ರೋಹಿತ್ ​ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಸ್ಥಾನ ತುಂಬಲು ಆರು ಯುವ ಆಟಗಾರರ ನಡುವೆ ತೀವ್ರ ಪೈಪೋಟಿ; ಯಾರವರು?

ಭಾರತ ತಂಡಕ್ಕೆ ಟಿ20 ವಿಶ್ವಕಪ್​ 2024 ಗೆದ್ದುಕೊಟ್ಟ ನಂತರ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಟಿ20ಐ ಕ್ರಿಕೆಟ್​​ನಿಂದ ನಿವೃತ್ತರಾದರು. ರೋಹಿತ್ (4231 ರನ್) ಅಂತಾರಾಷ್ಟ್ರೀಯ ಟಿ20ಐಗಳಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರನಾಗಿ ತಮ್ಮ ವೃತ್ತಿಜೀವನ ಕೊನೆಗೊಳಿಸಿದರು. ಕೊಹ್ಲಿ (4188 ರನ್) ಎರಡನೇ ಸ್ಥಾನದಲ್ಲಿದ್ದಾರೆ. ಭಾರತೀಯ ಕ್ರಿಕೆಟ್​ಗೆ ಅಪಾರ ಕೊಡುಗೆ ನೀಡಿದ ಈ ದಿಗ್ಗಜರ ಸ್ಥಾನಕ್ಕೆ ಬದಲಿ ಆಟಗಾರರನ್ನು ಹುಡುಕುವುದು ಅಷ್ಟು ಸುಲಭವಲ್ಲ. ಆದರೆ, ಅವರ ಸ್ಥಾನಕ್ಕೆ 6 ಮಂದಿ ಪೈಪೋಟಿ ನಡೆಸುತ್ತಿದ್ದಾರೆ. ಅವರ ಪಟ್ಟಿ ಇಲ್ಲಿದೆ ನೋಡಿ.

ಯಶಸ್ವಿ ಜೈಸ್ವಾಲ್

ಭಾರತ ಟಿ20ಐ ತಂಡದಲ್ಲಿ ಸ್ಥಾನ ಪಡೆಯಲು ಯಶಸ್ವಿ ಜೈಸ್ವಾಲ್ ಮುಂಚೂಣಿಯಲ್ಲಿದ್ದಾರೆ. 17 ಪಂದ್ಯಗಳಲ್ಲಿ 502 ರನ್‌ ಸಿಡಿಸಿದ್ದಾರೆ. ಬ್ಯಾಟಿಂಗ್​ ಸರಾಸರಿ 33.46, ಸ್ಟ್ರೈಕ್-ರೇಟ್ 161.93, ಗರಿಷ್ಠ ಸ್ಕೋರ್ 100. ಪ್ರಸ್ತುತ ಟಿ20 ವಿಶ್ವಕಪ್ ತಂಡದಲ್ಲಿ ಅವಕಾಶ ಪಡೆದಿದ್ದ ಜೈಸ್ವಾಲ್ ಭವಿಷ್ಯದ ಸೂಪರ್​ಸ್ಟಾರ್ ಆಗುವುದರಲ್ಲಿ ಯಾವುದೇ ಅನುಮಾನ ಇಲ್ಲ. ತನಗೆ ಸಿಕ್ಕ ಅವಕಾಶದಲ್ಲಿ ಸಾಮರ್ಥ್ಯ ನಿರೂಪಿಸಿದ ಜೈಸ್ವಾಲ್ ಸ್ಥಾನ ಭದ್ರಪಡಿಸಿಕೊಂಡಿದ್ದಾರೆ. ಅವರ ಸೇರ್ಪಡೆಯು ಅಗ್ರಕ್ರಮಾಂಕದ ಎಡ-ಬಲ ಸಂಯೋಜನೆ ಖಚಿತಪಡಿಸುತ್ತದೆ.

ಶುಭ್ಮನ್ ಗಿಲ್

ಟಿ20ಐ ಕ್ರಿಕೆಟ್​ನಲ್ಲಿ 14 ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದು 335 ರನ್​ಗಳನ್ನು ಗಳಿಸಿದ್ದಾರೆ. 25.76ರ ಬ್ಯಾಟಿಂಗ್ ಸರಾಸರಿ ಹಾಗೂ ಸ್ಟ್ರೈಕ್​ರೇಟ್ 147.57 ಹೊಂದಿದ್ದಾರೆ. ಗರಿಷ್ಠ ಸ್ಕೋರ್ 126. ಕ್ಲಾಸಿ ಬಲಗೈ ಬ್ಯಾಟರ್ ಕಳೆದ ಕೆಲವು ವರ್ಷಗಳಿಂದ ಭಾರತೀಯ ವೈಟ್-ಬಾಲ್ ಸೆಟಪ್‌ನಲ್ಲಿ ನಿಯಮಿತವಾಗಿದ್ದಾರೆ. 2023 ಕ್ರಿಕೆಟ್ ವಿಶ್ವಕಪ್‌ನಲ್ಲಿ ರೋಹಿತ್‌ನ ಆರಂಭಿಕ ಪಾಲುದಾರರಾಗಿದ್ದರು. ಗಿಲ್ ಕೂಡ ಕೊಹ್ಲಿ ಅವರಂತೆಯೇ ತಂಡವನ್ನು ಮುನ್ನಡೆಸುವ ಸಾಮರ್ಥ್ಯ ಹೊಂದಿದ್ದಾರೆ.

ಅಭಿಷೇಕ್ ಶರ್ಮಾ

2018ರಲ್ಲಿ ಅಂಡರ್​-19 ವಿಶ್ವಕಪ್ ವಿಜೇತ ತಂಡದ ಸದಸ್ಯ ಅಭಿಷೇಕ್ ಶರ್ಮಾ ಇನ್ನೂ ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಬೇಕಿದೆ. ಆಕ್ರಮಣಕಾರಿ ಸ್ಟ್ರೋಕ್‌ಪ್ಲೇಗೆ ಹೆಸರುವಾಸಿಯಾಗಿದ್ದರು. ಆದಾಗ್ಯೂ, 2024ರ ಐಪಿಎಲ್ ಆವೃತ್ತಿಯಲ್ಲಿ ಎಸ್​ಆರ್​​ಹೆಚ್ ಪರ ಸ್ಫೋಟಕ ಬ್ಯಾಟಿಂಗ್ ನಡೆಸುವ ಮೂಲಕ ಗಮನ ಸೆಳೆದಿದ್ದರು. 16 ಪಂದ್ಯಗಳಲ್ಲಿ 204.21ರ ಸ್ಟ್ರೈಕ್ ರೇಟ್‌ನಲ್ಲಿ 484 ರನ್ ಗಳಿಸಿದ್ದರು. ಅವರು ಟಿ20ಐ ಕ್ರಿಕೆಟ್​ಗೆ ಪಕ್ಕಾ ಸೂಟ್ ಆಗುವ ಆಟಗಾರನಾಗಿದ್ದಾರೆ.

ಇದನ್ನೂ ಓದಿ: ಬಹುನಿರೀಕ್ಷಿತ ಪ್ಯಾರಿಸ್ ಒಲಿಂಪಿಕ್ಸ್​ ಸಮಯ, ದಿನಾಂಕ; ಭಾರತದಲ್ಲಿ ಎಲ್ಲಿ, ಯಾವಾಗ ವೀಕ್ಷಿಸಬೇಕು?

ಕೆಎಲ್ ರಾಹುಲ್

ರಾಹುಲ್ 72 ಪಂದ್ಯಗಳಲ್ಲಿ 37.75ರ ಬ್ಯಾಟಿಂಗ್ ಸರಾಸರಿಯಲ್ಲಿ 2265 ರನ್ ಗಳಿಸಿದ್ದಾರೆ. ಸ್ಟ್ರೈಕ್​ರೇಟ್ 139.12 ಹಾಗೂ ಗರಿಷ್ಠ ಸ್ಕೋರ್ 110 ಆಗಿದೆ. ಕೆಎಲ್ ರಾಹುಲ್ ಅವರನ್ನು ಟಿ20 ವಿಶ್ವಕಪ್‌ಗೆ ಸೆಲೆಕ್ಟರ್​ಗಳು ಆಯ್ಕೆ ಮಾಡದಿದ್ದರೂ ಅನುಭವಿ ಆಟಗಾರನಾಗಿ ಅಗ್ರಕ್ರಮಾಂಕದಲ್ಲಿ ಆಡುವ ಅವಕಾಶ ಪಡೆಯುವ ನಿರೀಕ್ಷೆ ಇದೆ. ಆದರೆ, ನಿಧಾನಗತಿಯ ಬ್ಯಾಟಿಂಗ್​ ಟೀಕೆಗೂ ಗುರಿಯಾಗಿದ್ದಾರೆ. ಒಂದು ವೇಳೆ ಟಿ20ಐ ಕ್ರಿಕೆಟ್​ಗೆ ಮರಳಿದರೆ ಅಗ್ರಕ್ರಮಾಂಕದಲ್ಲಿ ಅವಕಾಶ ಪಡೆಯುವುದು ಖಚಿತ.

ಋತುರಾಜ್ ಗಾಯಕ್ವಾಡ್

ಭಾರತದ ಪರ 19 ಟಿ20ಐ ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದು 35.71ರ ಸ್ಟ್ರೈಕ್​ರೇಟ್​​ನಲ್ಲಿ 500 ರನ್​ ಸಿಡಿಸಿದ್ದಾರೆ. ಸ್ಟ್ರೈಕ್-ರೇಟ್ 140.05, ಗರಿಷ್ಠ ಸ್ಕೋರ್ 123* ಹೊಂದಿದ್ದಾರೆ. ಇದೀಗ ರೋಹಿತ್​-ಕೊಹ್ಲಿ ಸ್ಥಾನ ತುಂಬಲು ಋತುರಾಜ್ ಗಾಯಕ್ವಾಡ್ ಮುಂಚೂಣಿಯಲ್ಲಿದ್ದಾರೆ. ಭಾರತದ ಜಿಂಬಾಬ್ವೆ ಪ್ರವಾಸದಲ್ಲಿ ಗಾಯಕ್ವಾಡ್‌ಗೆ ನಿಯಮಿತ ಸ್ಥಾನವನ್ನು ಮುದ್ರೆಯೊತ್ತಲು ಅವಕಾಶವಿದೆ. ಈ ಸರಣಿಯಲ್ಲಿ ಅಬ್ಬರಿಸಿದರೆ ಮುಂದಿನ ಸರಣಿಗಳಲ್ಲೂ ಅವಕಾಶ ಪಡೆಯಲಿದ್ದಾರೆ.

ಇಶಾನ್ ಕಿಶನ್

ಇಶಾನ್ ಕಿಶನ್ 32 ಟಿ20ಐ ಪಂದ್ಯಗಳಲ್ಲಿ ಕಣಕ್ಕಿಳಿಸಿದ್ದು 796 ರನ್‌ ಸಿಡಿಸಿದ್ದಾರೆ. 25.67 ಬ್ಯಾಟಿಂಗ್ ಸರಾಸರಿ, 124.37ರ ಸ್ಟ್ರೈಕ್​ರೇಟ್ ಹೊಂದಿದ್ದಾರೆ. ಗರಿಷ್ಠ ಸ್ಕೋರ್ 89. ಆದರೆ, ಇಶಾನ್ ಇತ್ತೀಚೆಗೆ ತೋರಿದ ದುರ್ವತನೆಯಿಂದ ಬಿಸಿಸಿಐ, ಆತನಿಗೆ ಮತ್ತೆ ಅವಕಾಶ ನೀಡದಿರಲು ಚಿಂತಿಸಿದೆ. ಪ್ರಸ್ತುತ ಭಾರತೀಯ ತಂಡದ ಭಾಗವಾಗಿಲ್ಲ. ಒಂದು ವೇಳೆ ತಂಡಕ್ಕೆ ಮರಳಿದರೆ ಕಿಶನ್ ಪ್ರಮುಖ ಆಯ್ಕೆಯಾಗುತ್ತಾರೆ.

ಇದನ್ನೂ ಓದಿ: ಆರ್​ಸಿಬಿಯಿಂದ ದಿನೇಶ್​ ಕಾರ್ತಿಕ್​ಗೆ ಬಂಪರ್​ ಆಫರ್; ವಿದಾಯ ಹೇಳಿದ ಒಂದೇ ತಿಂಗಳಿಗೆ ಮಹತ್ವದ ಹುದ್ದೆ