Numerology: ಕಲಿಯುವುದು ಕಡಿಮೆ ತಿಳಿಯುವುದು ಹೆಚ್ಚು, ಸಹಾಯ ಮಾಡುವ ಮನಸ್ಸು; 22ನೇ ತಾರೀಖಿನಂದು ಜನಿಸಿದವರ ಗುಣಲಕ್ಷಣ

ಸಮಾಜದ ಕಟ್ಟು ಪಾಡುಗಳಿಗೆ ಹೆದರುವ ಇವರು ಜೀವನದಲ್ಲಿ ತಪ್ಪು ಮಾಡುವುದೇ ಕಡಿಮೆ. ಒಂದು ವೇಳೆ ತಪ್ಪು ಮಾಡಿದರೆ ಒಪ್ಪಿಕೊಳ್ಳಲು ಹಿಂಜರಿಯುವುದಿಲ್ಲ. ಮನದಲ್ಲಿ ಒಂದು ರೀತಿಯ ಆತಂಕ ಮನೆ ಮಾಡಿರುತ್ತದೆ. ಭಯವನ್ನು ಬದಿಗೊತ್ತಿ ಕೆಲಸ ಕಾರ್ಯಗಳನ್ನು ಆರಂಭಿಸಿದರೆ ಇವರನ್ನು ಮೀರಿಸುವವರೇ ಇರುವುದಿಲ್ಲ. ಎಲ್ಲಾ ರೀತಿಯ ವಿದ್ಯೆಗಳಲ್ಲಿಯೂ ಆಸಕ್ತಿ ಇರುತ್ತದೆ. ಆದ್ದರಿಂದ ಕಲಿಯುವುದು ಕಡಿಮೆಯಾದರೂ ತಿಳಿಯುವುದೇ ಹೆಚ್ಚು.

ಯಾವ ವಿಚಾರದಲ್ಲಿಯೂ ಸೋಲನ್ನು ಒಪ್ಪದ ಇವರು ಕೆಲಸ ಕಾರ್ಯ ಮಾಡಲು ಹಿಂಜರಿಯುವುದಿಲ್ಲ. ವಿದ್ಯಾಭ್ಯಾಸದ ವೇಳೆ ಕಲಿಕೆಯಲ್ಲಿ ಇವರಿಗೆ ಹೆಚ್ಚಿನ ಆಸಕ್ತಿ ಇರುವುದಿಲ್ಲ. ಆದರೆ ದಿನೇ ದಿನೇ ಹೊಸ ರೀತಿಯ ವಿಚಾರಗಳನ್ನು ಕಲಿಯುವ ಹಂಬಲ ಹೆಚ್ಚುತ್ತದೆ. ಚಿಕ್ಕ ವಯಸ್ಸಿನಲ್ಲಿ ಆರೋಗ್ಯದಲ್ಲಿ ತೊಂದರೆ ಅನುಭವಿಸಿದರೂ ಕ್ರಮೇಣವಾಗಿ ಉತ್ತಮ ಆರೋಗ್ಯ ಇವರದ್ದಾಗುತ್ತದೆ. ಹಿರಿಯ ವಯಸ್ಸಿನ ಎಲ್ಲರನ್ನೂ ಪ್ರೀತಿಸುವ ಮತ್ತು ಗೌರವಿಸುವ ದೊಡ್ಡ ಮನಸ್ಸು ಇವರಲ್ಲಿ ಇರುತ್ತದೆ. ದೇವರಲ್ಲಿ ಅತಿಯಾದ ನಂಬಿಕೆ ತೋರುತ್ತಾರೆ. ಆಸಕ್ತಿಯಿಂದ ಯಾರೇ ಕೇಳಿದರೂ ತಮ್ಮಲ್ಲಿರುವ ವಿದ್ಯೆಯನ್ನು ಧಾರೆ ಎರೆಯುತ್ತಾರೆ. ಇವರ ಜೀವನದಲ್ಲಿ ವಾಹನ ಅಪಘಾತ ಹಲವು ಬಾರಿ ನಡೆಯುತ್ತದೆ. ಆದರೆ ಇವರಿಗೆ ಯಾವುದೇ ರೀತಿಯ ತೊಂದರೆ ಉಂಟಾಗುವುದಿಲ್ಲ.

ಇದನ್ನೂ ಓದಿ:  ಕುಟುಂಬಕ್ಕಾಗಿ ಯಾವುದೇ ತ್ಯಾಗಕ್ಕೆ ಸಿದ್ಧ, ಜ್ಞಾನ ಹಂಚಲು ಸದಾ ಮುಂದು; 21ನೇ ತಾರೀಖಿನಂದು ಜನಿಸಿದವರ ಗುಣ ಲಕ್ಷಣ

ಮಕ್ಕಳಿಗಾಗಿ ಗ್ರಂಥಾಲಯ ಸ್ಥಾಪಿಸುವ ಯೋಚನೆ

ಒಂದು ವೇಳೆ ಇವರು ಶಿಕ್ಷಕರಾದರೆ ಸಮಾಜದಲ್ಲಿ ವಿಶಿಷ್ಟ ಗೌರವ ಪಡೆಯುತ್ತಾರೆ. ಬೇರೆಯವರಿಗೆ ಬುದ್ಧಿವಾದ ಹೇಳುವುದು ಮತ್ತು ವಿದ್ಯೆಯನ್ನು ಕಲಿಸುವುದು ಇಷ್ಟವಾದ ಕೆಲಸ. ಪುರಾತನ ಕಾಲದ ಪುಸ್ತಕಗಳನ್ನು ಓದಿ ಅದರ ಬಗ್ಗೆ ಎಲ್ಲರಿಗೂ ತಿಳಿಸುವುದು ಇವರ ಒಂದು ಹವ್ಯಾಸ. ಓದುವ ಮಕ್ಕಳಿಗಾಗಿ ಗ್ರಂಥಾಲಯವನ್ನೇ ಸ್ಥಾಪಿಸುವ ಯೋಚನೆ ಇವರಲ್ಲಿ ಇರುತ್ತದೆ. ಯಾವುದೇ ರೀತಿಯ ಪ್ರತಿಫಲಾಪೇಕ್ಷೆ ಇಲ್ಲದೆ ಎಲ್ಲರಿಗೂ ಸಹಾಯ ಮಾಡುತ್ತಾರೆ. ಹಳೆಯ ವಸ್ತುಗಳನ್ನು ಪುಸ್ತಕಗಳನ್ನು ಒಪ್ಪ ಮಾಡುವುದು ಇವರಿಗೆ ಅತಿ ಇಷ್ಟ. ಸಣ್ಣಪುಟ್ಟ ಲೇಖನಗಳು ಮತ್ತು ಕವನಗಳನ್ನು ಬರೆಯುವುದು ಇವರ ಮುಖ್ಯ ಗುರಿ. ಇದರಿಂದ ತಾನಾಗಿಯೇ ಜನಪ್ರಿಯತೆ ದೊರೆಯುತ್ತದೆ. 

ಯೋಗ ಧ್ಯಾನ ಮಾಡುವುದನ್ನು ಕಲಿಸಲು ತರಗತಿಗಳನ್ನು ಆರಂಭಿಸುತ್ತಾರೆ. ತೊಂದರೆಗೆ ಪರಿಹಾರ ಕಂಡು ಹಿಡಿಯುವುದರ ಬದಲು ತೊಂದರೆಯೇ ಬಾರದಂತೆ ನೋಡಿಕೊಳ್ಳುವುದು ಇವರ ಮೂಲ ಉದ್ದೇಶ. ಇವರಿಂದ ಕುಟುಂಬದಲ್ಲಿ ಶಾಂತಿ ನೆಮ್ಮದಿ ನೆಲೆಸಿರುತ್ತದೆ. ಇವರು ಇರುವ ಸ್ಥಳದಲ್ಲಿ ಹಾಸ್ಯಕ್ಕೆ ಕೊನೆ ಇರುವುದಿಲ್ಲ. ತಮಗೆ ತಿಳಿದಿರುವ ವಿದ್ಯೆಯನ್ನು ಭಾಷಣಗಳ ಮುಖಾಂತರ ಎಲ್ಲರಿಗೂ ತಿಳಿಯಪಡಿಸುತ್ತಾರೆ. ಕೈ ತುಂಬಾ ಹಣವಿದ್ದರೂ ಕುಟುಂಬದ ಆಸ್ತಿ ಇದ್ದರೂ ಸರಳ ಜೀವನ ಇಷ್ಟಪಡುತ್ತಾರೆ.

ಇದನ್ನೂ ಓದಿ: ಸಮಾಜದ ತಪ್ಪನ್ನು ತಿದ್ದುವರು, ಬೋಧನಾಕೇಂದ್ರ ಆರಂಭಿಸಿ ಯಶಸ್ಸು ಗಳಿಸುವರು; 19ನೇ ತಾರೀಖಿನಂದು ಹುಟ್ಟಿದವರ ಗುಣ ಲಕ್ಷಣ

ಇಳಿ ವಯಸ್ಸಿನಲ್ಲೂ ಹೊಸ ವಿಚಾರ ಕಲಿಯುವ ಹಂಬಲ

ಜೀವನದಲ್ಲಿಒಂದೇ ರೀತಿ ಇರಲು ಇಷ್ಟಪಡುವುದಿಲ್ಲ. ಬದಲಾವಣೆಗಳನ್ನು ಇಷ್ಟಪಡುತ್ತಾರೆ. ಆದ್ದರಿಂದ ಸದಾಕಾಲ ಬೆಳವಣಿಗೆಯನ್ನು ಎದುರು ನೋಡುತ್ತಾರೆ. ಬೇರೆಯವರು ಹೇಳುವುದನ್ನು ಕೇಳುವುದಕ್ಕಿಂತಲೂ ಅಭ್ಯಾಸ ಮಾಡುವಲ್ಲಿ ನಿರತರಾಗುತ್ತಾರೆ. ತಂದೆ ತಾಯಿ ಮತ್ತು ತಾಯಿಯ ಸಂಬಂಧಿಕರ ಬಗ್ಗೆ ವಿಶೇಷ ಪ್ರೀತಿ-ವಿಶ್ವಾಸ ಗೌರವ ಇರುತ್ತವೆ. ಸಾಮಾನ್ಯವಾಗಿ ಇವರು ತಾಯಿ ಹಾಕಿದ ಕಟ್ಟುಪಾಡುಗಳನ್ನು ಮೀರುವುದಿಲ್ಲ. ವಂಶ ಪಾರ್ಯಂಪರ್ಯವಾಗಿ ಬಂದ ವಿದ್ಯೆಯೊಂದು ಇವರಿಗೆ ಆಶ್ರಯ ನೀಡುತ್ತದೆ. ಇವರ ಒಂದು ವಿಶೇಷವೆಂದರೆ ತಮ್ಮ ಇಳಿ ವಯಸಿನಲ್ಲೂ ಹೊಸ ವಿಚಾರಗಳನ್ನುಕಲಿಯಲು ಇಷ್ಟಪಡುತ್ತಾರೆ. ಪ್ರಯೋಜನವಿಲ್ಲದ ಹರಟೆ ಇವರಿಗೆ ಇಷ್ಟವಾಗುವುದಿಲ್ಲ.

ಅನಾವಶ್ಯಕವಾಗಿ ಸಮಯ ವ್ಯರ್ಥ ಮಾಡುವುದಿಲ್ಲ. ತಮಗೆ ತಿಳಿದ ವಿಚಾರವಾದರೂ ಅದರ ಆಂತರ್ಯವನ್ನು ಅರಿಯುವ ಮನಸ್ಸಿರುತ್ತದೆ. ಇವರ ವಿವಾಹವು ಯೋಗ್ಯರೊಂದಿಗೆ ನಡೆಯಲಿದೆ. ಸಂಗಾತಿಯು ಇವರ ಮನಸ್ಸನ್ನು ಅರಿತು ನಡೆಯುವ ಕಾರಣ ದಾಂಪತ್ಯ ಜೀವನ ಸುಖ ಸಂತೋಷದಿಂದ ಕೂಡಿರುತ್ತದೆ. ಇವರ ಮಕ್ಕಳು ವಿದ್ಯಾಭ್ಯಾಸದಲ್ಲಿ ಮತ್ತು ತಿಳುವಳಿಕೆಯಲ್ಲಿ ಮೀರಿಸುತ್ತಾರೆ. ಇವರ ಮಕ್ಕಳಿಗೆ ಅಜ್ಜಿಯಿಂದ ವಿದ್ಯೆಯೊಂದು ವರವಾಗಿ ಬರುತ್ತದೆ. ಬೇಡದ ವಿಚಾರಗಳಿಗೆ ಹಣವನ್ನು ಖರ್ಚು ಮಾಡದ ಕಾರಣ ಹಣದ ತೊಂದರೆ ಇರುವುದಿಲ್ಲ. ತಮ್ಮನ್ನು ನಂಬಿ ಬಂದವರಿಗೆ ಮೋಸ ಮಾಡುವುದಿಲ್ಲ. ಹಣವಾಗಲಿ, ಆಹಾರವಾಗಲಿ ಅಥವಾ ವಿದ್ಯೆಯಾಗಲೀ ಹಂಚಿ ತಿನ್ನುವ ಸ್ವಭಾವ ಇವರಲ್ಲಿ ಇರುತ್ತದೆ.

ಇದನ್ನೂ ಓದಿ: ಬುದ್ಧಿ ಹೇಳುವುದರಲ್ಲಿ ನಿಸ್ಸೀಮರು, ಇವರಿದ್ದ ಕಡೆ ಹಾಸ್ಯಕ್ಕೆ ಕೊರತೆ ಇರುವುದಿಲ್ಲ; 17ನೇ ತಾರೀಖಿನಂದು ಹುಟ್ಟಿದವರ ಗುಣ ಲಕ್ಷಣ

ಬರಹ: ಎಚ್‌. ಸತೀಶ್, ಜ್ಯೋತಿಷಿ

ಮೊಬೈಲ್:‌ 8546865832

(ಗಮನಿಸಿ: ಜ್ಯೋತಿಷ್ಯ ಶಾಸ್ತ್ರದ ಲೆಕ್ಕಾಚಾರಕ್ಕೆ ಹಲವು ಸೂತ್ರಗಳಿವೆ. ನಿರ್ದಿಷ್ಟ ರೀತಿಯಲ್ಲಿ ಕ್ರಮಬದ್ಧವಾಗಿ ಈ ರಾಶಿ ಭವಿಷ್ಯ ನೀಡಲಾಗಿದೆ. ಆದರೆ ಒಟ್ಟಾರೆಯಾಗಿ ಜ್ಯೋತಿಷ್ಯ ಎನ್ನುವುದು ನಂಬಿಕೆಯ ಮಾತು. ಓದುಗರ ನಂಬಿಕೆಯನ್ನು ‘ಹಿಂದೂಸ್ತಾನ್ ಟೈಮ್ಸ್ ಕನ್ನಡ’ ಗೌರವಿಸುತ್ತದೆ. ಇಲ್ಲಿರುವ ಯಾವುದೇ ಶಿಫಾರಸು ಅಥವಾ ಸಲಹೆಗಳನ್ನು ಪಾಲಿಸುವುದು ಓದುಗರ ವಿವೇಚನೆ, ನಂಬಿಕೆಗೆ ಬಿಟ್ಟ ವಿಷಯವಾಗಿರುತ್ತದೆ).