ಕನ್ನಡ ಸುದ್ದಿ  /  ಕ್ರಿಕೆಟ್  /  ತವರಿನಲ್ಲೇ ಸನ್​ರೈಸರ್ಸ್​ ಹೈದರಾಬಾದ್​ಗೆ ಹೀನಾಯ ಸೋಲು; ಕೊನೆಗೂ ಗೆದ್ದ ಆರ್​​​ಸಿಬಿಗೆ ಪ್ಲೇಆಫ್ ಕನಸು ಜೀವಂತ

ತವರಿನಲ್ಲೇ ಸನ್​ರೈಸರ್ಸ್​ ಹೈದರಾಬಾದ್​ಗೆ ಹೀನಾಯ ಸೋಲು; ಕೊನೆಗೂ ಗೆದ್ದ ಆರ್​​​ಸಿಬಿಗೆ ಪ್ಲೇಆಫ್ ಕನಸು ಜೀವಂತ

RCB beat SRH : ಸೀಸನ್​​-17ರ ಐಪಿಎಲ್​ನ 41ನೇ ಪಂದ್ಯದಲ್ಲಿ ಸನ್​​ರೈಸರ್ಸ್ ಹೈದರಾಬಾದ್ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಜಯದ ನಗೆ ಬೀರಿದೆ. ಸತತ 6 ಸೋಲುಗಳ ನಂತರ ಆರ್​ಸಿಬಿ ಗೆಲುವು ದಾಖಲಿಸಿದೆ.

ತವರಿನಲ್ಲೇ ಸನ್​ರೈಸರ್ಸ್​ ಹೈದರಾಬಾದ್​ಗೆ ಹೀನಾಯ ಸೋಲು; ಕೊನೆಗೂ ಗೆದ್ದ ಆರ್​​​ಸಿಬಿಗೆ ಪ್ಲೇಆಫ್ ಕನಸು ಜೀವಂತ
ತವರಿನಲ್ಲೇ ಸನ್​ರೈಸರ್ಸ್​ ಹೈದರಾಬಾದ್​ಗೆ ಹೀನಾಯ ಸೋಲು; ಕೊನೆಗೂ ಗೆದ್ದ ಆರ್​​​ಸಿಬಿಗೆ ಪ್ಲೇಆಫ್ ಕನಸು ಜೀವಂತ (AP)

ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB 2024) ಕೊನೆಗೂ ಜಯದ ನಗೆ ಬೀರಿದ್ದು, ಭರ್ಜರಿ ಕಂಬ್ಯಾಕ್ ಮಾಡಿದೆ. ಸತತ 6 ಸೋಲುಗಳ ನಂತರ ಗೆಲುವು ಕಂಡ ಆರ್​​ಸಿಬಿ, ತವರಿನ ಮೈದಾನದಲ್ಲಿ ಸನ್​ರೈಸರ್ಸ್ ಹೈದರಾಬಾದ್ (SRH) ತಂಡಕ್ಕೆ ಸೋಲುಣಿಸಿದೆ. 35 ರನ್​ಗಳಿಂದ ಸೋಲಿಸಿದ ಫಾಫ್ ಪಡೆ, ಟೂರ್ನಿಯಲ್ಲಿ ಎರಡನೇ ದಿಗ್ವಿಜಯ ಸಾಧಿಸಿದೆ. ಪಂಜಾಬ್ ಕಿಂಗ್ಸ್ ವಿರುದ್ಧ ತನ್ನ ಮೊದಲ ಗೆಲುವು ಸಾಧಿಸಿತ್ತು. ಇದೀಗ ತನ್ನ ಪ್ಲೇಆಫ್ ಆಸೆಯನ್ನು ಇನ್ನೂ ಜೀವಂತವಾಗಿಟ್ಟುಕೊಂಡಿದೆ.

ಟ್ರೆಂಡಿಂಗ್​ ಸುದ್ದಿ

ಹೈದರಾಬಾದ್​ನ ರಾಜೀವ್​ಗಾಂಧಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಆರ್​ಸಿಬಿ ಸತತ ಮೂರನೇ ಬಾರಿಗೆ 200ರ ಗಡಿ ದಾಟಿತು. ರಜತ್ ಪಾಟೀದಾರ್ ಅವರ ವೇಗದ ಅರ್ಧಶತಕ, ವಿರಾಟ್ ಕೊಹ್ಲಿ ಅವರ ಆಕರ್ಷಕ ಅರ್ಧಶತಕದ ನೆರವಿನಿಂದ ಬೆಂಗಳೂರು, 20 ಓವರ್​​ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 206 ರನ್ ಪೇರಿಸಿತು. ಜಯದೇವ್ ಉನಾದ್ಕತ್ 3, ಟಿ ನಟರಾಜನ್ 2 ವಿಕೆಟ್ ಪಡೆದು ಮಿಂಚಿದರು.

ಈ ಗುರಿ ಬೆನ್ನಟ್ಟಿದ ಸನ್​ರೈಸರ್ಸ್ ಹೈದರಾಬಾದ್, ಮತ್ತೆ ಬ್ಯಾಟಿಂಗ್ ನಡೆಸಲಿದೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ ಆರ್​​ಸಿಬಿ ಬೌಲರ್​​ಗಳು ಲಯಕ್ಕೆ ಮರಳುವ ಮೂಲಕ ಎದುರಾಳಿಗೆ ಆಘಾತ ನೀಡಿದರು. ಇದು ಎಸ್​​ಆರ್​ಹೆಚ್ ಬ್ಯಾಟರ್ಸ್​ ಕೂಡ ನಿರೀಕ್ಷಿಸಿರಲಿಲ್ಲ. ಸ್ಪಿನ್ನರ್​ಗಳು ಬಲಿಷ್ಠ ಬ್ಯಾಟಿಂಗ್ ವಿರುದ್ಧ ದರ್ಬಾರ್​ ನಡೆಸಿದರು. ಅಂತಿಮವಾಗಿ ಹೈದರಾಬಾದ್ 20 ಓವರ್​​ಗಳಲ್ಲಿ 8 ವಿಕೆಟ್​ಗೆ 171 ರನ್ ಗಳಿಸಿತು. ಕ್ಯಾಮರೂನ್ ಗ್ರೀನ್ ಕರಣ್ ಶರ್ಮಾ ಮತ್ತು ಸ್ವಪ್ನಿಲ್ ಸಿಂಗ್ ತಲಾ 2 ವಿಕೆಟ್ ಪಡೆದರು.

ಅದ್ಭುತ ಬೌಲಿಂಗ್ ನಡೆಸಿದ ಆರ್​ಸಿಬಿ

207 ರನ್​ಗಳ ಗುರಿ ಬೆನ್ನಟ್ಟಿದ ಎಸ್​ಆರ್​ಹೆಚ್​​ಗೆ ಆರ್​ಸಿಬಿ ಭಾರಿ ಆಘಾತ ನೀಡಿತು. ಆರೆಂಜ್ ಆರ್ಮಿ, ಆರ್​ಸಿಬಿ ಬೌಲರ್​ಗಳನ್ನು ಪುಡಿಗಟ್ಟುತ್ತದೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ ಆಗಿದ್ದೇ ಬೇರೆ. ಆರ್​ಸಿಬಿ ಬೌಲರ್​ಗಳು ಪವರ್​​ಪ್ಲೇನಲ್ಲಿ 4 ವಿಕೆಟ್​​ ಪಡೆದು ಮಿಂಚಿದರು. ಅಭಿಷೇಕ್ ಶರ್ಮಾ (31), ಟ್ರಾವಿಸ್ ಹೆಡ್ (1), ಏಡನ್ ಮಾರ್ಕ್ರಮ್ (7), ಹೆನ್ರಿಚ್ ಕ್ಲಾಸೆನ್ (7) ಬೇಗನೇ ನಿರ್ಗಮಿಸಿದರು. ಈ ಬ್ಯಾಟರ್ಸ್ ಕಳೆದ ಪಂದ್ಯಗಳಲ್ಲಿ ವಿಧ್ವಂಸ ಸೃಷ್ಟಿಸಿದ್ದರು.

ಪವರ್​ಪ್ಲೇ ಬಳಿಕವೂ ಎಸ್​​ಆರ್​​ಹೆಚ್​ ಬ್ಯಾಟಿಂಗ್​ ವಿಭಾಗ ಡಲ್ ಆಯಿತು. ನಿತೀಶ್ ರೆಡ್ಡಿ (13), ಅಬ್ದುಲ್ ಸಮದ್ (10) ಕೂಡ ನಿರಾಸೆ ಮೂಡಿಸಿದರು. ಆದರೆ ಪ್ಯಾಟ್ ಕಮಿನ್ಸ್ (31), ಶಹಬಾಜ್ ಅಹ್ಮದ್ (40) ಫೈಟ್​ ಬ್ಯಾಕ್ ನೀಡಲು ಪ್ರಯತ್ನಿಸಿದರು. ಆದರೆ ಸಾಧ್ಯವಾಗಲಿಲ್ಲ. ಭುವನೇಶ್ವರ್ ಕುಮಾರ್​ 13 ರನ್, ಜಯದೇವ್ ಉನಾದ್ಕತ್ 8 ರನ್ ಗಳಿಸಿದರು. 

ರಜತ್ ಪಾಟೀದಾರ್ ವೇಗದ ಅರ್ಧಶತಕ

ಮೊದಲು ಬ್ಯಾಟಿಂಗ್ ಮಾಡಿದ ಆರ್​ಸಿಬಿ ಪರ ಫಾಫ್ ಡು ಪ್ಲೆಸಿಸ್ 25 ರನ್ ಗಳಿಸಿ ಔಟಾದರು. ವಿಲ್ ಜಾಕ್ಸ್ (6) ಕೂಡ ಬೇಗನೇ ಮರಳಿದರು. ಈ ಹಂತದಲ್ಲಿ ಒಂದಾದ ವಿರಾಟ್ ಕೊಹ್ಲಿ ಮತ್ತು ರಜತ್ ಪಾಟೀದಾರ್​, ಅರ್ಧಶತಕದ ಪಾಲುದಾರಿಕೆ ನೀಡಿದರು. ಅಲ್ಲದೆ, ಪಾಟೀದಾರ್​​, ಮಯಾಂಕ್ ಮಾರ್ಕಂಡೆ ಬೌಲಿಂಗ್​ ಸತತ 4 ಸಿಕ್ಸರ್​​​ಗಳನ್ನು ಬಾರಿಸಿ ಕೇವಲ 19 ಎಸೆತಗಳಲ್ಲಿ 50 ರನ್​ಗಳ ವೇಗದ ಅರ್ಧಶತಕ ಬಾರಿಸಿದರು. ಇದು ಆರ್​ಸಿಬಿ ಪರ ದಾಖಲೆ ಎರಡನೇ ವೇಗದ ಅರ್ಧಶತಕ.

ಪಾಟೀದಾರ್ ಬಿರುಸಿನ ಬ್ಯಾಟಿಂಗ್ ನಡೆಸಿದರೆ, ವಿರಾಟ್ ಕೊಹ್ಲಿ ವಿಕೆಟ್ ಕಾಪಾಡುತ್ತಾ ನಿಧಾನಗತಿಯ ಅರ್ಧಶತಕ ಪೂರೈಸಿದರು. ರಜತ್ 20 ಎಸೆತಗಳಲ್ಲಿ 5 ಸಿಕ್ಸರ್, 2 ಬೌಂಡರಿ ಸಹಿತ 50 ರನ್ ಗಳಿಸಿದರೆ, ಕೊಹ್ಲಿ 43 ಎಸೆತಗಳಲ್ಲಿ 4 ಬೌಂಡರಿ, 1 ಸಿಕ್ಸರ್​ ಸಹಿತ 51 ರನ್ ಗಳಿಸಿದರು. ಇಬ್ಬರು ಸಹ ಜಯದೇವ್ ಉನಾದ್ಕತ್​ಗೆ ಬಲಿಯಾದರು. ಕೊನೆಯಲ್ಲಿ ಮಿಂಚಿದ ಕ್ಯಾಮರೂನ್ ಗ್ರೀನ್ ಅಜೇಯ 37 ರನ್​​ಗಳ ಕಾಣಿಕೆ ನೀಡಿದರೆ, ಮಹಿಪಾಲ್ ಲೊಮ್ರೋರ್ 7, ದಿನೇಶ್ ಕಾರ್ತಿಕ್ 11, ಸ್ವಪ್ನಿಲ್ ಸಿಂಗ್ 12 ರನ್ ಬಾರಿಸಿದರು.

ಇನ್ನಷ್ಟು ಕ್ರಿಕೆಟ್​ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.

IPL_Entry_Point