ಕರ್ನಾಟಕ ಬಜೆಟ್ 2024; ಆಗದು ಎಂದು ಕೈ ಕಟ್ಟಿ ಕುಳಿತರೆ ಎನ್ನುತ್ತ ಸಿಎಂ ಸಿದ್ದರಾಮಯ್ಯ ಬಜೆಟ್ ಭಾಷಣ ಶುರು; ಇಲ್ಲಿದೆ ಹಾಡಿನ ಸಾಹಿತ್ಯ, ವಿಡಿಯೋ

ಬೆಂಗಳೂರು: ಕರ್ನಾಟಕ ಬಜೆಟ್ 2024 ಮಂಡನೆ ಶುರುಮಾಡಿದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಆರಂಭದಲ್ಲಿ ಶರಣರ ವಚನ ಹೇಳಿದರು. ಕೂಡಲೇ ಕನ್ನಡದ ವರನಟ ಡಾ.ರಾಜ್ ಕುಮಾರ್ ಅಭಿನಯದ ಬಂಗಾರದ ಮನುಷ್ಯ ಚಿತ್ರದ ಹಾಡನ್ನು ಉಲ್ಲೇಖಿಸಿದರು.

“ಆಗದು ಎಂದು; ಕೈಲಾಗದು ಎಂದು ಕೈಕಟ್ಟಿ ಕುಳಿತರೆ ಸಾಗದು ಕೆಲಸವು ಮುಂದೆ ಮನಸೊಂದಿದ್ದರೆ ಮಾರ್ಗವು ಉಂಟು ಕೆಚ್ಚೆದೆ ಇರಬೇಕೆಂದು…”

ವರನಟ ಡಾ|| ರಾಜ್‌ಕುಮಾರ್‌ ಅಭಿನಯದ ಹಾಗೂ ಆರ್.ಎನ್.ಜಯಗೋಪಾಲ್‌ ರಚಿಸಿದ ಬಂಗಾರದ ಮನುಷ್ಯ ಚಿತ್ರದ ಈ ಹಾಡಿನಂತೆ ದೇಶದ ಯಾವುದೇ ಸರ್ಕಾರ ಜಾರಿಗೊಳಿಸದ ಅತ್ಯಂತ ಬೃಹತ್‌ ಪ್ರಮಾಣದ ನೇರ ನೆರವು ನೀಡುವ ಗ್ಯಾರಂಟಿ ಯೋಜನೆಗಳನ್ನು ಅತ್ಯಂತ ಕಡಿಮೆ ಅವಧಿಯಲ್ಲಿ ಪರಿಣಾಮಕಾರಿಯಾಗಿ ಅನುಷ್ಠಾನಗೊಳಿಸಿದ ಶ್ರೇಯ ನಮ್ಮದಾಗಿದೆ. ನಮ್ಮ ಮಹತ್ವಾಕಾಂಕ್ಷೆಯ ಗ್ಯಾರಂಟಿಗಳು ಜನರ ಆಶೋತ್ತರಗಳನ್ನು ಆಧರಿಸಿವೆ ಎಂದು ಹೇಳುತ್ತ ಮುಖ್ಯಮಂತ್ರಿ ಸಿದ್ದರಾಮಯ್ಯ ತಮ್ಮ ಬಜೆಟ್ ಭಾಷಣ ಶುರುಮಾಡಿದರು.

ಇದನ್ನೂ ಓದಿ| ಕರ್ನಾಟಕ ಬಜೆಟ್ 2024 Highlights: ಗ್ಯಾರೆಂಟಿಗಳು ಅಬಾಧಿತ, ವೃದ್ಧರಿಗೆ ಅನ್ನ ಸುವಿಧಾ, ಮುತುವಲ್ಲಿಗಳಿಗೆ ತರಬೇತಿ; ಬಜೆಟ್‌ ಭಾಷಣದ ಮುಖ್ಯ ಅಂಶ

ಬಂಗಾರದ ಮನುಷ್ಯ ಸಿನಿಮಾದ “ಮನಸೊಂದಿದ್ದರೆ ಮಾರ್ಗವು ಉಂಟು ಕೆಚ್ಚೆದೆ ಇರಬೇಕೆಂದು” ಹಾಡಿನ ಸಾಹಿತ್ಯ

ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಬಜೆಟ್ ಭಾಷಣದಲ್ಲಿ ಈ ಹಾಡನ್ನು ಉಲ್ಲೇಖಿಸಿದ್ದು ಎಲ್ಲರ ಗಮನವೂ ಡಾ. ರಾಜ್ ಅಭಿನಯದ ಬಂಗಾರದ ಮನುಷ್ಯ ಸಿನಿಮಾದ ಹಾಡಿಗಾಗಿ ಹುಡುಕಾಡುವಂತಾಯಿತು.

ಮನಸೊಂದಿದ್ದರೆ ಮಾರ್ಗವು ಉಂಟು

ಕೆಚ್ಚೆದೆ ಇರಬೇಕೆಂದು ಕೆಚ್ಚೆದೆ ಇರಬೇಕೆಂದೆಂದು

ಕೆತ್ತಲಾಗದು ಕಗ್ಗಲ್ಲೆಂದು

ಎದೆಗುಂದಿದ್ದರೆ ಶಿಲ್ಪಿ ಆಗುತಿತ್ತೆ

ಕಲೆಗಳ ಬೀಡು ಗೊಮ್ಮಟೇಶನ ನೆಲೆನಾಡು

ಬೇಲೂರು ಹಳೆಬೀಡು ಬೇಲೂರು ಹಳೆಬೀಡು

ಆಗದು ಎಂದು ಕೈಲಾಗದು ಎಂದು ಕೈ ಕಟ್ಟಿ ಕುಳಿತರೆ

ಸಾಗದು ಕೆಲಸವು ಮುಂದೆ ಸಾಗದು ಕೆಲಸವು ಮುಂದೆ

ಕಾವೇರಿಯನು ಹರಿಯಲು ಬಿಟ್ಟು

ಕಾವೇರಿಯನು ಹರಿಯಲು ಬಿಟ್ಟು

ವಿಶ್ವೇಶ್ವರಯ್ಯ ಶ್ರಮ ಪಡದಿದ್ದರೆ

ಕನ್ನಂಬಾಡಿಯ ಕಟ್ಟದಿದ್ದರೆ

ಬಂಗಾರ ಬೆಳೆವ ಹೊನ್ನಾಡು

ಆಹಾ ಬಂಗಾರ ಬೆಳೆವ ಹೊನ್ನಾಡು

ಆಗುತಿತ್ತೆ ಈ ನಾಡು ಕನ್ನಡ ಸಿರಿನಾಡು

ನಮ್ಮ ಕನ್ನಡ ಸಿರಿನಾಡು

ಆಗದು ಎಂದು ಕೈಲಾಗದು ಎಂದು ಕೈ ಕಟ್ಟಿ ಕುಳಿತರೆ

ಸಾಗದು ಕೆಲಸವು ಮುಂದೆ ಸಾಗದು ಕೆಲಸವು ಮುಂದೆ

ಇದನ್ನೂ ಓದಿ| ಬಜೆಟ್‌ನಲ್ಲಿ ಡೇರ್‌ಡೆವಿಲ್‌ ಮುಸ್ತಾಫಾ ಚಿತ್ರದ ಹಾಡಿನ ಮೋಡಿ; ಡಾಲಿ ಧನಂಜಯ್‌ ಬರೆದ ಸಾಹಿತ್ಯ ಓದಿದ ಸಿಎಂ

ಕೈಕೆಸರಾದರೆ ಬಾಯಿ ಮೊಸರೆಂಬ ಹಿರಿಯರ ಅನುಭವ ಸತ್ಯ

ಇದ ನೆನಪಿಡಬೇಕು ನಿತ್ಯ

ದುಡಿಮೆಯ ನಂಬಿ ಬದುಕು

ಅದರಲೆ ದೇವರ ಹುಡುಕು

ಬಾಳಲಿ ಬರುವುದು ಬೆಳಕು

ನಮ್ಮ ಬಾಳಲಿ ಬರುವುದು ಬೆಳಕು

ಆಗದು ಎಂದು ಕೈ ಕಟ್ಟಿ ಕುಳಿತರೆ ಸಾಗದು ಕೆಲಸವು ಮುಂದೆ

ಮನಸೊಂದಿದ್ದರೆ ಮಾರ್ಗವು ಉಂಟು

ಕೆಚ್ಚೆದೆ ಇರಬೇಕೆಂದು ಕೆಚ್ಚೆದೆ ಇರಬೇಕೆಂದೆಂದು

ಈ ಹಾಡಿನ ಸಾಹಿತ್ಯ ಬರೆದವರು ಆರ್.ಎನ್.ಜಯಗೋಪಾಲ್‌. ಸಂಗೀತ ನೀಡಿದ್ದು ಜಿ.ಕೆ.ವೆಂಕಟೇಶ್‌ ಮತ್ತು ಹಾಡಿದ್ದು ಪಿ.ಬಿ.ಶ್ರೀನಿವಾಸ್.

ಇದನ್ನೂ ಓದಿ| ಕರ್ನಾಟಕ ಬಜೆಟ್‌ 2024: ಬಜೆಟ್‌ ಪಿಡಿಎಫ್‌ ಪ್ರತಿ ಡೌನ್‌ಲೋಡ್ ಮಾಡಿಕೊಳ್ಳುವುದು ಹೇಗೆ, ಇಲ್ಲಿದೆ ಮಾರ್ಗ

ಇಲ್ಲಿದೆ ಬಂಗಾರದ ಮನುಷ್ಯ ಸಿನಿಮಾದ “ಮನಸೊಂದಿದ್ದರೆ ಮಾರ್ಗವು ಉಂಟು” ಹಾಡಿನ ವಿಡಿಯೋ

ಸದ್ಯದ ರಾಜಕೀಯ ಸನ್ನಿವೇಶಗಳಿಗೆ ಸರಿ ಹೊಂದುವಂತೆ ಬಜೆಟ್ ಭಾಷಣದಲ್ಲಿ ಹಾಡುಗಳನ್ನು ಜೋಡಿಸಿಕೊಂಡಿರುವ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಬಂಗಾರದ ಮನುಷ್ಯ ಸಿನಿಮಾವನ್ನು ಮತ್ತೆ ನೆನಪಿಗೆ ಬರುವಂತೆ ಮಾಡಿದ್ದಾರೆ.

ವಿಪಕ್ಷ ನಾಯಕರ, ಸದಸ್ಯರ ಟೀಕೆಗಳನ್ನು ಎದುರಿಸುತ್ತ ಐದು ಗ್ಯಾರೆಂಟಿ ಯೋಜನೆಗಳನ್ನು ಜಾರಿಗೊಳಿಸಿದ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಬಜೆಟ್ ಭಾಷಣದಲ್ಲೂ ಆ ಟೀಕೆಗಳಿಗೆ ಉತ್ತರ ನೀಡಲು ಹಲವು ಹಾಡಿನ ಸಾಲುಗಳನ್ನು ಬಳಸಿಕೊಂಡಿದ್ದಾರೆ. ಅದರಲ್ಲಿ ಈ ಹಾಡು ಕೂಡ ಒಂದಾಗಿತ್ತು.

(This copy first appeared in Hindustan Times Kannada website. To read more like this please logon to kannada.hindustantimes.com)