Timed Out Controversy: ಬಾಂಗ್ಲಾಗೆ ಹಸ್ತಲಾಘವ ಮಾಡದೆ ಮೈದಾನ ತೊರೆದ ಶ್ರೀಲಂಕಾ ಆಟಗಾರರು; ದಂಡದ ಭೀತಿ

ದೆಹಲಿಯ ಅರುಣ್ ಜೇಟ್ಲಿ ಮೈದಾನದಲ್ಲಿ ನಡೆದ ಐಸಿಸಿ ವಿಶ್ವಕಪ್ ಟೂರ್ನಿಯ 38ನೇ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ ಬಾಂಗ್ಲಾದೇಶ 3 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿತು. ಸೆಮಿಫೈನಲ್​ಗೇರುವ ವಿಶ್ವಾಸ ಹೊಂದಿದ್ದ ಲಂಕಾಗೆ ಭಾರಿ ನಿರಾಸೆಯಾಯಿತು. ಮತ್ತೊಂದೆಡೆ ಲಂಕಾ ಆಟಗಾರರು, ಬಾಂಗ್ಲಾ ಆಟಗಾರರಿಗೆ ಹಸ್ತಲಾಘವ ಮಾಡದೆ ಮೈದಾನ ತೊರೆದಿದ್ದಾರೆ. ಇದು ಚರ್ಚೆಯ ಮತ್ತೊಂದು ಅಧ್ಯಾಯವಾಗಿ ಮಾರ್ಪಟ್ಟಿದೆ.

ಇದನ್ನೂ ಓದಿ: ಇಷ್ಟು ಕೀಳು ಮಟ್ಟಕ್ಕಿಳಿದು ಆಟ ಆಡಬೇಕಿತ್ತಾ, ಅವಮಾನಕರ; ಬಾಂಗ್ಲಾಗೆ ಬಹಿರಂಗವಾಗೇ ಹಿಗ್ಗಾಮುಗ್ಗಾ ಬೈದ ಮ್ಯಾಥ್ಯೂಸ್

ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಶ್ರೀಲಂಕಾ 49.3 ಓವರ್​​​ಗಳಲ್ಲಿ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡು 279 ರನ್ ಗಳಿಸಿತು. ಚರಿತ್ ಅಸಲಂಕಾ ಭರ್ಜರಿ 108 ರನ್ ಸಿಡಿಸಿದರು. ಈ ಗುರಿ ಬೆನ್ನಟ್ಟಿದ ಬಾಂಗ್ಲಾ 41.1 ಓವರ್​​​ಗಳಲ್ಲಿ 7 ವಿಕೆಟ್​ ಕಳೆದುಕೊಂಡು ಜಯದ ನಗೆ ಬೀರಿತು. ಆದರೆ ಪಂದ್ಯ ಗೆದ್ದ ನಂತರ ಬಾಂಗ್ಲಾ ಬ್ಯಾಟ್ಸ್​ಮನ್​ಗಳು ಹಸ್ತಲಾಘವ ಮಾಡಲು ಯತ್ನಿಸಿದರು. ಆದರೆ, ಲಂಕಾ ಹಸ್ತಲಾಘವ ಮಾಡದೆ ಮೈದಾನ ತೊರೆದರು.

ಪಂದ್ಯದುದ್ದಕ್ಕೂ ಸ್ಲೆಡ್ಜ್​

ಇದಕ್ಕೆ ಕಾರಣ ಏಂಜಲೊ ಮ್ಯಾಥ್ಯೂಸ್​ ಅವರನ್ನು ಬಾಂಗ್ಲಾದೇಶ ಆಟಗಾರರು ಕ್ರೀಡಾಸ್ಫೂರ್ತಿ ಮರೆತು ಔಟ್ ಮಾಡಿದ್ದು. ಟೈಮ್ಡ್​ ಔಟ್ ಎಂದು ಮನವಿ ಸಲ್ಲಿಸಿ, ಮ್ಯಾಥ್ಯೂಸ್​ರನ್ನು ಔಟ್ ಮಾಡಿದ ನಂತರ ಉಭಯ ತಂಡಗಳ ನಡುವೆ ಪಂದ್ಯದ ಅಂತಿಮ ಹಂತದವರೆಗೂ ಮುಸುಕಿನ ಗುದ್ದಾಟದ ಮೂಲಕವೇ ಸಾಗಿತು. ಬಾಂಗ್ಲಾ ಬ್ಯಾಟ್ಸ್​​ಮನ್​ಗಳು ಆಡುತ್ತಿದ್ದಾಗ ಲಂಕಾ ಆಟಗಾರರು ಸ್ಲೆಡ್ಜ್ ಮಾಡುತ್ತಲೇ ಇದ್ದರು.

ಇದನ್ನೂ ಓದಿ: ತಪ್ಪೋ ಸರಿನೋ, ನಿಯಮದಂತೆ ನಾನು ಮಾಡಿದ್ದು ಸರಿಯಿದೆ; ಟೈಮ್ಡ್ ಔಟ್ ಬಗ್ಗೆ ಶಕೀಬ್ ಸಮರ್ಥನೆ

ಉಭಯ ತಂಡಗಳ ಆಟಗಾರರ ನಡುವೆ ವಾಗ್ದಾದಗಳಿಗೂ ಈ ಪಂದ್ಯ ಸಾಕ್ಷಿಯಾಯಿತು. ಹಾಗಾಗಿ ಪಂದ್ಯ ರೋಚಕತೆ ಪಡೆದುಕೊಂಡಿತು. ಶ್ರೀಲಂಕಾ ನಾಯಕ ಕುಸಾಲ್ ಮೆಂಡಿಸ್ ಮತ್ತು ಬಾಂಗ್ಲಾದೇಶದ ವೇಗಿ ತಂಜಿಮ್ ಹಸನ್ ಸಾಕಿಬ್ ನಡುವಿನ ಮಾತಿನ ಸಮರ ನಡೆಯಿತು. ಆದರೆ ಆಟಗಾರರ ವಾಗ್ವಾದವನ್ನು ಪದೆಪದೇ ಬಿಡಿಸಿ ಸುಸ್ತುಗೊಂಡರು. ಈ ಕುರಿತ ವಿಡಿಯೋಗಳು ವೈರಲ್ ಆಗುತ್ತಿವೆ.

ಕಾರಣ ಇಲ್ಲಿದೆ

ಮೊದಲು ಬ್ಯಾಟಿಂಗ್ ಲಂಕಾ 24.2 ಓವರ್​​​ನಲ್ಲಿ ತನ್ನ 4ನೇ ವಿಕೆಟ್ ಕಳೆದುಕೊಂಡಿತು. ಆಗ ಸದೀರ ಸಮರವಿಕ್ರಮ ಔಟಾಗಿ ಹೊರ ನಡೆದರು. ಬಳಿಕ ಕಣಕ್ಕಿಳಿದ ಏಂಜೆಲೊ ಮ್ಯಾಥ್ಯೂಸ್ ಕ್ರೀಸ್​ಗೆ ಬಂದ ನಂತರ ಹೆಲ್ಮೆಟ್ ಸಮಸ್ಯೆ ಎದುರಾಯಿತು. ಕೂಡ ಡಗೌಟ್​ನಲ್ಲಿದ್ದ ಸಹ ಆಟಗಾರನಿಗೆ ಮತ್ತೊಂದು ಹೆಲ್ಮೆಟ್ ತರುವಂತೆ ಸೂಚಿಸಿದರು. ಆದರೆ ಹೊಸ ಹೆಲ್ಮೆಟ್ ತರುವಲ್ಲಿ ಸ್ವಲ್ಪ ವಿಳಂಬವಾಯಿತು.

ಈ ಸಂದರ್ಭದಲ್ಲಿ ಬಾಂಗ್ಲಾ ಆಟಗಾರರು ಅಂಪೈರ್​​ ಬಳಿಕ ಟೈಮ್ಡ್​ ಔಟ್ ಮನವಿ ಮಾಡಿದರು. ಬಳಿಕ ಆನ್​ ಫೀಲ್ಡ್ ಅಂಪೈರ್​, ಆಟಗಾರರ ಮನವಿಯನ್ನು ಮಾನ್ಯ ಮಾಡಿ ಮ್ಯಾಥ್ಯೂಸ್ ಔಟ್ ಎಂದು ಪ್ರಕಟಿಸಿದರು. ಹೆಲ್ಮೆಟ್ ಸಮಸ್ಯೆಯನ್ನು ತೋರಿಸಿ ಘಟನೆ ವಿವರಿಸಿದರು. ಆದರೆ ಅಂಪೈರ್​ ನಿಯಮವನ್ನು ಪಾಲಿಸುವುದು ಹೊರತುಪಡಿಸಿ ಬೇರೆ ಆಯ್ಕೆ ಇರಲಿಲ್ಲ.

ಎದುರಾಳಿ ತಂಡದ ನಾಯಕನಿಗೂ ವಿವರಿಸಿದರು. ಆದರೆ ಶಕೀಬ್ ಮನವಿ ಹಿಂಪಡೆಯಲಿಲ್ಲ. ಇದು ಮ್ಯಾಥ್ಯೂಸ್ ಕೋಪಕ್ಕೆ ಕಾರಣವಾಯಿತು. ಮೈದಾನ ತೊರೆದ ನಂತರ ಮ್ಯಾಥ್ಯೂಸ್​ ಡಗೌಡ್​ನಲ್ಲಿ ಹೆಲ್ಮೆಟ್​ ಅನ್ನು ಬಿಸಾಡಿದರು. ಮ್ಯಾಥ್ಯೂಸ್‌ ಅವರು ಒಂದೂ ಎಸೆತ ಎದುರಿಸಿದೆ ಟೈಮ್ಡ್​ ಔಟ್​ಗೆ ಬಲಿಯಾದ ವಿಶ್ವದ ಮೊದಲ ಕ್ರಿಕೆಟಿಗ ಎನಿಸಿದರು.

ಲಂಕಾಗೆ ದಂಡದ ಭೀತಿ

ಕ್ರೀಡಾಸ್ಫೂರ್ತಿ ಮರೆತ ಬಾಂಗ್ಲಾದೇಶ ತಂಡದ ಆಟಗಾರರನ್ನು ಬ್ಯಾಟಿಂಗ್​ ವೇಳೆ ಪಂದ್ಯದುದ್ದಕೂ ಸ್ಲೆಡ್ಜ್ ಮಾಡುತ್ತಲೇ ಇದ್ದರು. ಅದರಲ್ಲೂ ಶಕೀಬ್​ ವಿಕೆಟ್​​ ಅನ್ನು​ ಮ್ಯಾಥ್ಯೂಸ್​ ಅವರೇ ಪಡೆದು ಸೇಡು ತೀರಿಸಿಕೊಂಡರು. ಅಲ್ಲದೆ, ಶ್ರೀಲಂಕಾ ಆಟಗಾರರು ಪಂದ್ಯದ ಮುಕ್ತಾಯದ ನಂತರ ಹಸ್ತಲಾಘವ ಮಾಡದೆ ತಮ್ಮ ಪಾಡಿಗೆ ಮೈದಾನ ತೊರೆದರು. ದ್ವೀಪರಾಷ್ಟ್ರದ ಆಟಗಾರರ ಈ ವರ್ತನೆಗೆ ಐಸಿಸಿ ದಂಡ ವಿಧಿಸುವ ಸಾಧ್ಯತೆ ಇದೆ.