ಕನ್ನಡತಿ ಸೇರಿ ಪ್ರಮುಖರನ್ನೇ ಖರೀದಿಸಿ ಬಲಿಷ್ಠ ತಂಡವನ್ನು ಕಟ್ಟಿದ ಆರ್ಸಿಬಿ; ನೂತನ ತಂಡ ಇಲ್ಲಿದೆ
Dec 09, 2023 08:38 PM IST
ಕನ್ನಡತಿ ಸೇರಿ ಪ್ರಮುಖರನ್ನೇ ಖರೀದಿಸಿ ಬಲಿಷ್ಠ ತಂಡವನ್ನು ಕಟ್ಟಿದ ಆರ್ಸಿಬಿ.
- Royal Challengers Bangalore: ಮಹಿಳಾ ಪ್ರೀಮಿಯರ್ ಲೀಗ್ನ ಮಿನಿ ಹರಾಜಿನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಫ್ರಾಂಚೈಸಿ ಯಾರನ್ನು ಖರೀದಿಸಿದೆ, ಎಷ್ಟು ಮೊತ್ತ ಕೊಟ್ಟಿದೆ ಎಂಬುದನ್ನು ಈ ಮುಂದೆ ನೋಡೋಣ.
ಉದ್ಘಾಟನಾ ಆವೃತ್ತಿಯಲ್ಲಿ ಅತ್ಯಂತ ಹೀನಾಯ ಪ್ರದರ್ಶನ ನೀಡಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು (Royal Challengers Bangalore) ಈ ಬಾರಿ ಪ್ರಮುಖ ಆಟಗಾರ್ತಿಯರನ್ನೇ ಖರೀದಿಸಿ ಬಲಿಷ್ಠ ತಂಡವನ್ನು ಕಟ್ಟಿದೆ. ಮುಂಬೈನಲ್ಲಿ ಇಂದು (ಡಿಸೆಂಬರ್ 9 ಶನಿವಾರ) ನಡೆದ ಮಿನಿ ಹರಾಜಿನಲ್ಲಿ (WPL Auction 2024) ಬಲಿಷ್ಠ ಆಟಗಾರ್ತಿಯರನ್ನೇ ಬುಟ್ಟಿಗೆ ಹಾಕಿಕೊಳ್ಳುವ ಮೂಲಕ ಚೊಚ್ಚಲ ಟ್ರೋಫಿ ಗೆಲ್ಲುವ ಲೆಕ್ಕಾಚಾರ ಹಾಕಿಕೊಂಡಿದೆ.
2ನೇ ಆವೃತ್ತಿಗೆ ಘಟಾನುಘಟಿ ಆಟಗಾರ್ತಿಯರನ್ನೇ ಉಳಿಸಿಕೊಂಡಿದ್ದ ರೆಡ್ ಆರ್ಮಿ, ಹರಾಜಿನಲ್ಲೂ ಪ್ರಮುಖರಿಗೆ ಮಣೆ ಹಾಕಿದೆ. ತನ್ನ ಪರ್ಸ್ನಲ್ಲಿದ್ದ 3.35 ಕೋಟಿ ಬಜೆಟ್ನಲ್ಲಿ ಮೂವರು ವಿದೇಶಿ ಸೇರಿ ಒಟ್ಟು 7 ಆಟಗಾರ್ತಿಯರನ್ನು ಖರೀದಿಸಿದ್ದು, ತಂಡದ ಗಾತ್ರ 18 ಆಗಿದೆ. ಇದರಲ್ಲಿ 6 ವಿದೇಶಿ ಆಟಗಾರ್ತಿಯರು ಇದ್ದಾರೆ. ಹರಾಜಿನಲ್ಲಿ 7 ಮಂದಿಯನ್ನು ಖರೀದಿಸಿದರೂ ಪರ್ಸ್ನಲ್ಲಿ ಇನ್ನೂ 1.05 ಕೋಟಿ ಬಾಕಿ ಇದೆ.
ಈ ಹರಾಜಿನಲ್ಲಿ ಆರ್ಸಿಬಿ ಖರೀದಿಸಿದ ಆಟಗಾರ್ತಿಯರ ಪಟ್ಟಿ
ಏಕ್ತಾ ಬಿಷ್ಟ್ (ಭಾರತ) - 60 ಲಕ್ಷ, ಬೌಲರ್
ಜಾರ್ಜಿಯಾ ವೇರ್ಹ್ಯಾಮ್ (ಆಸ್ಟ್ರೇಲಿಯಾ) - 40 ಲಕ್ಷ, ಆಲ್ರೌಂಡರ್
ಕೇಟ್ ಕ್ರಾಸ್ (ಇಂಗ್ಲೆಂಡ್) - 30 ಲಕ್ಷ, ಆಲ್ರೌಂಡರ್
ಸಬ್ಬಿನೇನಿ ಮೇಘನಾ (ಭಾರತ) - 30 ಲಕ್ಷ, ಆಲ್ರೌಂಡರ್
ಸೋಫಿ ಮೊಲಿನಿಕ್ಸ್ (ಆಸ್ಟ್ರೇಲಿಯಾ) - 30 ಲಕ್ಷ, ಆಲ್ರೌಂಡರ್
ಸಿಮ್ರಾನ್ ಬಹದ್ದೂರ್ (ಭಾರತ) - 30 ಲಕ್ಷ, ಬೌಲರ್
ಶುಭಾ ಸತೀಶ್ (ಭಾರತ, ಕರ್ನಾಟಕ) - 10 ಲಕ್ಷ, ಆಲ್ರೌಂಡರ್
ಆರ್ಸಿಬಿ ಪೂರ್ಣ ತಂಡ
ಆಶಾ ಶೋಭನಾ, ದಿಶಾ ಕಸತ್, ಎಲ್ಲಿಸ್ ಪೆರ್ರಿ, ಹೀದರ್ ನೈಟ್, ಇಂದ್ರಾಣಿ ರಾಯ್, ಕನಿಕಾ ಅಹುಜಾ, ರೇಣುಕಾ ಸಿಂಗ್, ರಿಚಾ ಘೋಷ್, ಶ್ರೇಯಾಂಕಾ ಪಾಟೀಲ್, ಸ್ಮೃತಿ ಮಂಧಾನ, ಸೋಫಿ ಡಿವೈನ್, ಏಕ್ತಾ ಬಿಷ್ಟ್, ಕೇಟ್ ಕ್ರಾಸ್, ಜಾರ್ಜಿಯಾ ವೇರ್ಹ್ಯಾಮ್, ಸಬ್ಬಿನೇನಿ ಮೇಘನಾ, ಸೋಫಿ ಮೊಲಿನೆಕ್ಸ್, ಸಿಮ್ರಾನ್ ಬಹದ್ದೂರ್, ಶುಭಾ ಸತೀಶ್.
ಕಳೆದ ಆವೃತ್ತಿಯಲ್ಲಿ ಕಳಪೆ ಪ್ರದರ್ಶನ
ತಂಡದಲ್ಲಿ ಸ್ಟಾರ್ ಆಟಗಾರ್ತಿಯರೇ ಇದ್ದರೂ ಚೊಚ್ಚಲ ಆವೃತ್ತಿಯಲ್ಲಿ ಹೀನಾಯ ಪ್ರದರ್ಶನ ನೀಡಿತ್ತು. ಸ್ಟಾರ್ ಪ್ಲೇಯರ್ಗಳಾದ ಸ್ಮೃತಿ ಮಂಧಾನ, ರಿಚಾ ಘೋಷ್, ರೇಣುಕಾ, ಎಲ್ಲಿಸ್ ಪೆರಿ, ಹೀದರ್ ನೈಟ್, ಸೋಫಿ ಡಿವೈನ್ ಸೇರಿದಂತೆ ಪ್ರಮುಖರೇ ತಂಡದಲ್ಲಿದ್ದರು. ಆದರೂ ನಿರೀಕ್ಷಿತ ಪ್ರದರ್ಶನ ನೀಡುವಲ್ಲಿ ವಿಫಲವಾಗಿತ್ತು. ಆಡಿದ 8 ಪಂದ್ಯಗಳಲ್ಲಿ ಕೇವಲ 2 ಪಂದ್ಯದಲ್ಲಿ ಜಯ ಸಾಧಿಸಿತ್ತು.