ಬುಮ್ರಾ, ಸಿರಾಜ್ ಅಲ್ಲ; ಟಿ20 ವಿಶ್ವಕಪ್​ಗೆ ಭಾರತದ ಎಕ್ಸ್-ಫ್ಯಾಕ್ಟರ್ ಬೌಲರ್​ ಗುರುತಿಸಿದ ಜಹೀರ್ ಖಾನ್

ನವದೆಹಲಿ: ವೇಗದ ಬೌಲರ್​​ಗಳಾದ ಜಸ್ಪ್ರೀತ್ ಬುಮ್ರಾ ಮತ್ತು ಮೊಹಮ್ಮದ್ ಸಿರಾಜ್ ಅವರು 2024ರ ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಭಾರತ ತಂಡವನ್ನು ಮುನ್ನಡೆಸಬೇಕು ಎಂದು ಅಭಿಪ್ರಾಯಪಟ್ಟಿರುವ ಮಾಜಿ ವೇಗಿ ಜಹೀರ್​ ​ಖಾನ್, ಎಕ್ಸ್​ಫ್ಯಾಕ್ಟರ್ ಬೌಲರ್​ ಈ ಇಬ್ಬರೂ ಅಲ್ಲ ಎಂದು ಹೇಳಿದ್ದಾರೆ. ಇತ್ತೀಚೆಗೆ ಮುಕ್ತಾಯಗೊಂಡ ಟಿ20ಐ ಸರಣಿಯಲ್ಲಿ ಅಫ್ಘಾನಿಸ್ತಾನ ತಂಡವನ್ನು ಭಾರತ 3-0 ಅಂತರದಿಂದ ಸೋಲಿಸಿತ್ತು.

ಬೆಂಗಳೂರಿನಲ್ಲಿ ಬುಧವಾರ (ಜ 17) ನಡೆದ ಡಬಲ್ ಸೂಪರ್ ಓವರ್ ಥ್ರಿಲ್ಲರ್ ಪಂದ್ಯದಲ್ಲಿ ರೋಹಿತ್ ನಾಯಕತ್ವದ ಟೀಮ್ ಇಂಡಿಯಾ, ಪ್ರವಾಸಿ ತಂಡವನ್ನು ಮಣಿಸಿತು. 2024ರ ವಿಶ್ವಕಪ್​​ಗೆ ಮುನ್ನ ನಡೆದ ಭಾರತದ ಕೊನೆಯ ಸರಣಿ ಇದಾಗಿತ್ತು. ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಕಹಿ-ಸಿಹಿ ಪ್ರದರ್ಶನದ ನಂತರ ಬುಮ್ರಾ ಮತ್ತು ಸಿರಾಜ್ ಅವರಿಗೆ ಅಫ್ಘಾನಿಸ್ತಾನ ಟಿ20 ಸರಣಿಗೆ ವಿಶ್ರಾಂತಿ ನೀಡಲಾಗಿತ್ತು.

ಮೊಹಮ್ಮದ್ ಶಮಿ ಎಕ್ಸ್​ಫ್ಯಾಕ್ಟರ್​

ಮುಂದಿನ ಐಸಿಸಿ ಟಿ20 ವಿಶ್ವಕಪ್​​ನಲ್ಲಿ ಭಾರತದ ವೇಗದ ಬೌಲಿಂಗ್ ದಾಳಿಯ ಬಗ್ಗೆ ಕಲರ್ಸ್ ಸಿನಿಪಲ್​​​ನಲ್ಲಿ ಮಾತನಾಡಿದ ಮಾಜಿ ಕ್ರಿಕೆಟಿಗ ಜಹೀರ್, ಮೆಗಾ ಟೂರ್ನಿಗಾಗಿ ನಾಲ್ವರು ಬೌಲರ್​​ಗಳನ್ನು ಆಯ್ಕೆ ಮಾಡಿದ್ದಾರೆ. ಈ ಪೈಕಿ ಒಬ್ಬರನ್ನು ಮಾತ್ರ ಎಕ್ಸ್​ಫ್ಯಾಕ್ಟರ್ ಎಂದು ಕರೆದಿದ್ದಾರೆ. ನಾಲ್ವರು ವೇಗಿಗಳು ಖಚಿತವಾಗಿ ಆಯ್ಕೆಯಾಗಬೇಕು ಎಂದು ಮಾಜಿ ವೇಗದ ಬೌಲರ್​​, ಸೂಚಿಸಿದ್ದಾರೆ.

ಭಾರತ ತಂಡದಲ್ಲಿ ಸಿರಾಜ್ ಮತ್ತು ಬುಮ್ರಾ ಅವರು ಅವಕಾಶ ಪಡೆಯುತ್ತಾರೆ. ಈ ಜೋಡಿ ಬೌಲಿಂಗ್ ದಾಳಿಯನ್ನು ಮುನ್ನಡೆಸಲಿದೆ. ಮತ್ತೊಂದೆಡೆ ಅರ್ಷದೀಪ್ ಸಿಂಗ್ ಸಹ ತಂಡದ ಭಾಗವಾಗಲಿದ್ದಾರೆ. ಎಡಗೈ ವೇಗಿಯಾಗಿದ್ದು, ಯಾರ್ಕರ್​​ಗಳ ಮೂಲಕ ಎದುರಾಳಿ ತಂಡಗಳಿಗೆ ನಡುಕ ಸೃಷ್ಟಿಸಬಲ್ಲರು. ಅಲ್ಲದೆ, ಬೌಲಿಂಗ್​​ ವಿಭಾಗದಲ್ಲೂ ಸ್ವಲ್ಪ ವ್ಯತ್ಯಾಸ ಕಾಣಬಹುದು ಎಂದು ಹೇಳಿದ್ದಾರೆ.

ಆದರೆ ಭಾರತ ತಂಡದ ಎಕ್ಸ್-ಫ್ಯಾಕ್ಟರ್ ಅಂದರೆ ಮೊಹಮ್ಮದ್ ಶಮಿ ಎಂದು ಜಹೀರ್​ ಹೇಳಿದ್ದಾರೆ. ಆದರೆ ನಾನು ಶಮಿಯನ್ನು ಹೆಚ್ಚು ನಂಬುತ್ತೇನೆ. ಏಕೆಂದರೆ ಫಿಟ್ ಆಗಿ ತಂಡಕ್ಕೆ ಲಭ್ಯವಾದರೆ ಅವರು ವಿಶ್ವಕಪ್​​ನಲ್ಲಿ ನಿಮಗೆ (ಮ್ಯಾನೇಜ್​ಮೆಂಟ್​ಗೆ) ಎಕ್ಸ್-ಫ್ಯಾಕ್ಟರ್ ಆಯ್ಕೆಯಾಗಬಹುದು. ಏಕದಿನ ವಿಶ್ವಕಪ್​​ನಲ್ಲಿ ಯಾವ ರೀತಿ ಎಕ್ಸ್​ಫ್ಯಾಕ್ಟರ್​ ಆಗಿದ್ದರೋ ಅದೇ ರೀತಿ ಪ್ರದರ್ಶನ ನೀಡಲಿದ್ದಾರೆ ಎಂದು ಹೇಳಿದ್ದಾರೆ.

ವಿಶ್ವಕಪ್ ಬಳಿಕ ಆಡಿಯೇ ಇಲ್ಲ ಶಮಿ

2023ರ ಏಕದಿನ ವಿಶ್ವಕಪ್​ ಬಳಿಕ ಯಾವುದೇ ಸ್ಪರ್ಧಾತ್ಮಕ ಕ್ರಿಕೆಟ್ ಆಡ ಮೊಹಮ್ಮದ್ ಶಮಿ, ಮೆಗಾ ಈವೆಂಟ್​​ನಲ್ಲಿ ಅತ್ಯಧಿಕ ವಿಕೆಟ್ ಟೇಕರ್ ಆಗಿ ಹೊರಹೊಮ್ಮಿದರು. 33 ವರ್ಷದ ಆಟಗಾರ 24 ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾಗಿದ್ದರು. ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್​ ಸರಣಿಗೆ ಆಯ್ಕೆಯಾಗಿದ್ದ ಶಮಿ, ಫಿಟ್​ನೆಸ್ ಸಮಸ್ಯೆಯಿಂದ ಹಿಂದೆ ಸರಿದರು. ಇನ್ನೂ ಫಿಟ್​ ಆಗುತ್ತಿರುವ ಶಮಿ ಇಂಗ್ಲೆಂಡ್ ವಿರುದ್ಧದ ಮೊದಲ ಎರಡು ಟೆಸ್ಟ್​​ಗಳಿಗೆ ಆಯ್ಕೆಯಾಗಿಲ್ಲ.

ಸದ್ಯ ಫಿಟ್​ನೆಸ್​ನತ್ತ ಗಮನ ನೀಡಿರುವ ಮೊಹಮ್ಮದ್ ಶಮಿ, ಉಳಿದ ಮೂರು ಟೆಸ್ಟ್​​​ಗಳಿಗೆ ಆಯ್ಕೆಯಾಗುವ ಸಾಧ್ಯತೆ ಇದೆ. ಕಳೆದ ಜೂನ್​​ನಲ್ಲಿ ಶಮಿ ತಮ್ಮ ಕೊನೆಯ ಟೆಸ್ಟ್ ಆಡಿದ್ದರು. ಬುಮ್ರಾ ಮತ್ತು ಸಿರಾಜ್ ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಉನ್ನತ ಮಟ್ಟದ ಟೆಸ್ಟ್ ಸರಣಿಯಲ್ಲಿ ಪ್ರಮುಖ ಬೌಲರ್​​ಗಳಾಗಿ ಕಣಕ್ಕಿಳಿಯಲಿದ್ದಾರೆ. ಸಿರಾಜ್ ಮತ್ತು ಬುಮ್ರಾ ಜೊತೆಗೆ ವೇಗಿಗಳಾಗಿ ಮುಕೇಶ್ ಕುಮಾರ್ ಮತ್ತು ಅವೇಶ್ ಖಾನ್ ಕೂಡ ಸ್ಥಾನ ಪಡೆದಿದ್ದಾರೆ.

'ಮನೆ-ಮನದಲ್ಲಿ ಶ್ರೀರಾಮ' ಸರಣಿಗೆ ನೀವೂ ಬರೆಯಿರಿ. ಇಮೇಲ್: ht.kannada@htdigital.in