ಅಬ್ಬಬ್ಬಾ T20ಯಲ್ಲಿ 314 ರನ್, 9 ಎಸೆತಗಳಲ್ಲಿ ಅರ್ಧಶತಕ, 34 ಬಾಲ್ಗಳಲ್ಲಿ ಶತಕ; ಹೊಸ ಚರಿತ್ರೆ ಸೃಷ್ಟಿಸಿದ ನೇಪಾಳ
Sep 27, 2023 02:35 PM IST
ಕ್ರಿಕೆಟ್ ಯುಗದಲ್ಲಿ ಹೊಸ ಚರಿತ್ರೆ ಸೃಷ್ಟಿಸಿದ ನೇಪಾಳ ತಂಡ.
- Asia Cup 2023, Nepal vs Mongolia: ಏಷ್ಯನ್ ಗೇಮ್ಸ್ನಲ್ಲಿ ಮಂಗೋಲಿಯಾ ವಿರುದ್ಧದ ತಮ್ಮ ಆರಂಭಿಕ ಪಂದ್ಯದಲ್ಲಿ ಪವರ್-ಹಿಟ್ಟಿಂಗ್ ಮೂಲಕ ನಂಬಲಾಗದ ಪ್ರದರ್ಶನದೊಂದಿಗೆ ನೇಪಾಳ ತಂಡವು ಅನೇಕ ವಿಶ್ವದಾಖಲೆಗಳನ್ನು ಮುರಿದಿದೆ.
ಏಷ್ಯನ್ ಗೇಮ್ನಲ್ಲಿ (Asian Games 2023) ಪುರುಷರ ಕ್ರಿಕೆಟ್ ವಿಭಾಗದ ಗ್ರೂಪ್ ಹಂತದ ಪಂದ್ಯದಲ್ಲಿ ಮಂಗೋಲಿಯಾ ವಿರುದ್ಧ ನೇಪಾಳ ತಂಡವು (Nepal vs Mongolia) ಹೊಸ ಚರಿತ್ರೆ ಸೃಷ್ಟಿಸಿದೆ. ಈ ಪಂದ್ಯದಲ್ಲಿ ಹಲವು ನೂತನ ವಿಶ್ವ ದಾಖಲೆಗಳನ್ನು ನಿರ್ಮಿಸಿದೆ. ಮಹಿಳೆಯರ ಕ್ರಿಕೆಟ್ ಮುಕ್ತಾಯದ ಬೆನ್ನಲ್ಲೇ ಇದೀಗ ಪುರುಷರ ಕ್ರಿಕೆಟ್ಗೆ ಆರಂಭಗೊಂಡಿದೆ. ಅದರಂತೆ ನಡೆದ ಮೊದಲ ಪಂದ್ಯದಲ್ಲಿ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ದಾಖಲೆಗಳ (Cricket Record) ಮೇಲೆ ದಾಖಲೆಗಳು ಸೃಷ್ಟಿಯಾಗಿವೆ.
ಮಂಗೋಲಿಯಾ ವಿರುದ್ಧ ಮೊದಲು ಬ್ಯಾಟಿಂಗ್ ನಡೆಸಿದ ನೇಪಾಳ ತಂಡವು, ನಿಗದಿತ 20 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ ಬರೋಬ್ಬರಿ ಗಳಿಸಿದ್ದು 314 ರನ್. ಇದು ನಂಬಲು ಅಸಾಧ್ಯ ಎನಿಸಿದ ಸ್ಕೋರ್. ಅಸಾಧಾರಣ ಬ್ಯಾಟಿಂಗ್ ಮೂಲಕ ಕೇವಲ 120 ಎಸೆತಗಳಲ್ಲಿ 300 ರನ್ ದಾಖಲಿಸಿ ಹೊಸ ದಾಖಲೆ ನಿರ್ಮಿಸಿದೆ. ಟಿ20 ಕ್ರಿಕೆಟ್ ಇತಿಹಾಸದಲ್ಲಿ 20 ಓವರ್ಗಳಲ್ಲಿ 300 ರನ್ ದಾಟಿದ ಮೊದಲ ತಂಡ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಇದೊಂದೇ ಅಲ್ಲ, ಹಲವು ರೆಕಾರ್ಡ್ಸ್ ಕ್ರಿಕೆಟ್ ಇತಿಹಾಸದ ದಾಖಲೆ ಪುಸ್ತಕ ಸೇರಿಕೊಂಡಿವೆ.
ವೇಗದ ಅರ್ಧಶತಕ, ಯುವಿ ದಾಖಲೆ ಧ್ವಂಸ
ಟೀಮ್ ಇಂಡಿಯಾದ ಆಲ್ರೌಂಡರ್ ಯುವರಾಜ್ ಸಿಂಗ್ 12 ಎಸೆತಗಳಲ್ಲಿ ಅರ್ಧಶತಕ ಸಿಡಿಸುವ ಮೂಲಕ ಅತಿವೇಗದ ಹಾಫ್ ಸೆಂಚುರಿ ಬಾರಿಸಿ ಇತಿಹಾಸ ನಿರ್ಮಿಸಿದ್ದರು. ಆದರೀಗ ಈ ದಾಖಲೆಯನ್ನು ನೇಪಾಳ ಕ್ರಿಕೆಟಿಗ ದೀಪೇಂದ್ರ ಸಿಂಗ್ ಐರಿ ಮುರಿದಿದ್ದಾರೆ. ದೀಪೇಂದ್ರ ಕೇವಲ 9 ಎಸೆತಗಳಲ್ಲಿ ಸಿಡಿಲಬ್ಬರದ ಅರ್ಧಶತಕ ಬಾರಿಸಿ 10 ಎಸೆತಗಳಲ್ಲಿ ಅಜೇಯ 52 ರನ್ ಗಳಿಸಿದರು. ಅವರ ಈ ಇನ್ನಿಂಗ್ಸ್ನಲ್ಲಿ 8 ಸಿಕ್ಸರ್ಗಳೇ ಇವೆ. ಅಂದರೆ 48 ರನ್ಗಳು ಸಿಕ್ಸರ್ಗಳ ಮೂಲಕವೇ ಬಂದಿರುವುದು ವಿಶೇಷ.
ಅತಿ ವೇಗದ ಶತಕ, ರೋಹಿತ್ ರೆಕಾರ್ಡ್ ಉಡೀಸ್
ಯುವರಾಜ್ ಸಿಂಗ್ ವೇಗ ಅರ್ಧಶತಕ ಮಾತ್ರವಲ್ಲ, ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಮತ್ತು ಸೌತ್ ಆಫ್ರಿಕಾದ ಡೇವಿಡ್ ಮಿಲ್ಲರ್ ಅವರ ವೇಗದ ಟಿ20 ಶತಕದ ಜಂಟಿ ದಾಖಲೆಯನ್ನೂ ಮುರಿಯಲಾಗಿದೆ. ಇವರಿಬ್ಬರೂ 35 ಎಸೆತಗಳಲ್ಲಿ ಶತಕ ಸಿಡಿಸಿ ವೇಗದ ಶತಕ ಬಾರಿಸಿದ ದಾಖಲೆ ಬರೆದಿದ್ದರು. ಆದರೀಗ ಈ ವಿಶ್ವ ದಾಖಲೆಯನ್ನು ನೇಪಾಳದ ಬ್ಯಾಟರ್ ಕುಶಾಲ್ ಮಲ್ಲಾ ಹಿಂದಿಕ್ಕಿದ್ದಾರೆ. ಕುಶಾಲ್ ಮಲ್ಲಾ ಕೇವಲ 34 ಎಸೆತಗಳಲ್ಲಿ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ನಲ್ಲಿ ವೇಗದ ಶತಕ ಬಾರಿಸಿದ್ದಾರೆ. ಮಲ್ಲಾ 12 ಸಿಕ್ಸರ್, 8 ಬೌಂಡರಿ ಸಹಿತ 50 ಎಸೆತಗಳಲ್ಲಿ ಅಜೇಯರಾಗಿ 137 ರನ್ ಗಳಿಸಿದರು.
ಒಂದೇ ಪಂದ್ಯದಲ್ಲಿ 26 ಸಿಕ್ಸರ್ಗಳು
ಮತ್ತೊಂದು ದಾಖಲೆ ಅಂದರೆ, ಟಿ20 ಕ್ರಿಕೆಟ್ನಲ್ಲಿ ಒಂದೇ ಇನ್ನಿಂಗ್ಸ್ನಲ್ಲಿ ಅಧಿಕ ಸಿಕ್ಸರ್ಗಳು ದಾಖಲಾಗಿವೆ. ಚುಟುಕು ಕ್ರಿಕೆಟ್ ಇತಿಹಾಸದಲ್ಲಿ ಯಾವ ತಂಡವೂ ಒಂದು ಇನ್ನಿಂಗ್ಸ್ನಲ್ಲಿ ಇಷ್ಟು ಸಿಕ್ಸರ್ ಸಿಡಿಸಿಲ್ಲ. ಈ ಹಿಂದೆ ಅಫ್ಘಾನಿಸ್ತಾನ 2019 ರಲ್ಲಿ 278/3 ಸ್ಕೋರ್ ಮಾಡಿದ್ದಾಗ 22 ಸಿಕ್ಸರ್ ಬಾರಿಸಿದ್ದು ಈವರೆಗಿನ ದಾಖಲೆಯಾಗಿತ್ತು. ಈಗ ಈ ದಾಖಲೆಯನ್ನೂ ಮುರಿದಿದೆ.
ಅತಿ ದೊಡ್ಡ ಅಂತರದ ಗೆಲುವು
ಮೊದಲು ಬ್ಯಾಟಿಂಗ್ ನಡೆಸಿದ ನೇಪಾಳ, ನಿಗದಿತ 20 ಓವರ್ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 314 ರನ್ಗಳ ಬೃಹತ್ ಮೊತ್ತ ಪೇರಿಸಿತು. ಈ ಗುರಿ ಬೆನ್ನಟ್ಟಿದ ಮಂಗೋಲಿಯಾ 41 ರನ್ಗಳಿಗೆ ಸರ್ವಪತನ ಕಂಡಿತು. ಇದರೊಂದಿಗೆ ನೇಪಾಳ 273 ರನ್ಗಳ ಅಂತರದ ಗೆಲುವು ಸಾಧಿಸಿತು. ಟಿ20 ಕ್ರಿಕೆಟ್ನಲ್ಲಿ ಅತಿ ದೊಡ್ಡ ಅಂತರದ ಗೆಲುವು ವಿಶ್ವ ದಾಖಲೆಯನ್ನೂ ತನ್ನದಾಗಿಸಿಕೊಂಡಿದೆ ನೇಪಾಳ. ಅಲ್ಲದೆ, ಮಂಗೋಲಿಯಾ ಅತಿ ಕಡಿಮೆ ಮೊತ್ತಕ್ಕೆ ಆಲೌಟ್ ಆದ ಕಳೆ ದಾಖಲೆಗೂ ಒಳಗಾಗಿದೆ.
ಟಿ20ಐ ಇತಿಹಾಸದಲ್ಲಿ ಅತ್ಯಧಿಕ ಸ್ಕೋರ್ ಪಟ್ಟಿ ಇಲ್ಲಿದೆ
- ನೇಪಾಳ - 314/4 ವಿರುದ್ಧ ಮಂಗೋಲಿಯಾ (2023)
- ಅಫ್ಘಾನಿಸ್ತಾನ - 278/3 ವಿರುದ್ಧ ಐರ್ಲೆಂಡ್ (2019)
- ಜೆಕ್ ರಿಪಬ್ಲಿಕ್ - 278/4 ವಿರುದ್ಧ ಟರ್ಕಿ (2019)
- ಆಸ್ಟ್ರೇಲಿಯಾ - 263/3 ವಿರುದ್ಧ ಶ್ರೀಲಂಕಾ (2016)
- ಶ್ರೀಲಂಕಾ 260/6 ವಿರುದ್ಧ ಕೀನ್ಯಾ (2007)