Vinod Prabhakar: ಬಹಳ ವರ್ಷಗಳ ಬಳಿಕ ಒಟ್ಟಿಗೆ ಕಾಣಿಸಿಕೊಂಡ ವಿನೋದ್‌ ಪ್ರಭಾಕರ್‌ ಸೌಂದರ್ಯ ಜಯಮಾಲ; ಅಣ್ಣ ತಂಗಿಯ ಅಪರೂಪದ ಫೋಟೋ ವೈರಲ್‌

ಜೂನ್‌ 7 ರಂದು ನಡೆದ ಅಭಿಷೇಕ್‌ ಅಂಬರೀಶ್ - ಅವಿವಾ ಬಿದ್ದಪ್ಪ ಆರತಕ್ಷತೆಗೆ ಅನೇಕ ಸೆಲಬ್ರಿಟಿಗಳು ಆಗಮಿಸಿದ್ದರು. ಕನ್ನಡ ಮಾತ್ರವಲ್ಲದೆ, ತೆಲುಗು, ತಮಿಳು, ಬಾಲಿವುಡ್‌ನಿಂದ ಕೂಡಾ ಅನೇಕ ಗಣ್ಯರು ಈ ಕಾರ್ಯಕ್ರಮಕ್ಕೆ ಆಗಮಿಸಿ ಹೊಸ ವಧು ವರರಿಗೆ ಶುಭ ಹಾರೈಸಿದ್ದರು. ಕಾರ್ಯಕ್ರಮದಲ್ಲಿ ಸೌಂದರ್ಯ ಜಯಮಾಲ ಹಾಗೂ ವಿನೋದ್‌ ಪ್ರಭಾಕರ್‌ ಮುಖಾಮುಖಿ ಆಗಿದ್ದು ಮತ್ತೊಂದು ವಿಶೇಷ ಅಂತಾನೇ ಹೇಳಬಹುದು.

ಅಭಿ-ಅವಿವಾ ಆರತಕ್ಷತೆಯಲ್ಲಿ ಮುಖಾಮುಖಿಯಾದ ಅಣ್ಣ-ತಂಗಿ

ಪ್ರಭಾಕರ್‌ ಅವರಿಗೆ ಮೂವರು ಪತ್ನಿಯರು. ಮೊದಲ ಪತ್ನಿ ಆಲ್ಫಾನ್ಸೊ ಮೇರಿ. ಈ ದಂಪತಿಗೆ ಇಬ್ಬರು ಹೆಣ್ಣು ಒಬ್ಬ ಗಂಡು ಮಗ, ಆ ಮಗನೇ ವಿನೋದ್‌ ಪ್ರಭಾಕರ್‌, ಮೊದಲ ಪತ್ನಿಯಿಂದ ಡಿವೋರ್ಸ್‌ ಪಡೆದ ಪ್ರಭಾಕರ್‌ ನಂತರ ಜಯಮಾಲಾ ಅವರನ್ನು ಪ್ರೀತಿಸಿ ಮದುವೆ ಆದರು. ಪ್ರಭಾಕರ್‌ ಹಾಗೂ ಜಯಮಾಲಾ ದಂಪತಿಗೆ ಸೌಂದರ್ಯ ಜನಿಸಿದರು. ಸೌಂದರ್ಯ ಕೂಡಾ ಸ್ಯಾಂಡಲ್‌ವುಡ್‌ನಲ್ಲಿ 2 ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಸದ್ಯಕ್ಕೆ ಸೌಂದರ್ಯ ಸಿನಿಮಾಗಳಿಂದ ದೂರ ಇದ್ದರೂ ಸ್ಯಾಂಡಲ್‌ವುಡ್‌ ಕಾರ್ಯಕ್ರಮಗಳಿಗೆ ಹಾಜರಿರುತ್ತಾರೆ. ಮೊನ್ನೆ ಅಭಿ-ಅವಿವಾ ಆರತಕ್ಷತೆಯಲ್ಲಿ ಕೂಡಾ ಅಣ್ಣ ತಂಗಿಯರು ಎದುರಾಗಿ ಉಭಯ ಕುಶಲೋಪರಿ ವಿಚಾರಿಸಿದರು.

ಇದುವರೆಗೂ ವಿನೋದ್ ಹಾಗೂ ಸೌಂದರ್ಯ ಮಾಧ್ಯಮಗಳ ಎದುರು ಒಟ್ಟಿಗೆ ಕಾಣಿಸಿಕೊಂಡಿಲ್ಲ, ಒಬ್ಬರನ್ನೊಬ್ಬರು ಭೇಟಿ ಆಗಿದ್ದರೋ, ಇಲ್ಲವೋ ಯಾರಿಗೂ ಗೊತ್ತಿಲ್ಲ. ಒಟ್ಟಿಗೆ ಆಡುತ್ತಾ ಬೆಳೆದ ಈ ಅಣ್ಣ ತಂಗಿ ಬದಲಾದ ಸನ್ನಿವೇಶದಲ್ಲಿ ದೂರ ಉಳಿದಿದ್ದು ಬಿಟ್ರೆ, ಗಾಂಧಿನಗರ ಮಾತಾಡಿಕೊಳ್ಳುವ ರೀತಿ ಅವರ ನಡುವೆ ಸಂಬಂಧ ಹಳಸಿಲ್ಲ. ವಿನೋದ್ ಹಾಗೂ ಸೌಂದರ್ಯ ಇಂದಿಗೂ ಅಣ್ಣ ತಂಗಿಯೇ. ಸಮಯ-ಸಂದರ್ಭ ಈ ಅಣ್ಣ ತಂಗಿಯನ್ನು ಮತ್ತೆ ಬೆಸೆಯುವಂತೆ ಮಾಡಿದೆ. ಮೊನ್ನೆ ಬೆಂಗಳೂರಿನ ಪ್ಯಾಲೇಸ್ ಗ್ರೌಂಡ್‌ನಲ್ಲಿ ಅದ್ಧೂರಿಯಾಗಿ ನಡೆದ ಅಭಿಷೇಕ್ ಅಂಬರೀಷ್ ಹಾಗೂ ಅವಿವಾ ಬಿದಪ ಆರತಕ್ಷತೆಯಲ್ಲಿ ವಿನೋದ್ ಪ್ರಭಾಕರ್ ಹಾಗೂ ಸೌಂದರ್ಯ ಜಯಮಾಲಾ ಮುಖಾಮುಖಿಯಾಗಿದ್ದಾರೆ. ಬಹಳ ವರ್ಷದ ಬಳಿಕ ತಂಗಿಯನ್ನು ನೋಡಿದ ಖುಷಿ ವಿನೋದ್ ಅವರದ್ದು, ಅಣ್ಣನನ್ನೂ ನೋಡಿದ ಖುಷಿ ಸೌಂದರ್ಯ ಅವರಿಗೆ.

ಬಾಲ್ಯದ ದಿನಗಳಿಗೆ ಜಾರಿದ ಸೌಂದರ್ಯ-ವಿನೋದ್

ಭೇಟಿಯ ಕ್ಷಣದಲ್ಲಿ ಅಣ್ಣ ತಂಗಿ ಇಬ್ಬರೂ ಮತ್ತೆ ಬಾಲ್ಯದ ದಿನಗಳಿಗೆ ಜಾರಿದ್ದಾರೆ. ಬಾಲ್ಯದ ಆಟ-ತುಂಟಾಟ ನೆನಪುಕೊಂಡು ಒಂದಷ್ಟು ಚರ್ಚಿಸಿದ್ದಾರೆ. ಸೌಂದರ್ಯ ಅಣ್ಣ ವಿನೋದ್‌ ಪ್ರಭಾಕರ್‌, ಅತ್ತಿಗೆ ನಿಶಾ ವಿನೋದ್‌ ಜೊತೆ ಫೋಟೋಗೆ ಪೋಸ್‌ ಕೊಟ್ಟಿದ್ದಾರೆ. ಈ ಅಪರೂಪದ ಫೋಟೋ ಈಗ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ.

ವಿನೋದ್‌ ಪ್ರಭಾಕರ್‌ ಸಿನಿಮಾಗಳ ಬಗ್ಗೆ ಹೇಳುವುದಾರೆ ಕಳೆದ ವರ್ಷ ತೆರೆ ಕಂಡ ಫೈಟರ್‌ ಸಿನಿಮಾ ಬಳಿಕ ಹೊಸ ಸಿನಿಮಾ ಅನೌನ್ಸ್‌ ಮಾಡಿಲ್ಲ. ಕಳೆದ ವರ್ಷ ವಿನೋದ್‌ ರಾಜ್‌ ಟೈಗರ್‌ ಟಾಕೀಸ್‌ ಎಂಬ ಚಿತ್ರ ನಿರ್ಮಾಣ ಸಂಸ್ಥೆಯೊಂದನ್ನು ಆರಂಭಿಸಿದ್ದರು. ತಮ್ಮದೇ ಹೋಂ ಬ್ಯಾನರ್‌ ಅಡಿ ಲಂಕಾಸುರ ಸಿನಿಮಾ ನಿರ್ಮಿಸಿದ್ದರು.

ಮಂಡ್ಯದಲ್ಲಿ ಅಭಿಷೇಕ್‌ ಅವಿವಾ ಬೀಗರ ಊಟ

ಜೂನ್‌ 16 ಶುಕ್ರವಾರ ಮಂಡ್ಯದಲ್ಲಿ ಗೌಡರ ಸಂಪ್ರದಾಯದ ಪ್ರಕಾರ ಅಭಿ-ಅವಿವಾ ಬೀಗರ ಔತಣವನ್ನು ಏರ್ಪಡಿಸಲಾಗಿದೆ. ಈ ಕಾರ್ಯಕ್ರಮಕ್ಕೆ ಈಗಾಗಲೇ ಸಿದ್ದತೆ ಆರಂಭವಾಗಿದೆ. ಅಂಬರೀಶ್‌ ಕುಟುಂಬದ ಆಪ್ತ, ನಿರ್ಮಾಪಕ ರಾಕ್‌ಲೈನ್‌ ವೆಂಕಟೇಶ್‌ ಈ ಕಾರ್ಯಕ್ರಮದ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ. ಬೀಗರ ಔತಣಕ್ಕೆ ಸುಮಾರು 50 ಸಾವಿರ ಮಂದಿ ಆಗಮಿಸುವ ನಿರೀಕ್ಷೆ ಇದೆ. ಆದ್ದರಿಂದ ಸುಮಾರು 15 ಎಕರೆ ಪ್ರದೇಶದಲ್ಲಿ ಜರ್ಮನ್‌ ಟೆಂಟ್‌ ಹಾಕಿಸುತ್ತಿದ್ದು ಅಲ್ಲೇ ಊಟದ ವ್ಯವಸ್ಥೆ ಕೂಡಾ ಮಾಡಲಾಗುತ್ತಿದೆ. ಮಂಡ್ಯ ಜಿಲ್ಲೆಯ ಮದ್ದೂರು ತಾಲೂಕು ಗಜ್ಜಲಗೆರೆ ಕಾಲೊನಿ ಬಳಿ ಬೀಗರ ಊಟಕ್ಕೆ ಸಕಲ ತಯಾರಿ ನಡೆದಿದೆ. ಇತ್ತೀಚೆಗೆ ಪ್ರಧಾನಿ ಮೋದಿ ಮಂಡ್ಯಕ್ಕೆ ಆಗಮಿಸಿದ್ದಾಗ ಕಾರ್ಯಕ್ರಮ ನಡೆದಿದ್ದ ಸ್ಥಳದಲ್ಲೇ ಅಭಿಷೇಕ್ - ಅವಿವಾ ಬೀಗರ ಔತಣ ಜರುಗುತ್ತಿದೆ.