ಬಿಗ್‌ಬಾಸ್‌ ಕನ್ನಡ 11: ಕಾರು ಹತ್ತಿ ಹೊರಟ ಮೋಕ್ಷಿತಾ ಪೈ, ಹಂಸ; ಬಿಗ್‌ಬಾಸ್‌ ಮನೆಗೆ ವಾಪಸ್‌ ಬಂದೋರು ಯಾರು, ಎಲಿಮಿನೇಟ್‌ ಆಗಿದ್ದು ಯಾರು?
Oct 29, 2024 09:13 AM IST
Share
ನಾಲ್ಕನೇ ವಾರ ಹಂಸ ಮನೆಯಿಂದ ಎಲಿಮಿನೇಟ್‌ ಆಗಿದ್ದರೆ, ಕಾರು ಹತ್ತಿ ಹೊರಟ ಮೋಕ್ಷಿತಾ ವಾಪಸ್‌ ಬಂದು ಸೇಫ್‌ ಆಗಿದ್ದಾರೆ.
Bigg Boss Kannada 11: ನಾಲ್ಕನೇ ವಾರದ ಎಲಿಮಿನೇಷನ್‌ ರೌಂಡ್‌ನಲ್ಲಿ ಮೋಕ್ಷಿತಾ ಪೈ ಸೇಫ್‌ ಆಗಿದ್ದರೆ, ಹಂಸ ಎಲಿಮಿನೇಟ್‌ ಆಗಿ ಮನೆಯಿಂದ ಹೊರ ಹೋಗಿದ್ದಾರೆ. ಈ ಬಾರಿ ಸುದೀಪ್‌ ಪಂಚಾಯ್ತಿಯಲ್ಲಿ ಭಾಗವಹಿಸದೆ ಇದ್ದಿದ್ದರಿಂದ ಬಹುಶ: ಮುಂದಿನ ವಾರ ಹಂಸ ಜೊತೆ ಸುದೀಪ್‌ ಮಾತನಾಡಬಹುದು ಎನ್ನಲಾಗುತ್ತಿದೆ.
ಬಿಗ್‌ಬಾಸ್‌ ಕನ್ನಡ 11: ನಾಲ್ಕನೇ ವಾರದ ಎಲಿಮಿನೇಷನ್‌ ಪ್ರಕ್ರಿಯೆ ಪೂರ್ಣಗೊಂಡಿದೆ. ಸಾಮಾನ್ಯವಾಗಿ ಎಲ್ಲಾ ಎಪಿಸೋಡ್‌ಗಳಲ್ಲೂ ಭಾನುವಾರ ಎಲಿಮಿನೇಷನ್‌ ಆಗುತ್ತದೆ. ಆದರೆ ಈ ಬಾರಿ ಬಿಗ್‌ಬಾಸ್‌ ಆ ಕುತೂಹಲವನ್ನು ಸೋಮವಾರಕ್ಕೆ ಕಾಯ್ದಿರಿಸಿದ್ದರು. ಕೊನೆಗೂ ಆ ಕುತೂಹಲಕ್ಕೆ ತೆರೆ ಬಿದ್ದಿದೆ. ಕಾರು ಹತ್ತಿ ಹೊರಟ ಇಬ್ಬರಲ್ಲಿ ಒಬ್ಬರು ವಾಪಸ್‌ ಬಂದಿದ್ದಾರೆ, ಮತ್ತೊಬ್ಬರು ಎಲಿಮಿನೇಟ್‌ ಆಗಿದ್ದಾರೆ.
ಒಂದೊಂದು ಕಾರು ಹತ್ತಿ ಹೊರ ಹೋದ ಹಂಸ, ಮೋಕ್ಷಿತಾ ಪೈ
ಕಳೆದ ವಾರ ನಾಮಿನೇಟ್‌ ಆದವರಲ್ಲಿ ಉಗ್ರಂ ಮಂಜು, ಮಾನಸಾ, ಗೌತಮಿ ಜಾಧವ್‌, ಮೋಕ್ಷಿತಾ ಪೈ ಹಾಗೂ ಹಂಸ ಡೇಂಜರಸ್‌ ಝೋನ್‌ಗೆ ಬಂದಿದ್ದರು. ಉಳಿದವರು ಸೇಫ್‌ ಆಗಿದ್ದರು. ಭಾನುವಾರದ ಸಂಚಿಕೆಯಲ್ಲಿ ಸೃಜನ್‌ ಲೋಕೇಶ್‌ ಎಲಿಮಿನೇಷನ್‌ ಪ್ರಕ್ರಿಯೆ ನಡೆಸಿಕೊಟ್ಟರು. ಆಕ್ಟಿವಿಟಿ ರೂಮ್‌ನಲ್ಲಿ ಕಟ್ಟಲಾದ ಬಲೂನ್‌ ಕೆಳಗೆ ಅಲ್ಲಿ ಸೂಚಿಸಲಾದ ಸ್ಪರ್ಧಿಗಳು ನಿಂತು, ತಮ್ಮ ಮೇಲಿರುವ ಬಲೂನ್‌ನ್ನು ಸೂಜಿಯಿಂದ ಒಡೆಯಬೇಕಿತ್ತು. ಹಸಿರು ಬಣ್ಣ ಬಂದವರು ಸೇಫ್‌, ಕೆಂಪು ಬಣ್ಣ ಬಂದರೆ ಡೇಂಜರಸ್‌ ಜೋನ್‌ ಎಂದು ಸೃಜನ್‌ ಲೋಕೇಶ್‌ ಮಾಹಿತಿ ನೀಡಿದ್ದರು. ಅದರಲ್ಲಿ ಉಗ್ರಂ ಮಂಜು, ಮಾನಸಾ ಹಾಗೂ ಗೌತಮಿ ಜಾಧವ್‌ ಒಡೆದ ಬಲೂನ್‌ನಿಂದ ಹಸಿರು ಬಣ್ಣ ಬಂದು ಮೂವರೂ ಸೇಫ್‌ ಆದರು. ಕೊನೆಗೆ ಹಂಸ ಹಾಗೂ ಮೋಕ್ಷಿತಾ ಡೇಂಜರಸ್‌ ಜೋನ್‌ನಲ್ಲಿ ಉಳಿದರು. ಆಗ ಹೊರಗಿನಿಂದ 2 ಕಾರುಗಳು ಬಂದು ನಿಲ್ಲುತ್ತವೆ. ಇಲ್ಲಿಗೆ ನನ್ನ ಕೆಲಸ ಮುಗಿಯಿತು ಎಂದು ಸೃಜನ್‌ ಲೋಕೇಶ್‌, ಎಲ್ಲರಿಗೂ ಬೈ ಹೇಳಿ ಅಲ್ಲಿಂದ ಹೊರಡುತ್ತಾರೆ. ಅಲ್ಲಿಗೆ ಭಾನುವಾರದ ಎಪಿಸೋಡ್‌ ಮುಕ್ತಾಯವಾಗಿತ್ತು.
ಹಂಸ ಎಲಿಮಿನೇಟ್‌, ಮೋಕ್ಷಿತಾ ಪೈ ಸೇಫ್‌
ಸೋಮವಾರದ ಎಪಿಸೋಡ್‌ನಲ್ಲಿ ಬಿಗ್‌ಬಾಸ್‌ ಹಂಸ ಹಾಗೂ ಮೋಕ್ಷಿತಾಗೆ ಒಂದೊಂದು ಕಾರ್‌ ಹತ್ತಲು ಹೇಳುತ್ತಾರೆ. ಬಿಗ್‌ಬಾಸ್‌ ಸೂಚನೆಯಂತೆ ಇಬ್ಬರೂ ಸ್ಪರ್ಧಿಗಳು ಕಾರು ಹತ್ತಿ ಕೂರುತ್ತಾರೆ. ಕಾರು ಆಕ್ಟಿವಿಟಿ ರೂಮ್‌ನಲ್ಲಿ 2-3 ಸುತ್ತಿ ಹೊರ ಹೋಗುತ್ತದೆ. ಆಗ ಶಟರ್‌ ಮುಚ್ಚಿಕೊಳ್ಳುತ್ತದೆ. ಇತರ ಸ್ಪರ್ಧಿಗೆಳೆಲ್ಲಾ ಇಬ್ಬರೂ ಹೋಗಿದ್ದಕ್ಕೆ ಆಶ್ಚರ್ಯ ವ್ಯಕ್ತಪಡಿಸುತ್ತಾರೆ. ಕೆಲವು ಹೊತ್ತಿನ ಬಳಿಕ ಮತ್ತೆ ಶಟರ್‌ ತೆಗೆದುಕೊಳ್ಳುತ್ತದೆ. ಆಗ ಒಂದು ಕಾರು ಒಳಬಂದು ನಿಲ್ಲುತ್ತದೆ. ಕಾರಿನಿಂದ ಮೋಕ್ಷಿತಾ ಪೈ ಇಳಿದು ಬರುತ್ತಾರೆ. ಆದರೆ ಹಂಸ ಹತ್ತಿದ ಕಾರು ಒಳಗೆ ಬರುವುದಿಲ್ಲ. ಈ ಮೂಲಕ ನಾಲ್ಕನೇ ವಾರ, ಹಂಸ ಮನೆಯಿಂದ ಹೊರ ಹೋಗಿರುವುದು ಸ್ಪಷ್ಟವಾಗಿದೆ. ತಾಯಿ ನಿಧನರಾಗಿದ್ದರಿಂದ ಸುದೀಪ್‌, ಈ ವಾರ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿಲ್ಲ. ಬಹುಶ: ಮುಂದಿನ ವಾರ ಸುದೀಪ್‌, ಹಂಸ ಜೊತೆ ಮಾತನಾಡುವ ಸಾಧ್ಯತೆ ಇದೆ.
ಮೋಕ್ಷಿತಾ ಬಂದಿದ್ದಕ್ಕೆ ಗೌತಮಿ ಖುಷಿಯಾಗುತ್ತಾರೆ. ಒಳಗೆ ಬರುತ್ತಿದ್ದಂತೆ ಮೋಕ್ಷಿತಾ ಎಲ್ಲರನ್ನೂ ಹಗ್‌ ಮಾಡುತ್ತಾರೆ. ಮತ್ತೆ ಮನೆಗೆ ವಾಪಸ್‌ ಬರುತ್ತಿದ್ದಂತೆ ಮೋಕ್ಷಿತಾ ಪೈ, ತ್ರಿವಿಕ್ರಮ್‌ ಮೇಲೆ ಕೋಪಗೊಳ್ಳುತ್ತಾರೆ. ನಾನು 10 ವಾರ ಮಾತ್ರ ಇದ್ದು ಹೋಗುವವಳು ಎಂದು ಹೇಳಿದ್ದೀರಿ. ಅಸಲಿ ಆಟ ಈಗ ಶುರು ಆಗೋದು. ನಿಮಗೆ ಹೇಗೆ ಗೊತ್ತು ನಾನು 10 ವಾರ ಇದ್ದು ಹೋಗ್ತೀನಿ ಅಂತ ಎಂದು ಕೇಳುತ್ತಾರೆ. ಆಗ ತ್ರಿವಿಕ್ರಮ್‌ ನಾನು ಹೇಳಿದ್ದೇ ಬೇರೆ ನೀವು ಅರ್ಥ ಮಾಡಿಕೊಂಡಿರುವುದು ಮತ್ತೊಂದು ರೀತಿ ಎನ್ನುತ್ತಾರೆ.