SA vs WI: 2,625 ದಿನ, 7 ವರ್ಷಗಳ ಬಳಿಕ ಬವುಮಾ ಶತಕ.! ಮಗನಿಗೆ ಸೆಲ್ಯೂಟ್ ಹೊಡೆದ ತಂದೆ.!
Temba Bavuma: ಸೌತ್ ಆಫ್ರಿಕಾದ ನಾಯಕ ಟೆಂಬಾ ಬವುಮಾ ನಿನ್ನೆ ನೂರರ ಗಡಿ ದಾಟಿ ಬ್ಯಾಟ್ ಮೇಲೆತ್ತಿ ಸಂಭ್ರಮಿಸಿದ್ದು, ಬರೋಬ್ಬರಿ 7 ವರ್ಷ 2 ತಿಂಗಳ ನಂತರ ಎಂಬುದು ವಿಶೇಷ. 2016ರಲ್ಲಿ ಕೊನೆಯ ಬಾರಿಗೆ ಟೆಸ್ಟ್ ಶತಕ ಸಿಡಿಸಿದ್ದ ಕ್ಯಾಪ್ಟನ್, ಆ ಬಳಿಕ ಇದೇ ಮೊದಲ ಬಾರಿಗೆ ಸೆಂಚುರಿ ಸಿಡಿಸಿ ಸಂಭ್ರಮಿಸಿದ್ದಾರೆ.
32 ರನ್ಗಳಿಗೆ 3 ವಿಕೆಟ್.. ಇದು ವೆಸ್ಟ್ ಇಂಡೀಸ್ ವಿರುದ್ಧದ 2ನೇ ಟೆಸ್ಟ್ ಪಂದ್ಯದ ದ್ವಿತೀಯ ಇನ್ನಿಂಗ್ಸ್ನಲ್ಲಿ ಸೌತ್ ಆಫ್ರಿಕಾ ಸಂಕಷ್ಟದ ಪರಿಸ್ಥಿತಿ. ಹರಿಣಗಳ ಪಾಲಿಗೂ ಈ ಟೆಸ್ಟ್ ಸೋಲುತ್ತೇವೆ ಎಂಬ ಭೀತಿ ಅದಾಗಲೇ ಮೂಡಿತ್ತು. ಆದರೆ, ನಾಯಕ ಟೆಂಬಾ ಬವುಮಾ ಈ ಆತಂಕ ದೂರ ಮಾಡಿದರು. ಅಜೇಯ ಅಮೋಘ ಶತಕ ಸಿಡಿಸಿ, ಭರ್ಜರಿ ಮುನ್ನಡೆ ತಂದುಕೊಟ್ಟರು. ಅಷ್ಟೇ ಅಲ್ಲ, ಸೌತ್ ಆಫ್ರಿಕಾ ಪರ ಅಪರೂಪದ ದಾಖಲೆಯೊಂದನ್ನೂ ಬರೆದಿದ್ದಾರೆ.
ಟ್ರೆಂಡಿಂಗ್ ಸುದ್ದಿ
ಜೊಹಾನ್ಸ್ಬರ್ಗ್ನಲ್ಲಿ ವೆಸ್ಟ್ ಇಂಡೀಸ್ ಎದುರು ನಡೆಯುತ್ತಿರುವ 2ನೇ ಟೆಸ್ಟ್ ಪಂದ್ಯದಲ್ಲಿ ಸೌತ್ ಆಫ್ರಿಕಾ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿತು. ಮೊದಲ ಇನ್ನಿಂಗ್ಸ್ನಲ್ಲಿ ಏಡನ್ ಮಾರ್ಕರಮ್ (96) ಮತ್ತು ಟೋನಿ ಡಿ ಜೊರ್ಜಿ (85) ಅದ್ಭುತ ಅರ್ಧಶತಕಗಳ ನೆರವಿನಿಂದ 320 ರನ್ ಗಳಿಸಿ ಆಲೌಟ್ ಆಯಿತು. ಅಲ್ಜಾರಿ ಜೋಸೆಫ್, ಕೈಲ್ ಮೇಯರ್ಸ್ ಮತ್ತು ಗುಡಕೇಶ್ ಮೋಟಿ ತಲಾ 3 ವಿಕೆಟ್ ಪಡೆದು ಮಿಂಚಿದರು.
ಬಳಿಕ ಮೊದಲ ಇನ್ನಿಂಗ್ಸ್ ಆರಂಭಿಸಿದ ವೆಸ್ಟ್ ಇಂಡೀಸ್, ಜೇಸನ್ ಹೋಲ್ಡರ್ (81 *) ಅಬ್ಬರದ ನಡುವೆಯೂ 251 ಕ್ಕೆ ಕುಸಿತ ಕಂಡಿತು. 69 ರನ್ಗಳ ಮುನ್ನಡೆಯೊಂದಿಗೆ 2ನೇ ಇನ್ನಿಂಗ್ಸ್ ಆರಂಭಿಸಿದ ಸೌತ್ ಆಫ್ರಿಕಾ ಆರಂಭಿಕ ಸಂಕಷ್ಟಕ್ಕೆ ಸಿಲುಕಿತು. 32 ರನ್ಗಳಿಗೆ ಪ್ರಮುಖ 3 ವಿಕೆಟ್ಗಳು ಕಳೆದುಹೋದವು. ಆದರೆ ಆಗ ನಾಯಕ ಟೆಂಬಾ ಬವುಮಾ, ವಾರಿಯರ್ನಂತೆ ತಂಡದ ನೆರವಿಗೆ ನಿಂತರು. ಸತತ ವಿಕೆಟ್ಗಳ ನಡುವೆಯೂ ಏಕಾಂಕಿಯಾಗಿ ತಂಡವನ್ನು ಮುನ್ನಡೆಸಿದ ಬವುಮಾ, ಶತಕ ಸಿಡಿಸಿ ಮಿಂಚಿದರು.
7 ವರ್ಷಗಳ ನಂತರ ಶತಕ ಸಿಡಿಸಿದ ಬವುಮಾ.!
ಹೌದು.! ಸೌತ್ ಆಫ್ರಿಕಾದ ನಾಯಕ ಟೆಂಬಾ ಬವುಮಾ ನಿನ್ನೆ ನೂರರ ಗಡಿ ದಾಟಿ ಬ್ಯಾಟ್ ಮೇಲೆತ್ತಿ ಸಂಭ್ರಮಿಸಿದ್ದು, ಬರೋಬ್ಬರಿ 7 ವರ್ಷ 2 ತಿಂಗಳ ನಂತರ ಎಂಬುದು ವಿಶೇಷ. 2016ರಲ್ಲಿ ಕೊನೆಯ ಬಾರಿಗೆ ಟೆಸ್ಟ್ ಶತಕ ಸಿಡಿಸಿದ್ದ ಕ್ಯಾಪ್ಟನ್, ಆ ಬಳಿಕ ಇದೇ ಮೊದಲ ಬಾರಿಗೆ ಸೆಂಚುರಿ ಸಿಡಿಸಿ ಸಂಭ್ರಮಿಸಿದ್ದಾರೆ. ಅಲ್ಪಮೊತ್ತಕ್ಕೆ ಕುಸಿಯುವ ಭೀತಿಯಲ್ಲಿದ್ದ ತಂಡಕ್ಕೆ ಜೀವ ತುಂಬಿದ ಬವುಮಾ, 356 ರನ್ಗಳ ಮುನ್ನಡೆ ತಂದು ಕೊಟ್ಟಿದ್ದಾರೆ.
ಬವುಮಾ ಅಜೇಯ 171 ರನ್..!
ಬಾಹುಬಲಿಯಂತೆ ಏಕಾಂಗಿಯಾಗಿ ತಂಡಕ್ಕೆ ನೆರವಾದ ಬವುಮಾ, ತಂಡಕ್ಕೆ ಅದ್ಭುತ ಮುನ್ನಡೆ ತಂದುಕೊಟ್ಟಿದ್ದಲ್ಲದೆ, ತಾನು ಕೂಡ ಕ್ರೀಸ್ನಲ್ಲಿ ಉಳಿದುಕೊಂಡಿದ್ದಾರೆ. 275 ಎಸೆತಗಳನ್ನು ಎದುರಿಸಿರುವ ಬಲಗೈ ಆಟಗಾರ, 20 ಬೌಂಡರಿಗಳಿಂದ ಅಜೇಯ 171 ರನ್ ಸಿಡಿಸಿದ್ದಾರೆ. ಚೊಚ್ಚಲ ದ್ವಿಶತಕದ ಕನಸಿನಲ್ಲಿರುವ ಬವುಮಾ, ಇಂದು ಎಷ್ಟು ರನ್ ಕಲೆ ಹಾಕುತ್ತಾರೆ ಎಂಬುದು ಕುತೂಹಲ ಮೂಡಿಸಿದೆ.
2016ರಲ್ಲಿ ಇಂಗ್ಲೆಂಡ್ ವಿರುದ್ಧ ಶತಕ..!
7 ವರ್ಷ 2 ತಿಂಗಳ ಹಿಂದೆ ಅಂದರೆ, ಜನವರಿ 2, 2016ರಲ್ಲಿ ಟೆಂಬಾ ಬವುಮಾ ಟೆಸ್ಟ್ ಕ್ರಿಕೆಟ್ನಲ್ಲಿ ತಮ್ಮ ಕೊನೆಯ ಶತಕ ಸಿಡಿಸಿದ್ದರು. ಅದಾದ ಬಳಿಕ 50, 60, 70, 80, 90ರ ಗಡಿ ದಾಟಿದರೂ, 100 ಮುಟ್ಟಲು ಸಾಧ್ಯವಾಗುತ್ತಿರಲಿಲ್ಲ. ಅಂತೂ ಇಂತೂ 7 ವರ್ಷಗಳ ಶತಕದ ಬರ ನೀಗಿಸಿಕೊಂಡಿದ್ದಾರೆ. ಅಂದು ಇಂಗ್ಲೆಂಡ್ ವಿರುದ್ಧ ಅಜೇಯ 102 ರನ್ ಬಾರಿಸಿದ್ದರು. ಈ ಪಂದ್ಯ ಕೇಪ್ಟೌನ್ನಲ್ಲಿ ನಡೆದಿತ್ತು.
ನಾಯಕನಾಗಿ ಮೊದಲ ಶತಕ;
ಸೆಲ್ಯೂಟ್ ಮಾಡಿದ ತಂದೆ!
ಇದೇ ವರ್ಷ ಟೆಸ್ಟ್ ಕ್ಯಾಪ್ಟನ್ ಆಗಿ ನೇಮಕಗೊಂಡರು. ಡೀನ್ ಎಲ್ಗರ್ ಅವರಿಂದ ನಾಯಕತ್ವ ವಹಿಸಿಕೊಂಡ ಬವುಮಾ, ತನ್ನ ಮೊದಲ ಟೆಸ್ಟ್ ಸರಣಿಯ ಮೊದಲ ಟಾಸ್ಕ್ನಲ್ಲೇ ಗೆದ್ದ ಬವುಮಾ ತನ್ನ 2ನೇ ಪಂದ್ಯದಲ್ಲೇ ಶತಕ ಬಾರಿಸಿದ್ದಾರೆ. ನಾಯಕನಾಗಿ ಶತಕ ಸಿಡಿಸಿದ ನಂತರ ಸ್ಟೇಡಿಯಂಗೆ ಹಾಜರಾಗಿದ್ದ ಬವುಮಾರ ತಂದೆ ಎದ್ದು ನಿಂತು ಸೆಲ್ಯೂಟ್ ಮಾಡಿದರು. ಇದು ತುಂಬಾ ವಿಶೇಷವಾಗಿತ್ತು.