Yogi 50th Movie: ಯೋಗಿ 50ನೇ ಚಿತ್ರಕ್ಕೆ ಶುಭ ಹಾರೈಸಿದ ಡಾಲಿ... ಗ್ಯಾಂಗ್‌ಸ್ಟರ್‌ ಅವತಾರದಲ್ಲಿ ಕಾಣಿಸಿಕೊಳ್ಳಲಿರುವ ಲೂಸ್‌ ಮಾದ

ಕಲಾವಿದರಿಗೆ ತಮ್ಮ ಪ್ರತಿ ಸಿನಿಮಾಗಳು ಕೂಡಾ ಬಹಳ ಮುಖ್ಯ. ಅದರಲ್ಲೂ ಮೊದಲ ಸಿನಿಮಾ 25, 50ನೇ ಸಿನಿಮಾಗಳು ಇನ್ನೂ ವಿಶೇಷ. ಆ ಚಿತ್ರವನ್ನು ಕಲಾವಿದರು ವಿಶೇಷ ರೀತಿಯಲ್ಲಿ ಸಂಭ್ರಮಿಸುತ್ತಾರೆ. ಸ್ಕ್ರಿಪ್ಟ್‌ ಚೆನ್ನಾಗಿರಬೇಕು, ಈ ಸಿನಿಮಾ ನಮ್ಮ ವೃತ್ತಿ ಜೀವನದಲ್ಲಿ ಸದಾ ಕಾಲ ನೆನಪಿನಲ್ಲಿಡುವಂತ ಸಿನಿಮಾ ಆಗಬೇಕು ಎಂದು ಬಯಸುತ್ತಾರೆ. ಇದೇ ಖುಷಿಯಲ್ಲಿ ಲೂಸ್‌ ಮಾದ ಯೋಗಿ ತಮ್ಮ 50ನೇ ಸಿನಿಮಾಗೆ ತಯಾರಿ ನಡೆಸಿದ್ದಾರೆ.

ಯೋಗೇಶ್‌, ಚಿತ್ರರಂಗಕ್ಕೆ ಬಂದದ್ದು 'ದುನಿಯಾ' ಚಿತ್ರದ ಮೂಲಕ, ಮೊದಲ ಚಿತ್ರದಲ್ಲಿ ಪೋಷಕ ಪಾತ್ರದಲ್ಲಿ ನಟಿಸಿದ್ದ ಯೋಗೇಶ್‌, ನಂತರ 'ನಂದ ಲವ್ಸ್‌ ನಂದಿತ' ಚಿತ್ರದ ಮೂಲಕ ಹೀರೋ ಆದರು. ಈ ಚಿತ್ರದ ಜಿಂಕೆ ಮರೀನಾ... ಹಾಡು ಇಂದಿಗೂ ಬಹಳ ಫೇಮಸ್.‌ ಈ ಚಿತ್ರದಲ್ಲಿ ಶ್ವೇತ ನಂದಿತಾ, ಯೋಗಿಗೆ ಜೋಡಿಯಾಗಿದ್ದರು. ದುನಿಯಾ ಚಿತ್ರದಲ್ಲಿ ಇವರು ಮಾಡಿದ್ದ ಮಾದ ಪಾತ್ರದ ಮೂಲಕ ಇವರು ಲೂಸ್‌ ಮಾದ ಎಂದೇ ಹೆಸರಾದರು. ಇದಾದ ನಂತರ ಪುಂಡ, ಪ್ರೀತ್ಸೆ ಪ್ರೀತ್ಸೆ, ಯೋಗಿ, ರಾವಣ, ಅಂಬಾರಿ, ಹುಡುಗರು , ಸಿದ್ಲಿಂಗು, ಅಲೆಮಾರಿ, ಪರಪಂಚ, ಜಾನ್‌ ಜಾನಿ ಜನಾರ್ದನ್‌ ಸೇರಿ ಅನೇಕ ಸಿನಿಮಾಗಳಲ್ಲಿ ನಟಿಸಿದರು. ಇತ್ತೀಚೆಗೆ ಯೋಗಿ ಅಭಿನಯದ 50ನೇ ಸಿನಿಮಾ ಮುಹೂರ್ತ ನೆರವೇರಿದೆ.

ಯೋಗಿ 50ನೇ ಚಿತ್ರಕ್ಕೆ 'ರೋಜಿ' ಎಂದು ಹೆಸರಿಡಲಾಗಿದೆ. ಈ ಚಿತ್ರದ ಶೀರ್ಷಿಕೆ ಅನಾವರಣ ಹಾಗೂ ಮುಹೂರ್ತ ಸಮಾರಂಭ ಇತ್ತೀಚೆಗೆ ಬೆಂಗಳೂರಿನ ನವರಂಗ್ ಚಿತ್ರಮಂದಿರದಲ್ಲಿ ನಡೆಯಿತು. ಡಾಲಿ ಧನಂಜಯ್‌ ಚಿತ್ರದ ಶೀರ್ಷಿಕೆ ಅನಾವರಣ ಮಾಡಿ, ಮೊದಲ ಸನ್ನಿವೇಶಕ್ಕೆ ಆರಂಭ ಫಲಕ ತೋರಿದರು. 'ಹೆಡ್ ಬುಷ್' ಚಿತ್ರವನ್ನು ನಿರ್ದೇಶಿಸಿದ್ದ ಶೂನ್ಯ, 'ರಾಜಿ' ಚಿತ್ರಕ್ಕೆ ಆಕ್ಷನ್‌ ಕಟ್‌ ಹೇಳುತ್ತಿದ್ದಾರೆ. ಡಿ.ವೈ. ರಾಜೇಶ್ ಹಾಗೂ ಡಿ.ವೈ. ವಿನೋದ್ ಸಿನಿಮಾ ನಿರ್ಮಾಣದ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ.

ಚಿತ್ರಕ್ಕೆ ಕ್ಲಾಪ್‌ ಮಾಡಿ ಮಾತನಾಡಿದ ಡಾಲಿ, ''ಯೋಗಿ ನನ್ನ ಆತ್ಮೀಯ ಗೆಳೆಯ. ಇದು ಯೋಗಿ ಅಭಿನಯದ 50ನೇ ಸಿನಿಮಾ ಎಂದು ತಿಳಿದು ಸಂತೋಷವಾಯಿತು. ಶೂನ್ಯ ಕೂಡಾ ನಮ್ಮ ಸಂಸ್ಥೆಯ ನಿರ್ಮಾಣದ 'ಹೆಡ್ ಬುಷ್' ಚಿತ್ರ ನಿರ್ದೇಶನ ಮಾಡಿದ್ದರು. ಈ ಚಿತ್ರ ದೊಡ್ಡ ಯಶಸ್ಸು ಕಾಣಲಿ'' ಎಂದು ಹಾರೈಸಿದರು. ನಂತರ ಮಾತನಾಡಿದ ಯೋಗಿ, ''ಇದು ನನ್ನ 50ನೇ ಚಿತ್ರ. ಚಿತ್ರದಲ್ಲಿ ಗ್ಯಾಂಗ್‌ಸ್ಟರ್ ಆಗಿ ಕಾಣಿಸಿಕೊಳ್ಳುತ್ತಿದ್ದೇನೆ. ಈ ಹಿಂದೆ ಮಾಡಿರುವ ಪಾತ್ರಗಳಿಗಿಂತ ವಿಭಿನ್ನ ಪಾತ್ರ ಎನ್ನಬಹುದು. ಶೂನ್ಯ, ಚಿತ್ರದ ಕಥೆಯನ್ನು ಚೆನ್ನಾಗಿ ಬರೆದಿದ್ದಾರೆ. ಶೀರ್ಷಿಕೆ ಬಿಡುಗಡೆ ಮಾಡಿ, ಶುಭ ಹಾರೈಸಿದ ಸ್ನೇಹಿತ ಡಾಲಿ ಧನಂಜಯ ಅವರಿಗೆ ಧನ್ಯವಾದ'' ಎಂದು ಸ್ನೇಹಿತನಿಗೆ ಥ್ಯಾಂಕ್ಸ್‌ ಹೇಳಿದರು.

''ನಾನು ನಿರ್ದೇಶಿಸಿದ ಮೊದಲ ಚಿತ್ರಕ್ಕೆ ನೀವೆಲ್ಲರೂ ನೀಡಿದ್ದ ಪ್ರೋತ್ಸಾಹಕ್ಕೆ ನಾನು ಚಿರಋಣಿ. ಈಗ ನಾನು ನಿರ್ದೇಶಿಸುತ್ತಿರುವ ಎರಡನೇ ಸಿನಿಮಾಗೆ ಚಾಲನೆ ಸಿಕ್ಕಿದೆ. ಈ ಚಿತ್ರದಲ್ಲಿ ಯೋಗಿ ಅವರ ಹೆಸರೇ 'ರೋಜಿ'. ಸಿನಿಮಾ ಮಂದಿಗೆ ಚಿತ್ರಮಂದಿರ ದೇವಸ್ಥಾನ ಇದ್ದಂತೆ. ಹಾಗಾಗಿ ನಮ್ಮ ಚಿತ್ರಕ್ಕೆ ಚಿತ್ರಮಂದಿರದಲ್ಲೇ ಮುಹೂರ್ತ ಮಾಡಿದ್ದೇವೆ. ಮೇ ತಿಂಗಳಲ್ಲಿ ಚಿತ್ರೀಕರಣ ಆರಂಭವಾಗಲಿದೆ. ಮುಂದಿನ ದಿನಗಳಲ್ಲಿ ಚಿತ್ರದ ಕುರಿತು ಹೆಚ್ಚಿನ ಮಾಹಿತಿ ಹಂಚಿಕೊಳ್ಳುವುದಾಗಿ'' ಶೂನ್ಯ ಹೇಳಿದರು.