ವಿಜಯ್‌ ದೇವರಕೊಂಡ ನಟನೆಯ ಖುಷಿ ಚಿತ್ರದ ಒಟಿಟಿ ಆಗಮನಕ್ಕೆ ಹೀಗೊಂದು ದಿನಾಂಕ

Kushi OTT Update: ವಿಜಯ್ ದೇವರಕೊಂಡ ಸಮಂತಾ ಜೋಡಿಯಾಗಿ ನಟಿಸಿದ ಖುಷಿ ಸಿನಿಮಾ ಮೆಚ್ಚುಗೆ ಜತೆಗೆ ಕಲೆಕ್ಷನ್‌ ವಿಚಾರದಲ್ಲೂ ಸದ್ದು ಮಾಡಿತ್ತು. ಸೆಪ್ಟೆಂಬರ್ 1ರಂದು ಥಿಯೇಟರ್‌ನಲ್ಲಿ ಬಿಡುಗಡೆಯಾದ ಖುಷಿ ಚಿತ್ರ ಫ್ಯಾನ್ಸ್‌ ಮಾತ್ರವಲ್ಲದೆ ಫ್ಯಾಮಿಲಿ ಪ್ರೇಕ್ಷಕರನ್ನೂ ಸೆಳೆದಿತ್ತು. ವಿಜಯ್‌ ಮತ್ತು ಸಮಂತಾ ಕೆಮಿಸ್ಟ್ರಿಯೂ ವರ್ಕೌಟ್‌ ಆಗಿತ್ತು. ಮೂಲ ತೆಲುಗಿನಲ್ಲಿ ನಿರ್ಮಾಣವಾಗಿದ್ದ ಈ ಸಿನಿಮಾ, ಕನ್ನಡ, ತಮಿಳು, ಹಿಂದಿಯಲ್ಲಿಯೂ ಬಿಡುಗಡೆ ಆಗಿತ್ತು. ಇದೀಗ ಇದೇ ಸಿನಿಮಾ ಚಿತ್ರಮಂದಿರದಲ್ಲಿರುವಾಗಲೇ ಒಟಿಟಿ ಬಿಡುಗಡೆಯ ಬಗ್ಗೆ ದಿನವೊಂದು ಸೋಷಿಯಲ್‌ ಮೀಡಿಯಾದಲ್ಲಿ ಸುಳಿದಾಡುತ್ತಿದೆ.

ಚಿತ್ರಮಂದಿರದಲ್ಲಿ ಸಿನಿಮಾ ನೋಡಿದ ಕೆಲವರು, ಒಟಿಟಿಗೆ ಯಾವಾಗ ಬರಲಿದೆ ಎಂದು ಕಾಯುತ್ತಿದ್ದಾರೆ. ಹೀಗಿರುವಾಗಲೇ ಅವರಿಗೂ ಸಿಹಿ ಸುದ್ದಿಯೊಂದು ಸಿಕ್ಕಿದೆ. ನೆಟ್‌ಫ್ಲಿಕ್ಸ್‌ ಸಂಸ್ಥೆ ವಿಜಯ್ ದೇವರಕೊಂಡ ಮತ್ತು ಸಮಂತಾ ಜೋಡಿಯ ಖುಷಿ ಚಿತ್ರದ ಡಿಜಿಟಲ್ ಸ್ಟ್ರೀಮಿಂಗ್ ಹಕ್ಕುಗಳನ್ನು ಖರೀದಿಸಿದೆ. ಈ ವೇದಿಕೆ ಮೂಲಕ ಅಕ್ಟೋಬರ್ 6ರಂದು ಖುಷಿ ಸಿನಿಮಾದ ಡಿಜಿಟಲ್‌ ಸ್ಟ್ರೀಮಿಂಗ್‌ ಶುರುವಾಗಲಿದೆ ಎನ್ನಲಾಗುತ್ತಿದೆ. ಈ ಬಗ್ಗೆ ಚಿತ್ರತಂಡದೇ ಅಧಿಕೃತವಾಗಿ ಘೋಷಣೆ ಮಾಡಬೇಕಿದೆ.

ಇದನ್ನೂ ಓದಿ: ಆಧುನಿಕ ಪಂಚ ಪಾಂಡವರ ವರಾಹ ಚಕ್ರಂ ಚಿತ್ರದಲ್ಲಿ ಪ್ರೇಮಾ

ಶಿವ ನಿರ್ವಾಣ ನಿರ್ದೇಶನದ ಮೂಡಿಬಂದಿದ್ದ ಖುಷಿ ಸಿನಿಮಾದಲ್ಲಿ ವೆನ್ನೆಲ ಕಿಶೋರ್, ರಾಹುಲ್ ರಾಮಕೃಷ್ಣ, ಶ್ರೀಕಾಂತ್ ಅಯ್ಯಂಗಾರ್, ಶರಣ್ಯ ಪ್ರದೀಪ್, ಜಯರಾಮ್, ಸಚಿನ್ ಕೇಡ್ಕರ್, ಮುರಳಿ ಶರ್ಮಾ, ಲಕ್ಷ್ಮಿ, ಅಲಿ, ರೋಹಿಣಿ ಮತ್ತು ಇತರರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಮೈತ್ರಿ ಮೂವೀ ಮೇಕರ್ಸ್ ಬ್ಯಾನರ್ ಅಡಿಯಲ್ಲಿ ನವೀನ್ ಯೆರ್ನೇನಿ ಮತ್ತು ರವಿಶಂಕರ್ ಯಲಮಂಚಿಲಿ ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ.

ಲೈಗರ್‌ ಸೋಲು ಮರೆಸಿದ ಖುಷಿ

ಕಳೆದ ವರ್ಷ ತೆರೆ ಕಂಡಿದ್ದ ವಿಜಯ್‌ ದೇವರಕೊಂಡ ಅಭಿನಯದ ಲೈಗರ್‌ ಸಿನಿಮಾ ಹೀನಾಯ ಸೋಲು ಕಂಡಿತ್ತು. ಲೈಗರ್‌ ಸಿನಿಮಾ ಬಗ್ಗೆ ವಿಜಯ್‌ ದೇವರಕೊಂಡ ಮತ್ತು ಅಭಿಮಾನಿಗಳು ಹಾಗೂ ಚಿತ್ರತಂಡಕ್ಕೆ ಭಾರೀ ಭರವಸೆ ಇತ್ತು. ಚಿತ್ರತಂಡ ಕೂಡಾ ದೇಶದ ವಿವಿಧ ನಗರಗಳಿಗೆ ತೆರಳಿ ಪ್ರಮೋಷನ್‌ ಸಹ ಮಾಡಿತ್ತು. ಆದರೆ ಸಿನಿಮಾ ರಿಲೀಸ್‌ ಆದ ನಂತರ ಎಲ್ಲರಿಗೂ ಭಾರೀ ನಿರಾಸೆ ಕಾದಿತ್ತು. ಹೀನಾಯ ಸೋಲು ಕಂಡಿತ್ತು ಲೈಗರ್.‌ ಇದೀಗ ಖುಷಿ ಸಿನಿಮಾ ಮೂಲಕ ಗೆಲುವಿನ ಲಯಕ್ಕೆ ಮರಳಿದ್ದಾರೆ ದೇವರಕೊಂಡ.

ಇದನ್ನೂ ಓದಿ: ವರ್ಷಾ ಕಾವೇರಿ ಜತೆಗಿನ ಬ್ರೇಕಪ್‌ ಬಗ್ಗೆ ವರುಣ್‌ ಆರಾಧ್ಯ ಸ್ಪಷ್ಟನೆ; ಆಕೆ ಬಿಟ್ರೂ ಕರ್ಮ ನಿನ್ನನ್ನು ಸುಮ್ಮನೆ ಬಿಡಲ್ಲ ಎಂದ ನೆಟ್ಟಿಗರು

ಮನರಂಜನೆ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ