Seetha Rama Serial: ಮನೆಗೆ ಬಂದ ಸೀತಾಳ ಮೇಲೆ ಬಿತ್ತು ಭಾರ್ಗವಿಯ ವಕ್ರದೃಷ್ಟಿ! ಚಿಕ್ಕಿಯ ಅಸಲಿ ಆಟಕ್ಕೆ ರಾಮ- ಅಶೋಕ ತಬ್ಬಿಬ್ಬು

Seetha Rama: ರಾಮನ ಹೊಸಮನೆಯಲ್ಲಿ ಹಬ್ಬದೂಟಕ್ಕೆ ಆಫೀಸ್‌ನ ಎಂಪ್ಲಾಯಿಸ್‌ಗಳಿಗೆಲ್ಲ ಆಹ್ವಾನ ಸಿಕ್ಕಿದೆ. ಅದಕ್ಕಾಗಿಯೇ ವಿಶೇಷ ತಯಾರಿಯೂ ನಡೆಯುತ್ತಿದೆ. ಸೂರ್ಯ ಪ್ರಕಾಶ್‌ ದೇಸಾಯಿ ಮತ್ತು ಅಶೋಕ ಅದೆಲ್ಲವನ್ನು ನೋಡುತ್ತಲೇ ರಾಮನ ಬಗ್ಗೆ ಮಾತುಕತೆ ನಡೆಸಿದ್ದಾರೆ. ರಾಮನ ಮನದಲ್ಲಿ ಪ್ರೀತಿ ಅರಳಿದ ವಿಚಾರವನ್ನು ಖುಷಿಯಲ್ಲಿಯೇ ಹಂಚಿಕೊಳ್ಳುತ್ತಿದ್ದಾರೆ. ಈ ನಡುವೆ ರಾಮನ ಎಂಟ್ರಿಯೂ ಅಲ್ಲಾಗಿದೆ. ಬಾಸ್‌ ಆಗದೇ ನಾರ್ಮಲ್‌ ಎಂಪ್ಲಾಯಿ ಆಗಿದ್ದೆ ಬೆಸ್ಟ್‌ ಎಂದು ಹೇಳಿಕೊಳ್ಳುತ್ತಿದ್ದಾನೆ.

ಮತ್ತೊಂದು ಬದಿಯಲ್ಲಿ ಆಫೀಸ್‌ನ ಎಲ್ಲರ ಆಗಮನವಾಗಿದೆ. ಸೀತಾ ಸೀರೆಯಲ್ಲಿ ಲಕ್ಷಣವಾಗಿ ಆಗಮಿಸಿದ್ದಾರೆ. ಹೊಸ ಮನೆ ನೋಡಿ ಪ್ರಿಯಾ ಮತ್ತು ಸೀತಾ ಮಾತನಾಡಿಕೊಂಡಿದ್ದಾರೆ. ಮನೆ ಪ್ರವೇಶಿಸಿ ಸೀತಾ ರಾಮನ ಮೂರ್ತಿಗೆ ನಮಸ್ಕರಿಸಿದ್ದಾಳೆ. ಅಷ್ಟೊತ್ತಿಗೆ ರೇಷ್ಮೆ ಶರ್ಟ್‌ ರೇಷ್ಮೆ ಪಂಚೆಯಲ್ಲಿ ರಾಮ್‌ ಸೀತಾಳ ಎದುರಾಗಿದ್ದಾನೆ. ರಾಮನ ಹೊಸ ಅವತಾರ ನೋಡಿದ ಸೀತಾ ಮೆಚ್ಚುಗೆ ಮಾತುಗಳನ್ನಾಡಿದ್ದಾಳೆ.

ಇದನ್ನೂ ಓದಿ: BBK 10: ಕಂಬಿ ಸೀಳಿ ಜೈಲಿಂದ ಬಿಗ್‌ಬಾಸ್‌ ಸ್ಪರ್ಧಿ ವರ್ತೂರು ಸಂತೋಷ್‌ ಎಸ್ಕೇಪ್‌!

ಇತ್ತ ಸೀತಾ ಮತ್ತು ರಾಮ ಮಾತನಾಡುತ್ತಿರುವುದನ್ನು ಭಾರ್ಗವಿ ನೋಡಿ ಹೊಟ್ಟೆ ಉರಿ ಶುರುವಾಗಿದೆ. ಕೋಪದ ಮುಖದಲ್ಲಿ ನಗು ಅರಳಿಸಿಕೊಂಡು ನೇರವಾಗಿ ರಾಮನ ಬಳಿ ಬಂದು ನಿಂತಿದ್ದಾಳೆ ಭಾರ್ಗವಿ. ಕಣ್ಣಲ್ಲೇ ಸೀತಾಳನ್ನು ನುಂಗುವಂತೆ ದುರುಗುಟ್ಟಿ ನೋಡುತ್ತಿದ್ದಾಳೆ. ಇತ್ತ ಸಿಕ್ಕಿದ್ದೇ ಚಾನ್ಸು ಅಂತ ಬಾಸ್‌ ಅಶೋಕನ ಬಳಿ ಫೋಟೋ ಕ್ಲಿಕ್ಕಿಸಿಕೊಳ್ಳಲು ಮುಂದಾಗಿದ್ದಾಳೆ ಪ್ರಿಯಾ.

ಇತ್ತ ಸಿಹಿ ಮತ್ತು ತಾತನ ನಡುವೆ ಸಣ್ಣ ಟೂ ಮುಂದುವರಿದಿದೆ. ತಾತ ಮಾತನಾಡದಿದ್ದರೂ, ಆತನ ಜತೆಗೆ ಮಾತಿಗಿಳಿದಿದ್ದಾಳೆ ಸಿಹಿ. ಇದೇ ವೇಳೆ ಲಾಯರ್‌ ರುದ್ರಪ್ರತಾಪ್‌ ಆಗಮನವಾಗಿದೆ. ಅಜ್ಜಿ, ತಾತನಿಗೆ ಉಡುಗೊರೆ ನೀಡಿ ಮತ್ತೆ ಮರಳು ಮಾಡುವ ಕೆಲಸ ಮುಂದುವರಿಸಿದ್ದಾನೆ. ಅಜ್ಜಿ, ತಾತನಿಗೆ ಅಪ್ಪ ಅಮ್ಮ ಎಂದು ತೋರಿಕೆಯ ಪ್ರೀತಿ ತೋರಿಸಿ, ಒಳಗೊಳಗೆ ಕೆಟ್ಟ ನಗೆ ಬೀರಿದ್ದಾನೆ ರುದ್ರಪ್ರತಾಪ್.‌

ಮತ್ತೊಂದು ಕಡೆ ಸೂರ್ಯ ಪ್ರಕಾಶ್‌ ಎಂಪ್ಲಾಯಿಗಳನ್ನು ಉದ್ದೇಶಿಸಿ ಮಾತನಾಡುತ್ತಿದ್ದಾರೆ. ನೀವೆಲ್ಲರೂ ನಮ್ಮ ಕುಟುಂಬದವರಿದಂತೆ ಎಂದು ಎಲ್ಲರ ಬಗ್ಗೆ ಮೆಚ್ಚುಗೆ ಮಾತಗಳನ್ನಾಡುತ್ತಿದ್ದಾರೆ. ಈ ನಡುವೆಯೇ ಅಲ್ಲೇ ಇದ್ದ ಭಾರ್ಗವಿ, ಅಪ್ಪು ನೀನು ವೇದಿಕೆ ಮೇಲೆ ಹೋಗು ಎಂದಿದ್ದಾಳೆ. ಹೀಗೆ ಹೇಳಿದ್ದೇ ತಡ, ರಾಮ್‌, ಅಶೋಕ ಮತ್ತು ಸೂರ್ಯ ಪ್ರಕಾಶ್‌ ಮನದಲ್ಲಿ ಆತಂಕ ಶುರುವಾಗಿದೆ. ಅಸಲಿಯತ್ತು ಬಯಲಾಗೋ ಸಮಯ ಬಂತಾ ಎಂಬ ಪ್ರಶ್ನೆ ಮೂಡತೊಡಗಿದೆ. ಏನಾಗಬಹುದು ಎಂಬುದಕ್ಕೆ ಉತ್ತರ ಸೋಮವಾರದ ಸಂಚಿಕೆಯಲ್ಲಿಯೇ ಗೊತ್ತಾಗಲಿದೆ.