Chikkanna about Anushree:ಎಲ್ಲಾ ಕಾರ್ಯಕ್ರಮಕ್ಕೂ ನೀವೇ ಆಂಕರ್‌, ಎಲ್ಲಿಂದ ನಿಂಬೆಹಣ್ಣು ಮಂತ್ರಿಸಿ ತರ್ತೀರ..ಅನುಶ್ರೀ ಕಾಲೆಳೆದ ಚಿಕ್ಕಣ್ಣ

ಸಿನಿಮಾರಂಗದಲ್ಲಿ ಗಾಸಿಪ್‌ ಸಾಮಾನ್ಯ. ಆದರೆ ಆ ಗಾಸಿಪ್‌ ಕೆಲವೊಮ್ಮೆ ಬಹಳ ಗಂಭೀರ ಸ್ವರೂಪ ಪಡೆದುಕೊಳ್ಳುತ್ತದೆ. ನಟ-ನಟಿಯರು ಒಂದೆರಡು ಸಿನಿಮಾಗಳಲ್ಲಿ ಒಟ್ಟಿಗೆ ನಟಿಸಿದರೆ, ಸಾರ್ವಜನಿಕವಾಗಿ ಒಟ್ಟಿಗೆ ಕಾಣಿಸಿಕೊಂಡರೆ ಅವರಿಗೆ ಅಫೇರ್‌ ಇದೆ ಎಂಬ ಸುದ್ದಿ ಹರಡುತ್ತಾರೆ. ಹಾಗೇ ಸ್ಯಾಂಡಲ್‌ವುಡ್‌ ಹಾಸ್ಯ ನಟ ಚಿಕ್ಕಣ್ಣ ಹಾಗೂ ನಿರೂಪಕಿ ಅನುಶ್ರೀ ಬಗ್ಗೆ ಕೂಡಾ ಗಾಸಿಪ್‌ ವೈರಲ್‌ ಆಗಿತ್ತು.

ಅನುಶ್ರೀ ಹಾಗೂ ಚಿಕ್ಕಣ್ಣ ಇಬ್ಬರೂ ಪ್ರೀತಿಸುತ್ತಿದ್ದಾರೆ. ಇಬ್ಬರೂ ಶೀಘ್ರದಲ್ಲೇ ಮದುವೆಯಾಗುತ್ತಿದ್ದಾರೆ ಎಂಬ ಸುದ್ದಿ ಕೆಲವು ವರ್ಷಗಳ ಹಿಂದೆ ವೈರಲ್‌ ಆಗಿತ್ತು. ಕೆಲವೊಂದು ಪತ್ರಿಕೆಗಳು, ಯೂಟ್ಯೂಬ್‌ ಚಾನೆಲ್‌ಗಳು ಹೀಗೇ ಪ್ರಸಾರ ಮಾಡಿದ್ದವು. ಆದರೆ ಅನುಶ್ರೀ ಹಾಗೂ ಚಿಕ್ಕಣ್ಣ ಇಬ್ಬರೂ ಇದನ್ನು ನಿರಾಕರಿಸಿದ್ದರು. ಇದೆಲ್ಲಾ ಸುಳ್ಳುಸುದ್ದಿ ಎಂದು ಸ್ಪಷ್ಟಪಡಿಸಿದ್ದರು. ಇದೀಗ ಮತ್ತೊಮ್ಮೆ ಈ ವಿಚಾರ ಮುನ್ನೆಲೆಗೆ ಬಂದಿದೆ. ಅನುಶ್ರೀ, ತಮ್ಮ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಚಿಕ್ಕಣ್ಣ ಅವರ ಇಂಟರ್‌ವ್ಯೂ ಮಾಡಿದ್ದು, ಈ ಸಂದರ್ಭದಲ್ಲಿ ಆಗಿನ ಸುದ್ದಿ ಮತ್ತೆ ಚರ್ಚೆಯಾಗಿದೆ.

ಕಾರ್ಯಕ್ರಮದ ಉದ್ದಕ್ಕೂ ಚಿಕ್ಕಣ್ಣ ಹಾಗೂ ಅನುಶ್ರೀ ಒಬ್ಬರನೊಬ್ಬರ ಕಾಲು ಎಳೆಯುತ್ತಾ ಎಂಜಾಯ್‌ ಮಾಡಿದ್ದಾರೆ. ಈ ಸಂದರ್ಶನದ ವಿಡಿಯೋ ನೆಟಿಜನ್ಸ್‌ಗೆ ಕೂಡಾ ಬಹಳ ಇಷ್ಟವಾಗಿದೆ. ಇಬ್ಬರ ಗಾಸಿಪ್‌ ವಿಚಾರವಾಗೇ ಮೊದಲು ಮಾತು ಶುರುವಾಗಿದೆ. ಅನುಶ್ರೀ ವಿಚಾರದಲ್ಲಿ ಜನರು ನನ್ನನ್ನು ಇಂದಿಗೂ ಎಷ್ಟು ರೇಗಿಸುತ್ತಾರೆ ಎಂಬುದನ್ನು ಚಿಕ್ಕಣ್ಣ ಹೇಳಿದ್ದಾರೆ. ಹಾಗೇ ಮಾತನಾಡುತ್ತಾ, ದೇವರು ನನಗೆ ಎಲ್ಲವನ್ನೂ ಕೊಟ್ಟು ಬಣ್ಣವನ್ನು ಕಿತ್ತುಕೊಂಡ, ನಾನು ಕಪ್ಪು ಅಂತಾನೇ ನೀವು ನನ್ನನ್ನು ಪ್ರಪೋಸ್‌ ಮಾಡ್ತಿಲ್ಲ ಎಂದು ಚಿಕ್ಕಣ್ಣ, ಅನುಶ್ರೀ ಕಾಲೆಳೆಯುತ್ತಾರೆ. ಅಷ್ಟೇ ಅಲ್ಲ, ನಮ್ಮಿಬರ ನಡುವೆ ಗಾಸಿಪ್‌ ವೈರಲ್‌ ಆದಾಗ ನನ್ನ ತಾಯಿ ಕೂಡಾ ಈ ಸುದ್ದಿ ನಿಜಾನಾ..? ಎಂದು ನನ್ನನ್ನು ಪ್ರಶ್ನಿಸಿದ್ದರು ಎಂದು ಚಿಕ್ಕಣ್ಣ ಹೇಳಿದ್ದಾರೆ.

'ಬೆಂಗಳೂರು 23' ಚಿತ್ರಕ್ಕೂ ಮುನ್ನ ನಾನು ಚಿಕ್ಕಣ್ಣ ಒಬ್ಬರಿಗೊಬ್ಬರು ಗೊತ್ತು. ಕಾಮಿಡಿ ಕಿಲಾಡಿಗಳು ಕಾರ್ಯಕ್ರಮದಲ್ಲಿ ನಾನು ನಿರೂಪಣೆ ಮಾಡಲು ಆರಂಭಿಸಿದಾಗ ಚಿಕ್ಕಣ್ಣ ಕಾರ್ಯಕ್ರಮದಲ್ಲಿ ಭಾಗವಹಿಸಿಸುತ್ತಿದ್ದರು ಎಂದು ಅನುಶ್ರೀ, ತಮ್ಮ ಹಾಗೂ ಚಿಕ್ಕಣ್ಣ ಬಹುತೇಕ ಒಟ್ಟಿಗೆ ಕರಿಯರ್‌ ಆರಂಭಿಸಿರುವ ಮಾಹಿತಿ ನೀಡಿದರು. ಕನ್ನಡ ಚಿತ್ರರಂಗದಲ್ಲಿ ನಾಯಕನನ್ನು ಬಿಟ್ಟು ಸಿನಿಮಾ ಮಾಡಬಹುದು, ಆದರೆ ಯಾರೂ ಚಿಕ್ಕಣ್ಣ ಅವರನ್ನು ಬಿಟ್ಟು ಸಿನಿಮಾ ಮಾಡುವುದಿಲ್ಲ, ಚಿಕ್ಕಣ್ಣನಿಗೆ ಅಷ್ಟು ಡಿಮ್ಯಾಂಡ್‌ ಇದೆ. ನೀವು ನಿಂಬೆಹಣ್ಣನ್ನು ಎಲ್ಲಿಂದ ಮಂತ್ರಿಸಿಕೊಂಡು ತರ್ತೀರ..? ಎಂದು ಅನುಶ್ರಿ ಕೇಳುತ್ತಾರೆ. ಇದಕ್ಕೆ ಪ್ರತಿಕ್ರಿಯಿಸುವ ಚಿಕ್ಕಣ್ಣ, ಈ ಪ್ರಶ್ನೆಯನ್ನು ನಾನು ನಿಮ್ಮ ಬಳಿ ಕೇಳಬೇಕು. ಯಾವ ಕಾರ್ಯಕ್ರಮದಲ್ಲಿ ನೋಡಿದರೂ ನೀವೇ ನಿರೂಪಣೆ ಮಾಡುತ್ತೀರ, ಇದು ಹೇಗೆ ಸಾಧ್ಯ..? ನೀವು ಎಲ್ಲಿಂದ ನಿಂಬೆಹಣ್ಣು ಮಂತ್ರಿಸಿಕೊಂಡು ತರ್ತೀರ..? ಎಂದು ಕೇಳುತ್ತಾರೆ.

ಮುಂದುವರೆದು ಮಾತನಾಡಿದ ಚಿಕ್ಕಣ್ಣ, ಬಹಳಷ್ಟು ಜನರು ನನ್ನ ಬಳಿ ಬಂದು ನಿನಗೆ ಹಳೆ ಲವ್‌ ಇದ್ಯಾ ಎಂದು ಕೇಳುತ್ತಾರೆ. ನನ್ನ ಹಳೆಯ ಕಾಮಿಡಿ ವಿಡಿಯೋಗಳನ್ನು ತೋರಿಸಿ, ಈ ವಿಡಿಯೋ ನೋಡಿದರೆ ಯಾರಾದರೂ ನನಗೆ ಪ್ರಪೋಸ್‌ ಮಾಡ್ತಾರಾ ಎಂದು ನಾನು ಕೇಳುತ್ತೇನೆ. ಅಷ್ಟಕ್ಕೂ ನನ್ನ ವಿಡಿಯೋ ನೋಡಿದರೆ ನನಗೆ ನನ್ನ ಮೇಲೆ ಲವ್‌ ಆಗುವುದಿಲ್ಲ ಅಂತದ್ದರಲ್ಲಿ ಬೇರೆ ಯಾರಿಗೆ ಆಗುತ್ತದೆ ಎನ್ನುತ್ತಾರೆ. ಒಟ್ಟಿನಲ್ಲಿ ಸಂದರ್ಶನದ ವಿಡಿಯೋ ಕೊನೆವರೆಗೂ ಚಿಕ್ಕಣ್ಣ, ನಗೆಚಟಾಕಿ ಹಾರಿಸಿದ್ದಾರೆ. ಚಿಕ್ಕಣ್ಣ ಅವರ ಸೆನ್ಸ್‌ ಆಫ್‌ ಹ್ಯೂಮರ್‌ಗೆ ನೆಟಿಜನ್ಸ್‌ ಚಪ್ಪಾಳೆ ತಟ್ಟುತ್ತಿದ್ದಾರೆ. ಈ ಸಂದರ್ಶನದ ಭಾಗ 2 ಮಾಡಿ ಎಂದು ಬೇಡಿಕೆ ಇಡುತ್ತಿದ್ದಾರೆ.

ಚಿಕ್ಕಣ್ಣ ಸಿನಿಮಾಗಳ ವಿಚಾರಕ್ಕೆ ಬರುವುದಾದರೆ ಇದುವರೆಗೂ ಅವರು ಸುಮಾರು 200ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಸದ್ಯಕ್ಕೆ ಅವರು 'ಉಪಾಧ್ಯಕ್ಷ' ಚಿತ್ರದಲ್ಲಿ ಹೀರೋ ಆಗಿ ನಟಿಸುತ್ತಿದ್ದಾರೆ.