ಶತಕ ಸಿಡಿಸಿ ವಿಶ್ವಕಪ್ ಇತಿಹಾಸದಲ್ಲಿ ಸೌತ್ ಆಫ್ರಿಕಾ ಪರ ವಿಶೇಷ ದಾಖಲೆ ಬರೆದ ಮಿಲ್ಲರ್; ರೆಕಾರ್ಡ್ಸ್ ಪಟ್ಟಿ ಹೀಗಿದೆ

ಏಕದಿನ ವಿಶ್ವಕಪ್ ಟೂರ್ನಿಯ ಎರಡನೇ ಸೆಮಿಫೈನಲ್​​ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಏಕಾಂಗಿ ಹೋರಾಟ ನಡೆಸಿ ಅಮೋಘ ಶತಕ ಸಿಡಿಸಿದರು. ಆ ಮೂಲಕ 48 ವರ್ಷಗಳ ವಿಶ್ವಕಪ್ ಇತಿಹಾಸದಲ್ಲಿ ದಕ್ಷಿಣ ಆಫ್ರಿಕಾ ಪರ ವಿಶೇಷ ದಾಖಲೆಯೊಂದಕ್ಕೆ ಪಾತ್ರರಾಗಿದ್ದಾರೆ. ಸಂಕಷ್ಟದಲ್ಲಿದ್ದ ತಂಡಕ್ಕೆ ಆಸರೆಯಾದ ಮಿಲ್ಲರ್ ಹಲವು ದಾಖಲೆಗಳನ್ನೂ ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ.

ನಾಕೌಟ್​ನಲ್ಲಿ ಶತಕ ಸಿಡಿಸಿದ ಮೊದಲ ಆಟಗಾರ

48 ವರ್ಷಗಳ ಏಕದಿನ ವಿಶ್ವಕಪ್ ಚರಿತ್ರೆಯಲ್ಲಿ ಸೌತ್ ಆಫ್ರಿಕಾ ಪರ ನಾಕೌಟ್​ ಪಂದ್ಯಗಳಲ್ಲಿ ಶತಕ ಸಿಡಿಸಿದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಡೇವಿಡ್ ಮಿಲ್ಲರ್ ಪಾತ್ರರಾಗಿದ್ದಾರೆ. ಅಲ್ಲದೆ, ನಾಕೌಟ್​ನಲ್ಲಿ ಅತ್ಯಧಿಕ ರನ್ ಗಳಿಸಿದ್ದ ಫಾಫ್ ಡು ಪ್ಲೆಸಿಸ್ ದಾಖಲೆ ಮುರಿದರು. ಈ ಹಿಂದೆ ಸೆಮಿಫೈನಲ್​ನಲ್ಲಿ ಪ್ಲೆಸಿಸ್ 82 ರನ್ ಗಳಿಸಿದ್ದು ಈವರೆಗಿನ ದಾಖಲೆಯಾಗಿತ್ತು. ಇದೀಗ ಮಿಲ್ಲರ್ 101 ರನ್ ಬಾರಿಸಿದ್ದಾರೆ.

ತಂಡಕ್ಕೆ ಆಸರೆ

ಕೋಲ್ಕತ್ತಾದ ಈಡನ್ ಗಾರ್ಡನ್ಸ್​ ಮೈದಾನದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಸೌತ್​ ಆಫ್ರಿಕಾ, 24 ರನ್​ಗಳಿಗೆ 4 ವಿಕೆಟ್ ಕಳೆದುಕೊಂಡಿತು. ಈ ವೇಳೆ ಅದ್ಭುತ ಬ್ಯಾಟಿಂಗ್ ಪ್ರದರ್ಶಿಸಿದ ಮಿಲ್ಲರ್​, ಅಮೋಘ ಶತಕ ಸಿಡಿಸಿ ತಂಡದ ಮೊತ್ತವನ್ನು 200ರ ಗಡಿ ದಾಟಿಸಿದರು. 116 ಎಸೆತಗಳಲ್ಲಿ 8 ಬೌಂಡರಿ, 5 ಸಿಕ್ಸರ್​ ಸಹಿತ 101 ರನ್ ಗಳಿಸಿದರು. ದಕ್ಷಿಣ ಆಫ್ರಿಕಾ 212 ರನ್​ಗಳಿಗೆ ಸರ್ವಪತನ ಕಂಡಿತು. ಮಿಲ್ಲರ್ ದಾಖಲೆಗಳ ಪಟ್ಟಿಯನ್ನು ಈ ಮುಂದೆ ನೋಡೋಣ.

ಮ್ಯಾಕ್ಸಿ ನಂತರ ಸ್ಥಾನ

ಏಕದಿನ ವಿಶ್ವಕಪ್​​ನಲ್ಲಿ 5ನೇ ಕ್ರಮಾಂಕ ಅಥವಾ ಅದಕ್ಕಿಂತ ಕೆಳ ಕ್ರಮಾಂಕದಲ್ಲಿ 2 ಅಥವಾ ಅದಕ್ಕಿಂತ ಹೆಚ್ಚಿನ ಶತಕ ಸಿಡಿಸಿದ ಆಟಗಾರರ ಪೈಕಿ ಮಿಲ್ಲರ್ 2ನೇ ಸ್ಥಾನ ಪಡೆದಿದ್ದಾರೆ. ಆಸ್ಟ್ರೇಲಿಯಾದ ಗ್ಲೆನ್​ ಮ್ಯಾಕ್ಸ್​​ವೆಲ್ ಮೊದಲ ಸ್ಥಾನದಲ್ಲಿದ್ದಾರೆ. ಮ್ಯಾಕ್ಸಿ 3 ಶತಕ, ಮಿಲ್ಲರ್ ಎರಡು ಶತಕ ಸಿಡಿಸಿದ್ದಾರೆ.

ಏಕದಿನದಲ್ಲಿ ಅಧಿಕ ಶತಕ

ಏಕದಿನದಲ್ಲಿ 5ನೇ ಕ್ರಮಾಂಕ ಅಥವಾ ಅದಕ್ಕಿಂತ ಕೆಳ ಕ್ರಮಾಂಕದಲ್ಲಿ ಅಧಿಕ ಶತಕ ಸಿಡಿಸಿದವರ ಪಟ್ಟಿಗೂ ಮಿಲ್ಲರ್ ಸೇರ್ಪಡೆಯಾಗಿದ್ದಾರೆ. 5 ಅಥವಾ ಅದಕ್ಕಿಂತ ಕೆಳ ಕ್ರಮಾಂಕದಲ್ಲಿ ಜೋಸ್ ಬಟ್ಲರ್ ಅಧಿಕ ಶತಕ ಸಿಡಿಸಿದ್ದಾರೆ. ಬಟ್ಲರ್ ಖಾತೆಯಲ್ಲಿ 8 ಶತಕಗಳಿವೆ. ಇನ್ನು ತಲಾ 7 ಸೆಂಚುರಿ ಬಾರಿಸಿರುವ ಎಂಎಸ್ ಧೋನಿ, ಯುವರಾಜ್ ಸಿಂಗ್ 2ನೇ ಸ್ಥಾನದಲ್ಲಿದ್ದಾರೆ. ಎಬಿ ಡಿವಿಲಿಯರ್ಸ್, ಇಯಾನ್ ಮಾರ್ಗನ್, ಆ್ಯಂಡ್ರೂ ಸೈಮಂಡ್ಸ್, ಸಿಕಂದರ್​ ರಾಜಾ, ಡೇವಿಡ್ ಮಿಲ್ಲರ್ ತಲಾ 6 ಶತಕ ಬಾರಿಸಿದ್ದಾರೆ.

ಏಕದಿನ ಕ್ರಿಕೆಟ್​ನಲ್ಲಿ 5 ಅಥವಾ ಅದಕ್ಕಿಂತ ಕೆಳ ಕ್ರಮಾಂಕದಲ್ಲಿ ತಂಡವೊಂದರ ವಿರುದ್ಧ ಹೆಚ್ಚು ಶತಕ ಸಿಡಿಸಿದವರು.

• 3 - ಕ್ರಿಸ್ ಕ್ರೈನ್ಸ್ (ನ್ಯೂಜಿಲೆಂಡ್) vs ಭಾರತ
• 3 - ಇಯಾನ್ ಮಾರ್ಗನ್ (ಇಂಗ್ಲೆಂಡ್) vs ಆಸ್ಟ್ರೇಲಿಯಾ
• 3 - ಕೆವಿನ್ ಪೀಟರ್​ಸನ್ (ಇಂಗ್ಲೆಂಡ್)vs ಸೌತ್ ಆಫ್ರಿಕಾ
• 3 - ಡೇವಿಡ್ ಮಿಲ್ಲರ್ (ಸೌತ್ ಆಫ್ರಿಕಾ) vs ಆಸ್ಟ್ರೇಲಿಯಾ

ಆಸ್ಟ್ರೇಲಿಯಾ vs ಸೌತ್ ಆಫ್ರಿಕಾ ನಡುವಿನ ಏಕದಿನಗಳಲ್ಲಿ ಹೆಚ್ಚು ಶತಕ ಸಿಡಿಸಿದವರು

• 5 - ಫಾಫ್ ಡು ಪ್ಲೆಸಿಸ್
• 5 - ಡೇವಿಡ್ ವಾರ್ನರ್
• 3 - ಕ್ವಿಂಟನ್ ಡಿ ಕಾಕ್
• 3 - ಹರ್ಷಲ್ ಗಿಬ್ಸ್
• 3 - ಡೇವಿಡ್ ಮಿಲ್ಲರ್
  

ಏಕದಿನದಲ್ಲಿ ಅತ್ಯಧಿಕ ಸಿಕ್ಸರ್​ (ಸೌತ್ ಆಫ್ರಿಕಾ ಪರ)

• 200 - ಎಬಿ ಡಿವಿಲಿಯರ್ಸ್
• 138 - ಡೇವಿಡ್ ಮಿಲ್ಲರ್
• 137 - ಜಾಕ್ ಕಾಲಿಸ್
• 128 - ಹರ್ಷಲ್ ಗಿಬ್ಸ್
• 118 - ಕ್ವಿಂಟನ್ ಡಿ ಕಾಕ್
  

ವಿಶ್ವಕಪ್​ ನಾಕೌಟ್​​ಗಳಲ್ಲಿ ಅತ್ಯಧಿಕ ರನ್ (ಸೌತ್ ಆಫ್ರಿಕಾ ಪರ)

• 101 - ಡೇವಿಡ್ ಮಿಲ್ಲರ್ vs ಆಸ್ಟ್ರೇಲಿಯಾ, ಕೋಲ್ಕತ್ತಾ, 2023ರ ವಿಶ್ವಕಪ್ ಸೆಮಿಫೈನಲ್
• 82 - ಫಾಫ್ ಡು ಪ್ಲೆಸಿಸ್ vs ನ್ಯೂಜಿಲೆಂಡ್, ಆಕ್ಲೆಂಡ್, 2015ರ ವಿಶ್ವಕಪ್ ಸೆಮಿಫೈನಲ್
• 78* - ಕ್ವಿಂಟನ್ ಡಿ ಕಾಕ್ vs ಶ್ರೀಲಂಕಾ, ಸಿಡ್ನಿ, 2015ರ ವಿಶ್ವಕಪ್ ಕ್ವಾರ್ಟರ್​ ಫೈನಲ್

ಐಸಿಸಿ ಏಕದಿನ ಟೂರ್ನಿಗಳ ನಾಕೌಟ್​​ಗಳಲ್ಲಿ ಶತಕ (ದ.ಆಫ್ರಿಕಾ ಪರ)

• 116* - ಹರ್ಷಲ್ ಗಿಬ್ಸ್ vs ಭಾರತ, ಕೊಲೊಂಬೊ, 2002ರ ಚಾಂಪಿಯನ್ಸ್ ಟ್ರೋಫಿ ಸೆಮಿಫೈನಲ್​
• 113* - ಜಾಕ್ ಕಾಲಿಸ್ vs ಶ್ರೀಲಂಕಾ, ಢಾಕಾ, 1998ರ ಚಾಂಪಿಯನ್ಸ್ ಟ್ರೋಫಿ ಸೆಮಿಫೈನಲ್
• 101 - ಡೇವಿಡ್ ಮಿಲ್ಲರ್ vs ಆಸ್ಟ್ರೇಲಿಯಾ, ಕೋಲ್ಕತ್ತಾ, 2023ರ ವಿಶ್ವಕಪ್ ಸೆಮಿಫೈನಲ್