Vishal and Abhinaya marriage: ತಮಿಳು ನಟ ವಿಶಾಲ್ ಜೊತೆ ಮದುವೆ ಸುದ್ದಿ....ನಟಿ ಅಭಿನಯ ಹೇಳಿದ್ದೇನು..?
Oct 31, 2022 11:47 AM IST
Share
ನಟಿ ಅಭಿನಯ, ವಿಶಾಲ್
- ಅಭಿನಯ ಮಾತು ಬಾರದ, ಕಿವಿ ಕೇಳದ ಹುಡುಗಿ. 2008ರಲ್ಲಿ 'ನೇನಿಂತೇ' ತೆಲುಗು ಚಿತ್ರದ ಮೂಲಕ ಚಿತ್ರರಂಗಕ್ಕೆ ಬಂದ ಈ ಹುಡುಗಿ ನಂತರ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕನ್ನಡದ 'ಹುಡುಗರು' ಚಿತ್ರದಲ್ಲಿ ಪುನೀತ್‌ ರಾಜ್‌ಕುಮಾರ್‌ ತಂಗಿಯಾಗಿ ನಟಿಸಿದ್ದ ಈ ಚೆಲುವೆ, ನಂತರ ಕಿಚ್ಚು, ಆಟೋ ರಾಮಣ್ಣ ಸಿನಿಮಾಗಳಲ್ಲಿ ಕೂಡಾ ನಟಿಸಿದ್ದಾರೆ.
ಕಾಲಿವುಡ್ ಸ್ಟಾರ್‌ ನಟ ವಿಶಾಲ್, ಆಕ್ಷನ್‌ಗಳಿಂದಲೇ ಹೆಸರಾಗಿದ್ದಾರೆ. ವಿಶಾಲ್ ರಾಜಕೀಯ ಸೇರುತ್ತಾರೆ ಎಂಬ ಸುದ್ದಿ ಕೆಲವು ದಿನಗಳ ಹಿಂದೆ ವೈರಲ್‌ ಆಗಿತ್ತು. ಇದೀಗ ಅವರು ಮದುವೆ ವಿಚಾರವಾಗಿ ಸುದ್ದಿಯಲ್ಲಿದ್ದಾರೆ. ನಟಿ ಅಭಿನಯ ಅವರನ್ನು ವಿಶಾಲ್ ಪ್ರೀತಿಸುತ್ತಿದ್ದು ಕೆಲವೇ ದಿನಗಳಲ್ಲಿ ಇಬ್ಬರೂ ಮದುವೆಯಾಗಲಿದ್ದಾರೆ ಎಂಬ ಮಾತು ಕೇಳಿಬರುತ್ತಿದೆ.
ಬಹಳ ವರ್ಷಗಳ ಮುನ್ನ ನಟ ವಿಶಾಲ್ ಮತ್ತು ತಮಿಳು ನಟಿ ವರಲಕ್ಷ್ಮಿ ಶರತ್‌ಕುಮಾರ್‌ ಇಬ್ಬರೂ ಪ್ರೀತಿಸುತ್ತಿದ್ದಾರೆ, ಇಬ್ಬರೂ ಮದುವೆಯಾಗುತ್ತಾರೆ ಎಂಬ ಸುದ್ದಿ ಹರಿದಾಡಿತ್ತು. ಆದರೆ ಈ ಸುದ್ದಿ ನಿಜವಾಗಲಿಲ್ಲ. ಇದಾದ ನಂತರ ಹೈದರಾಬಾದ್‌ ಮೂಲದ ಯುವತಿಯೊಬ್ಬರನ್ನು ಮದುವೆಯಾಗಲಿದ್ದಾರೆ ಎನ್ನಲಾತ್ತು. ಆಕೆಯೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡರೂ ಮದುವೆಗೂ ಮುನ್ನ ಈ ನಿಶ್ಚಿತಾರ್ಥ ರದ್ದಾಗಿತ್ತು. ಆದರೆ ಇದೀಗ ವಿಶಾಲ್, ನಟಿ ಅಭಿನಯ ಅವರನ್ನು ಪ್ರೀತಿಸುತ್ತಿದ್ದು ಇಬ್ಬರೂ ಶೀಘ್ರದಲ್ಲೇ ಮದುವೆಯಾಗುತ್ತಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ.
ಅಭಿನಯ ಮಾತು ಬಾರದ, ಕಿವಿ ಕೇಳದ ಹುಡುಗಿ. 2008ರಲ್ಲಿ 'ನೇನಿಂತೇ' ತೆಲುಗು ಚಿತ್ರದ ಮೂಲಕ ಚಿತ್ರರಂಗಕ್ಕೆ ಬಂದ ಈ ಹುಡುಗಿ ನಂತರ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕನ್ನಡದ 'ಹುಡುಗರು' ಚಿತ್ರದಲ್ಲಿ ಪುನೀತ್‌ ರಾಜ್‌ಕುಮಾರ್‌ ತಂಗಿಯಾಗಿ ನಟಿಸಿದ್ದ ಈ ಚೆಲುವೆ, ನಂತರ ಕಿಚ್ಚು, ಆಟೋ ರಾಮಣ್ಣ ಸಿನಿಮಾಗಳಲ್ಲಿ ಕೂಡಾ ನಟಿಸಿದ್ದಾರೆ. ತೆಲುಗಿನ ಕಿಂಗ್‌, ಶಂಭೋ ಶಿವ ಶಂಭೋ, ದಮ್ಮು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ತಮಿಳಿನ ನಾಡೋಡಿಗಳ್‌, ಈಶನ್‌, ವೀರಮ್‌, ಪೂಜಾರಿ, ಕುಟ್ರಮ್‌ 23 ಸಿನಿಮಾಗಲ್ಲಿ ನಟಿಸಿದ್ದಾರೆ. ಹಿಂದಿ ಹಾಗೂ ಮಲಯಾಳಂ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದಾರೆ.
ಇಷ್ಟೆಲ್ಲಾ ಹೆಸರು ಗಳಿಸಿರುವ ಅಭಿನಯ ಈಗ ವಿಶಾಲ್ ಅವರನ್ನು ಮದುವೆಯಾಗುತ್ತಿದ್ದಾರೆ ಎಂಬ ಮಾತು ಕೇಳಿ ಬರುತ್ತಿದೆ. ಇದುವರೆಗೂ ಈ ಸುದ್ದಿ ಬಗ್ಗೆ ನಟ ವಿಶಾಲ್ ಏನೂ ಪ್ರತಿಕ್ರಿಯಿಸಿಲ್ಲ. ಆದರೆ ಅಭಿನಯ ಮೌನ ಮುರಿದಿದ್ದಾರೆ. ''ಮಾರ್ಕ್‌ ಆಂಟೋನಿ ಸಿನಿಮಾದಲ್ಲಿ ನಾನು ವಿಶಾಲ್ ಅವರ ಪತ್ನಿಯಾಗಿ ನಟಿಸುತ್ತಿದ್ದೇನೆ. ರೀಲ್‌ ಲೈಫ್‌ನಲ್ಲಿ ಹೆಂಡತಿಯಾಗಿ ನಟಿಸಿದ ಮಾತ್ರಕ್ಕೆ ರಿಯಲ್‌ ಲೈಫ್‌ನಲ್ಲೂ ಹೆಂಡತಿಯಾಗಲು ಸಾಧ್ಯವೇ..?'' ಎಂದು ಅಭಿನಯ ಗಾಸಿಪ್‌ ಹಬ್ಬಿಸುತ್ತಿರುವವರನ್ನು ಪ್ರಶ್ನಿಸಿದ್ದಾರೆ. ಇದರ ಮೂಲಕ ಅಭಿನಯ-ವಿಶಾಲ್ ಮದುವೆ ವದಂತಿಗೆ ಫುಲ್‌ ಸ್ಟಾಪ್‌ ಬಿದ್ದಂತಾಗಿದೆ.
ಅಭಿನಯ ಪ್ರಸ್ತುತ 'ಮಾರ್ಕ್‌ ಆಂಟನಿ' ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ವಿಶಾಲ್ ಸದ್ಯಕ್ಕೆ ಲಾಠಿ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಇದಲ್ಲದೆ ಅವರು ತುಪರಿವಾಲನ್‌ 2, ಮಾರ್ಕ್‌ ಆಂಟನಿ ಚಿತ್ರದಲ್ಲಿ ಕೂಡಾ ಬ್ಯುಸಿಯಾಗಿದ್ದಾರೆ.