Tamil Actor Vishal: 'ಮಾರ್ಕ್‌ ಆಂಟನಿ' ಚಿತ್ರೀಕರಣದ ವೇಳೆ ಅವಘಡ.. ತಮಿಳು ನಟ ವಿಶಾಲ್ ಪ್ರಾಣಾಪಾಯದಿಂದ ಪಾರು!
Feb 23, 2023 10:01 AM IST
Share
ಚಿತ್ರೀಕರಣದ ವೇಳೆ ನಡೆದ ಘಟನೆ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ
- ಚಿತ್ರೀಕರಣದ ವೇಳೆ ಲಾರಿ ನಿಯಂತ್ರಣ ತಪ್ಪಿ, ನಿಲ್ಲಬೇಕಾದ ಕಡೆ ನಿಲ್ಲದೆ ಮುಂದೆ ಬಂದಿದೆ. ಪರಿಸ್ಥಿತಿ ಅರ್ಥವಾಗುತ್ತಿದ್ದಂತೆ ಅಲ್ಲಿದ್ದವರು ವಿಶಾಲ್ ಅವರನ್ನು ದೂರ ಎಳೆದಿದ್ದಾರೆ. ಈ ವಿಡಿಯೋ ಈಗ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ.
ಸಿನಿಮಾ ಚಿತ್ರೀರಕಣದ ವೇಳೆ ಅವಘಡ ಸಂಭವಿಸುತ್ತಲೇ ಇರುತ್ತದೆ. ಕೆಲವೊಮ್ಮೆ ಸಣ್ಣ ಪುಟ್ಟ ಗಾಯಗಳಿಂದ ಕಲಾವಿದರು, ತಂತ್ರಜ್ಞರು ಪಾರಾದರೆ ಕೆಲವೊಮ್ಮೆ ಗಂಭೀರ ಗಾಯಗಳಾಗುತ್ತವೆ. ಆದರೆ ಇನ್ನೂ ಕೆಲವೆಡೆ ಚಿತ್ರತಂಡದ ಸದಸ್ಯರು ಪ್ರಾಣ ಕಳೆದುಕೊಂಡಿರುವ ಉದಾಹರಣೆ ಕೂಡಾ ಇದೆ.
ಚೆನ್ನೈನಲ್ಲಿ ನಡೆಯುತ್ತಿದ್ದ ಶೂಟಿಂಗ್‌
ತಮಿಳಿನ 'ಮಾರ್ಕ್‌ ಆಂಟನಿ' ಸಿನಿಮಾ ಚಿತ್ರೀಕರಣದ ವೇಳೆ ಅವಘಡ ಸಂಭವಿಸಿದ್ದು ತಮಿಳು ನಟ ವಿಶಾಲ್ ಕೂದಲೆಳೆ ಅಂತರದಲ್ಲಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ವಿಶಾಲ್ ಅಭಿನಯದ 'ಮಾರ್ಕ್‌ ಆಂಟನಿ' ಸಿನಿಮಾ ಚೆನ್ನೈ ಸ್ಟುಡಿಯೋವೊಂದರಲ್ಲಿ ನಡೆಯುತ್ತಿದೆ. ಆಕ್ಷನ್‌ ದೃಶ್ಯವೊಂದರ ಚಿತ್ರೀಕರಣದ ಸಮಯದಲ್ಲಿ ಈ ಘಟನೆ ಸಂಭವಿಸಿದೆ. ಬಾಂಬ್‌ ಸಿಡಿದು ನಾಯಕ ಕೆಳಗೆ ಬೀಳುತ್ತಾನೆ, ಈ ವೇಳೆ ಹೀರೋ ಹಿಂಬದಿಯಿಂದ ಲಾರಿಯೊಂದು ಬರುವ ದೃಶ್ಯವನ್ನು ಚಿತ್ರೀಕರಿಸಲಾಗುತ್ತಿತ್ತು. ಆದರೆ ಚಿತ್ರೀಕರಣದ ವೇಳೆ ಲಾರಿ ನಿಯಂತ್ರಣ ತಪ್ಪಿ, ನಿಲ್ಲಬೇಕಾದ ಕಡೆ ನಿಲ್ಲದೆ ಮುಂದೆ ಬಂದಿದೆ. ಪರಿಸ್ಥಿತಿ ಅರ್ಥವಾಗುತ್ತಿದ್ದಂತೆ ಅಲ್ಲಿದ್ದವರು ವಿಶಾಲ್ ಅವರನ್ನು ದೂರ ಎಳೆದಿದ್ದಾರೆ. ಈ ವಿಡಿಯೋ ಈಗ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ.
ದೇವರಿಗೆ ಧನ್ಯವಾದ ಎಂದ ವಿಶಾಲ್
ವಿಶಾಲ್ ಈ ವಿಡಿಯೋವನ್ನು ತಮ್ಮ ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ''ಕೆಲವೇ ಸೆಕೆಂಡ್‌ಗಳಲ್ಲಿ, ಕೆಲವೇ ಇಂಚಿನ ಅಂತರದಲ್ಲಿ ನನ್ನ ಜೀವಕ್ಕೆ ಅಪಾಯ ತಪ್ಪಿದೆ. ಇದಕ್ಕಾಗಿ ದೇವರಿಗೆ ಧನ್ಯವಾದ ಹೇಳುತ್ತೇನೆ. ಕೆಲವು ಸಮಯದ ನಂತರ ಮತ್ತೆ ಚಿತ್ರೀಕರಣ ಮುಂದುವರೆಸಿದ್ದೇವೆ'' ಎಂದು ವಿಶಾಲ್ ಬರೆದುಕೊಂಡಿದ್ದಾರೆ. ವಿಡಿಯೋ ನೋಡಿದವರು ಶಾಕ್‌ ಆಗಿದ್ದಾರೆ. ದಯವಿಟ್ಟು ಇಂತಹ ಆಕ್ಷನ್‌ ಸನ್ನಿವೇಶಗಳಲ್ಲಿ ಬಹಳ ಮುನ್ನೆಚರಿಕೆ ವಹಿಸಿ, ನಿಮ್ಮ ಸೇಫ್ಟಿ ಬಹಳ ಮುಖ್ಯ ಎಂದು ಕಮೆಂಟ್‌ ಮಾಡುತ್ತಿದ್ದಾರೆ. ವಿಶಾಲ್ ಈ ರೀತಿ ಶೂಟಿಂಗ್‌ ಸಮಯದಲ್ಲಿ ಗಾಯಗೊಂಡಿರುವುದು ಇದೇ ಮೊದಲಲ್ಲ. 'ಲಾಠಿ' ಚಿತ್ರೀಕರಣದ ಸಮಯದಲ್ಲಿ ಕೂಡಾ ವಿಶಾಲ್ ಗಾಯಗೊಂಡಿದ್ದರು. ಆ ವಿಷಯವನ್ನು ಕೂಡಾ ಅವರು ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದರು.
2 ಸಿನಿಮಾಗಳಲ್ಲಿ ಬ್ಯುಸಿ ಇರುವ ನಟ
ವಿಶಾಲ್ 1989 ರಲ್ಲಿ ಬಾಲನಟನಾಗಿ ಚಿತ್ರರಂಗಕ್ಕೆ ಬಂದರು. 2004 ರಲ್ಲಿ ಚೆಲ್ಲಮೆ ಎಂಬ ಚಿತ್ರದಲ್ಲಿ ಲೀಡ್‌ ರೋಲ್‌ನಲ್ಲಿ ನಟಿಸುವ ಮೂಲಕ ಸೆಕೆಂಡ್‌ ಇನ್ನಿಂಗ್ಸ್‌ ಆರಂಭಿಸಿದ ವಿಶಾಲ್, ತಿಮಿರು, ಸತ್ಯಂ, ಪಿಸ್ತಾ, ಅವನ್‌ ಇವನ್‌, ಪೂಜೈ, ವಿಲನ್‌, ಅಯೋಗ್ಯ, ಚಕ್ರ, ಎನಿಮಿ ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಸದ್ಯಕ್ಕೆ ಅವರು ತುಪ್ಪರಿವಾಲನ್‌ 2, ಮಾರ್ಕ್‌ ಆಂಟೋನಿ ಸಿನಿಮಾಗಳಲ್ಲಿ ಬ್ಯುಸಿ ಇದ್ದಾರೆ.
ಎಂಜಿಆರ್‌ ಫೋಟೋವನ್ನು ಹಚ್ಚೆ ಹಾಕಿಸಿಕೊಂಡ ವಿಶಾಲ್
ಕೆಲವು ದಿನಗಳ ಹಿಂದೆ ನಟ ವಿಶಾಲ್, ತಮ್ಮ ಎದೆ ಮೇಲೆ ಎಂಜಿಆರ್‌ ಟ್ಯಾಟೂ ಹಾಕಿಸಿಕೊಂಡಿದ್ದರು. ಎಂಜಿಆರ್‌ ಮೇಲಿನ ಗೌರವದಿಂದ ವಿಶಾಲ್ ಈ ರೀತಿ ಟ್ಯಾಟೂ ಹಾಕಿಸಿಕೊಂಡಿದ್ದಾರೋ ಅಥವಾ 'ಮಾರ್ಕ್‌ ಆಂಟೋನಿ' ಚಿತ್ರಕ್ಕಾಗಿ ಈ ಹಚ್ಚೆ ಹಾಕಿಸಿಕೊಂಡಿದ್ದಾರೋ ಎಂಬುದು ಮಾತ್ರ ಗೊತ್ತಿಲ್ಲ. ಇದಕ್ಕೂ ಮುನ್ನ ವಿಶಾಲ್, ತಾವು ಎಂಜಿಆರ್‌ ಅವರ ದೊಡ್ಡ ಅಭಿಮಾನಿ ಎಂದು ಅನೇಕ ವೇದಿಕೆಗಳಲ್ಲಿ ಹೇಳಿದ್ದರು. ಈ ಫೋಟೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿತ್ತು.