ಭೈರತಿ ರಣಗಲ್ ಸಿನಿಮಾ ನೋಡಿದ ಶಿವರಾಜ್‌ಕುಮಾರ್‌ ಪತ್ನಿ , ಪುತ್ರಿ ನಿವೇದಿತಾ: ಥಿಯೇಟರ್‌ನಲ್ಲಿ ದೀಪಾವಳಿ ಆಚರಿಸಿದ ಫ್ಯಾನ್ಸ್‌

ಬಹಳ ದಿನಗಳಿಂದ ಅಭಿಮಾನಿಗಳು ಕಾಯುತ್ತಿದ್ದ ದಿನ ಬಂದಿದೆ. ಬಹುನಿರೀಕ್ಷಿತ ಭೈರತಿ ರಣಗಲ್‌ ಸಿನಿಮಾ ಬಿಡುಗಡೆ ಆಗಿದೆ. ಅಭಿಮಾನಿಗಳು, ಸಿನಿಮಾವನ್ನು ಮನೆ ಹಬ್ಬದಂತೆ ಸ್ವಾಗತಿಸಿ ಸಂಭ್ರಮಿಸುತ್ತಿದ್ದಾರೆ. ಥಿಯೇಟರ್‌ ಮುಂದೆ ಶಿವರಾಜ್‌ಕುಮಾರ್‌ ಕಟೌಟ್‌, ಬಂಟಿಗ್ಸ್‌, ಕನ್ನಡ ಬಾವುಟಗಳು ರಾರಾಜಿಸುತ್ತಿವೆ. ಕಟೌಟ್‌ಗಳಿಗೆ ಅಭಿಮಾನಿಗಳು ಹೂವು, ಹಾಲಿನ ಅಭಿಷೇಕ ಮಾಡುತ್ತಿದ್ದಾರೆ.

ಅಭಿಮಾನಿಗಳೊಂದಿಗೆ ಸಿನಿಮಾ ನೋಡಿದ ಶಿವರಾಜ್‌ಕುಮಾರ್‌ ಪತ್ನಿ, ಪುತ್ರಿ 

ರಾಜ್ಯಾದ್ಯಂತ ಸುಮಾರು 300 ಥಿಯೇಟರ್‌ಗಳಲ್ಲಿ ಭೈರತಿ ರಣಗಲ್‌ ಸಿನಿಮಾ ರಿಲೀಸ್‌ ಆಗಿದೆ. ಬೆಳಗ್ಗೆ 6 ಗಂಟೆಗೆ ಫಸ್ಟ್‌ ಡೇ, ಫಸ್ಟ್‌ ಶೋ ನೋಡಲು ಶಿವರಾಜ್‌ಕುಮಾರ್‌ ಪತ್ನಿ ಗೀತಾ ಹಾಗೂ ಪುತ್ರಿ ನಿವೇದಿತಾ ಚಿತ್ರಮಂದಿರಕ್ಕೆ ಆಗಮಿಸಿದ್ದರು. ಅವರು ಬರುತ್ತಿದ್ದಂತೆ ಅಭಿಮಾನಿಗಳು ಜೈಕಾರ ಹಾಕಿ ಇಬ್ಬರನ್ನೂ ಚಿತ್ರಮಂದಿರದೊಳಗೆ ಬರಮಾಡಿಕೊಂಡರು. ಶಿವಣ್ಣನ ಚಿತ್ರವನ್ನು ಅಭಿಮಾನಿಗಳು ಸ್ವಾಗತಿಸಿದ ರೀತಿ ನೋಡಿ ಗೀತಾ ಶಿವರಾಜ್‌ಕುಮಾರ್‌ ಹಾಗೂ ಪುತ್ರಿ ಸಂತೋಷ ವ್ಯಕ್ತಪಡಿಸಿದ್ದಾರೆ. ಪ್ರತಿ ಬಾರಿ ಶಿವಣ್ಣನ ಸಿನಿಮಾ ಬಿಡುಗಡೆ ಆದರೆ ಸಾಕು, ಅಭಿಮಾನಿಗಳು ತಮ್ಮ ಮನೆಯ ಹಬ್ಬದಂತೆ ಚಿತ್ರಮಂದಿರವನ್ನು ಅಲಂಕರಿಸಿ ಅದ್ದೂರಿಯಾಗಿ ಸಿನಿಮಾವನ್ನು ಬರಮಾಡಿಕೊಂಡಿದ್ದಾರೆ.

ಥಿಯೇಟರ್‌ ಸ್ಕ್ರೀನ್‌ ಮುಂದೆ ಪಟಾಕಿ ಹಚ್ಚಿದ ಅಭಿಮಾನಿಗಳು

ಥಿಯೇಟರ್‌ನಲ್ಲಿ ಅಭಿಮಾನಿಗಳು ಸ್ಕ್ರೀನ್‌ ಮುಂದೆ ಹೂಕುಂಡ ಹಚ್ಚಿ ಸಿನಿಮಾವನ್ನು ಬರಮಾಡಿಕೊಂಡಿದ್ದಾರೆ. ಇನ್ನೂ ಕೆಲವು ಅಭಿಮಾನಿಗಳು ಕನ್ನಡ ಬಾವುಟ, ಶಿವರಾಜ್‌ಕುಮಾರ್‌ ಫೋಟೋ ಹಿಡಿದು ಸಂಭ್ರಮಿಸಿದ್ದಾರೆ. ಕೆಲವೊಂದು ಥಿಯೇಟರ್‌ಗಳಲ್ಲಿ ಸಿನಿಮಾ ನೋಡಲು ಬಂದ ಅಭಿಮಾನಿಗಳಿಗೆ ಸಿಹಿ ಹಾಗೂ ಉಪಹಾರ ಹಂಚಲಾಗಿದೆ. ಸಿನಿಮಾ ಅಬ್ಬರ ಹೇಗಿದೆ ಎಂದರೆ ನೀರಿನ ಬಾಟೆಲ್‌ಗಳ ಮೇಲೆ ಕೂಡಾ ಭೈರತಿ ರಣಗಲ್‌ ಪೋಸ್ಟರ್‌ ಅಂಟಿಸಿ ಸೇಲ್‌ ಮಾಡಲಾಗುತ್ತಿದೆ.

ಭೈರತಿ ರಣಗಲ್‌ ಗೆಟಪ್‌ನಲ್ಲಿ ಸಿನಿಮಾ ನೋಡಿದ ಡಾಲಿ ಧನಂಜಯ್

ಇನ್ನು ಡಾಲಿ ಧನಂಜಯ್‌ ಕೂಡಾ ಸಿನಿಮಾ ನೋಡಿದ್ದಾರೆ. 5 ದಿನಗಳ ಹಿಂದೆ ನಡೆದ ಪ್ರಿ ರಿಲೀಸ್‌ ಇವೆಂಟ್‌ ಕಾರ್ಯಕ್ರಮದಲ್ಲಿ ನಾನು ಭೈರತಿ ರಣಗಲ್‌ ಗೆಟಪ್‌ನಲ್ಲಿ ಸಿನಿಮಾ ನೋಡುತ್ತೇನೆ ಎಂದು ಹೇಳಿದ್ದ ಡಾಲಿ ಧನಂಜಯ್‌ ನುಡಿದಂತೆ ಕಪ್ಪು ಷರ್ಟ್‌, ಪಂಚೆ ಧರಿಸಿ ಫಸ್ಟ್‌ ಡೇ ಫಸ್ಟ್‌ ಶೋ ನೋಡಿದ್ದಾರೆ. ಜೊತೆಗೆ ನಾಗಭೂಷಣ್‌, ಪೂರ್ಣಚಂದ್ರ ಮೈಸೂರು, ರಚನಾ ಇಂದರ್‌ ಕೂಡಾ ಥಿಯೇಟರ್‌ನಲ್ಲಿ ಸಿನಿಮಾ ನೋಡಿದ್ದಾರೆ. ಗುರುವಾರವಷ್ಟೇ ರಾಜ್ಯದಲ್ಲಿ ಸೂರ್ಯ ಅಭಿನಯದ ಕಂಗುವಾ ಸಿನಿಮಾ ರಿಲೀಸ್‌ ಆಗಿದೆ. ಭೈರತಿ ರಣಗಲ್‌ ಅಬ್ಬರದ ಮುಂದೆ ಕಂಗುವಾ ಮರೆಯಾಗೋದು ಪಕ್ಕಾ ಎಂದು ಶಿವಣ್ಣ ಅಭಿಮಾನಿಗಳು ಹೇಳುತ್ತಿದ್ದಾರೆ.