Rashmika Mandanna: ಥಾಮಾ ಇದು ರಕ್ತಪಾತದ ಪ್ರೇಮಕಹಾನಿ; ಸ್ತ್ರೀ 2 ತಂಡದ ಜತೆಗೆ ಕೈ ಜೋಡಿಸಿದ ರಶ್ಮಿಕಾ ಮಂದಣ್ಣ
Oct 30, 2024 04:51 PM IST
Share
ಸ್ತ್ರೀ 2 ತಂಡದ ಜತೆಗೆ ಕೈ ಜೋಡಿಸಿದ ರಶ್ಮಿಕಾ ಮಂದಣ್ಣ
Thama Movie: ಬಾಲಿವುಡ್‌ನಲ್ಲಿ ಮಿಂಚುತ್ತಿರುವ ಕನ್ನಡತಿ ರಶ್ಮಿಕಾ ಮಂದಣ್ಣ ಇದೀಗ ಮ್ಯಾಡಕ್‌ ಹಾರರ್ ಯೂನಿವರ್ಸ್‌ನ ಭಾಗವಾಗಿದ್ದಾರೆ. ಸ್ತ್ರೀ 2 ಸಿನಿಮಾ ನಿರ್ಮಾಣ ಮಾಡಿದ್ದ ಸಂಸ್ಥೆ ಥಾಮಾ ಹೆಸರಿನ ಹಾರರ್ ಸಿನಿಮಾ ಘೋಷಣೆ ಮಾಡಿದೆ. ಇಲ್ಲಿ ಆಯುಷ್ಮಾನ್ ಖುರಾನಾಗೆ ರಶ್ಮಿಕಾ ಜೋಡಿಯಾಗಲಿದ್ದಾರೆ.
Rashmika Mandanna: ಈಗಾಗಲೇ ಬಾಲಿವುಡ್ ಸಿನಿಮಾ ಇಂಡಸ್ಟ್ರಿಯಲ್ಲಿ ಗುರುತಿಸಿಕೊಂಡಿರುವ ನಟಿ ರಶ್ಮಿಕಾ ಮಂದಣ್ಣ, ಹಿಂದಿಯಲ್ಲಿ ಹಿಟ್‌ ನೀಡಿ ಗೆದ್ದಿದ್ದಾರೆ. ಸದ್ಯ ಸಲ್ಮಾನ್‌ ಖಾನ್‌ ಜತೆಗೆ ಸಿಕಂದರ್‌ ಚಿತ್ರದಲ್ಲೂ ರಶ್ಮಿಕಾ ಮಂದಣ್ಣ ನಟಿಸುತ್ತಿದ್ದಾರೆ. ದಕ್ಷಿಣದ ಸಾಲು ಸಾಲು ಸಿನಿಮಾಗಳಲ್ಲಿಯೂ ಅವರು ಬಿಜಿಯಾಗಿದ್ದಾರೆ. ಇದೀಗ ಇದೇ ರಶ್ಮಿಕಾ ಮಂದಣ್ಣ ಬಾಲಿವುಡ್‌ನಲ್ಲಿ ಮತ್ತೊಂದು ಸಿನಿಮಾ ಒಪ್ಪಿಕೊಂಡಿದ್ದಾರೆ. ಆ ಚಿತ್ರಕ್ಕೆ ಥಾಮಾ ಎಂದು ಹೆಸರಿಡಲಾಗಿದೆ. ದೀಪಾವಳಿ ಪ್ರಯುಕ್ತ ಈ ಚಿತ್ರದ ಘೋಷಣೆ ಆಗಿದೆ.
ಬಾಲಿವುಡ್‌ನಲ್ಲಿ ಶ್ರದ್ಧಾ ಕಪೂರ್ ಅಭಿನಯದ 'ಸ್ತ್ರೀ 2' ಬಾಕ್ಸ್ ಆಫೀಸ್‌ನಲ್ಲಿ ಕಮಾಲ್‌ ಮಾಡಿದೆ. ಕಲೆಕ್ಷನ್‌ ವಿಚಾರದಲ್ಲಿ ಮೋಡಿ ಮಾಡಿತ್ತು ಈ ಸಿನಿಮಾ. ಈ ಚಿತ್ರದ ಯಶಸ್ಸಿನ ನಂತರ, ಇದೀಗ ಹಾರರ್ ಕಾಮಿಡಿ ಯೂನಿವರ್ಸ್‌ನ ಮತ್ತೊಂದು ಸಿನಿಮಾ ಘೋಷಣೆ ಮಾಡಿದೆ ಮಡೋಕ್‌ ಚಿತ್ರ ನಿರ್ಮಾಣ ಸಂಸ್ಥೆ. ಥಾಮಾ ಎಂಬ ಹಾರರ್ ಚಿತ್ರದ ಅನೌನ್ಸ್‌ ಆಗಿದ್ದು, ಈ ಸಿನಿಮಾ 2025ರಲ್ಲಿ ತೆರೆಗೆ ಬರಲಿದೆ ಎಂದೂ ನಿರ್ಮಾಣ ಸಂಸ್ಥೆ ಹೇಳಿಕೊಂಡಿದೆ. ಅಚ್ಚರಿಯ ವಿಚಾರ ಏನೆಂದರೆ ಆಯುಷ್ಮಾನ್ ಖುರಾನಾ ಅವರ ಜತೆಗಿಲ್ಲಿ, ರಶ್ಮಿಕಾ ಮಂದಣ್ಣ ಜೋಡಿಯಾಗಿದ್ದಾರೆ.
44 ಸೆಕೆಂಡ್‌ಗಳ ಶೀರ್ಷಿಕೆ ಅನಾವರಣದ ಟೀಸರ್‌ ಝಲಕ್‌ ಬಿಡುಗಡೆ ಆಗಿದ್ದು, ಆದಿತ್ಯಾ ಸರ್ಪೋತದಾರ್ ಈ ಸಿನಿಮಾ ನಿರ್ದೇಶನ ಮಾಡಲಿದ್ದಾರೆ. ಸ್ತ್ರೀ, ಭೇಡಿಯ, ಮುಂಜ್ಯಾ, ಸ್ತ್ರೀ 2 ಸಿನಿಮಾ ಮಾಡಿದ್ದ ನಿರ್ಮಾಪಕರು ಈಗ ಲವ್ ಸ್ಟೋರಿಯೊಂದಿಗೆ ಬರುತ್ತಿದ್ದಾರೆ. ಇದೂ ಕೇವಲ ಪ್ರೇಮಕಹಾನಿ ಮಾತ್ರವಲ್ಲ. ಭಯಹುಟ್ಟಿಸೋ ಹಾರರ್ ಅಂಶಗಳೂ ಈ ಸಿನಿಮಾದಲ್ಲಿದೆ ಇದೆ ಎಂಬುದನ್ನು ಟೀಸರ್‌ನಲ್ಲಿ ತೋರಿಸಿದೆ ಚಿತ್ರತಂಡ.
ಮುಂಜ್ಯಾ ನಿರ್ದೇಶಕರ ಸಿನಿಮಾ
ಥಾಮಾ ಸಿನಿಮಾದಲ್ಲಿ ಆಯುಷ್ಮಾನ್ ಖುರಾನಾ, ರಶ್ಮಿಕಾ ಮಂದಣ್ಣ ಜೊತೆಗೆ ಪರೇಶ್ ರಾವಲ್ ಮತ್ತು ನವಾಜುದ್ದೀನ್ ಸಿದ್ದಿಕಿ ಕೂಡ ನಟಿಸಲಿದ್ದಾರೆ. ದಿನೇಶ್ ವಿಜನ್ ಮತ್ತು ಅಮರ್ ಕೌಶಿಕ್ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಮುಂಜ್ಯಾ ಚಿತ್ರದ ಡೈರೆಕ್ಟರ್‌ ಆದಿತ್ಯ ಸರ್ಪೋತದಾರ್ ನಿರ್ದೇಶನ ಮಾಡುತ್ತಿದ್ದಾರೆ. ಈ ಚಿತ್ರ 2025ರ ದೀಪಾವಳಿಗೆ ಬಿಡುಗಡೆಯಾಗಲಿದೆ. ಥಾಮಾ ಶೀರ್ಷಿಕೆಗೂ ಮೊದಲೇ ಈ ಚಿತ್ರಕ್ಕೆ “ವೆಂಪಾಯರ್‌ ಆಫ್‌ ವಿಜಯನಗರ” ಎಂಬ ಟೈಟಲ್‌ ಇಡಲಾಗಿತ್ತು. ಈಗ ಥಾಮ ಎಂದು ಬದಲಾಯಿಸಲಾಗಿದೆ.
ರಶ್ಮಿಕಾ ಮಂದಣ್ಣ ಮತ್ತೊಂದು ಸಿನಿಮಾ
ನ್ಯಾಷನಲ್ ಕ್ರಶ್ ರಶ್ಮಿಕಾ ಮಂದಣ್ಣ ಭಯಾನಕ ಜಗತ್ತಿಗೆ ಕಾಲಿಡುತ್ತಿದ್ದಾರೆ. ಸ್ತ್ರೀ, ಸ್ತ್ರೀ 2, ಮುಂಜ್ಯಾ ಮತ್ತು ಭೇಡಿಯಾದಂತಹ ಹಾರರ್ ಕಾಮಿಡಿ ಸಿನಿಮಾಗಳನ್ನು ನೀಡಿದ ಮ್ಯಾಡಾಕ್ ಫಿಲ್ಮ್ಸ್ ಸಂಸ್ಥೆ ಜತೆಗೆ ಕೈ ಜೋಡಿಸಿದ್ದಾರೆ. ಥಾಮ ಸಿನಿಮಾದಲ್ಲಿ ಆಯುಷ್ಮಾನ್ ಖುರಾನಾಗೆ ರಶ್ಮಿಕಾ ಜೋಡಿಯಾಗಿದ್ದಾರೆ. ಆದಾಗ್ಯೂ, ಚಿತ್ರದ ಶೀರ್ಷಿಕೆಯ ನಿಜವಾದ ಅರ್ಥವನ್ನು ಮೇಕರ್ಸ್‌ ಬಹಿರಂಗಪಡಿಸಿಲ್ಲ. ಆದರೆ ಇದೊಂದು ಹಾರರ್ ಪ್ರೇಮಕಥೆ ಎಂಬುದು ಸ್ಪಷ್ಟವಾಗಿದೆ.