ಇವರಿಗೆ ಕ್ರಿಕೆಟ್ ಬಗ್ಗೆ ಏನ್ ಗೊತ್ತು ಅಂತ ಮ್ಯಾಚ್​ ನೋಡ್ತಾರೆ; ಅನುಷ್ಕಾ-ಅಥಿಯಾ ಬಗ್ಗೆ ಹರ್ಭಜನ್ ಸ್ತ್ರೀದ್ವೇಷದ ಟೀಕೆ

ಭಾರತದ ಸೂಪರ್ ಸ್ಟಾರ್ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಪತ್ನಿ ಅನುಷ್ಕಾ ಶರ್ಮಾ (Anushka Sharma) ಮತ್ತು ವಿಕೆಟ್ ಕೀಪರ್​ ಕೆಎಲ್ ರಾಹುಲ್ ಪತ್ನಿ ಅಥಿಯಾ ಶೆಟ್ಟಿ (Athiya Shetty) ಅವರ ಕುರಿತು ಭಾರತದ ಮಾಜಿ ಕ್ರಿಕೆಟಿಗ ಹರ್ಭಜನ್ ಸಿಂಗ್​ (Harbhajan Singh) ಸ್ತ್ರೀ ದ್ವೇಷದ ಟೀಕೆ ಮಾಡಿದ್ದು, ವಿವಾದಕ್ಕೆ ಗುರಿಯಾಗಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶ ಭುಗಿಲೆದ್ದಿದೆ.

ಇದನ್ನೂ ಓದಿ: ಭಾರತ ವಿಶ್ವಕಪ್​ ಸೋತರೂ ನಮ್ಮ ಹೆಮ್ಮೆ; ನಿಂದನೆ ಬೇಡ, ನೋವಿನಲ್ಲಿರುವ ಆಟಗಾರರ ಜೊತೆ ನಿಲ್ಲೋಣ

ಅಹಮದಾಬಾದ್​ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ ಕ್ರಿಕೆಟ್ ವಿಶ್ವಕಪ್ 2023ರ ಫೈನಲ್‌ನಲ್ಲಿ ಭಾರತದ ಮಾಜಿ ಕ್ರಿಕೆಟಿಗ ಹರ್ಭಜನ್ ಸಿಂಗ್ ಕಾಮೆಂಟೇಂಟರ್​​ ಆಗಿದ್ದರು. ಈ ವೇಳೆ ಇವರಿಗೆ ಕ್ರಿಕೆಟ್ ಬಗ್ಗೆ ಏನು ಅರ್ಥ ಆಗುತ್ತದೆ ಎಂದು ಪಂದ್ಯ ನೋಡುತ್ತಾರೆಂದು ಅನುಷ್ಕಾ ಮತ್ತು ಅಥಿಯಾ ಬಗ್ಗೆ ಹರ್ಭಜನ್ ವ್ಯಂಗ್ಯವಾಡಿದ್ದಾರೆ.

ಭಾರತದ ಇನ್ನಿಂಗ್ಸ್​​ನಲ್ಲಿ ವಿರಾಟ್ ಮತ್ತು ರಾಹುಲ್ ಅದ್ಭುತ ಜೊತೆಯಾಟ ಕಟ್ಟುತ್ತಿದ್ದ ವೇಳೆ ಸ್ಟ್ಯಾಂಡ್‌ನಲ್ಲಿ ಒಟ್ಟಿಗೆ ಕುಳಿತಿದ್ದ ಅನುಷ್ಕಾ-ಅಥಿಯಾ ಜೋಡಿಯತ್ತ ಕ್ಯಾಮೆರಾಗಳು ತೋರಿಸುತ್ತಿದ್ದವು. ಈ ವೇಳೆ​ ಇಬ್ಬರ ಕ್ರಿಕೆಟ್ ಜ್ಞಾನವನ್ನು ಪ್ರಶ್ನಿಸಿದ ಹರ್ಭಜನ್, ಅನಗತ್ಯ ಹೇಳಿಕೆ ನೀಡಿ ವಿವಾದಕ್ಕೆ ಗುರಿಯಾಗಿದ್ದಾರೆ.

ಇದನ್ನೂ ಓದಿ: ಭಾರತಕ್ಕೆ ಕೇವಲ 240 ರನ್‌, ವಿಶ್ವಕಪ್‌ ಫೈನಲ್‌ ಕ್ರಿಕೆಟ್‌ ಪಂದ್ಯದಲ್ಲಿ ರೋಹಿತ್‌ ಶರ್ಮಾ ಹೀಗೆ ಮಾಡಬಾರದಿತ್ತು ಅಂದ್ರು ಸುನಿಲ್ ಗವಾಸ್ಕರ್‌

ಭಾರತೀಯ ಬ್ಯಾಟಿಂಗ್‌ನ 18ನೇ ಓವರ್‌ನಲ್ಲಿ, ಹಿಂದಿ ವೀಕ್ಷಕ ವಿವರಣೆಗಾರ ಜತಿನ್ ಸಪ್ರು, ಅನುಷ್ಕಾ ಮತ್ತು ಅಥಿಯಾ ಅವರು ಕ್ರಿಕೆಟ್​ ಬಗ್ಗೆಯೇ ಯೋಚಿಸುತ್ತಿದ್ದಾರಾ? ಗಂಡಂದಿರು ಕ್ರೀಸ್‌ನಲ್ಲಿ ಉಳಿಯುವವರೆಗೂ ಒಟ್ಟಿಗೆ ಇರುತ್ತೇವೆ ಎಂದು ಯೋಚಿಸುತ್ತಿರಬಹುದಾ ಎಂದು ಜತಿನ್ ಸಪ್ರು, ಕ್ಯಾಮೆರಾ ಅವರತ್ತ ತೋರಿಸಿದಾಗ ಹರ್ಭಜನ್‌ಗೆ ಕೇಳಿದರು.

‘ಅವರಿಗೆ ಕ್ರಿಕೆಟ್​ ಬಗ್ಗೆ ಗೊತ್ತಿಲ್ಲ’

ಇದಕ್ಕೆ ಉತ್ತರಿಸಿದ ಹರ್ಭಜನ್, ಅನುಷ್ಕಾ-ಅಥಿಯಾ ನಡುವಿನ ಚರ್ಚೆ ವಿಷಯ ಏನಾಗಿರಬಹುದು ಎಂದು ನಾನು ಯೋಚಿಸುತ್ತಿದ್ದೇನೆ ಎಂದು ಹೇಳಿದರು. ಬಾಲಿವುಡ್ ನಟಿಯರಿಬ್ಬರೂ ಚಲನಚಿತ್ರಗಳ ಬಗ್ಗೆ ಚರ್ಚಿಸುತ್ತಿರಬಹುದು ಎಂದು ಭಜ್ಜಿ ವಾದಿಸಿದರು. ಅವರಿಗೆ ಕ್ರಿಕೆಟ್​​ ಬಗ್ಗೆ ಹೆಚ್ಚು ಗೊತ್ತೇ ಇಲ್ಲ. ಕ್ರಿಕೆಟ್ ಎಷ್ಟು ಅರ್ಥಮಾಡಿಕೊಂಡಿದ್ದಾರೆ ಎಂದು ನನಗೆ ತಿಳಿದಿಲ್ಲ ಎಂದು ಹರ್ಭಜನ್ ಕಾಮೆಂಟ್ ಮಾಡಿದ್ದು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದೆ.

ನೆಟ್ಟಿಗರು ಗರಂ

ಅನುಷ್ಕಾ ಮತ್ತು ಅಥಿಯಾಗೆ ಕ್ರಿಕೆಟ್​ ಜ್ಞಾನವೇ ಇಲ್ಲ ಎನ್ನುವಂತೆ ಹೇಳಿಕೆ ನೀಡಿದ ಹರ್ಭಜನ್ ವಿರುದ್ಧ ಭಾರಿ ಆಕ್ರೋಶ ವ್ಯಕ್ತವಾಗಿದೆ. ಕೆಲ ಅಭಿಮಾನಿಗಳು ನೀವು ಹೀಗೆ ಮಾತನಾಡುತ್ತೀರಿ ಎಂದು ಊಹಿಸಿರಲಿಲ್ಲ. ನಿಮ್ಮ ಮಾತಿನ ಮೇಲೆ ಹಿಡಿತ ಇರಬೇಕು ಎಂದು ಕಿಡಿ ಕಾರಿದ್ದಾರೆ. ಸ್ತ್ರೀಯರ ವಿರುದ್ಧ ಹೀಗೆ ಹೇಳಿಕೆ ನೀಡುವುದು ಎಷ್ಟು ಸರಿ. ಈ ಕೂಡಲೇ ಕ್ಷಮೆಯಾಚಿಸಬೇಕು ಎಂದು ಆಗ್ರಹಿಸಿದ್ದಾರೆ.

ಪಂದ್ಯದ ಸಂಕ್ಷಿಪ್ತ ಸ್ಕೋರ್​​

ನರೇಂದ್ರ ಮೋದಿ ಮೈದಾನದಲ್ಲಿ ನಡೆದ ಫೈನಲ್​ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ, 240 ರನ್‌ಗಳಿಗೆ ಆಲೌಟ್​ ಆಯಿತು. ಕೆಎಲ್ ರಾಹುಲ್ 66, ವಿರಾಟ್ ಕೊಹ್ಲಿ 54, ರೋಹಿತ್ ಶರ್ಮಾ 47 ರನ್ ಗಳಿಸಿದರು. 241 ರನ್​​ಗಳ ಗುರಿ ಬೆನ್ನಟ್ಟಿದ ಆಸೀಸ್​​, 43 ಓವರ್‌ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ ಗೆದ್ದು ಬೀಗಿತು. ಟ್ರಾವಿಸ್ ಹೆಡ್ 137 ರನ್​ ಸಿಡಿಸಿ ಆಸೀಸ್​ ಗೆಲುವಿನ ರೂವಾರಿಯಾದರು.