ನಯನತಾರಾ ಮುಖದ ಅಂದದ ರಹಸ್ಯ ಪ್ಲಾಸ್ಟಿಕ್‌ ಸರ್ಜರಿಯೇ? ಬೇಕಿದ್ರೆ ಚಿವುಟಿ ನೋಡಿ ಅಂದ್ರು ನಟಿ

ಬೆಂಗಳೂರು: ನಟಿ ನಯನತಾರಾ ಅವರ ಚಂದದ ಮುಖದ ಮೇಲೆ ಅಭಿಮಾನಿಗಳಿಗೆ ವಿಶೇಷ ಪ್ರೀತಿ. ಇದೇ ಸಮಯದಲ್ಲಿ ಈಕೆಯ ಮುಖ ಮೊದಲಿನಂತೆ ಇಲ್ಲ ಎಂಬ ಮಾತೂ ಅಲ್ಲಲ್ಲಿ ಕೇಳಿಬರುತ್ತಿದೆ. ಜನರು ಈ ರೀತಿ ಅಂದುಕೊಳ್ಳುತ್ತಿದ್ದಾರೆ ಎಂದು ನಯನತಾರಾರಿಗೆ ತಿಳಿದಿದೆ. ಮನಸ್ಸಿನಕ್ಕರೆ ಎಂಬ ಮಲಯಾಳಂ ಸಿನಿಮಾದ ಮೂಲಕ 2003ರಲ್ಲಿ ಸಿನಿಮಾರಂಗಕ್ಕೆ ಕಾಲಿಟ್ಟ ನಯನತಾರಾ ಇತ್ತೀಚಿಗೆ ಹೌಟರ್‌ಫ್ಲೈಗೆ ನೀಡಿದ ಸಂದರ್ಶನದಲ್ಲಿ ತನ್ನ ಸೌಂದರ್ಯದ ಹಿಂದಿನ ರಹಸ್ಯ "ವಿವಿಧ ಹಂತಗಳಲ್ಲಿ ಹುಬ್ಬು ಬದಲಾವಣೆ (brow phases)ಮತ್ತು ಡಯೆಟ್‌" ಎಂದಿದ್ದಾರೆ.

ನಾನು ಮುಖಕ್ಕೆ ಏನೋ ಮಾಡಿಕೊಂಡಿದ್ದೇನೆ ಎಂದು ಜನರು ಅಂದುಕೊಂಡಿದ್ದಾರೆ!

ಈ ಸಂದರ್ಶನದಲ್ಲಿ ಜನರು ನನ್ನ ಮುಖದ ಸೌಂದರ್ಯದ ಕುರಿತು ಏನು ಅಂದುಕೊಳ್ಳುತ್ತಿದ್ದಾರೆ ಎಂದು ಹೇಳಿದ್ದಾರೆ. "ಹುಬ್ಬು ಸುಂದರವಾಗಿಸಲು ನಾನು ಪ್ರಯತ್ನಿಸಿದ್ದೇನೆ. ಹಲವು ವರ್ಷಗಳಿಂದ ಹುಬ್ಬಿನ ಸೌಂದರ್ಯ ಹೆಚ್ಚಿಸಲು ವಿವಿಧ brow phases ಮಾಡುತ್ತಿದ್ದೇನೆ. ಇದೇ ಕಾರಣಕ್ಕೆ ಜನರಿಗೆ ನಾನು ಬೇರೆ ರೀತಿ ಕಾಣಿಸುತ್ತ ಹೋಗುತ್ತಿರಬಹುದು" ಎಂದು ಅವರು ಹೇಳಿದ್ದಾರೆ.

"ಜನರು ಅಂದುಕೊಂಡಿದ್ದಾರೆ, ನಾನು ನನ್ನ ಮುಖಕ್ಕೆ ಏನೋ ಮಾಡಿಕೊಂಡಿದ್ದೇನೆ ಎಂದು. ಆದರೆ, ಅದು ನಿಜವಲ್ಲ. ಆ ರೀತಿ ಮಾಡಿಕೊಂಡಿದ್ದರೂ ತಪ್ಪಿಲ್ಲ. ಆದರೆ, ನಾನು ಮಾಡಿಕೊಂಡಿಲ್ಲ. ನಾನು ಡಯೆಟ್‌ ಫಾಲೋ ಮಾಡುತ್ತಿದೇನೆ. ಎಲ್ಲರಂತೆ ಸಹಜವಾಗಿ ದೇಹದ ತೂಕದಲ್ಲಿ ಏರುಪೇರು ಆಗುತ್ತ ಇರುತ್ತದೆ. ಇದೇ ಕಾರಣದಲ್ಲಿ ನನ್ನ ಮುಖದ ಸೌಂದರ್ಯ ಬದಲಾಗುತ್ತ ಇರುತ್ತದೆ. ನನ್ನ ಕೆನ್ನೆಗಳೂ ಇದಕ್ಕೆ ತಕ್ಕಂತೆ ಬದಲಾಗುತ್ತ ಇರಬಹುದು. ನೀವು ನನ್ನ ಮುಖವನ್ನು ಚಿವುಟಿ ನೋಡಿ, ಸುಟ್ಟು ನೋಡಿದರೂ ಪ್ಲಾಸ್ಟಿಕ್‌ ಸಿಗದು" ಎಂದು ನಯನತಾರಾ ಹೇಳಿದ್ದಾರೆ.

ಇದೇ ಸಂದರ್ಶನದಲ್ಲಿ ತನ್ನ ಫೇವರಿಟ್‌ ಆನ್‌ಸ್ಕ್ರೀನ್‌ ಲುಕ್‌ ಯಾವುದೆಂದೂ ನಯನತಾರ ಹೇಳಿದ್ದಾರೆ. "ನನಗೆ ನನ್ನ ಪ್ರೀತಿಯ ನನ್ನ ಕ್ಯಾರೆಕ್ಟರ್‌ ಲುಕ್‌, ಕಾದಂಬರಿ" ಎಂದು ಅವರು ಹೇಳಿದ್ದಾರೆ. ಇದು ಇವರ ಪತಿ ವಿಘ್ನೇಶ್‌ ಶಿವನ್‌ ಅವರ ಎರೆನೇ ಸಿನಿಮಾವಾದ ನಾನೂಮ್‌ ರೌಡಿ ಧಾನ್‌ ಚಿತ್ರದ ಪಾತ್ರವಾಗಿದೆ. ಈ ಸಿನಿಮಾದಲ್ಲಿ ವಿಶೇಷ ಚೇತನ ವ್ಯಕ್ತಿಯ ಪಾತ್ರ ಮಾಡಿದ್ದಾರೆ.

ಮುಂಬರುವ ಸಿನಿಮಾಗಳು

ನಯನತಾರ ಅವರು ಕೊನೆಯ ಬಾರಿಗೆ 2023ರ ಅನ್ನಪೂರಣಿಯಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾ ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾದ ಬಳಿಕ ವಿವಾದದ ಕಿಡಿ ಹೊತ್ತಿಕೊಂಡಿತ್ತು. ಇದು ಧಾರ್ಮಿಕ ಭಾವನೆಗಳಿಗೆ ನೋವುಂಟು ಮಾಡಿದ ಕಾರಣಕ್ಕೆ ತಾತ್ಕಾಲಿಕವಾಗಿ ಓಟಿಟಿಯಿಂದ ತೆಗೆಯಲಾಗಿತ್ತು. ಇದಾದ ಬಳಿಕ ಸಿನಿಮಾದಲ್ಲಿರುವ ವಿವಾದಾತ್ಮಕ ಅಂಶಗಳನ್ನು ತೆಗೆದ ಬಳಿಕ ಸಿನಿಮಾ ಮತ್ತೆ ಓಟಿಟಿಯಲ್ಲಿ ಸ್ಟ್ರೀಮಿಂಗ್‌ ಆಗಿತ್ತು.

ಇದರೊಂದಿಗೆ ಎರಡು ಸಿನಿಮಾಗಳ ಶೂಟಿಂಗ್‌ಲ್ಲಿದ್ದಾರೆ. ಒಂದು ಸಿನಿಮಾದ ಹೆಸರು ಇನ್ನೂ ಘೋಷಣೆಯಾಗಿಲ್ಲ. ಮತ್ತೊಂದು ಸಿನಿಮಾದ ಹೆಸರು ಮನ್ನನ್‌ಗಟ್ಟಿ ಸಿನ್ಸ್‌ 1960. ಇದರೊಂದಿಗೆ ಥಾನಿ ಓರುವನ್‌ 2 ಸಿನಿಮಾದ ಶೂಟಿಂಗ್‌ನಲ್ಲಿದ್ದಾರೆ. ಮುಕ್ಕೋಟಿ ಅಮ್ಮನ್‌ 2 ಚಿತ್ರದಲ್ಲೂ ನಟಿಸುತ್ತಿದ್ದಾರೆ. ಸದ್ಯ ಇವರು ಡಿಯರ್‌ ಸ್ಟುಡೆಂಟ್ಸ್‌ ಎಂಬ ಸಿನಿಮಾದ ಶೂಟಿಂಗ್‌ನಲ್ಲಿ ಬಿಝಿಯಾಗಿದ್ದಾರೆ.