ಹುಷಾರ್​​! ಕೈ ಬೆರಳು ತೋರಿಸಿ ಅರ್ಷದೀಪ್‌ ಸಿಂಗ್‌ ವಿರುದ್ಧ ರೇಗಾಡಿದ ಸೂರ್ಯಕುಮಾರ್, ವಿಡಿಯೋ ವೈರಲ್

ಗುರುವಾರ (ಡಿಸೆಂಬರ್ 14) ಜೋಹಾನ್ಸ್‌ಬರ್ಗ್‌ನ ನ್ಯೂ ವಾಂಡರರ್ಸ್ ಸ್ಟೇಡಿಯಂನಲ್ಲಿ ನಡೆದ 3 ಪಂದ್ಯಗಳ ಸರಣಿಯ ಮೂರನೇ ಮತ್ತು ಅಂತಿಮ ಟಿ20 ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ತಂಡವನ್ನು 106 ರನ್​ಗಳ ಅಂತರದಿಂದ ಸೋಲಿಸಿ ಸರಣಿಯನ್ನು 1-1ರಲ್ಲಿ ಸಮಬಲಗೊಳಿಸಿತು. ಮೊದಲ ಪಂದ್ಯವು ಮಳೆಯಿಂದ ರದ್ದಾದರೆ, ಎರಡನೇ ಪಂದ್ಯದಲ್ಲಿ ಆತಿಥೇಯರು ಜಯ ಸಾಧಿಸಿದ್ದರು.

ಇದನ್ನೂ ಓದಿ : ಹೃದಯ ಛಿದ್ರವಾದ ಎಮೋಜಿ ಪೋಸ್ಟ್ ಮಾಡಿದ ಸೂರ್ಯ; ಪರೋಕ್ಷವಾಗಿ ಮುಂಬೈ ವಿರುದ್ಧ ಸಿಡಿದ ಟಿ20 ಸ್ಪೆಷಲಿಸ್ಟ್

ಮೂರನೇ ಟಿ20 ಪಂದ್ಯದಲ್ಲಿ ಟಾಸ್ ಸೋತು ಭಾರತ ತಂಡ ಮೊದಲು ಬ್ಯಾಟಿಂಗ್ ನಡೆಸಿತು. ನಾಯಕ ಸೂರ್ಯಕುಮಾರ್ ಯಾದವ್ ಅವರ ದಾಖಲೆಯ ನಾಲ್ಕನೇ ಟಿ20 ಶತಕದ ನೆರವಿನಿಂದ ಭಾರತ 7 ವಿಕೆಟ್​ಗಳ ನಷ್ಟಕ್ಕೆ 201 ರನ್​ ಪೇರಿಸಿತ್ತು. ಆದರೆ ಈ ಗುರಿ ಬೆನ್ನಟ್ಟಿದ ಸೌತ್ ಆಫ್ರಿಕಾ 13.5 ಓವರ್‌ಗಳಲ್ಲಿ 95 ರನ್‌ಗಳಿಗೆ ಸರ್ವಪತನ ಕಂಡಿತು. ಕುಲ್ದೀಪ್ 2.5 ಓವರ್‌ಗಳಲ್ಲಿ 17 ರನ್ ನೀಡಿ 5 ವಿಕೆಟ್ ಪಡೆದು ಗಮನ ಸೆಳೆದರು.

ಕೈ ಬೆರಳು ತೋರಿಸಿ ಸೂರ್ಯ ಕೆಂಡ

ಜೋಬರ್ಗ್‌ನಲ್ಲಿ ನಡೆದ ಮೂರನೇ ಟಿ20 ಮುಗಿದ ನಂತರ ತಂಡದ ಬಸ್​ನಲ್ಲಿ ಹೋಗುತ್ತಿದ್ದ ವೇಳೆ​​ ಸೂರ್ಯಕುಮಾರ್, ಯುವ ವೇಗಿ ಅರ್ಷದೀಪ್ ಸಿಂಗ್‌ ವಿರುದ್ದ ಕೆಂಡಾಮಂಡಲರಾದರು. ಸಿಟ್ಟಿಗೆದ್ದು ಮನಬಂದಂತೆ ಬೈದರು. ಸೀಟ್​ನಲ್ಲಿ ಕುಳಿತಿದ್ದ ಅರ್ಷದೀಪ್​ಗೆ ರೇಗಾಡಿದ ಸೂರ್ಯ, ಕೈ ಬೆರಳು ತೋರಿಸಿ ಆಕ್ರೋಶ ಹೊರ ಹಾಕಿದ್ದಾರೆ. ಸದ್ಯ ಈ ವಿಡಿಯೋ ಪಂದ್ಯದ ಮುಗಿದು ಎರಡು ದಿನಗಳ ನಂತರ ಸಖತ್ ವೈರಲ್ ಆಗುತ್ತಿದೆ. ಆದರೆ ಸೂರ್ಯನ ಕೋಪಕ್ಕೆ ಕಾರಣ ಏನೆಂಬುದು ಇದುವರೆಗೂ ತಿಳಿದು ಬಂದಿಲ್ಲ.

ಏಕದಿನ ಸರಣಿಯನ್ನೂ ಆಡಲಿರುವ ಅರ್ಷ್​ದೀಪ್

ಟಿ20 ಸರಣಿ ಮುಗಿದ ಬೆನ್ನಲ್ಲೇ ವೇಗಿ ಅರ್ಷ​ದೀಪ್ ಸಿಂಗ್, ಏಕದಿನ ಸರಣಿಯಲ್ಲೂ ಕಾಣಿಸಿಕೊಳ್ಳಲಿದ್ದಾರೆ.​ ಮೂರನೇ ಟಿ20 ಪಂದ್ಯದಲ್ಲಿ ಕೇವಲ 13 ರನ್ ಬಿಟ್ಟುಕೊಟ್ಟು 1 ವಿಕೆಟ್​ ಪಡೆಯುವಲ್ಲಿ ಯಶಸ್ವಿಯಾಗಿದ್ದರು. ಈ ಪಂದ್ಯಕ್ಕೂ ಮುನ್ನ ಎರಡನೇ ಟಿ20 ಪಂದ್ಯದಲ್ಲಿ 2 ಓವರ್‌ಗಲ್ಲಿ 31 ರನ್‌ ನೀಡಿ ವಿಕೆಟ್ ಪಡೆಯಲು ವಿಫಲರಾಗಿದ್ದರು.

ಡಿಸೆಂಬರ್ 17ರಿಂದ ದಕ್ಷಿಣ ಆಫ್ರಿಕಾ ಮತ್ತು ಭಾರತ ತಂಡದ ನಡುವೆ ಮೂರು ಪಂದ್ಯಗಳ ಏಕದಿನ ಸರಣಿ ಪ್ರಾರಂಭವಾಗಲಿದೆ. ಈ ಸರಣಿಯ ಭಾಗವಾಗಿರುವ ಅರ್ಷ​​ದೀಪ್ ಮಿಂಚಲು ಭರ್ಜರಿ ಸಿದ್ಧತೆ ನಡೆಸಿದ್ದಾರೆ. ಸರಣಿಯ ಆರಂಭಿಕ ಪಂದ್ಯ ಜೋಹಾನ್ಸ್‌ಬರ್ಗ್‌ನ ನ್ಯೂ ವಾಂಡರರ್ಸ್ ಸ್ಟೇಡಿಯಂನಲ್ಲಿ ನಡೆಯಲಿದ್ದು, ಮಧ್ಯಾಹ್ನ 1:30ಕ್ಕೆ ಆರಂಭವಾಗಲಿದೆ. ಕೆಎಲ್ ರಾಹುಲ್ ತಂಡವನ್ನು ಮುನ್ನಡೆಸಲಿದ್ದಾರೆ.

ತವರಿಗೆ ಸೂರ್ಯ

ಏಕದಿನ ತಂಡದಲ್ಲಿ ಸ್ಥಾನ ಪಡೆಯದ ಸೂರ್ಯಕುಮಾರ್, ತವರಿಗೆ ಮರಳಿದ್ದಾರೆ. ಸೂರ್ಯ ಜೊತೆಗೆ ವಿಶ್ವದ ನಂ. 1 ಟಿ20 ಬೌಲರ್ ರವಿ ಬಿಷ್ಣೋಯ್ ಮತ್ತು ವಿಕೆಟ್‌ಕೀಪರ್ ಜಿತೇಶ್ ಶರ್ಮಾ ಸಹ ಏಕದಿನ ಮತ್ತು ಟೆಸ್ಟ್ ತಂಡಗಳ ಭಾಗವಾಗಿರದ ಕಾರಣ ಮುಂಬರುವ ರಣಜಿ ಆವೃತ್ತಿಗೆ ತಯಾರಿ ನಡೆಸಲು ಭಾರತಕ್ಕೆ ಮರಳಲಿದ್ದಾರೆ.