ಅರ್ಧ ತಲೆ ಬೋಳಿಸಿದ ನಿಗೂಢ ವ್ಯಕ್ತಿ ಯಾರಪ್ಪ? ಪುಷ್ಪ 2ನಲ್ಲಿ ಸಂಚಲನ ಸೃಷ್ಟಿಸಿದ ಕನ್ನಡ ನಟ ತಾರಕ್‌ ಪೊನ್ನಪ್ಪ

Who is Tarak Ponnappa?: ಸುಕುಮಾರ್‌ ನಿರ್ದೇಶನದ, ಅಲ್ಲು ಅರ್ಜುನ್‌, ರಶ್ಮಿಕಾ ಮಂದಣ್ಣ, ಫಹಾದ್‌ ಫಾಸಿಲ್‌ ನಟನೆಯ ಪುಷ್ಪ 2 ದಿ ರೂಲ್‌ ಸಿನಿಮಾದ ಟ್ರೇಲರ್‌ ಇತ್ತೀಚೆಗೆ ಬಿಡುಗಡೆಯಾಗಿದೆ. ಇದೇ ಸಮಯದಲ್ಲಿ ಈ ಟ್ರೇಲರ್‌ನಲ್ಲಿ ಕಂಡ ವಿಶಿಷ್ಟ ನಿಗೂಢ ಪಾತ್ರವೊಂದು ದೇಶಾದ್ಯಂತ ಸಿನಿ ಅಭಿಮಾನಿಗಳನ್ನು ಸೆಳೆದಿದೆ. 2 ನಿಮಿಷ ̇48 ಸೆಕೆಂಡಿನ ಈ ವಿಡಿಯೋದಲ್ಲಿ ಜಾತ್ರೆಯ ಸಮಯದಲ್ಲಿ ಕನ್ನಡ ನಟ ತಾರಕ್‌ ಪೊನ್ನಪ್ಪ ಟ್ರೇಲರ್‌ನಲ್ಲಿ ಕಾಣಿಸಿದ್ದಾರೆ. ಅರ್ಧ ತಲೆ ಬೋಳಿಸಿದ ಈ ಬಣ್ಣದ ಕ್ಯಾರೆಕ್ಟರ್‌ಗೆ ಜನರು ಫಿದಾ ಗೊಂಡಿದ್ದಾರೆ. ಕನ್ನಡ ನಟ ತಾರಕ್‌ ಪೊನ್ನಪ್ಪ ಈಗ ಟ್ರೆಂಡಿಂಗ್‌ನಲ್ಲಿದ್ದಾರೆ.

ಟಾಲಿವುಡ್‌ನಲ್ಲಿ ಕನ್ನಡ ನಟಿಯರು ಕಮಾಲ್‌ ಮಾಡುತ್ತಿರುವುದು ಎಲ್ಲರಿಗೂ ಗೊತ್ತಿರುವ ವಿಚಾರ. ರಶ್ಮಿಕಾ ಮಂದಣ್ಣ ಸೇರಿದಂತೆ ಹಲವು ನಟಿಯರು ಸ್ಯಾಂಡಲ್‌ವುಡ್‌ನಿಂದ ಟಾಲಿವುಡ್‌ಗೆ ನೆಗೆದು ಸದ್ದು ಮಾಡುತ್ತಿದ್ದಾರೆ. ಇದೇ ಸಮಯದಲ್ಲಿ ಕನ್ನಡದ ನಟರೂ ಅಲ್ಲಿ ಉತ್ತಮ ಅವಕಾಶ ಪಡೆಯುತ್ತಿದ್ದಾರೆ. ಇತ್ತೀಚೆಗೆ ಹಲವು ತೆಲುಗು ಸಿನಿಮಾಗಳಲ್ಲಿ ಕಾಣಿಸಿಕೊಂಡಿರುವ ತಾರಕ್‌ ಪೊನ್ನಪ್ಪ ಕೂಡ ಟಾಲಿವುಡ್‌ನಲ್ಲಿ ಜನಪ್ರಿಯತೆ ಪಡೆಯುತ್ತಿದ್ದಾರೆ.

ಇತ್ತೀಚೆಗೆ ಬಿಡುಗಡೆಯಾದ ಪುಷ್ಪ 2 ಟ್ರೇಲರ್‌ನಲ್ಲಿ ದೇವಾಲಯದಲ್ಲಿ ನಡೆಯುವ ಜಾತ್ರೆಯ ಸಮಯದಲ್ಲಿ ಕಂಡ ನಿಗೂಢ ವ್ಯಕ್ತಿಯನ್ನು ಪ್ರೇಕ್ಷಕರು ಮೆಚ್ಚಿದ್ದಾರೆ. ಅರ್ಧ ತಲೆ ಬೋಳಿಸಿದ ಈ ವ್ಯಕ್ತಿಯನ್ನು ಯಾರೆಂದು ಸರ್ಚ್‌ ಮಾಡುತ್ತಿರುವುದು ಹೆಚ್ಚಾಗಿದೆ. ಇವರು ಬೇರೆ ಯಾರು ಅಲ್ಲ ಕನ್ನಡದ ಕಿರುತೆರೆ ಮತ್ತು ಹಿರಿತೆರೆ ನಟ ತಾರಕ್‌ ಪೊನ್ನಪ್ಪ.

ಗೂಗಲ್‌ ಟ್ರೆಂಡಿಂಗ್‌ನಲ್ಲಿ ಕನ್ನಡ ನಟ ತಾರಕ್‌ ಪೊನ್ನಪ್ಪ

ಪುಷ್ಪ 2 ಸಿನಿಮಾದಲ್ಲಿ ತಾರಕ್‌ ಪೊನ್ನಪ್ಪರ ಪಾತ್ರವೇ ಸ್ಪೆಷಲ್‌ ಆಗಿದೆ. ದೇಹಕ್ಕೆ ಪೇಂಟ್‌ ಬಳಿದುಕೊಂಡು, ಚಪ್ಪಲಿಗಳಿಂದ ಮಾಡಿರುವ ಹಾರ ಹಾಕಿಕೊಂಡಿರುವ ವ್ಯಕ್ತಿ ಈತ. ಜತೆಗೆ, ಜುಮ್‌ಕಾ, ದೊಡ್ಡ ಬಿಂದಿ ಇಟ್ಟುಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ಇವರು ಪುಷ್ಪನ ಶತ್ರುವೇ? ಸ್ನೇಹಿತನೇ? ಎಂಬ ಕುತೂಹಲವೂ ಸಿನಿ ಅಭಿಮಾನಿಗಳಲ್ಲಿ ಮೂಡಿದೆ. ಕೆಲವರ ಪ್ರಕಾರ ಈತ ಪುಷ್ಪನ ವಿರುದ್ಧ ಹೋರಾಡಲಿರುವ ನಟೋರಿಯಸ್‌ ವ್ಯಕ್ತಿಯಾಗಿರಬಹುದು. ಅಥವಾ ಈ ವ್ಯಕ್ತಿ ಪುಷ್ಪನ ಮಲ ಸಹೋದರನಾಗಿರಬಹುದೇ? ಎಂದೂ ಜನರು ಚರ್ಚಿಸುತ್ತಿದ್ದಾರೆ.

ತಾರಕ್‌ ಪೊನ್ನಪ್ಪ ಸಿನಿಮಾಗಳು

ಈಗಾಗಲೇ ತಾರಕ್‌ ಪೊನ್ನಪ್ಪ ಹಲವು ಬಿಗ್‌ಬಜೆಟ್‌ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕನ್ನಡ ಸಿನಿಮಾ ಕೆಜಿಎಫ್‌: ಚಾಪ್ಟರ್‌ 1 ಮತ್ತು ಕೆಜಿಎಫ್‌: ಚಾಪ್ಟರ್‌ 2ನಲ್ಲಿ ದಯಾ ಪಾತ್ರದಲ್ಲಿ ತಾರಕ್‌ ಪೊನ್ನಪ್ಪ ನಟಿಸಿದ್ದರು. ಇತ್ತೀಚೆಗೆ ಬಿಡುಗಡೆಯಾದ ದೇವರ: ಪಾರ್ಟ್‌ 1ರಲ್ಲಿ ಪಸುರ ಪಾತ್ರದಲ್ಲಿ ಮಿಂಚಿದ್ದರು. ಅಂದರೆ, ಸೈಫ್‌ ಆಲಿ ಖಾನ್‌ ನಟಿಸಿರುವ ಭೈರಾ ಪಾತ್ರದ ಮಗನಾಗಿ ಕಾಣಿಸಿಕೊಂಡಿದ್ದರು. ಸಾಕಷ್ಟು ಜನರು ಪುಷ್ಪ 2 ಟ್ರೇಲರ್‌ ನೋಡಿದ ಬಳಿಕ ಇವನು ಭೈರನ ಕೊಡುಕು, ಭೈರನ ಮಗ ಎಂದೆಲ್ಲ ಕಾಮೆಂಟ್‌ ಮಾಡುತ್ತಿದ್ದಾರೆ.

ಕನ್ನಡದ ಪ್ರತಿಭಾನ್ವಿತ ನಟ ತಾರಕ್‌ ಪೊನ್ನಪ್ಪ ಈಗಾಗಲೇ ಹಲವು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಅಜರಾಮರ, ಕನ್ನಡ ದೇಶದೋಳ್‌, ಯುವ ರತ್ನ, ಕೋಟಿಗೊಬ್ಬ 3, ಗಿಲ್ಕಿ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ದೇವರಾ ಸಿನಿಮಾಕ್ಕಿಂತ ಮೊದಲು ಸಿಎಸ್‌ಐ ಸನತನ್‌, ರಝಾಕರ್‌ ಮುಂತಾದ ಸಿನಿಮಾಗಳಲ್ಲಿಯೂ ನಟಿಸಿದ್ದಾರೆ.

ಪುಷ್ಪ 2 ಸಿನಿಮಾ ಡಿಸೆಂಬರ್‌ 5ರಂದು ಬಿಡುಗಡೆ

ಸ್ಟೈಲಿಶ್ ಸ್ಟಾರ್ ಅಲ್ಲು ಅರ್ಜುನ್ ಮತ್ತು ನಿರ್ದೇಶಕ ಸುಕುಮಾರ್ ನಿರ್ದೇಶನದ ಪುಷ್ಪ ಸಿನಿಮಾವು 2021ರಲ್ಲಿ ಬಿಡುಗಡೆಯಾಗಿ ಸೂಪರ್‌ಹಿಟ್‌ ಆಗಿತ್ತು. ಅಕ್ರಮ ಕೆಂಪು ಚಂದನದ ಸಾಗಾಟದ ಹಿನ್ನೆಲೆಯೂ ಈ ಚಿತ್ರಕ್ಕಿದೆ. ಪುಷ್ಪರಾಜ್ ಪಾತ್ರದಲ್ಲಿ ಅಲ್ಲು ಅರ್ಜುನ್ ನಟನೆ ಮತ್ತು ಮ್ಯಾನರಿಸಂ ಎಲ್ಲರ ಗಮನ ಸೆಳೆದಿತ್ತು. ಈ ಚಿತ್ರದ ಮುಂದುವರೆದ ಭಾಗವಾಗಿ ಪುಷ್ಪ 2 ದಿ ರೂಲ್‌ ಬಿಡುಗಡೆಯಾಗುತ್ತಿದೆ. ಇದೇ ಡಿಸೆಂಬರ್‌ 5ರಂದು ಈ ಸಿನಿಮಾ ರಿಲೀಸ್‌ ಆಗುತ್ತಿದೆ. ಪುಷ್ಪ ಸಿನಿಮಾ ಬಿಡುಗಡೆ ಆಗುವ ಮುನ್ನವೇ 1,065 ಕೋಟಿ ರೂ. ಬಿಸ್ನೆಸ್‌ ಮಾಡಿದೆ ಎಂಬ ಮಾತು ಕೇಳಿ ಬರುತ್ತಿದೆ. ಥಿಯಟ್ರಿಕಲ್‌, ಒಟಿಟಿ ಡಿಜಿಟಲ್‌ ಸ್ಟ್ರೀಮಿಂಗ್‌, ಆಡಿಯೋ, ಸಾಟಲೈಟ್‌ ಎಲ್ಲಾ ಸೇರಿ ಸಿನಿಮಾ ಭಾರೀ ಲಾಭ ಮಾಡಿದೆ ಎನ್ನಲಾಗುತ್ತಿದೆ. ಮುಂದಿನ ತಿಂಗಳು ಬಿಡುಗಡೆಯಾಗಲಿರುವ ಈ ಸಿನಿಮಾ ಹೇಗಿರಲಿದೆ? ಈ ಚಿತ್ರದಲ್ಲಿ ಪುಷ್ಪ 2 ಎಲ್ಲರ ಗಮನ ಸೆಳೆಯಲಿದ್ದಾರೆಯೇ? ಇದೇ ಸಮಯದಲ್ಲಿ ತಾರಕ್‌ ಪೊನ್ನಪ್ಪ ಸೇರಿದಂತೆ ಇತರೆ ಕಲಾವಿದರರ ನಟನೆ ಹೇಗಿರಲಿದೆ? ಶ್ರೀವಲ್ಲಿ ಡ್ಯಾನ್ಸ್‌ ಹೇಗಿರಲಿದೆ? ರಶ್ಮಿಕಾ ಮಂದಣ್ಣ ಕಮಾಲ್‌ ಮಾಡಲಿದ್ದಾರೆಯೇ ಮುಂತಾದ ಕುತೂಹಲದೊಂದಿಗೆ ಸಾಕಷ್ಟು ಸಿನಿಮಾ ಪ್ರೇಮಿಗಳು ಪುಷ್ಪ 2 ಬಿಡುಗಡೆಗೆ ಕಾಯುತ್ತಿದ್ದಾರೆ.

ಇದನ್ನೂ ಓದಿ: ಒಂದೇ ಲುಕ್‌ನಲ್ಲಿ ಅಲ್ಲು ಅರ್ಜುನ್‌- ಯಶ್‌, ಪುಷ್ಪನಿಗೆ ಕೆಜಿಎಫ್‌ ಸ್ಪೂರ್ತಿಯೇ? ಈ ಎರಡು ಚಿತ್ರಗಳ ನಡುವಿನ ವ್ಯತ್ಯಾಸ ಗುರುತಿಸಿ