Shankar Nag Birthday Poster: ಶಂಕರ್‌ ನಾಗ್‌ ಬರ್ತ್‌ಡೇಗೆ ‘ಅಬ ಜಬ ದಬ’ ಚಿತ್ರದಿಂದ ಶಂಕ್ರಣ್ಣನ ಫಸ್ಟ್‌ ಲುಕ್ ರಿಲೀಸ್..

ಶಂಕರ್‌ ನಾಗ್‌ ಕನ್ನಡ ಚಿತ್ರರಂಗವನ್ನು ಬೇರೆ ದೃಷ್ಟಿಯಿಂದ ನೋಡಿದವರು. ತಮ್ಮ ಜೀವಿತಾವಧಿಯ ಅತ್ಯಂತ ಕಡಿಮೆ ಅವಧಿಯಲ್ಲಿಯೇ ಅಪಾರ ಸಾಧನೆ ಮಾಡಿ ಕಣ್ಮರೆಯಾದವರು. ಇದೀಗ ಅವರು ಇದ್ದಿದ್ದೇ ಆಗಿದ್ದರೆ, ಅವರಿಗೆ 68 ವರ್ಷ ವಯಸ್ಸಾಗುತ್ತಿತ್ತು. ಸ್ಯಾಂಡಲ್‌ವುಡ್‌ ಚಿತ್ರರಂಗದ ಸಾಧನೆ ಕಂಡು ಹಿರಿ ಹಿರಿ ಹಿಗ್ಗುತ್ತಿದ್ದರು. ಶಂಕರ್‌ನಾಗ್‌ ನಮ್ಮ ನಡುವೆ ಇಲ್ಲ ಎಂಬ ಭಾವ ಯಾರಿಗೂ ಇಲ್ಲ. ಈಗಲೂ ಅವರನ್ನು ಆರಾಧಿಸುವ ಕೋಟ್ಯಂತರ ಅಭಿಮಾನಿಗಳಿದ್ದಾರೆ. ಆ ಅಭಿಮಾನಿಗಳಿಗೆ ಆಟೋ ರಾಜನ ಬರ್ತ್‌ಡೇ ದಿನವೇ ‘ಅಬ ಜಬ ದಬ’ ಚಿತ್ರತಂಡ ಹೊಸ ಲುಕ್‌ ಬಿಡುಗಡೆ ಮಾಡಿ ಗಿಫ್ಟ್‌ ನೀಡಿದೆ.

ಈ ಹಿಂದೆ ‘ಕನ್ನಡ್ ಗೊತ್ತಿಲ್ಲ’ ಚಿತ್ರವನ್ನು ನಿರ್ದೇಶಿಸಿದ್ದ ಮಯೂರ ರಾಘವೇಂದ್ರ, ಅದಾದ ಬಳಿಕ ಏನು ಮಾಡಲಿದ್ದಾರೆ ಎಂಬುದಕ್ಕೆ ಉತ್ತರವಾಗಿ ಹೊಸ ಸಿನಿಮಾ ಘೋಷಣೆ ಮಾಡಿದ್ದರು. ಅದರ ಹೆಸರು, ‘ಅಬ ಜಬ ದಬ’. ಇದೀಗ ಇದೇ ಸಿನಿಮಾ ಸದ್ದಿಲ್ಲದೆ ಕೊನೇ ಹಂತಕ್ಕೆ ಬಂದು ನಿಂತಿದೆ. ಈ ಚಿತ್ರದಲ್ಲಿ ಶಂಕರ್‌ನಾಗ್‌ ಪ್ರಮುಖ ಆಕರ್ಷಣೆ ಎಂದು ತಂಡ ಹೇಳಿಕೊಂಡಿತ್ತು. ಆದರೆ, ಅದು ಹೇಗೆ ಎಂಬುದಕ್ಕೆ ಉತ್ತರ ಮಾತ್ರ ಸಿಕ್ಕಿರಲಿಲ್ಲ. ಈಗ ಚಿತ್ರದ ಫಸ್ಟ್‌ ಲುಕ್‌ ಕುತೂಹಲ ಮೂಡಿಸಿದೆ.

ಅನಂತ ಕೃಷ್ಣ ನಿರ್ಮಾಣದಲ್ಲಿ ಮೂಡಿಬಂದಿರುವ ‘ಅಬ ಜಬ ದಬ’ ಚಿತ್ರದಲ್ಲಿ ದಿಯಾ ಸಿನಿಮಾ ಖ್ಯಾತಿಯ ಪೃಥ್ವಿ ಅಂಬರ್ ನಾಯಕನಾಗಿ ನಟಿಸಿದರೆ, ಕಿರುತೆರೆ ನಟಿ ಅಂಕಿತ ಅಮರ್ ನಾಯಕಿ. ಇತ್ತೀಚೆಗಷ್ಟೇ ಕೊನೇ ಹಂತದ ಶೂಟಿಂಗ್‌ ಬೆಂಗಳೂರಿನಲ್ಲಿ ಮುಗಿಸಿಕೊಂಡಿತ್ತು.

ಎಸ್ ರಾಮ್ ಪ್ರೊಡಕ್ಷನ್ಸ್ ಅಡಿಯಲ್ಲಿ ನಿರ್ಮಾಣವಾಗುತ್ತಿರುವ, ಮಯೂರ ರಾಘವೇಂದ್ರ ನಿರ್ದೇಶನದ ‘ಅಬ ಜಬ ದಬ’ ಸಿನಿಮಾ ಶೇ. 80 ಭಾಗದ ಚಿತ್ರೀಕರಣವನ್ನು ಮುಗಿಸಿದೆ. 2 ಹಾಡು ಹಾಗೂ ಒಂದು ಸಾಹಸ ದೃಶ್ಯದ ಚಿತ್ರೀಕರಣ ಮಾತ್ರ ಬಾಕಿ ಇದೆ.

"‘ಅಬ ಜಬ ದಬ’ ಚಿತ್ರ ಹಲವು ವಿಶೇಷತೆಗಳನ್ನು ಹೊಂದಿದೆ, ಅದರಲ್ಲಿ ಮುಖ್ಯ ವಿಶೇಷತೆ ಎಂದರೆ ನಮ್ಮ ಕರಾಟೆ ಕಿಂಗ್ "ಶಂಕರ್ ನಾಗ್" ಅವರನ್ನು ಮತ್ತೆ ತರೆಮೇಲೆ ಕರೆತರುತ್ತಿರುವುದು. ಮುಂಬೈನ ಪ್ರಸಿದ್ಧ ತಂಡದೊಂದಿಗೆ ಕೆಲಸ ಪ್ರಾರಂಭವಾಗಿದ್ದು, ಮುಂದಿನ ವರ್ಷ ನಮ್ಮ ಶಂಕರಣ್ಣನನ್ನು ತೆರೆ ಮೇಲೆ ನೋಡಿ ಆನಂದಿಸಬಹುದು" ಎಂದು ಚಿತ್ರತಂಡ ಹೇಳಿಕೊಂಡಿದೆ.