ಮಗನಿಗಾಗಿ ಅಪ್ಪನ ತ್ಯಾಗ: ರಾಮ್‌ಚರಣ್‌ ಗೇಮ್ ಚೇಂಜರ್ ಚಿತ್ರಕ್ಕಾಗಿ ತಮ್ಮ ವಿಶ್ವಂಭರ ಸಿನಿಮಾ ರಿಲೀಸ್ ಮುಂದೂಡಿದ ಚಿರಂಜೀವಿ
Oct 12, 2024 02:16 PM IST
Share
ರಾಮ್‌ಚರಣ್‌ ಗೇಮ್ ಚೇಂಜರ್ ಚಿತ್ರಕ್ಕಾಗಿ ಮೆಗಾಸ್ಟಾರ್‌ ಚಿರಂಜೀವಿ ತಮ್ಮ ವಿಶ್ವಂಭರ ಸಿನಿಮಾ ರಿಲೀಸ್ ದಿನಾಂಕವನ್ನು ಮುಂದೂಡಿದ್ದಾರೆ. ಇದಕ್ಕಾಗಿ ನಿರ್ಮಾಪಕ ದಿಲ್ ರಾಜು ಚಿರಂಜೀವಿಗೆ ಧನ್ಯವಾದ ಅರ್ಪಿಸಿದ್ದಾರೆ.
ರಾಮ್ ಚರಣ್‌ ಅಭಿನಯದ ಗೇಮ್ ಚೇಂಜರ್ ಸಿನಿಮಾ ಇದೇ ವರ್ಷ ಕ್ರಿಸ್‌ಮಸ್‌ನಲ್ಲಿ ಬಿಡುಗಡೆ ಆಗಬೇಕಿತ್ತು. ಆದರೆ ಕಾರಣಾಂತರಗಳಿಂದ ಚಿತ್ರವನ್ನು ಜನವರಿಗೆ ಮುಂದೂಡಲಾಗಿದೆ. ಚಿತ್ರತಂಡ ಹೊಸ ರಿಲೀಸ್ ದಿನಾಂಕವನ್ನು ಅನೌನ್ಸ್‌ ಮಾಡಿದೆ. ರಾಮ್ ಚರಣ್‌ ಫ್ಯಾನ್ಸ್‌, ಸಿನಿಮಾಗಾಗಿ ಎದುರು ನೋಡುತ್ತಿದ್ದಾರೆ.
ಕೊನೆಗೂ ರಾಮ್ ಚರಣ್‌ ಅಭಿನಯದ ಗೇಮ್ ಚೇಂಜರ್ ಸಿನಿಮಾ ಬಿಡುಗಡೆ ದಿನಾಂಕದ ಗೊಂದಲ ಪರಿಹಾರವಾಗಿದೆ. ಈ ಸಿನಿಮಾ ಕ್ರಿಸ್‌ಮಸ್‌ಗೆ ಬರಲಿದೆ ಎಂದು ನಿರ್ಮಾಪಕ ದಿಲ್ ರಾಜು ಮೊದಲು ಅನೌನ್ಸ್‌ ಮಾಡಿದ್ದರು. ಆದರೆ ಚಿತ್ರತಂಡ ಈಗ ಹೊಸ ರಿಲೀಸ್ ಡೇಟ್‌ ಅನೌನ್ಸ್‌ ಮಾಡಿದೆ. ಇದು ರಾಮ್ ಚರಣ್‌ ಅಭಿಮಾನಿಗಳಿಗೆ ಖುಷಿ ನೀಡಿದೆ. ಹಾಗೇ ನಿರ್ಮಾಪಕ ದಿಲ್ ರಾಜು ಮೆಗಾಸ್ಟಾರ್‌ ಚಿರಂಜೀವಿಗೆ ಧನ್ಯವಾದ ಕೂಡಾ ಹೇಳಿದ್ದಾರೆ.
ಜನವರಿಗೆ ರಿಲೀಸ್ ಆಗಬೇಕಿದ್ದ ವಿಶ್ವಂಭರ
ರಾಮ್ ಚರಣ್‌ ಸಿನಿಮಾ ರಿಲೀಸ್ ಡೇಟ್‌ ಫಿಕ್ಸ್‌ ಆಗುವುದಕ್ಕೂ ಮೆಗಾಸ್ಟಾರ್‌ ಚಿರಂಜೀವಿಗೂ ಖಂಡಿತ ಕನೆಕ್ಷನ್‌ ಇದೆ. ಏಕೆಂದರೆ ಸದ್ಯಕ್ಕೆ ಮೆಗಾಸ್ಟಾರ್‌, ವಿಶ್ವಂಭರ ಸಿನಿಮಾ ಕೆಲಸದಲ್ಲಿ ಬ್ಯುಸಿ ಇದ್ದಾರೆ. ಸಿನಿಮಾ ಚಿತ್ರೀಕರಣ ಮುಗಿದಿದ್ದು ಪೋಸ್ಟ್ ಪ್ರೊಡಕ್ಷನ್ ಕೆಲಸ ಆರಂಭವಾಗಿದೆ. ಚಿರಂಜೀವಿ ಡಬ್ಬಿಂಗ್‌ ಮಾಡುತ್ತಿದ್ದು ಸಿನಿಮಾ ಟೀಸರ್ ವಿಜಯದಶಮಿಯಂದು ರಿಲೀಸ್ ಆಗಿದೆ. ಈ ಸಿನಿಮಾ ಜನವರಿಯಲ್ಲಿ ಸಂಕ್ರಾಂತಿಗೆ ಬಿಡುಗಡೆ ಆಗಬೇಕಿತ್ತು. ಆದರೆ ಅದೇ ಸಮಯಕ್ಕೆ ಗೇಮ್ ಚೇಂಜರ್ ರಿಲೀಸ್ ಆದರೆ, ಅಪ್ಪ ಮಗನ ಸಿನಿಮಾ ಕ್ಲಾಷ್‌ ಆಗುತ್ತೆ. ಇದೇ ಕಾರಣಕ್ಕೆ ತಮ್ಮ ಸಿನಿಮಾ ಮುಂದೂಡುವಂತೆ ದಿಲ್ ರಾಜು, ಚಿರಂಜೀವಿಗೆ ಮನವಿ ಮಾಡಿದ್ದು, ಅವರೂ ಒಪ್ಪಿಕೊಂಡಿದ್ದಾರಂತೆ. ಅದ್ದರಿಂದ ದಿಲ್ ರಾಜು, ಚಿರಂಜೀವಿಗೆ ಧನ್ಯವಾದ ಅರ್ಪಿಸಿದ್ದಾರೆ.
ಜನವರಿ 10ಕ್ಕೆ ಗೇಮ್ ಚೇಂಜರ್ ರಿಲೀಸ್
ಅಂದಹಾಗೆ ಗೇಮ್ ಚೇಂಜರ್ ಸಿನಿಮಾ ಮುಂದಿನ ವರ್ಷ ಜನವರಿ 10 ರಂದು ರಿಲೀಸ್ ಮಾಡಲು ಎಲ್ಲಾ ತಯಾರಿ ನಡೆಸಿದ್ದು ಶೀಘ್ರದಲ್ಲೇ ಚಿತ್ರತಂಡ ಅಧಿಕೃತ ಪ್ರಕಟಣೆ ಹೊರಡಿಸಲಿದೆ. ಚಿರಂಜೀವಿ ನಟನೆಯ ವಿಶ್ವಂಭರ ಬದಲಿಗೆ ಜನವರಿ 10 ರಂದು ರಾಮ್ ಚರಣ್‌ ಅಭಿನಯದ ಗೇಮ್ ಚೇಂಜರ್ ರಿಲೀಸ್ ಆಗಲಿದೆಯಂತೆ. ಗೇಮ್ ಚೇಂಜರ್ ಚಿತ್ರವನ್ನು ತಮಿಳಿನ ಸ್ಟಾರ್ ನಿರ್ದೇಶಕ, ಶಂಕರ್ ನಿರ್ದೇಶಿಸಿದ್ದಾರೆ. ಸದ್ಯ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ನಡೆಯುತ್ತಿವೆ. ಇತ್ತೀಚೆಗಷ್ಟೇ ಈ ಸಿನಿಮಾದಿಂದ ಎರಡನೇ ಹಾಡು 'ರಾ ಮಚ್ಚಾ ಮಚ್ಚಾ' ಬಿಡುಗಡೆ ಆಗಿತ್ತು. ಗೇಮ್ ಚೇಂಜರ್ ಟೀಸರ್ ದಸರಾ ಸಮಯಕ್ಕೆ ರಿಲೀಸ್ ಮಾಡಲಿದ್ದೇವೆ ಎಂದು ಸಂಗೀತ ನಿರ್ದೇಶಕ ಥಮನ್ ಅನೌನ್ಸ್‌ ಮಾಡಿದ್ದರು. ಆದರೆ ನಂತರ , ದಸರಾಗೆ ಟೀಸರ್ ಬಿಡುಗಡೆ ಆಗುತ್ತಿಲ್ಲ ಎಂದು ಹೇಳಿ ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿದ್ದರು.
ದಿಲ್ ರಾಜು ನಿರ್ಮಾಣದ ಸಿನಿಮಾ
ಗೇಮ್ ಚೇಂಜರ್ ಸಿನಿಮಾದಲ್ಲಿ ರಾಮ್ ಚರಣ್‌ಗೆ ನಾಯಕಿಯಾಗಿ ಕಿಯಾರಾ ಅಡ್ವಾಣಿ ನಟಿಸಿದ್ದಾರೆ. ಜೊತೆಗೆ ಎಸ್‌ಜೆ ಸೂರ್ಯ, ಅಂಜಲಿ, ಶ್ರೀಕಾಂತ್, ಜಯರಾಮ್, ಸುನೀಲ್ ಹಾಗೂ ಇನ್ನಿತರರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಶ್ರೀವೆಂಕಟೇಶ್ವರ ಕ್ರಿಯೇಷನ್ಸ್ ಬ್ಯಾನರ್ ಅಡಿಯಲ್ಲಿ ದಿಲ್ ರಾಜು ಮತ್ತು ಸಿರೀಶ್ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಸುಮಾರು 300 ಕೋಟಿ ಬಜೆಟ್‌ನಲ್ಲಿ ಈ ಸಿನಿಮಾ ನಿರ್ಮಾಣವಾಗಿದೆ.