ಅಮೆರಿಕದ ಚುನಾವಣೆಯಲ್ಲಿ ಡೊನಾಲ್ಡ್ ಟ್ರಂಪ್ ಮತ್ತೆ ಗೆದ್ದರೆ, ಭಾರತಕ್ಕೆ ಉಂಟಾಗಬಹುದಾದ ಪ್ರಯೋಜನಗಳೇನು, 5 ಮುಖ್ಯ ಅಂಶಗಳು

ನವದೆಹಲಿ/ಬೆಂಗಳೂರು: ಅಮೆರಿಕ ಚುನಾವಣೆಗೆ ಇಂದು (ನವೆಂಬರ್ 5) ಮತದಾನ ನಡೆಯುತ್ತಿದೆ. ಒಂದೊಮ್ಮೆ ಈ ಚುನಾವಣೆಯಲ್ಲಿ ಡೊನಾಲ್ಡ್‌ ಟ್ರಂಪ್ ಗೆದ್ದರೆ ಅಮೆರಿ- ಭಾರತದ ಸಂಬಂಧಗಳು ಹೇಗಿರಬಹುದು ಎಂಬುದರ ಕಡೆಗೊಂದು ನೋಟ ಹರಿಸುವ ಸಮಯ. ಯುಎಸ್ ಅಧ್ಯಕ್ಷೀಯ ಚುನಾವಣೆ (US presidential election)ಗೆ ಕೇವಲ ಒಂದು ವಾರದ ಮೊದಲು, ರಿಪಬ್ಲಿಕನ್ ಅಭ್ಯರ್ಥಿ ಡೊನಾಲ್ಡ್ ಟ್ರಂಪ್ ಅವರು ಯುನೈಟೆಡ್ ಸ್ಟೇಟ್ಸ್ ಮತ್ತು ಭಾರತದ ನಡುವಿನ "ಮಹಾನ್ ಪಾಲುದಾರಿಕೆ" ಯನ್ನು ಬಲಪಡಿಸುವ ತಮ್ಮ ಬದ್ಧತೆಯನ್ನು ಒತ್ತಿ ಹೇಳಿದರು. ಪ್ರಧಾನಿ ನರೇಂದ್ರ ಮೋದಿಯನ್ನು ತಮ್ಮ "ಉತ್ತಮ ಸ್ನೇಹಿತ" ಎಂದು ಡೊನಾಲ್ಡ್ ಟ್ರಂಪ್ ದೀಪಾವಳಿಗೆ ಮಾಡಿದ ಎಕ್ಸ್ ಪೋಸ್ಟ್‌ನಲ್ಲಿ ಹೇಳಿಕೊಂಡಿದ್ದಾರೆ. ತನ್ನ ಸಂಭಾವ್ಯ ಆಡಳಿತದಲ್ಲಿ ಎರಡು ರಾಷ್ಟ್ರಗಳ ನಡುವಿನ ಸಂಬಂಧಗಳನ್ನು ವರ್ಧಿಸಲು ಪ್ರಯತ್ನಿಸುವುದಾಗಿ ಹೇಳಿದ್ದರು. ವರದಿಗಳ ಪ್ರಕಾರ, ಮುಸ್ಲಿಂ ಬಹುಸಂಖ್ಯಾತ ದೇಶವಾದ ಬಾಂಗ್ಲಾದೇಶದಲ್ಲಿ ನೂರಾರು ಹಿಂದೂಗಳು ಮಾರಣಾಂತಿಕ ದಾಳಿಯನ್ನು ಎದುರಿಸಿದ್ದಾರೆ. ಬಾಂಗ್ಲಾದೇಶದಲ್ಲಿ ಹಿಂದೂಗಳು ಮತ್ತು ಇತರ ಅಲ್ಪಸಂಖ್ಯಾತರ ವಿರುದ್ಧ ಇತ್ತೀಚಿನ ಹಿಂಸಾಚಾರವನ್ನು ಮಾಜಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಖಂಡಿಸಿದ್ದರು. ಬಾಂಗ್ಲಾದೇಶದ ಪ್ರಧಾನಿ ಶೇಖ್ ಹಸೀನಾ ಅವರನ್ನು ಪದಚ್ಯುತಗೊಳಿಸಿ ದೇಶ ಬಿಟ್ಟು ಓಡಿ ಹೋಗುವಂತೆ ಮಾಡಿದಾಗ ಅವರು ಭಾರತ ಆಶ್ರಯ ಕೋರಿದ್ದರು. ಆ ಸಂದರ್ಭದಲ್ಲಿ ಡೊನಾಲ್ಡ್ ಟ್ರಂಪ್ ಅವರು ಈ ಹೇಳಿಕೆ ನೀಡಿದ್ದರು. ಇದು ದಕ್ಷಿಣ ಏಷ್ಯಾದ ಜಾಗತಿಕ ರಾಜಕೀಯ ಬಿಕ್ಕಟ್ಟನ್ನು ಸಂಕೀರ್ಣಗೊಳಿಸಿದ್ದ ಸನ್ನಿವೇಶವಾಗಿತ್ತು.

1) ಹೌಡಿ ಮೋದಿ ಕಾರ್ಯಕ್ರಮದಲ್ಲಿದ್ದ ಟ್ರಂಪ್‌

ಕಳೆದ ಸಲದ ಅಂದರೆ 2020ರ ಅಮೆರಿಕ ಚುನಾವಣೆಗೆ ಮೊದಲು ಅಮೆರಿಕದಲ್ಲಿ ಆಯೋಜಿಸಿದ್ದ ಹೌಡಿ ಮೋದಿ ಕಾರ್ಯಕ್ರಮದಲ್ಲಿ ಡೊನಾಲ್ಡ್ ಟ್ರಂಪ್ ಭಾಗವಹಿಸಿದ್ದರು. ಅಂದು ಅವರು ನೀಡಿದ ಸಂದೇಶವು ಭಾರತೀಯ ಅಮೆರಿಕನ್ನರ ಮೇಲೆ ಪರಿಣಾಮ ಬೀರಿತ್ತು. 2019 ರಲ್ಲಿ ಟೆಕ್ಸಾಸ್‌ನಲ್ಲಿ ನಡೆದ ರ್ಯಾಲಿ, ಅಲ್ಲಿ ಟ್ರಂಪ್ ಅವರು ಮೋದಿಯವರನ್ನು ಅಂದಾಜು 50,000 ಜನರ ಮುಂದೆ ಪ್ರಶಂಸಿದ್ದರು. ಇದು ವಿದೇಶಿ ನಾಯಕರಿಗಾಗಿ ಇದುವರೆಗಿನ ಅತಿದೊಡ್ಡ ಸಭಾಕಾರ್ಯಕ್ರಮದಲ್ಲಿ ಒಂದಾಗಿ ದಾಖಲಾಗಿದೆ. ಇದಕ್ಕೆ ಪ್ರತಿಯಾಗಿ 2020ರಲ್ಲಿ ಮೋದಿ ಗುರಜಾತ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಟ್ರಂಪ್ ಅವರಿಗಾಗಿ 1.2 ಲಕ್ಷ ಜನರ ಕಾರ್ಯಕ್ರಮ ಆಯೋಜಿಸಿದ್ದರು. ಟ್ರಂಪ್ ಅವರ ಅಮೆರಿಕ ಫಸ್ಟ್ ನೀತಿಗೆ ಮೋದಿ ಅವರ ಭಾರತ ಫಸ್ಟ್ ನೀತಿ ಹೊಂದಿಕೆಯಾಗುತ್ತಿದೆ ಎಂಬ ಮಾತುಗಳನ್ನು ಆಡಿದ್ದರು.

2) ಆರ್ಥಿಕ ಮತ್ತು ವಾಣಿಜ್ಯ ನೀತಿಗಳು

ಡೊನಾಲ್ಡ್ ಟ್ರಂಪ್ ನೇತೃತ್ವದ ಆಡಳಿತವು ಅಮೆರಿಕ ಕೇಂದ್ರಿತ ವ್ಯಾಪಾರ ನೀತಿಗಳಿಗೆ ಆದ್ಯತೆ ನೀಡಿತ್ತು ಎಂಬುದನ್ನು ಗಮನಿಸಬಹುದು. ವ್ಯಾಪಾರ ಅಡೆತಡೆಗಳನ್ನು ಕಡಿಮೆ ಮಾಡಲು ಅಥವಾ ಸುಂಕಗಳನ್ನು ಎದುರಿಸಲು ಭಾರತದ ಮೇಲೆ ಒತ್ತಡ ಹೇರುತ್ತದೆ. ಅಮೆರಿಕಕ್ಕೆ ಗಣನೀಯವಾಗಿ ರಫ್ತು ಮಾಡುವ ಭಾರತದ ಐಟಿ, ಔಷಧೀಯ ಮತ್ತು ಜವಳಿ ಕ್ಷೇತ್ರಗಳು ವಿಶೇಷವಾಗಿ ಪ್ರಭಾವ ಬೀರಬಹುದು. ಸೆಪ್ಟೆಂಬರ್‌ನಲ್ಲಿ, ಟ್ರಂಪ್, ಆಮದು ಸುಂಕದ ವಿಷಯದಲ್ಲಿ ಭಾರತವನ್ನು "ದುರುಪಯೋಗ" ಮಾಡುವ ದೇಶ ಎಂದು ಟೀಕಿಸಿದರೂ, ಮೋದಿಯನ್ನು "ಅದ್ಭುತ ವ್ಯಕ್ತಿ" ಎಂದು ಉಲ್ಲೇಖಿಸಿದ್ದರು. ಆದರೂ, ಅಮೆರಿಕದ ಕಂಪನಿಗಳು ತಮ್ಮ ಪೂರೈಕೆ ಸರಪಳಿಗಳನ್ನು ಬೇರೆಡೆಗೆ ಸ್ಥಳಾಂತರಿಸಲು ಉತ್ತೇಜಿಸುವ ಮೂಲಕ ಚೀನಾದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಟ್ರಂಪ್‌ರ ಒತ್ತಡವು ಭಾರತದ ಪರವಾಗಿ ಕೆಲಸ ಮಾಡಬಹುದು. ಅನುಕೂಲಕರ ನೀತಿಗಳೊಂದಿಗೆ, ಭಾರತವು ತನ್ನ ಆರ್ಥಿಕ ಭವಿಷ್ಯವನ್ನು ಹೆಚ್ಚಿಸುವ ಮೂಲಕ ಕಾರ್ಯಾಚರಣೆಗಳನ್ನು ವೈವಿಧ್ಯಗೊಳಿಸಲು ಹೆಚ್ಚು ಅಮೆರಿಕ ಕಂಪನಿಗಳನ್ನು ಆಕರ್ಷಿಸಬಹುದು.

3) ರಕ್ಷಣಾ ಮತ್ತು ಭದ್ರತಾ ನೀತಿ

ಚೀನಾದ ಬಗ್ಗೆ ಡೊನಾಲ್ಡ್ ಟ್ರಂಪ್ ಅವರ ನಿಲುವು ಭಾರತದ ಕಳವಳಗಳೊಂದಿಗೆ ಹೊಂದಿಕೆಯಾಗುತ್ತದೆ. ಅವರ ನಾಯಕತ್ವದಲ್ಲಿ ರಕ್ಷಣಾ ಸಹಕಾರವು ಹೆಚ್ಚಾಗಲಿದೆ. ಇಂಡೋ-ಪೆಸಿಫಿಕ್‌ನಲ್ಲಿ ಚೀನಾದ ಪ್ರಭಾವವನ್ನು ಎದುರಿಸಲು ಅಮೆರಿಕ, ಭಾರತ, ಜಪಾನ್ ಮತ್ತು ಆಸ್ಟ್ರೇಲಿಯಾ ನಡುವಿನ ಭದ್ರತಾ ಪಾಲುದಾರಿಕೆಯ ಕ್ವಾಡ್ ಅನ್ನು ಅವರ ಆಡಳಿತವು ಹಿಂದೆ ಬಲಪಡಿಸಿದೆ. ಚೀನಾ ಮತ್ತು ಪಾಕಿಸ್ತಾನದಂತಹ ನೆರೆಯ ರಾಷ್ಟ್ರಗಳೊಂದಿಗಿನ ಉದ್ವಿಗ್ನತೆಯ ನಡುವೆ ಹೆಚ್ಚುವರಿ ಜಂಟಿ ಮಿಲಿಟರಿ ವ್ಯಾಯಾಮಗಳು, ಶಸ್ತ್ರಾಸ್ತ್ರಗಳ ಮಾರಾಟ ಮತ್ತು ತಂತ್ರಜ್ಞಾನ ವರ್ಗಾವಣೆಗಳು ಭಾರತದ ರಕ್ಷಣಾ ಸಾಮರ್ಥ್ಯಗಳನ್ನು ಹೆಚ್ಚಿಸಬಹುದು.

4) ವಲಸೆ ಮತ್ತು ಎಚ್‌1 ಬಿ ವೀಸಾ ನೀತಿಗಳು

ಡೊನಾಲ್ಡ್ ಟ್ರಂಪ್ ಅವರ ಸರ್ಕಾರ ಈ ಹಿಂದೆ ವಲಸೆಯ ಮೇಲೆ ನಿರ್ಬಂಧಿತ ನೀತಿ ಜಾರಿಗೊಳಿಸಿತ್ತು. ವಿಶೇಷವಾಗಿ H-1B ವೀಸಾ ಕಾರ್ಯಕ್ರಮಕ್ಕೆ ಸಂಬಂಧಿಸಿದ ನಿಯಮ ಬಿಗಿಯಾಗಿತ್ತು. ಇದು ಅಮೆರಿಕದಲ್ಲಿನ ಭಾರತೀಯ ವೃತ್ತಿಪರರ ಮೇಲೆ ಗಣನೀಯ ಪರಿಣಾಮ ಬೀರಿತು. ಅಂತಹ ನೀತಿಗಳನ್ನು ಅಮೆರಿಕ ಮತ್ತೆ ಜಾರಿಗೊಳಿಸಿದರೆ, ಅಂತಹ ಕ್ರಮವು ಅಮೆರಿಕದ ಉದ್ಯೋಗ ಮಾರುಕಟ್ಟೆಗಳಿಗೆ ಭಾರತೀಯ ಕಾರ್ಮಿಕರ ಪ್ರವೇಶವನ್ನು ಸಂಕೀರ್ಣಗೊಳಿಸಬಹುದು. ವಿಶೇಷವಾಗಿ ತಂತ್ರಜ್ಞಾನದಲ್ಲಿ ನುರಿತ ಭಾರತೀಯ ಕಾರ್ಮಿಕರ ಮೇಲೆ ಅವಲಂಬಿತವಾಗಿರುವ ಕ್ಷೇತ್ರಗಳ ಮೇಲೆ ಪರಿಣಾಮ ಬೀರುತ್ತದೆ. ಇನ್ನೊಂದು ಸಾಧ್ಯತೆ ಇರುವಂಥದ್ದು, ಅಮೆರಿಕದ ಕಠಿಣ ವಲಸೆ ಕಾನೂನುಗಳು ಇತರ ಮಾರುಕಟ್ಟೆಗಳನ್ನು ಅನ್ವೇಷಿಸಲು ಅಥವಾ ಹೆಚ್ಚು ದೇಶೀಯ ಅವಕಾಶಗಳನ್ನು ಸೃಷ್ಟಿಸಲು ಹೂಡಿಕೆ ಮಾಡಲು ಭಾರತೀಯ ತಂತ್ರಜ್ಞಾನ ಸಂಸ್ಥೆಗಳನ್ನು ಪ್ರೇರೇಪಿಸಬಹುದು.

5) ಭೌಗೋಳಿಕ ರಾಜಕೀಯ ಪ್ರಭಾವ

ದಕ್ಷಿಣ ಏಷ್ಯಾದಲ್ಲಿ ಡೊನಾಲ್ಡ್ ಟ್ರಂಪ್ ಅವರ ನೀತಿಗಳು ಭಾರತದ ಪ್ರಾದೇಶಿಕ ಹಿತಾಸಕ್ತಿಗಳ ಮೇಲೂ ಪರಿಣಾಮ ಬೀರಬಹುದು. ಟ್ರಂಪ್ ಪಾಕಿಸ್ತಾನದೊಂದಿಗೆ ಕೆಲಸ ಮಾಡಲು ಇಚ್ಛೆಯನ್ನು ತೋರಿಸಿದ್ದರೂ, ಅವರು ಭಯೋತ್ಪಾದನೆ ನಿಗ್ರಹ ಪ್ರಯತ್ನಗಳಲ್ಲಿ ಹೊಣೆಗಾರಿಕೆಯನ್ನು ಒತ್ತಾಯಿಸಿದ್ದಾರೆ. ಅದು ಅವರ ವಿಧಾನವನ್ನು ಸಮತೋಲನಗೊಳಿಸಬಹುದು. ಆದಾಗ್ಯೂ, ಟ್ರಂಪ್‌ರ "ಬಲ ಪ್ರಯೋಗದ ಮೂಲಕ ಶಾಂತಿ" ಮಂತ್ರವು ಭಯೋತ್ಪಾದನೆ ಮತ್ತು ಉಗ್ರವಾದದ ಮೇಲೆ ಯುಎಸ್ ಕಠಿಣ ನಿಲುವು ಭಾರತದ ಭದ್ರತಾ ಗುರಿಗಳೊಂದಿಗೆ ಹೊಂದಿಕೆಯಾಗುತ್ತದೆ.