ರಕ್ತ ಚರಿತ್ರೆ ಬರೆಯಲು ಹೊರಟ ಯುವ ಕೈಗೆ ಮೆತ್ತಿದ ನೆತ್ತರು! ಈ ಚಿತ್ರಕ್ಕಿದೆ ಪುನೀತ್‌ ರಾಜ್‌ಕುಮಾರ್‌ ಜಾಕಿ ಚಿತ್ರದ ನಂಟು
Oct 11, 2024 03:47 PM IST
Share
ಯುವ ರಾಜ್‌ಕುಮಾರ್‌ ಎರಡನೇ ಸಿನಿಮಾ ಘೋಷಣೆ
- ಯುವ ಸಿನಿಮಾ ಬಳಿಕ ಯುವ ರಾಜ್‌ಕುಮಾರ್‌ ನಟನೆಯ ಎರಡನೇ ಸಿನಿಮಾ ಯಾವುದು? ಈ ಬಗ್ಗೆ ಕೆಲ ತಿಂಗಳಿಂದ ಇದ್ದ ಕುತೂಹಲಕ್ಕೆ ಇದೀಗ ತೆರೆ ಬಿದ್ದಿದೆ. ಎರಡನೇ ಸಿನಿಮಾ ಘೋಷಣೆ ಆಗಿದ್ದು, ನವೆಂಬರ್‌ 1ರಂದು ಶೀರ್ಷಿಕೆ ಅನಾವರಣವಾಗಲಿದೆ.
Yuva Rajkumar: ದೊಡ್ಮನೆಯ ಕುಡಿ ಯುವ ರಾಜ್‌ಕುಮಾರ್‌, ಯುವ ಸಿನಿಮಾ ಮೂಲಕ ಇದೇ ವರ್ಷ ಪ್ರೇಕ್ಷಕರ ಮುಂದೆ ಬಂದಿದ್ದರು. ಚೊಚ್ಚಲ ಸಿನಿಮಾಕ್ಕೆ ಮೆಚ್ಚುಗೆಯ ಜತೆಗೆ ಪ್ರೇಕ್ಷಕನೂ ರಾಜ್‌ ಕುಟುಂಬದ ಕುಡಿಯ ಚಿತ್ರವನ್ನು ಅಷ್ಟೇ ಅದ್ಧೂರಿಯಾಗಿಯೇ ಸ್ವಾಗತಿಸಿದ್ದರು. ಹೊಂಬಾಳೆ ಫಿಲಂಸ್‌ ಬ್ಯಾನರ್‌ನಲ್ಲಿ ನಿರ್ಮಾಣವಾಗಿದ್ದ ಆ ಚಿತ್ರವನ್ನು ನಿರ್ದೇಶಕ ಸಂತೋಷ್‌ ಆನಂದ್‌ರಾಮ್‌ ನಿರ್ದೇಶನ ಮಾಡಿದ್ದರು. ಯುವ ಸಿನಿಮಾ ರಿಲೀಸ್‌ ಆದ ಮೇಲೆ ಯುವರಾಜ್‌ಕುಮಾರ್‌ ಮುಂದಿನ ಪ್ರಾಜೆಕ್ಟ್‌ ಯಾವುದು ಎಂಬ ಬಗ್ಗೆ ಕುತೂಹಲ ಮೂಡಿತ್ತು. ಈಗ ಆ ಕುತೂಹಲ ತಣಿದಿದೆ. ಆಯುಧ ಪೂಜೆಗೆ ಹೊಸ ಚಿತ್ರದ ಅಪ್‌ಡೇಟ್ ಹೊರಬಿದ್ದಿದೆ.
ಆಯುಧ ಪೂಜೆ ನಿಮಿತ್ತ ಯುವ ರಾಜ್‌ಕುಮಾರ್‌ ಎರಡನೇ ಸಿನಿಮಾದ ಮಾಹಿತಿ ಸಿಕ್ಕಿದೆ. ರಕ್ತ ಅಂಟಿದ ಕೈಯಲ್ಲಿ ಲಾಂಗ್‌ ಹಿಡಿದಿರುವ ಭಂಗಿಯ ಅನೌನ್ಸ್‌ಮೆಂಟ್‌ ಪೋಸ್ಟರ್‌ ಹೊರಬಂದಿದೆ. ವಿಶೇಷ ಏನೆಂದರೆ, ಮಗನ ಸಿನಿಮಾಕ್ಕೆ ಚಿಕ್ಕಮ್ಮ ಅಶ್ವಿನಿ ಪುನೀತ್‌ ರಾಜ್‌ಕುಮಾರ್‌ ನಿರ್ಮಾಪಕರಾಗಿದ್ದಾರೆ, ಅಶ್ವಿನಿ ಜತೆಗೆ ಜಯಣ್ಣ ಮತ್ತು ಭೋಗೇಂದ್ರ, ಕಾರ್ತಿಕ್‌ ಮತ್ತು ಯೋಗಿ ಜಿ ರಾಜ್‌ ನಿರ್ಮಾಣದಲ್ಲಿ ಸಾಥ್‌ ನೀಡಿದ್ದಾರೆ.
ಹಾಗಾದರೆ ಈ ಸಿನಿಮಾವನ್ನು ನಿರ್ದೇಶಿಸುವವರು ಯಾರು? ದಯವಿಟ್ಟು ಗಮನಿಸಿ, ರತ್ನನ್‌ ಪ್ರಪಂಚ ಸಿನಿಮಾ ನಿರ್ದೇಶಿಸಿದ್ದ ರೋಹಿತ್‌ ಪದಕಿ ಈ ಚಿತ್ರಕ್ಕೆ ಆಕ್ಷನ್‌ ಕಟ್‌ ಹೇಳಲಿದ್ದಾರೆ. ಈ ಪೋಸ್ಟರ್‌ ಜತೆಗೆ ಚಿತ್ರದ ಶೀರ್ಷಿಕೆ ಮತ್ತು ಫಸ್ಟ್‌ ಲುಕ್‌ ಪೋಸ್ಟರ್‌ ಅನ್ನು ನವೆಂಬರ್‌ 1ರಂದು ಬಿಡುಗಡೆ ಮಾಡಲಾಗುವುದು ಎಂದೂ ಹೇಳಿಕೊಂಡಿದೆ ಚಿತ್ರತಂಡ. ಇನ್ನುಳಿದಂತೆ ಈ ಚಿತ್ರದ ತಾರಾಬಳಗದಲ್ಲಿ ಯಾರೆಲ್ಲ ಇರಲಿದ್ದಾರೆ, ತಾಂತ್ರಿಕ ವರ್ಗ ಹೇಗಿರಲಿದೆ ಎಂಬಿತ್ಯಾದಿ ವಿವರಗಳು ಇನ್ನೇನು ಶೀಘ್ರದಲ್ಲಿ ರಿವೀಲ್‌ ಆಗಲಿದೆ.
ಚಿತ್ರಕ್ಕೆ ಎಕ್ಕ ರಾಜಾ ರಾಣಿ ಶೀರ್ಷಿಕೆ?
ಸದ್ಯ ಸೋಷಿಯಲ್‌ ಮೀಡಿಯಾದಲ್ಲಿ ಒಂದು ಸುತ್ತು ಹಾಕಿ ಬಂದರೆ ಈ ಸಿನಿಮಾಕ್ಕೆ ಅಷ್ಟೇ ವಿಶೇಷವಾದ ಶೀರ್ಷಿಕೆಯನ್ನೇ ಇಡಲಾಗದೆ ಎನ್ನಲಾಗುತ್ತಿದೆ. ಅಚ್ಚರಿಯ ವಿಚಾರ ಏನೆಂದರೆ ಈ ಚಿತ್ರಕ್ಕೂ ಪುನೀತ್‌ ರಾಜ್‌ಕುಮಾರ್‌ ನಟನೆಯ ಕ್ಲಾಸಿಕ್‌ ಜಾಕಿ ಸಿನಿಮಾಕ್ಕೂ ಒಂದು ನಂಟಿದೆ ಅಂದೇನೆಂದರೆ, ಜಾಕಿ ಸಿನಿಮಾದಲ್ಲಿ ಎಕ್ಕ ರಾಜಾ ರಾಣಿ ನಿನ್ನ ಕೈಯೊಳಗೆ.. ಹಿಡಿ ಮಣ್ಣು ನಿನ್ನ ಬಾಯೊಳಗೆ.. ಎಂಬ ಹಾಡಿದೆ. ಈಗ ಇದೇ ಹಾಡಿನ ಮೊದಲ ಮೂರು ಪದ ಅಂದರೆ, ಎಕ್ಕ ರಾಜಾ ರಾಣಿಯನ್ನೇ ಸಿನಿಮಾ ಶೀರ್ಷಿಕೆ ಮಾಡಿಕೊಂಡಿದೆ ಈ ಚಿತ್ರತಂಡ. ಈ ಬಗ್ಗೆ ನವೆಂಬರ್‌ 1ರಂದು ಅಧಿಕೃತ ಮಾಹಿತಿ ಹೊರಬೀಳಲಿದೆ.
ಉತ್ತರಕಾಂಡ ಸಿನಿಮಾ ಏನಾಯ್ತು?
ನಿರ್ದೇಶಕ ರೋಹಿತ್‌ ಪದಕಿ ಸದ್ಯ ಇದೇ ಕಾರ್ತಿಕ್‌ ಗೌಡ ಮತ್ತು ಯೋಗಿ ಜಿ ರಾಜ್‌ ನಿರ್ಮಾಣ ಮಾಡುತ್ತಿರುವ ಉತ್ತರಕಾಂಡ ಸಿನಿಮಾ ನಿರ್ದೇಶನ ಮಾಡುತ್ತಿದ್ದಾರೆ. ಡಾಲಿ ಧನಂಜಯ್‌ ನಾಯಕನಾಗಿ ನಟಿಸಿರುವ ಈ ಸಿನಿಮಾ ಈಗಾಗಲೇ ಶೂಟಿಂಗ್‌ ಆರಂಭಿಸಿದೆ. ಒಂದಷ್ಟು ಭಾಗದ ಚಿತ್ರೀಕರಣವೂ ಮುಗಿದಿದೆ. ಈಗ ಇದೇ ನಿರ್ದೇಶಕರು ಯುವ ರಾಜ್‌ಕುಮಾರ್‌ ಸಿನಿಮಾಕ್ಕೂ ನಿರ್ದೇಶನ ಮಾಡಲಿದ್ದಾರೆ.