭ್ಯರಾಗಿದ್ದಾರೆ. ಜೂನ್ 7ರಂದು ಇಂಗ್ಲೆಂಡ್ನ ಲಂಡನ್ನ ದಿ ಓವಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಈ ಮಹತ್ವದ ಪಂದ್ಯ ನಡೆಯಲಿದೆ. ಈ ಪಂದ್ಯದಲ್ಲಿ ಚಾಂಪಿಯನ್ ಪಟ್ಟಕ್ಕಾಗಿ ಭಾರತ - ಆಸ್ಟ್ರೇಲಿಯಾ ಸೆಣಸಾಟ ನಡೆಸಲಿವೆ.
ಋತುರಾಜ್ ಪ್ರಮುಖ ಪಂದ್ಯದಲ್ಲಿ ಹಿಂದಡಿ ಹಾಕಿದ ಕಾರಣ ಬದಲಿ ಆಟಗಾರನಾಗಿ ಮುಂಬೈ ರಣಜಿ ತಂಡದ ಯಂಗ್ ಸೆನ್ಸೇಷನ್ ಯಶಸ್ವಿ ಜೈಸ್ವಾಲ್ಗೆ ಮಣೆ ಹಾಕಲಾಗಿದೆ ಎಂದು ಬಿಸಿಸಿಐ ತಿಳಿಸಿದೆ. 16ನೇ ಆವೃತ್ತಿಯ ಐಪಿಎಲ್ನಲ್ಲೂ ಜೈಸ್ವಾಲ್, ಅದ್ಭುತ ಪ್ರದರ್ಶನ ನೀಡಿದರು. ರಾಜಸ್ಥಾನ್ ರಾಯಲ್ಸ್ ಪರ ಶತಕವನ್ನೂ ಸಿಡಿಸಿ ಗಮನ ಸೆಳೆದಿದ್ದರು. 14 ಪಂದ್ಯಗಳಲ್ಲಿ48.08ರ ಸರಾಸರಿ, 163.61ರ ಸ್ಟ್ರೈಕ್ರೇಟ್ನಲ್ಲಿ 625 ರನ್ ಗಳಿಸಿದ್ದಾರೆ.
ರಣಜಿಯಲ್ಲಿ ಅದ್ಭುತ ಆಟ
ರಣಜಿ ಕ್ರಿಕೆಟ್ನಲ್ಲೂಲ್ಲೂ ಅಮೋಘ ಬ್ಯಾಟಿಂಗ್ ನಡೆಸಿದ್ದಾರೆ. ಮಾಜಿ - ಹಾಲಿ ಕ್ರಿಕೆಟರ್ಗಳೇ ಈತನ ಆಟಕ್ಕೆ ಸಲಾಂ ಎಂದಿದ್ದಾರೆ. ಹಲವು ಶತಕ ಮತ್ತು ದ್ವಿಶತಕ ಬಾರಿಸಿ ಅಬ್ಬರಿಸಿದ ಜೈಸ್ವಾಲ್ಗೆ ರಾಷ್ಟ್ರೀಯ ತಂಡದಿಂದ ಮೊದಲ ಬಾರಿಗೆ ಕರೆ ಬಂದಿದೆ. ಈವರೆಗೂ 15 ಪ್ರಥಮ ದರ್ಜೆ ಪಂದ್ಯಗಳನ್ನಾಡಿದ್ದು, 9 ಶತಕ, 2 ಅರ್ಧಶತಕಗಳ ನೆರವಿನಿಂದ ಬರೋಬ್ಬರಿ 1845 ರನ್ ಗಳಿಸಿದ್ದಾರೆ. ಅದು ಕೂಡ 80.21ರ ಸರಾಸರಿಯಲ್ಲಿ. 265 ರನ್ ಅವರ ಬೆಸ್ಟ್ ಸ್ಕೋರ್.
ಲಂಡನ್ನಲ್ಲಿ ಮೊದಲ ಬ್ಯಾಚ್ ಅಭ್ಯಾಸ
ಈಗಾಗಲೇ ಟೀಮ್ ಇಂಡಿಯಾದ ಮೊದಲ ಬ್ಯಾಚ್ ಲಂಡನ್ನಲ್ಲಿದೆ. ವಿರಾಟ್ ಕೊಹ್ಲಿ, ಮೊಹಮ್ಮದ್ ಸಿರಾಜ್, ಆರ್. ಅಶ್ವಿನ್, ಅಕ್ಷರ್ ಪಟೇಲ್, ಶಾರ್ದೂಲ್ ಠಾಕೂರ್, ಉಮೇಶ್ ಯಾದವ್, ಜಯದೇವ್ ಉನಾದ್ಕತ್ ಮತ್ತು ಚೇತೇಶ್ವರ್ ಪೂಜಾರ ಸದ್ಯ ತಂಡವನ್ನು ಕೂಡಿಕೊಂಡಿದ್ದಾರೆ. ಟೀಮ್ ಇಂಡಿಯಾ ರೋಹಿತ್ ಶರ್ಮಾ, ಇಶಾನ್ ಕಿಶನ್, ಸೂರ್ಯಕುಮಾರ್ ಯಾದವ್ ಅವರು ಇಂದು ತೆರಳಿದ್ದಾರೆ. ಐಪಿಎಲ್ ಫೈನಲ್ ಬಳಿಕ ಶುಭ್ಮನ್ ಗಿಲ್, ರವೀಂದ್ರ ಜಡೇಜಾ, ಕೆಎಸ್ ಭರತ್, ಅಜಿಂಕ್ಯ ರಹಾನೆ ಮತ್ತು ಮೊಹಮ್ಮದ್ ಶಮಿ ಇಂಗ್ಲೆಂಡ್ಗೆ ಪ್ರಯಾಣ ಬೆಳೆಸಲಿದ್ದಾರೆ. ಇವರೊಂದಿಗೆ ಯಶಸ್ವಿ ಜೈಸ್ವಾಲ್ ಕೂಡ ಇರಲಿದ್ದಾರೆ.
ಡಬ್ಲ್ಯಟಿಸಿ ಫೈನಲ್ ಪಂದ್ಯಕ್ಕೆ ಭಾರತ ತಂಡ
ರೋಹಿತ್ ಶರ್ಮಾ (ನಾಯಕ), ಶುಭ್ಮನ್ ಗಿಲ್, ಚೇತೇಶ್ವರ ಪೂಜಾರ, ವಿರಾಟ್ ಕೊಹ್ಲಿ, ಅಜಿಂಕ್ಯ ರಹಾನೆ, ಇಶಾನ್ ಕಿಶನ್ (ವಿಕೆಟ್ ಕೀಪರ್), ಕೆಎಸ್ ಭರತ್ (ವಿಕೆಟ್ ಕೀಪರ್), ರವಿಚಂದ್ರನ್ ಅಶ್ವಿನ್, ರವೀಂದ್ರ ಜಡೇಜಾ, ಅಕ್ಷರ್ ಪಟೇಲ್, ಶಾರ್ದೂಲ್ ಠಾಕೂರ್, ಮೊಹಮ್ಮದ್ ಶಮಿ, ಮೊಹಮ್ಮದ್ ಸಿರಾಜ್ , ಉಮೇಶ್ ಯಾದವ್, ಜಯದೇವ್ ಉನದ್ಕತ್.