ಲಕ್ನೋ ಸೂಪರ್ ಜೈಂಟ್ಸ್ ತೊರೆಯಲಿದ್ದಾರೆ ಕೆಎಲ್ ರಾಹುಲ್? ಆರ್​​ಸಿಬಿ ಸೇರುವಂತೆ ಫ್ಯಾನ್ಸ್ ಒತ್ತಾಯ

ಭಾರತೀಯ ಕ್ರಿಕೆಟ್​​ನ ಪ್ರತಿಭಾವಂತ ಕ್ರಿಕೆಟಿಗ ಕೆಎಲ್ ರಾಹುಲ್ (KL Rahul) ಅವರು ತಾನೆಂಥ ಬ್ಯಾಟರ್​ ಎಂಬುದನ್ನು ಹಲವು ಬಾರಿ ಸಾಬೀತುಪಡಿಸಿದ್ದಾರೆ. ಐಪಿಎಲ್ (IPL) ಇತಿಹಾಸದಲ್ಲಿ ಪ್ರಮುಖ ರನ್ ಗಳಿಸಿದವರಲ್ಲಿ ಒಬ್ಬರಾದ ಕೆಎಲ್ ರಾಹುಲ್, ಲಕ್ನೋ ಸೂಪರ್ ಜೈಂಟ್ಸ್ (LSG) ತಂಡವನ್ನು ಮೊದಲ ಎರಡು ಸೀಸನ್‌ಗಳಲ್ಲಿ ಪ್ಲೇಆಫ್‌ಗೆ ಮುನ್ನಡೆಸಿದ್ದಾರೆ. ಮೇ 8ರಂದು ನಡೆದ ಸನ್​ರೈಸರ್ಸ್ ಹೈದರಾಬಾದ್ (SR) ವಿರುದ್ಧದ ಪಂದ್ಯದಲ್ಲಿ ರಾಹುಲ್ ನೇತೃತ್ವದ ಲಕ್ನೋ ತಂಡವು ಅತ್ಯಂತ ನಿರಾಶಾದಾಯಕ ಪ್ರದರ್ಶನ ಮಾಲೀಕರ ಕೋಪಕ್ಕೆ ಕಾರಣವಾಯಿತು. ಹೀಗಾಗಿ ಪಂದ್ಯದ ನಂತರ ಮಾಲೀಕರು, ನಾಯಕ ರಾಹುಲ್​ಗೆ ತರಾಟೆ ತೆಗೆದುಕೊಂಡಿದ್ದರು.

ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋವೊಂದು ವೈರಲ್ ಆಗಿದ್ದು, ರಾಹುಲ್ ಅವರ ಮೇಲೆ ಫ್ರಾಂಚೈಸಿ ಮಾಲೀಕ ಸಂಜೀವ್ ಗೋಯೆಂಕಾ ಕೂಗಾಡಿದ್ದಾರೆ. ಪಂದ್ಯದಲ್ಲಿ ಮಾಡಲಾದ ತಪ್ಪುಗಳ ಬಗ್ಗೆ ರಾಹುಲ್​ಗೆ ವಿವರಿಸಿದ್ದಾರೆ. ಸಾರ್ವಜನಿಕವಾಗಿ ರಾಹುಲ್​ರನ್ನು ಅವಮಾನಿಸಿದ್ದಾರೆ. ಆದರೆ ಕ್ಯಾಪ್ಟನ್​ ಬೇಸರದಿಂದ ಉತ್ತರಿಸುವುದನ್ನು ಈ ವಿಡಿಯೋದಲ್ಲಿ ಕಾಣಬಹುದು. ಸಂಜೀವ್ ಗೋಯೆಂಕಾ ವರ್ತನೆಗೆ ಅಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಭಾರತ ತಂಡದ ಹಿರಿಯ ಆಟಗಾರನಿಗೆ ಕ್ರಿಕೆಟ್ ಗಂಧ-ಗಾಳಿ ಗೊತ್ತಿಲ್ಲದ ವ್ಯಕ್ತಿ ಬುದ್ಧಿವಾದ ಹೇಳುತ್ತಿದ್ದಾರೆ ಎಂದು ಫ್ಯಾನ್ಸ್ ಕಿಡಿಕಾರಿದ್ದಾರೆ. ಲಕ್ನೋ ತ್ಯಜಿಸಿ ಆರ್​​ಸಿಬಿ ತಂಡವನ್ನು ಸೇರುವಂತೆ ರಾಹುಲ್​ಗೆ ಫ್ಯಾನ್ಸ್ ಕೇಳಿಕೊಂಡಿದ್ದಾರೆ.

ಈ ಘಟನೆ ಬೆನ್ನಲ್ಲೇ ಟೂರ್ನಿಯ ಬಳಿಕ ಕೆಎಲ್ ರಾಹುಲ್ ಅವರನ್ನು ಫ್ರಾಂಚೈಸಿಯಿಂದ ಬಿಡುಗಡೆಯಾಗುವ ಸಾಧ್ಯತೆಯಿದೆ. ಅಥವಾ ಕ್ರಿಕೆಟಿಗನೇ ಸ್ವತಃ ಎಲ್​ಎಸ್​ಜಿ ಶಿಬಿರದಿಂದ ಹೊರಬರುವ ಎಲ್ಲಾ ಸಾಧ್ಯತೆಗಳಿವೆ ಎಂದು ಹೇಳಲಾಗಿದೆ. ಕೆಲವು ವರದಿಗಳು ರಾಹುಲ್​ರನ್ನು ತಂಡದಿಂದ ಕೈಬಿಡಲು ಫ್ರಾಂಚೈಸಿ ನಿರ್ಧರಿಸಿದೆ ಎಂಬ ಸುದ್ದಿ ಹರಿದಾಡುತ್ತಿದೆ. 2025ರ ಮೆಗಾ ಹರಾಜಿನಲ್ಲಿ ಎಲ್​ಎಸ್​ಜಿ ನಾಯಕ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗುತ್ತಿದೆ. ಆದರೆ ಇದ್ಯಾವುದು ಸಹ ಅಧಿಕೃತ ಮಾಹಿತಿ ಅಲ್ಲ. ವದಂತಿಗಳು ಮಾತ್ರ ಎದ್ದಿವೆ. ಒಂದು ವೇಳೆ ಆತ ಹರಾಜಿಗೆ ಬಂದರೆ ಯಾವ ತಂಡ ಸೇರಬಹುದು?

ಇದನ್ನೂ ಓದಿ: ಕೆಎಲ್ ರಾಹುಲ್ ಮೇಲೆ ಕೂಗಾಡಿದ ಸಂಜೀವ್ ಗೋಯೆಂಕಾ; ಹಣ ಶಿಷ್ಟಾಚಾರ ಕಲಿಸಲ್ಲ ಎಂಬುದಕ್ಕೆ ಈ ವಿಡಿಯೋ ಸಾಕ್ಷಿ

ಕೆಎಲ್ ರಾಹಲ್​ ಖರೀದಿಸಲು ಆರ್​ಸಿಬಿಗೆ ಉತ್ತಮ ಅವಕಾಶ

ಒಂದು ವೇಳೆ ಕರ್ನಾಟಕದ ಆಟಗಾರ ಮೆಗಾ ಹರಾಜಿಗೆ ಬಂದಿದ್ದೇ ಆದರೆ ಬೃಹತ್ ಮೊತ್ತಕ್ಕೆ ಸೇಲಾಗುವುದು ಖಚಿತ. ಆರ್​ಸಿಬಿ ಆತನನ್ನು ಬುಟ್ಟಿಗೆ ಹಾಕಿಕೊಳ್ಳಲು ಉತ್ತಮ ಅವಕಾಶ ಆಗಿರಲಿದೆ. ಮೆಗಾ ಹರಾಜಿನಲ್ಲಿ ಆರ್​ಸಿಬಿ ಹಲವು ಆಟಗಾರರನ್ನು ಬಿಡುಗಡೆ ಮಾಡುವ ಸಾಧ್ಯತೆ ಇದೆ. 2025ರ ಐಪಿಎಲ್​ನಲ್ಲಿ ಹೊಸದಾಗಿ ಪ್ರಾರಂಭಿಸಲು ಆರ್​ಸಿಬಿ, ಚಿಂತನೆ ನಡೆಸಿದೆ. ಪ್ರಸ್ತುತ ತಂಡದ ನಾಯಕ ಫಾಫ್ ಡು ಪ್ಲೆಸಿಸ್ ಅವರನ್ನೂ ಸಹ ಕೈಬಿಡುವುದು ಖಚಿತವಾಗಿದೆ. ಹಾಗಾಗಿ ನೂತನ ನಾಯಕನ ಹುಟುಕಾಟ ನಡೆಸಲಿದೆ. ಒಂದು ವೇಳೆ ರಾಹುಲ್ ಮೆಗಾ ಹರಾಜಿಗೆ ಬಂದರೆ ಆರ್​ಸಿಬಿ ಆತನ ಮೇಲೆ ಬಿಡ್ ಮಾಡಬಹುದು. ನಾಯಕನ ಸ್ಥಾನಕ್ಕೆ ಉತ್ತಮ ಆಯ್ಕೆಯಾಗಿರಲಿದೆ.

ಲಕ್ನೋ ವಿರುದ್ಧ ಎಸ್​ಆರ್​​ಹೆಚ್ ಗೆಲುವು

2024ರ ಐಪಿಎಲ್​ನ 57ನೇ ಪಂದ್ಯದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧ ಸನ್​ರೈಸರ್ಸ್ ಹೈದರಾಬಾದ್ ತಂಡವು 10 ವಿಕೆಟ್​​ಗಳ ಭರ್ಜರಿ ಗೆಲುವು ಸಾಧಿಸಿತು. ಮೊದಲು ಬ್ಯಾಟಿಂಗ್ ನಡೆಸಿದ ಲಕ್ನೋ, 20 ಓವರ್​​ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 165 ರನ್ ಪೇರಿಸಿತು. ಆಯುಷ್ ಬದೋನಿ 55* ರನ್, ನಿಕೋಲಸ್ ಪೂರನ್ 48* ರನ್ ಗಳಿಸಿದರು. 166 ರನ್​ಗಳ ಗುರಿ ಬೆನ್ನಟ್ಟಿದ ಹೈದರಾಬಾದ್, 9.4 ಓವರ್​​ಗಳಲ್ಲೇ ಗೆದ್ದು ಬೀಗಿತು. ಅಭಿಷೇಕ್ ಶರ್ಮಾ ಅಜೇಯ 75 ರನ್, ಟ್ರಾವಿಸ್ ಹೆಡ್ 89 ರನ್ ಗಳಿಸಿ ಔಟಾಗದೆ ಉಳಿದರು. ಲಕ್ನೋ ಬೌಲರ್​​ಗಳ ಮೇಲೆ ನಿಜಕ್ಕೂ ದಂಡಯಾತ್ರೆ ನಡೆಸಿದರು.

ಇನ್ನೂ ಓದಿ: ಕತ್ತರಿಸಿ ಹೋಗಿದೆ ಪ್ಯಾಟ್ ಕಮಿನ್ಸ್​ ಮಧ್ಯದ ಬೆರಳು; ಈ ಭಯಾನಕ ಕಥೆ ಕೇಳಿ ದಂಗಾದ ಸೂರ್ಯ-ಹಾರ್ದಿಕ್

ಇನ್ನಷ್ಟು ಕ್ರಿಕೆಟ್ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.