ಕೊಹ್ಲಿ, ಜಡೇಜಾ, ಫಿಲಿಪ್ಸ್, ಮ್ಯಾಕ್ಸಿ ಅಲ್ಲ; ವಿಶ್ವಕಪ್ನಲ್ಲಿ ಬೆಸ್ಟ್ ಫೀಲ್ಡರ್ ಹೆಸರಿಸಿದ ಸುರೇಶ್ ರೈನಾ
Nov 02, 2023 04:04 PM IST
ವಿಶ್ವಕಪ್ನಲ್ಲಿ ಬೆಸ್ಟ್ ಫೀಲ್ಡರ್ ಯಾರೆಂದು ಬಹಿರಂಗಪಡಿಸಿದ ಸುರೇಶ್ ರೈನಾ.
- ICC ODI World Cup 2023: ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಅತ್ಯುತ್ತಮ ಫೀಲ್ಡರ್ ಯಾರು ಎಂಬುದನ್ನು ಭಾರತದ ಮಾಜಿ ಕ್ರಿಕೆಟಿಗ ಸುರೇಶ್ ರೈನಾ (Suresh Raina) ಬಹಿರಂಗಪಡಿಸಿದ್ದಾರೆ.
ಪ್ರಸಕ್ತ ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ (ICC ODI World Cup 2023) ಅತ್ಯುತ್ತಮ ಫೀಲ್ಡರ್ (Best Fielder) ಯಾರು ಎಂಬುದನ್ನು 2011ರ ಏಕದಿನ ವಿಶ್ವಕಪ್ ವಿಜೇತ ಭಾರತ ತಂಡದ ಸದಸ್ಯರಾಗಿದ್ದ ಸುರೇಶ್ ರೈನಾ (Suresh Raina) ಬಹಿರಂಗಪಡಿಸಿದ್ದಾರೆ. ಆದರೆ ಈ ಪಟ್ಟಿಯಲ್ಲಿ ವಿರಾಟ್ ಕೊಹ್ಲಿ (Virat Kohli), ರವೀಂದ್ರ ಜಡೇಜಾ (Ravindra Jadeja), ಗ್ಲೆನ್ ಫಿಲಿಪ್ಸ್ (Glenn Phillips), ಗ್ಲೆನ್ ಮ್ಯಾಕ್ಸ್ವೆಲ್ (Glenn Maxwell) ಸೇರಿದಂತೆ ಅತ್ಯುತ್ತಮ ಫೀಲ್ಡರ್ ಎಂಬುದನ್ನು ಪರಿಗಣಿಸದೆ ಇರುವುದು ಅಚ್ಚರಿಯ ಸಂಗತಿ.
ಕುಲ್ದೀಪ್ ಬೆಸ್ಟ್ ಫೀಲ್ಡರ್
ಕೊಹ್ಲಿ, ಜಡೇಜಾ, ಫಿಲಿಪ್ಸ್, ಮ್ಯಾಕ್ಸ್ವೆಲ್ ಹೆಸರನ್ನು ಪ್ರಸ್ತಾಪಿಸಿದರೂ, ಈ 28 ವರ್ಷದ ಭಾರತೀಯ ಸ್ಟಾರ್ ಆಟಗಾರ ಇವರಿಗಿಂತ ಉತ್ತಮ ಫೀಲ್ಡರ್ ಎಂದು ಉಲ್ಲೇಖಿಸಿದ್ದಾರೆ. ಐಸಿಸಿ ಅಧಿಕೃತ ಇನ್ಸ್ಟಾಗ್ರಾಂ ಹ್ಯಾಂಡಲ್ನಲ್ಲಿ ಅಪ್ಲೋಡ್ ಮಾಡಲಾಗಿರುವ ವಿಡಿಯೋದಲ್ಲಿ ಮಾತನಾಡಿದ ಮಾಜಿ ಕ್ರಿಕೆಟಿಗ ಸುರೇಶ್ ರೈನಾ, ಪ್ರಸ್ತುತ ವಿಶ್ವಕಪ್ನಲ್ಲಿ ಕುಲ್ದೀಪ್ ಯಾದವ್ ಬೆಸ್ಟ್ ಫೀಲ್ಡರ್ ಎಂದು ಹೇಳಿದ್ದಾರೆ.
ಕ್ಯಾಚ್ ಪಡೆಯುವುದೇ ಬೆಸ್ಟ್ ಫೀಲ್ಡಿಂಗ್ ಅಲ್ಲ
ಕುಲ್ದೀಪ್ ಯಾದವ್ ಅವರ ಫೀಲ್ಡಿಂಗ್ ಅನ್ನು ಶ್ಲಾಘಿಸಿದ ರೈನಾ, ಮೈದಾನದಲ್ಲಿ ಅವರ ಕ್ಷೇತ್ರ ರಕ್ಷಣೆ ಅದ್ಭುತವಾಗಿದೆ. ಒಬ್ಬ ಬೌಲರ್ ಆಗಿಯೂ ಫೀಲ್ಡಿಂಗ್ನಲ್ಲಿ ಅದ್ಭುತ ಪ್ರದರ್ಶನ ನೀಡುವುದು ಅಷ್ಟು ಸುಲಭವಲ್ಲ. ಫೀಲ್ಡಿಂಗ್ ಅನ್ನು ಕುಲ್ದೀಪ್ ಸಖತ್ ಎಂಜಾಯ್ ಮಾಡುತ್ತಿದ್ದಾರೆ. ಕೇವಲ ಉತ್ತಮ ಕ್ಯಾಚ್ ಪಡೆಯುವುದು, ರನೌಟ್ ಮಾಡುವುದೇ ಅತ್ಯುತ್ತಮ ಫೀಲ್ಡಿಂಗ್ ಅಲ್ಲ ಎಂದು ಹೇಳಿದ್ದಾರೆ.
ರವೀಂದ್ರ ಜಡೇಜಾ, ವಿರಾಟ್ ಕೊಹ್ಲಿ, ಗ್ಲೆನ್ ಮ್ಯಾಕ್ಸ್ವೆಲ್, ಗ್ಲೆನ್ ಫಿಲಿಪ್ಸ್ ಅವರು ಸಾಕಷ್ಟು ಉತ್ತಮ ಕ್ಯಾಚ್ಗಳನ್ನು ಪಡೆದಿದ್ದಾರೆ. ಉತ್ತಮವಾದ ರನೌಟ್ಗಳನ್ನು ಮಾಡುತ್ತಿದ್ದಾರೆ. ಆದರೂ, ಕುಲ್ದೀಪ್ ಉತ್ತಮ ಫೀಲ್ಡರ್. ಬೌಂಡರಿ ಗೆರೆಯಲ್ಲಿ ಅದ್ಭುತ ಡೈವ್ಗಳ ಮೂಲಕ ರನ್ಗಳನ್ನು ರಕ್ಷಿಸಿದ್ದಾರೆ. ಅನೇಕ ಬೌಂಡರಿಗಳನ್ನು ನಿಲ್ಲಿಸಿದ್ದಾರೆ. ಚುರುಕಿನ ಫೀಲ್ಡಿಂಗ್ ಮೂಲಕ ಗಮನ ಸೆಳೆದಿದ್ದಾರೆ ಎಂದು ಗುಣಗಾನ ಮಾಡಿದ್ದಾರೆ.
ಫೀಲ್ಡಿಂಗ್ನಿಂದಲೂ ಕುಲ್ದೀಪ್ ಪಂದ್ಯ ಗೆಲ್ಸಿದ್ದಾರೆ!
ಅದ್ಭುತ ಫೀಲ್ಡಿಂಗ್ ನಡೆಸಿ ಅನೇಕ ರನ್ಗಳನ್ನು ಕಾಪಾಡಿದ ಕುಲ್ದೀಪ್, ಪಂದ್ಯದ ಗೆಲುವಿನಲ್ಲೂ ಪ್ರಮುಖ ಪಾತ್ರವಹಿಸಿದ್ದಾರೆ. ಕೇವಲ ಬೌಲಿಂಗ್ನಿಂದ ಮಾತ್ರವಲ್ಲ, ಫೀಲ್ಡಿಂಗ್ನಿಂದಲೂ ಪಂದ್ಯವನ್ನು ಗೆಲ್ಲಿಸಿಕೊಡಲು ನೆರವಾಗಿದ್ದಾರೆ. ಫೀಲ್ಡಿಂಗ್ ಅನ್ನು ಸಾಕಷ್ಟು ಎಂಜಾಯ್ ಮಾಡುತ್ತಿರುವ ಕುಲ್ದೀಪ್, ಪ್ರಸಕ್ತ ಆವೃತ್ತಿಯ ವಿಶ್ವಕಪ್ನಲ್ಲಿ ಅತ್ಯುತ್ತಮ ಫೀಲ್ಡರ್ ಎಂದು ನಾನು ಭಾವಿಸುತ್ತೇನೆ ಎಂದು ರೈನಾ ಅಭಿಪ್ರಾಯಪಟ್ಟಿದ್ದಾರೆ.
ವಿಶ್ವಕಪ್ನಲ್ಲಿ ಕುಲ್ದೀಪ್ ಪ್ರದರ್ಶನ
ಪ್ರಸಕ್ತ ಸಾಲಿನಲ್ಲಿ ಚೈನಾಮೆನ್ ಕುಲ್ದೀಪ್ ಯಾದವ್ ಅವರು, ಆಡಿರುವ 6 ಪಂದ್ಯಗಳಲ್ಲಿ 10 ವಿಕೆಟ್ ಉರುಳಿಸಿದ್ದಾರೆ. ಕೇವಲ 4.50ರ ಬೌಲಿಂಗ್ ಎಕಾನಮಿ ಹೊಂದಿದ್ದಾರೆ. ಅಲ್ಲದೆ, 26.10ರ ಬೌಲಿಂಗ್ ಸರಾಸರಿ ಹೊಂದಿದ್ದಾರೆ. ಆ ಮೂಲಕ ಅತ್ಯುತ್ತಮ ಪ್ರದರ್ಶನ ನೀಡಿದ್ದಾರೆ. 2 ರನ್ ನೀಡಿ 24 ರನ್ ಬಿಟ್ಟುಕೊಟ್ಟಿರುವುದೇ ಈ ಟೂರ್ನಿಯಲ್ಲಿ ಅತ್ಯುತ್ತಮ ಬೌಲಿಂಗ್ ಆಗಿದೆ. ಅಲ್ಲದೆ, 6 ಪಂದ್ಯಗಳಿಂದ ಒಟ್ಟು 58 ಓವರ್ ಬೌಲಿಂಗ್ ಮಾಡಿದ್ದು, 348 ರನ್ ನೀಡಿದ್ದಾರೆ.