Seetha Rama: ಸತ್ಯ ಹೇಳಿ ಭಾರ್ಗವಿ ಕೆಂಗಣ್ಣಿಗೆ ಗುರಿಯಾದ್ಲಾ ಸೀತಾ? ಅಸಲಿಯತ್ತು ತಿಳಿಯಲು ರಾಮನ ಬತ್ತಳಿಕೆಯಿಂದ ಬಂತು ಹೊಸ ಬಾಣ

Seetha Rama: ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರ ಕಾಣುತ್ತಿರುವ ಸೀತಾ ರಾಮ ಧಾರಾವಾಹಿ ಸದ್ಯ ಎಲ್ಲರ ಮೆಚ್ಚಿನ ಧಾರಾವಾಹಿಯಾಗಿ ಮೂಡಿಬರುತ್ತಿದೆ. ವೀಕ್ಷಕರಿಗೆ ಆಪ್ತ ಎನಿಸುವ ಕಥೆ ಒಂದೆಡೆಯಾದರೆ, ಇಡೀ ಧಾರಾವಾಹಿಯಲ್ಲಿನ ಒಂದಷ್ಟು ವೈಶಿಷ್ಟ್ಯತೆಗಳು ಕಥಾಹಂದರವನ್ನು ಮತ್ತಷ್ಟು ಅಂದಗಾಣಿಸುತ್ತಿದೆ. ದಿನದಿಂದ ದಿನಕ್ಕೆ, ಸಂಚಿಕೆಯಿಂದ ಸಂಚಿಕೆಗೆ ಕೌತುಕದ ವಿಚಾರಗಳನ್ನೇ ಹೊರಗೆಡವುತ್ತಿದೆ ಈ ಸೀತಾ ರಾಮ.

ಅದ್ದೂರಿತನದ ಮೇಕಿಂಗ್, ಘಟಾನುಘಟಿ ಪಾತ್ರವರ್ಗ, ಪ್ರತಿ ಕಲಾವಿದರಿಗೂ ತಕ್ಕುದಾದ ಪಾತ್ರ.. ಹೀಗೆ ಹಲವು ವಿಶೇಷ ಗೊಂಚಲನ್ನು ಈ ಧಾರಾವಾಹಿ ನೋಡುಗರಿಗೆ ನೀಡುತ್ತಿದೆ. ಆರಂಭದಿಂದ ಪ್ರೋಮೋ ಮೂಲಕ ಗಮನ ಸೆಳೆದ ಈ ಧಾರಾವಾಹಿ, "ಯಾರ ಜೀವ ಯಾರನೂ ಸೇರೋದು ಬಾಳ ತೀರ್ಮಾನ... ಅದನು ಮೀರಿ ಸಾಗದು ಈ ಜೀವನ... ಯಾರ ಹೆಜ್ಜೆ ಯಾರನೋ ಕಾಯೋದೇ ಸುಂದರ ಧ್ಯಾನ... ಹೃದಯ ತೆರೆದು ಕೂರಲಿ ನಿನ್ನೀ ಮನ..’ ಶೀರ್ಷಿಕೆ ಹಾಡಿನ ಮೂಲಕವೇ ಹೆಚ್ಚು ಸುದ್ದಿ ಮಾಡಿತ್ತು.

ಇದೀಗ ಸೀರಿಯಲ್‌ ಶುರುವಾದಾಗಿನಿಂದ ಕಥೆಯ ವಿಚಾರದಲ್ಲೂ ಅಷ್ಟೇ ಗಟ್ಟಿತನವನ್ನು ಕಾಯ್ದುಕೊಂಡು ಮುನ್ನುಗ್ಗುತ್ತಿದೆ ಸೀತಾ ರಾಮ. ಸಣ್ಣ ಸಣ್ಣ ಬದಲಾವಣೆಗಳೂ ದೊಡ್ಡದರ ಮುನ್ಸೂಚನೆಯಂತೆ ನೋಡುಗರನ್ನು ಸೆಳೆಯುತ್ತಿದೆ ಈ ಸೀತಾರಾಮ. ಸಿಹಿಯ ಕೀಟಲೆ, ತಾಯಿ ಸೀತಾಳ ಸಂಕಟ, ಇವರಿಬ್ಬರ ಮೇಲೆ ರಾಮನ ಪ್ರೀತಿ ನೋಡುಗರಿಗೆ ಇಷ್ಟವಾಗುತ್ತಿದೆ. ಇದೆಲ್ಲದರ ನಡುವೆ ಭಾರ್ಗವಿಯ ನೆಗೆಟಿವ್‌ ಶೇಡ್‌ ಎಲ್ಲರ ಕಣ್ಣು ಕೆಂಪಾಗಿಸಿದೆ. ಮಾವ ಕಂಡೊಂಡನೆ ಬಣ್ಣ ಬದಲಿಸುವ ಭಾರ್ಗವಿ, ರಾಮನ ವಿರುದ್ಧ ಮನದಲ್ಲೇ ಕತ್ತಿ ಮಸಿಯುವ ಕಾಯಕ ಮುಂದುವರಿಯುತ್ತಿದೆ.

ಇದೀಗ ಹಿಂದಿನ ಸಂಚಿಕೆಯನ್ನು ನೋಡುವುದಾದರೆ, ಅಂದುಕೊಂಡಂತೆ ಸಾಲಗಾರರಿಂದ ತಮ್ಮನ್ನು ರಕ್ಷಣೆ ಮಾಡಿದ್ದು ರಾಮ ಎಂದು ಸೀತಾಗೆ ಸಿಹಿ ಮೂಲಕ ಗೊತ್ತಾಗಿದೆ. ರಾಮನ ಬಗ್ಗೆ ಸೀತಾಗಿದ್ದ ಮುನಿಸು ಇದೀಗ ಮಾಯವಾಗಿದೆ. ಮನಸ್ಸಲ್ಲೇ ಆತನ ಬಗ್ಗೆ ಒಳ್ಳೆಯ ಆಲೋಚನೆ ಮೂಡತೊಡಗಿದೆ. ಸಿಹಿಯ ಮುಗುಳ್ನಗೆ ಮ್ಯಾಜಿಕ್‌ಗೆ ಸೀತಾ ಮತ್ತು ರಾಮನಿಂದಲೂ ಥ್ಯಾಂಕ್ಯು ಸಿಕ್ಕಿದೆ. ಅದಕ್ಕೆ ಕೃತಜ್ಞತೆ ಸಲ್ಲಿಸಲು ಫೋನ್‌ ಕೈಗೆತ್ತಿಕೊಂಡು ಧನ್ಯವಾದ ಹೇಳಲು ಮುಂದಾಗ್ತಿದ್ದಂತೆ, ಅದಕ್ಕೆ ಬ್ರೇಕ್‌ ಹಾಕಿ ಆಫೀಸ್‌ನಲ್ಲಿಯೇ ಹೇಳಲು ನಿರ್ಧರಿಸುತ್ತಾಳೆ ಸೀತಾ.

ಇತ್ತ ಕಂಪನಿಯ ಮಾಲೀಕ ಸೂರ್ಯಪ್ರಕಾಶ್‌ ದೇಸಾಯಿ ಆಫೀಸ್‌ಗೆ ದಿಢೀರ್‌ ಭೇಟಿ ನೀಡಿ, ಸ್ಥಿತಿಗತಿ ವಿಚಾರಿಸಲು ಮುಂದಾಗಿದ್ದಾರೆ. ಸದ್ದಿಲ್ಲದೆ, ಆಫೀಸ್‌ನಲ್ಲಿನ ಲೆಕ್ಕಪತ್ರಗಳ ತಾಳೆ ನೋಡಿದ್ದಾರೆ. ಒಂದಕ್ಕೊಂದು ಸಂಬಂಧವಿಲ್ಲದನ್ನು ಕಂಡು, ಅನುಮಾನದಿಂದಲೇ ಮ್ಯಾನೇಜರ್‌ ಬಳಿ ಕಟುವಾಗಿಯೇ ವರ್ತಿಸಿದ್ದಾರೆ. ಎಲ್ಲರಿಗೂ ಪ್ರತಿ ವರ್ಷ ಬೋನಸ್‌ ನೀಡಲಾಗ್ತದೆಯೇ ಎಂದು ಮ್ಯಾನೇಜರ್‌ಗೆ ಪ್ರಶ್ನಿಸಿದ್ದಾರೆ. ಬಳಿಕ ನೇರವಾಗಿ ಕೆಲಸಗಾರರ ಬಳಿ ಹೋಗಿ ಅವರಿಂದಲೇ ಉತ್ತರ ಪಡೆದುಕೊಂಡಿದ್ದಾರೆ.

ಸೂರ್ಯಪ್ರಕಾಶ್‌ ಆಫೀಸ್‌ಗೆ ಬಂದಿದ್ದನು ಕಂಡ ಭಾರ್ಗವಿ ಸಹ ಕಚೇರಿಗೆ ಆಗಮಿಸಿರುತ್ತಾಳೆ. ಏನೆಲ್ಲ ನಡೆಯುತ್ತಿದೆ ಎಂಬುದನ್ನು ಮರೆಯಲ್ಲಿಯೇ ನಿಂತು ಕೇಳಿಸಿಕೊಳ್ಳುತ್ತಿರುತ್ತಾಳೆ. ಹೀಗಿರುವಾಗ ಎಲ್ಲರಿಗೂ ಬೋನಸ್‌ ಸಿಗುತ್ತಿದೆಯೇ ಎಂದು ಸೂರ್ಯಪ್ರಕಾಶ್‌ ಕೇಳುತ್ತಾರೆ. ಆ ಪ್ರಶ್ನೆಗೆ ಇಲ್ಲ ಎಂಬ ಉತ್ತರ ನೀಡುತ್ತಾಳೆ ಸೀತಾ. ಸೀತಾಳ ಈ ಮಾತು ಮ್ಯಾನೇಜರ್‌ ಮತ್ತು ಭಾರ್ಗವಿ ಹೊಟ್ಟೆಯಲ್ಲಿ ಖಾರ ಕಲಸಿದಂತಾಗುತ್ತದೆ. ಇತ್ತ ಮ್ಯಾನೇಜರ್‌ನನ್ನು ಕೆಲಸದಿಂದ ವಜಾಗೊಳಿಸುವ ನಿರ್ಧಾರಕ್ಕೆ ಬಂದರೂ, ಆತನ ಹಿಂದೆ ಯಾರಿದ್ದಾರೆ ಎಂಬುದನ್ನು ತಿಳಿಯಲೆಂದೇ ಆತನನ್ನು ಅದೇ ಕೆಲಸದಲ್ಲಿ ಮುಂದುವರಿಸುತ್ತಾನೆ ರಾಮ್.‌

ಇದೆಲ್ಲದರ ಹಿಂದೆ ಯಾರಿರಬಹುದೆಂದು ಪತ್ತೆ ಮಾಡುವ ಸಲುವಾಗಿಯೇ, ರಾಮ್‌, ಚೇಂಬರ್‌ನಿಂದ ನೇರವಾಗಿ ಕೆಲಸಗಾರರು ಇರುವ ಕಡೆಗೇ ಆಗಮಿಸಿ, ಅಲ್ಲಿಯೇ ತನ್ನ ಹೊಸ ಚೇಂಬರ್‌ ಮಾಡಿಕೊಳ್ಳುತ್ತಾನೆ. ಹಣ ನುಂಗುತ್ತಿರುವವರು ಯಾರು ಎಂಬುದನ್ನು ಪತ್ತೆ ಮಾಡಲು ರಾಮ ಇದೀಗ ತನ್ನ ಬತ್ತಳಿಕೆಯಲ್ಲಿನ ಹೊಸ ಬಾಣವನ್ನೇ ಹೂಡಿದ್ದಾನೆ. ಅತ್ತ ಭಾರ್ಗವಿ ಸೀತಾಳ ವಿರುದ್ಧ ಸಿಟ್ಟಾಗಿದ್ದಾಳೆ. ಹಾಗಾದರೆ, ಮ್ಯಾನೇಜರ್‌ ಸತ್ಯ ಬಾಯ್ಬಿಡ್ತಾನಾ? ಭಾರ್ಗವಿಯ ಈ ಕೃತ್ಯ ಮಾವ ಸೂರ್ಯ ಪ್ರಕಾಶ್‌ ಗಮನಕ್ಕೆ ಬರುತ್ತಾ? ಅದೇ ಸದ್ಯದ ಕುತೂಹಲ.

ಮನರಂಜನೆ ಕುರಿತ ಇನ್ನಷ್ಟು ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ