ಕಿಚ್ಚ ಸುದೀಪ್‌ ನಟನೆಯ ಮ್ಯಾಕ್ಸ್‌ ಸಿನಿಮಾ ಬಿಡುಗಡೆ ಶೀಘ್ರ? ಕೆಆರ್‌ಜಿ ಸ್ಟುಡಿಯೋಸ್‌ನ ಕಾರ್ತಿಕ್‌ ಗೌಡ ನೀಡಿದ್ರು ಅಪ್‌ಡೇಟ್‌

Kiccha Sudeep Max Movie: ಕನ್ನಡ ನಟ ಕಿಚ್ಚ ಸುದೀಪ್‌ ನಟನೆಯ ಮ್ಯಾಕ್ಸ್‌ ಸಿನಿಮಾವು ದಕ್ಷಿಣ ಭಾರತದ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ ಒಂದು ಎಂದರೆ ತಪ್ಪಾಗದು. 2022ರಲ್ಲಿ ವಿಕ್ರಾಂತ್‌ ರೋಣ ಬಿಡುಗಡೆಯಾದ ಬಳಿಕ ಸುದೀಪ್‌ ಹಿರಿತೆರೆ ಮೇಲೆ ಕಾಣಿಸಿಕೊಂಡಿರಲಿಲ್ಲ. ಬಿಗ್‌ಬಾಸ್‌, ಕ್ರಿಕೆಟ್‌ ಹಾಗೂ ಇತರೆ ಚಟುವಟಿಕೆಗಳಲ್ಲಿ ನಟ ಬಿಝಿ ಇದ್ರು. ಹೀಗಾಗಿ. ಮ್ಯಾಕ್ಸ್‌ ಎನ್ನುವುದು ಸುದೀಪ್‌ ನಟನೆಯ ಬಹುನಿರೀಕ್ಷಿತ ಚಿತ್ರವಾಗಿದೆ. ಈ ಚಿತ್ರದ ಬಿಡುಗಡೆಗಾಗಿ ಕಿಚ್ಚನ ಅಭಿಮಾನಿಗಳು ಕಾಯುತ್ತಿದ್ದಾರೆ. ಇದು ಕಲೈಪುಲಿ ಎಸ್ ಥಾನು ನಿರ್ಮಾಣದ ಮತ್ತು ವಿಜಯ್ ಕಾರ್ತಿಕೇಯ ನಿರ್ದೇಶನದ ಸಿನಿಮಾ. ಈ ಸಿನಿಮಾ ಯಾವಾಗ ಬಿಡುಗಡೆಯಾಗಲಿದೆ ಎಂಬ ಕುತೂಹಲ ಕೆರಳಿಸುವಂತೆ ಕೆಆರ್‌ಜಿ ಸ್ಟುಡಿಯೋಸ್‌ನ ಕಾರ್ತಿಕ್‌ ಗೌಡ ಎಕ್ಸ್‌ನಲ್ಲಿ (ಹಳೆಯ ಟ್ವಿಟ್ಟರ್‌) ಪೋಸ್ಟ್‌ ಮಾಡಿದ್ದಾರೆ. ಇದು ಮ್ಯಾಕ್ಸ್‌ ಬಿಡುಗಡೆ ಸನಿಹದಲ್ಲಿರುವ ಸೂಚನೆ ಎಂದು ಫ್ಯಾನ್ಸ್‌ ಖುಷಿಪಟ್ಟಿದ್ದಾರೆ.

ಮ್ಯಾಕ್ಸ್‌ ಸಿನಿಮಾ ಬಿಡುಗಡೆ ದಿನಾಂಕ

ಕೆಆರ್‌ಜಿ ಸ್ಟುಡಿಯೋಸ್‌ನ ಕಾರ್ತಿಕ್‌ ಗೌಡ ಇತ್ತೀಚೆಗೆ ಸೋಷಿಯಲ್‌ ಮೀಡಿಯಾದಲ್ಲಿ "ಮ್ಯಾಕ್ಸ್‌ ರೌಂಡ್‌ ದಿ ಕಾರ್ನರ್‌" ಎಂದು ಟ್ವೀಟ್‌ ಮಾಡಿದ್ದಾರೆ. ಅಂದಹಾಗೆ, ಕಾರ್ತಿಕ್‌ ಗೌಡ ಕರ್ನಾಟಕದಲ್ಲಿ ಮ್ಯಾಕ್ಸ್‌ ಸಿನಿಮಾ ವಿತರಣೆ ಮಾಡಲಿದ್ದಾರೆ. ಇವರು ನೀಡಿರುವ ಅಪ್‌ಡೇಟ್‌ನಿಂದಾಗಿ "ಮ್ಯಾಕ್ಸ್‌ ಸಿನಿಮಾ ಅಂದುಕೊಂಡಿರುವುದಕ್ಕಿಂತಲೂ ಬೇಗ ಆಗಮಿಸಲಿದೆ" ಎಂಬ ಮಾತುಗಳು ಕೇಳಿಬರುತ್ತಿವೆ. ಕೆಲವು ಮೂಲಗಳ ಪ್ರಕಾರ ಮುಂದಿನ ತಿಂಗಳ ಕೊನೆಗೆ ಅಂದರೆ ಡಿಸೆಂಬರ್‌ 2024ರ ಕೊನೆಯ ವಾರದಲ್ಲಿ ಮ್ಯಾಕ್ಸ್‌ ರಿಲೀಸ್‌ ಆಗುವ ಸೂಚನೆಯಿದೆ. ಆದರೆ, ಆ ಸಮಯದಲ್ಲಿ ಉಪೇಂದ್ರರ ಯುಐ ಸಿನಿಮಾ ಬಿಡುಗಡೆಯಾಗುತ್ತಿದೆ. ಹೀಗಾಗಿ, ಮ್ಯಾಕ್ಸ್‌ ಸಿನಿಮಾವು 2025ರ ಮೊದಲ ತಿಂಗಳಲ್ಲಿ ಅಂದರೆ ಸಂಕ್ರಾಂತಿಗೆ ಬರುವ ಸಾಧ್ಯತೆ ಹೆಚ್ಚಿದೆ.

ಡಿಸೆಂಬರ್‌ 20ಕ್ಕೆ ಮ್ಯಾಕ್ಸ್‌ ರಿಲೀಸ್‌ ಆಗುತ್ತಾ?

ಯುಐ ಸಿನಿಮಾ ಬಿಡುಗಡೆ ಮುಂದೂಡಿಕೆಯಾಗಬಹುದು ಎಂಬ ವದಂತಿಗಳೂ ಹರಿದಾಡುತ್ತಿವೆ. ಈ ಸಿನಿಮಾದ ವಿಎಫ್‌ಎಕ್ಸ್‌ ಕೆಲಸಗಳು ಇನ್ನೂ ಮುಗಿಯದೆ ಇರುವ ಕಾರಣ ಅಂದುಕೊಂಡಿರುವ ಸಮಯದಲ್ಲಿ ಬಿಡುಗಡೆ ಕಷ್ಟ ಎನ್ನಲಾಗುತ್ತಿದೆ. ಎಲ್ಲಾದರೂ ಯುಐ ಸಿನಿಮಾ ಡಿಸೆಂಬರ್‌ ಕೊನೆಗೆ ಬಿಡುಗಡೆಯಾಗದೆ ಇದ್ದರೆ ಮ್ಯಾಕ್ಸ್‌ಗೆ ಅವಕಾಶ ದೊರಕಲಿದೆ. ಈ ರೀತಿಯಾದರೆ ಮ್ಯಾಕ್ಸ್‌ ಸಿನಿಮಾ ಡಿಸೆಂಬರ್‌ 20 ಅಥವಾ ಡಿಸೆಮಬರ್‌ 27ರಂದು ಬಿಡುಗಡೆಯಾಗುವ ಸಾಧ್ಯತೆ ಇದೆ. ಕಳೆದ ವರ್ಷ ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ನಟನೆಯ ಕಾಟೇರ ಸಿನಿಮಾ ಡಿಸೆಂಬರ್‌ ಕೊನೆಗೆ ಬಿಡುಗಡೆಯಾಗಿ ಬ್ಲಾಕ್‌ಬಸ್ಟರ್‌ ಹಿಟ್‌ ಆಗಿತ್ತು.

ಮ್ಯಾಕ್ಸ್‌ ಸಿನಿಮಾ ಬಿಡುಗಡೆ ದಿನಾಂಕದ ಕುರಿತು ಚಿತ್ರತಂಡ ಅಧಿಕೃತವಾಗಿ ಸದ್ಯದಲ್ಲಿಯೇ ಮಾಹಿತಿ ನೀಡುವ ಸೂಚನೆಯಿದೆ. ಬಹುಶಃ ಡಿಸೆಂಬರ್‌ 1ರಂದು ಮ್ಯಾಕ್ಸ್‌ ಸಿನಿಮಾದ ಅಪ್‌ಡೇಟ್‌ ದೊರಕಬಹುದು ಎಂದು ಮೂಲಗಳು ತಿಳಿಸಿವೆ. ಬಳಿಕ ಮ್ಯಾಕ್ಸ್‌ ಸಿನಿಮಾದ ಪ್ರಮೋಷನ್‌ ಆರಂಭವಾಗಲಿದೆ. ಬೆಂಗಳೂರಿನಲ್ಲಿ ಚಿತ್ರತಂಡ ಮೊದಲ ಬಾರಿಗೆ ಪತ್ರಿಕಾಗೋಷ್ಠಿ ಆಯೋಜಿಸಲಿದೆ.

ಮ್ಯಾಕ್ಸ್‌ ಸಿನಿಮಾದಲ್ಲಿ ಕಿಚ್ಚ ಸುದೀಪ್‌ ಮತ್ತೆ ಪೊಲೀಸ್‌ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಸುದೀಪ್‌ ಅವರನ್ನು ಹಲವು ಸಿನಿಮಾಗಳಲ್ಲಿ ಪೊಲೀಸ್‌ ಅವತಾರದಲ್ಲಿ ನೋಡಿ ಮೆಚ್ಚಿದ್ದಾರೆ. ಮ್ಯಾಕ್ಸ್‌ನ ಪೊಲೀಸ್‌ ಖದರ್‌ ನೆಕ್ಸ್ಟ್‌ ಲೆವೆಲ್‌ನಲ್ಲಿರುವ ಸೂಚನೆಯಿದೆ.

ಮ್ಯಾಕ್ಸ್‌ ಎನ್ನುವುದು ಮೂಲ ಕನ್ನಡ ಸಿನಿಮಾ ಎನ್ನುವುದು ನಿಜ. ಆದರೆ, ಈ ಸಿನಿಮಾ ನಿರ್ಮಿಸುತ್ತಿರುವುದು ತಮಿಳು ಪ್ರೊಡ್ಯುಸರ್ಸ್‌. ಮ್ಯಾಕ್ಸ್‌ ಸಿನಿಮಾದ ಟೀಸರ್‌ ಬಿಡುಗಡೆಯಾಗಿ ಸಾಕಷ್ಟು ಸಮಯವಾಗಿದೆ. ಆ ಸಮಯದಲ್ಲಿ ಚಿತ್ರ ಬಿಡುಗಡೆ ದಿನಾಂಕದ ಕುರಿತು ಯಾವುದೇ ಅಪ್‌ಡೇಟ್‌ ನೀಡಿರಲಿಲ್ಲ. ಮುಂದಿನ ತಿಂಗಳ ಆರಂಭದಲ್ಲಿಯೇ ಚಿತ್ರ ಬಿಡುಗಡೆ ದಿನಾಂಕದ ಕುರಿತು ಅಭಿಮಾನಿಗಳಿಗೆ ಗುಡ್‌ನ್ಯೂಸ್‌ ದೊರಕುವ ಸೂಚನೆಯಿದೆ.