ಎಂಎಸ್ ಧೋನಿ ದಾಖಲೆ ಪುಡಿಪುಡಿ​; ಭಾರತದ ನಾಯಕನಾಗಿ ಹೊಸ ಮೈಲಿಗಲ್ಲು ಸ್ಥಾಪಿಸಿದ ರೋಹಿತ್ ಶರ್ಮಾ

ಅಫ್ಘಾನಿಸ್ತಾನ ತಂಡದ ವಿರುದ್ಧ 3ನೇ ಟಿ20 ಪಂದ್ಯದಲ್ಲೂ ಡಬಲ್​ ಸೂಪರ್​ನಲ್ಲಿ ಗೆದ್ದು ಬೀಗಿದ ಟೀಮ್ ಇಂಡಿಯಾ, 3-0 ಅಂತರದಲ್ಲಿ (India vs Afghanistan 3rd T20) ಸರಣಿಯನ್ನು ವಶಪಡಿಸಿಕೊಂಡಿದೆ. ಈ ವೈಟ್​ವಾಶ್ ಸಾಧನೆ ಬಳಿಕ ನಾಯಕ ರೋಹಿತ್​ ಶರ್ಮಾ (Rohit Sharma), ಮಾಜಿ ನಾಯಕ ಎಂಎಸ್ ಧೋನಿ (MS Dhoni) ದಾಖಲೆಯನ್ನು ಹಿಂದಿಕ್ಕಿದ್ದಾರೆ. ಟಿ20 ಕ್ರಿಕೆಟ್​​ನಲ್ಲಿ ಅತ್ಯಧಿಕ ಗೆಲುವು ದಾಖಲಿಸಿದ ಭಾರತದ ನಾಯಕ ಎನಿಸಿದ್ದಾರೆ.

ಚಿನ್ನಸ್ವಾಮಿ ಮೈದಾನದಲ್ಲಿ ಜನವರಿ 17ರಂದು ನಡೆದ ಮೂರನೇ ಹಾಗೂ ಅಂತಿಮ ಟಿ20 ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ 20 ಓವರ್​​ಗಳಲ್ಲಿ 212 ರನ್ ಗಳಿಸಿತು. ರೋಹಿತ್​ ಶರ್ಮಾ ವಿಶ್ವ ದಾಖಲೆಯ ಶತಕ ಸಿಡಿಸಿದರು. ಈ ಗುರಿ ಬೆನ್ನಟ್ಟಿದ 6 ವಿಕೆಟ್ ನಷ್ಟಕ್ಕೆ ಅಷ್ಟೇ ರನ್ ಗಳಿಸಿ ಟೈ ಮಾಡಿತು. ಬಳಿಕ ಮೊದಲ ಸೂಪರ್ ಓವರ್​​ ಸಹ ಟೈ ಆಯಿತು. ಕೊನೆಗೆ ಭಾರತ 2ನೇ ಸೂಪರ್​ ಓವರ್​​ನಲ್ಲಿ ಜಯಿಸಿತು.

ಅತ್ಯಧಿಕ ಗೆಲುವಿನ ದಾಖಲೆ

ಈ ಪಂದ್ಯಕ್ಕೂ ಮುನ್ನ ನಾಯಕನಾಗಿ ಎಂಎಸ್ ಧೋನಿ ದಾಖಲೆ ಸರಿಗಟ್ಟಿದ್ದ ರೋಹಿತ್​, ಈಗ ರೆಕಾರ್ಡ್​ ಅನ್ನು ಮುರಿದಿದ್ದಾರೆ. ಇದರೊಂದಿಗೆ ಅತ್ಯಧಿಕ ಟಿ20 ಗೆಲುವು ದಾಖಲಿಸಿದ ಭಾರತದ ಕ್ಯಾಪ್ಟನ್ ಎಂಬ ದಾಖಲೆಗೆ ಪಾತ್ರರಾಗಿದ್ದಾರೆ. ನಾಯಕನಾಗಿ ಧೋನಿ ಟಿ20 ಕ್ರಿಕೆಟ್​ನಲ್ಲಿ ಭಾರತಕ್ಕೆ 41 ಗೆಲುವು ತಂದುಕೊಟ್ಟಿದ್ದರು. ಹಿಟ್​ಮ್ಯಾನ್ 42 ಗೆಲುವು ಸಾಧಿಸಿ ಹೊಸ ಮೈಲಿಗಲ್ಲು ನೆಟ್ಟಿದ್ದಾರೆ. ಅದು ಕೂಡ ಅತಿ ಕಡಿಮೆ ಪಂದ್ಯಗಳಲ್ಲಿ ಎಂಬುದು ವಿಶೇಷ.

72 ಪಂದ್ಯಗಳಲ್ಲಿ ಭಾರತ ತಂಡವನ್ನು ಮುನ್ನಡೆಸಿದ್ದ ಧೋನಿ, 41 ಗೆಲುವು, 28 ಸೋಲು ಕಂಡಿದ್ದಾರೆ. 1 ಟೈನಲ್ಲಿ ಅಂತ್ಯಕಂಡಿದೆ. ಗೆಲುವಿನ ಪ್ರಮಾಣ 56.94. ಅದೇ ರೋಹಿತ್​ ಶರ್ಮಾ 55 ಪಂದ್ಯಗಳಲ್ಲಿ ತಂಡಕ್ಕೆ ನಾಯಕನಾಗಿದ್ದು, 42 ಗೆಲುವು, 12 ಸೋಲು, 1 ಟೈ ಕಂಡಿದ್ದಾರೆ. ಗೆಲುವಿನ ಪ್ರಮಾಣ 75.92. ಈಗ ರೋಹಿತ್ ಅಗ್ರಸ್ಥಾನದಲ್ಲಿದ್ದಾರೆ. 3ನೇ ಸ್ಥಾನದಲ್ಲಿರುವ ವಿರಾಟ್, 50 ಟಿ20ಗಳಲ್ಲಿ ಕ್ಯಾಪ್ಟನ್ ಆಗಿದ್ದು, 30 ಜಯ, 16 ಸೋಲು ಕಂಡಿದ್ದಾರೆ. ಗೆಲುವಿನ ಪ್ರಮಾಣ 60.

ರೋಹಿತ್​ ನಾಯಕನಾಗಿ ಮತ್ತೊಂದು ದಾಖಲೆ

ಸರಣಿಯ ಮೊದಲೆರಡು ಪಂದ್ಯಗಳಲ್ಲಿ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದ್ದ ರೋಹಿತ್​ ಅಂತಿಮ ಟಿ20ಯಲ್ಲಿ ಆಕರ್ಷಕ ಶತಕ ಸಿಡಿಸಿದರು. ಬೌಂಡರಿ ಸಿಕ್ಸರ್‌ಗಳ ಸುರಿಮಳೆಗೈದು ಚುಟುಕು ಕ್ರಿಕೆಟ್​ನಲ್ಲಿ ಐದನೇ ಶತಕ ಸಿಡಿಸಿ ಮಿಂಚಿದರು. ಇದರೊಂದಿಗೆ ಹಲವು ದಾಖಲೆ ಬರೆದರು. ಕೇವಲ 69 ಎಸೆತಗಳಲಕ್ಲಿ 11 ಬೌಂಡರಿ, 8 ಸಿಕ್ಸರ್​ ಸಹಿತ ಅಜೇಯ 121 ರನ್‌ ಕಲೆ ಹಾಕಿದರು. ಟಿ20 ಸ್ವರೂಪದಲ್ಲಿ ಇದು ಅವರ ಅತಿ ಹೆಚ್ಚು ಸ್ಕೋರ್.‌

ಇದೇ ವೇಳೆ ನಾಯಕನಾಗಿ ರೋಹಿತ್‌ ವಿಶೇಷ ದಾಖಲೆ ನಿರ್ಮಿಸಿದರು. ಭಾರತ ತಂಡದ ನಾಯಕನಾಗಿ ಟಿ20 ಸ್ವರೂಪದಲ್ಲಿ ಅಧಿಕ ರನ್‌ ಕಲೆ ಹಾಕಿದರು. ಆ ಮೂಲಕ ವಿರಾಟ್‌ ಕೊಹ್ಲಿ ದಾಖಲೆ ಬ್ರೇಕ್‌ ಮಾಡಿದರು. ಕೊಹ್ಲಿ ನಾಯಕನಾಗಿ 1570 ರನ್‌ ಗಳಿಸಿದ್ದು, ರೋಹಿತ್‌ ಶರ್ಮಾ ಆ ರನ್‌ ಮೀರಿಸಿದ್ದಾರೆ. 1647ಕ್ಕೂ ಅಧಿಕ ರನ್‌ ಕಲೆ ಹಾಕಿದ್ದಾರೆ. ವಿಶ್ವ ಟಿ20 ಕ್ರಿಕೆಟ್​ನಲ್ಲಿ ಅತ್ಯಧಿಕ ಸೆಂಚುರಿ ಸೇರಿದಂತೆ ಹಲವು ದಾಖಲೆಗಳು ದಾಖಲಾದವು.

'ಮನೆ-ಮನದಲ್ಲಿ ಶ್ರೀರಾಮ' ಸರಣಿಗೆ ನೀವೂ ಬರೆಯಿರಿ. ಇಮೇಲ್: ht.kannada@htdigital.in