Saturday Motivation: ಜೀವನಕ್ಕೊಂದು ಸ್ಫೂರ್ತಿಮಾತು; ಹೊಗಳುವವರನ್ನಲ್ಲ, ಟೀಕಿಸುವವರನ್ನು ಸ್ನೇಹಿತರಂತೆ ಪರಿಗಣಿಸಿ ಆಗಲೇ ಯಶಸ್ಸು ಸಾಧ್ಯ
Saturday Motivation: ಒಬ್ಬ ವ್ಯಕ್ತಿಯಿಂದ ಯಾವುದೇ ಹೊಗಳಿಕೆ ಅಥವಾ ಟೀಕೆಯನ್ನು ಸಮಾನವಾಗಿ ಸ್ವೀಕರಿಸಿ ಮುನ್ನಡೆದರೆ ಮಾತ್ರ ನೀವು ಜೀವನದಲ್ಲಿ ಏನನ್ನಾದರೂ ಸಾಧಿಸಬಹುದು. ಆದರೆ ಹೊಗಳಿಕೆಗೆ ಹಿಗ್ಗಿದರೆ ಮತ್ತು ಟೀಕೆಗಳಿಗೆ ಕುಗ್ಗಿದರೆ ಜೀವನ ಬಹಳ ಕಷ್ಟವಾಗುತ್ತದೆ.
ಶನಿವಾರದ ಸ್ಫೂರ್ತಿಮಾತು: ಸಾಮಾನ್ಯವಾಗಿ ಜನರು ಬೇರೆಯವರು ತಮ್ಮನ್ನು ಹೊಗಳಿದರೆ ಖುಷಿಯಾಗುವುದು, ತೆಗಳಿದರೆ ಬೇಸರ ಮಾಡಿಕೊಂಡು ಕೂರುವುದು ಮಾಡುತ್ತಾರೆ. ಆದರೆ ಜೀವನದಲ್ಲಿ ಯಶಸ್ಸು ಕಂಡ ವ್ಯಕ್ತಿಗಳು ಹೊಗಳಿಕೆ ಮತ್ತು ಟೀಕೆಗೆ ಸಮಾನವಾಗಿ ಪ್ರತಿಕ್ರಿಯಿಸುತ್ತಾರೆ. ಅವರು ತಮ್ಮನ್ನು ಹೊಗಳಿದವರನ್ನು, ಟೀಕಿಸುವವರನ್ನು ಕೀಳಾಗಿ ಕಾಣುವುದಿಲ್ಲ. ವಾಸ್ತವವಾಗಿ, ಹೊಗಳಿಕೆಗಿಂತ ಟೀಕೆ ಉತ್ತಮವಾಗಿದೆ. ನಿಂದಕರಿರಬೇಕಯ್ಯಾ ಜಗದೊಳಗೆ ಎಂದು ಪುರಂದರದಾಸರೇ ಹೇಳಿಲ್ಲವೇ? ನೀವು ಮಾಡಿದ ಕೆಲಸಗಳಿಗೆ ಟೀಕೆ ಮಾಡುವವರು ಇದ್ದರೆ ತಾನೇ ನೀವು ಅದೆಲ್ಲವನ್ನೂ ಮೀರಿ ಮುಂದೆ ಬರಲು ಸಾಧ್ಯ.
ಟ್ರೆಂಡಿಂಗ್ ಸುದ್ದಿ
ಹೊಗಳಿಕೆಯು ನಿಮ್ಮ ಪ್ರಯಾಣಕ್ಕೆ ಅಡ್ಡಿಯಾಗಬಹುದು. ಆ ಹೊಗಳಿಕೆಗೆ ಕಟ್ಟುಬಿದ್ದು ಅಲ್ಲಿಗೇ ನಿಂತರೆ ನೀವು ಬಯಸಿದ ಯಶಸ್ಸು ಸಿಗುವುದಿಲ್ಲ. ಪ್ರತಿ ಟೀಕಾಕಾರರನ್ನು ಶಪಿಸುತ್ತಿದ್ದರೆ ನೀವು ಮುಂದೆ ಹೋಗುವುದಿಲ್ಲ. ಆದ್ದರಿಂದ ಟೀಕಿಸುವ ಬದಲು, ಟೀಕೆಯ ವಿಷಯವನ್ನು ವಿಶ್ಲೇಷಿಸಿ. ನೀವು ಎಲ್ಲಿ ಹೆಜ್ಜೆ ಹಾಕುತ್ತೀರಿ ಎಂಬುದನ್ನು ಅರ್ಥಮಾಡಿಕೊಳ್ಳಿ.
ಹೊಗಳಿಕೆಯನ್ನು ಲಘುವಾಗಿ ತೆಗೆದುಕೊಳ್ಳಬೇಡಿ. ಏಕೆಂದರೆ ನೀವು ಮಾಡಿದ ಕೆಲಸವನ್ನು ಅವರ ಮೆಚ್ಚುಗೆಯ ರೂಪದಲ್ಲಿ ಕಾಣಬಹುದು. ಆದರೆ ಟೀಕೆ ಬೇರೆ. ನೀವು ಮಾಡಬೇಕಾದುದನ್ನು ಮತ್ತು ನೀವು ಮಾಡದೆ ಬಿಟ್ಟದ್ದನ್ನು ನೀವು ಟೀಕೆಯ ರೂಪದಲ್ಲಿ ಪಡೆಯಬಹುದು. ಹಾಗೇ ಟೀಕೆ ಮಾಡುವವರೆಲ್ಲಾ ನಿಮ್ಮನ್ನು ನಿಂದಿಸುತ್ತಿದ್ದಾರೆ ಎಂದು ತಿಳಿದುಕೊಳ್ಳಬೇಡಿ. ಅವರನ್ನೇ ಸ್ಪೂರ್ತಿಯಾಗಿಟ್ಟುಕೊಂಡು ನೀವು ಅವರಿಗೆ ಸರಿಯಾದ ಉತ್ತರ ಕೊಡಿ.
ತೆಗಳಿಕೆಗಳಿಂದಲೇ ಯಶಸ್ಸು ಸಾಧ್ಯ
ನೀವು ಜೀವನದಲ್ಲಿ ಯಾವುದೇ ಅಡ್ಡಿ ಆತಂಕ ಇಲ್ಲದೆ ಯಶಸ್ವಿಯಾಗಲು ಬಯಸಿದರೆ ಟೀಕೆ ಮತ್ತು ಹೊಗಳಿಕೆಯನ್ನು ಸಮಾನವಾಗಿ ಪರಿಗಣಿಸಿ. ಎರಡಕ್ಕೂ ಒಂದೇ ಮೌಲ್ಯವನ್ನು ನೀಡಿ. ನೀವು ಟೀಕೆಗೆ ಹೆಚ್ಚಿನ ಮೌಲ್ಯವನ್ನು ನೀಡಲು ಬಯಸಿದರೆ. ನಂತರ ಖಂಡಿತವಾಗಿಯೂ ನೀವು ನಿಮ್ಮನ್ನು ಸರಿಪಡಿಸಿಕೊಂಡು ಮುಂದುವರಿಯುತ್ತೀರಿ. ಇದು ಯಶಸ್ಸಿಗೆ ಅಗತ್ಯವಾದ ಅಂಶವಾಗಿದೆ. ಮೆಚ್ಚುಗೆಯು ಜನರನ್ನು ಪ್ರೇರೇಪಿಸುತ್ತದೆ. ನಿಜ, ಆದರೆ ಟೀಕೆಯು ನೀವು ಮಾಡಬೇಕಾದ ಕೆಲಸಗಳನ್ನು ಸೂಚಿಸುತ್ತದೆ. ಹಾಗಾಗಿ ಪ್ರಶಂಸೆಯ ಜೊತೆಗೆ ಟೀಕೆಯೂ ಬೇಕು.
ಹೊಗಳಿಕೆಯನ್ನು ಕೇಳಿದಾಗ ಕೆಲವರು ಅಹಂನಿಂದ ವರ್ತಿಸಲು ಪ್ರಾರಂಭಿಸುತ್ತಾರೆ. ನಾನು ಯಾರೂ ಸಾಧಿಸಬಾರದ್ದನ್ನು ಸಾಧಿಸಿಬಿಟ್ಟಿರುವಂತೆ ಭಾವಿಸುತ್ತಾರೆ. ಹಾಗೆ ಮಾಡಿದರೆ ಅವರ ಪ್ರಯಾಣ ಅಲ್ಲಿಗೇ ನಿಲ್ಲುತ್ತದೆ. ಅಹಂಕಾರ ಹೆಚ್ಚಾದಾಗ ಸೋಲು ಹಿಂಬಾಲಿಸುತ್ತದೆ. ಆದ್ದರಿಂದ ಹೊಗಳಿಕೆಯನ್ನು ಬಹಳ ನಮ್ರತೆಯಿಂದ ಸ್ವೀಕರಿಸಬೇಕು. ಆ ಹೊಗಳಿಕೆಗೆ ಹೆಮ್ಮೆ ಪಡಬೇಡಿ. ನಿಮ್ಮ ಮನಸ್ಸು ಅಹಂಕಾರದ ಅಮಲೇರಿದರೆ, ನಿಮ್ಮ ಮನಸ್ಸು ದುರ್ಬಲವಾಗಿದೆ ಎಂದರ್ಥ. ಯಶಸ್ವಿಯಾಗಲು ಬಯಸುವ ವ್ಯಕ್ತಿಯು ದೃಢವಾದ ಮನಸ್ಸನ್ನು ಹೊಂದಿರುತ್ತಾನೆ.
ಹೊಗಳಿಕೆಯಿಂದ ಅರ್ಧಕ್ಕೆ ನಿಲ್ಲುವ ನಿಮ್ಮ ಯಶಸ್ಸಿನ ಪ್ರಯಾಣ
ನಿಮ್ಮನ್ನು ಹೊಗಳುವವರಲ್ಲಿ ಎಷ್ಟೋ ಮಂದಿ ಮನಸ್ಸಿನ ಆಳದಿಂದ ಹೊಗಳುವುದಿಲ್ಲ. ಆದರೆ ಟೀಕೆಯಲ್ಲಿ ಆ ರೀತಿ ಅಲ್ಲ, ಅದೇ ಸತ್ಯ. ಟೀಕೆಯು ನಿಮ್ಮ ಜೀವನವನ್ನು ಹೆಚ್ಚು ಬದಲಾಯಿಸುತ್ತದೆ. ಟೀಕೆಯಲ್ಲಿನ ಸತ್ಯವನ್ನು ಅರಿತುಕೊಳ್ಳಿ ಮತ್ತು ನೀವು ಏನು ತಪ್ಪು ಮಾಡಿದ್ದೀರಿ ಅಥವಾ ನೀವು ಮುಂದೆ ಏನು ಮಾಡಬೇಕೆಂದು ನಿರ್ಧರಿಸಿ. ಪ್ರಶಂಸೆಗಳನ್ನು ಕೇಳಲು ಸಮಯ ವ್ಯರ್ಥ ಮಾಡಬೇಡಿ. ಬದಲಾಗಿ ಅದನ್ನು ಸಲಹೆಯನ್ನಾಗಿ ಸ್ವೀಕರಿಸಿ. ಹೊಗಳಿಕೆ ನಿಮ್ಮನ್ನು ಹೆಮ್ಮೆ ಪಡುವಂತೆ ಮಾಡಿದರೆ, ಟೀಕೆ ನಿಮ್ಮನ್ನು ನೆಲದ ಮೇಲೆ ನಿಲ್ಲುವಂತೆ ಮಾಡುತ್ತದೆ.
ಯಶಸ್ಸನ್ನು ಪಡೆದ ನಂತರ ಒಬ್ಬರು ಹೊಗಳುತ್ತಾರೆ. ಆ ಯಶಸ್ಸಿನ ಪಯಣದಲ್ಲಿ ನೀವು ಎದುರಿಸಬೇಕಾಗಿರುವುದು ಟೀಕೆ. ಆಗ ಮಾತ್ರ ನಿಮ್ಮನ್ನು ನೀವು ಬದಲಾಯಿಸಿಕೊಂಡು ಮುಂದೆ ಸಾಗುತ್ತೀರಿ. ಆದರೆ ಹೊಗಳಿಕೆಗೆ ಬಿದ್ದರೆ ಪ್ರಯಾಣ ಅಲ್ಲಿಗೇ ನಿಲ್ಲುತ್ತದೆ. ಯಶಸ್ಸು ಹೆಚ್ಚು ಕಷ್ಟಕರವಾಗುತ್ತದೆ. ಪ್ರತಿ ಟೀಕಾಕಾರರನ್ನು ನಿಮ್ಮ ಶತ್ರುವನ್ನಾಗಿ ಮಾಡಿಕೊಳ್ಳಬೇಡಿ. ಅವರನ್ನು ನಿಮ್ಮ ಸ್ನೇಹಿತರು ಎಂದು ಪರಿಗಣಿಸಿ. ಅವರ ಟೀಕೆಯಿಂದ ಒಳ್ಳೆಯದನ್ನು ತೆಗೆದುಕೊಳ್ಳಿ, ಇನ್ನಷ್ಟು ಯಶಸ್ಸು ಸಾಧಿಸಿ.