ಏನ್ರೀ ಮೀಡಿಯಾ, ಇದು ಕರ್ನಾಟಕದಲ್ಲಿ..; ಎಬಿಡಿ ಬಾಯಲ್ಲಿ ಡಿಬಾಸ್ ಡೈಲಾಗ್, ಸೋಷಿಯಲ್ ಮೀಡಿಯಾದಲ್ಲಿ ವೈರಲ್

ದಕ್ಷಿಣ ಆಫ್ರಿಕಾ ತಂಡದ ದಿಗ್ಗಜ, ಆರ್​​ಸಿಬಿ ಮಾಜಿ ಆಟಗಾರ ಎಬಿ ಡಿವಿಲಿಯರ್ಸ್ ಅದೆಷ್ಟು ಬಾರಿ ಕನ್ನಡಿಗರ ಮನ ಗೆದ್ದಿದ್ದರೋ ಗೊತ್ತಿಲ್ಲ. ಆಗಾಗ್ಗೆ ಕನ್ನಡದಲ್ಲಿ ಮಾತನಾಡುತ್ತಾ, ಕನ್ನಡದಲ್ಲಿ ಪ್ರತಿಕ್ರಿಯಿಸುತ್ತಾ ಕರ್ನಾಟಕದ ಅಭಿಮಾನಿಗಳ ಹೃದಯ ಗೆದ್ದಿದ್ದಾರೆ. ಇತ್ತೀಚೆಗೆ ಐಸಿಸಿ ಹಾಲ್​ ಆಫ್ ಫೇಮ್ ಗೌರವ ಪಡೆದಾಗ ಆರ್​​ಸಿಬಿ ಹಂಚಿಕೊಂಡಿದ್ದ ಅಭಿನಂದನಾ ಪೋಸ್ಟ್​​ಗೂ ಎಬಿ, ಧನ್ಯವಾದ ಎಂದು ಕನ್ನಡದಲ್ಲೇ ರಿಪ್ಲೈ ಕೊಟ್ಟಿದ್ದರು. ಇದೀಗ ಮತ್ತೊಮ್ಮೆ ಕನ್ನಡದ ಫೇಮಸ್ ಡೈಲಾಗ್​ ಒಂದನ್ನು ಹೇಳುವ ಮೂಲಕ ಗಮನ ಸೆಳೆದಿದ್ದಾರೆ.

ನಟ ದರ್ಶನ್ ಮಾಧ್ಯಮಗಳಿಗೆ ಹೇಳಿದ್ದ ಡೈಲಾಗ್​ ಅನ್ನು ಎಬಿಡಿ ಹೇಳಿದ್ದು, ಅದನ್ನು ಇಂಗ್ಲಿಷ್​ಗೆ ಅನುವಾದ ಕೂಡ ಮಾಡಿದ್ದಾರೆ. ಏನ್ರೀ ಮೀಡಿಯಾ ಎಂದು ಹೇಳಿರುವ ಮಾಜಿ ಕ್ರಿಕೆಟಿಗ, What is Media ಎಂದು ಇಂಗ್ಲಿಷ್​ನಲ್ಲಿ ಕರೆಯುತ್ತಾ, ಇದು ಕರ್ನಾಟಕದಲ್ಲಿ ತುಂಬಾ ಫೇಮಸ್ ಡೈಲಾಗ್ ಎಂದಿದ್ದಾರೆ. ಕಾಯಕವೇ ಕೈಲಾಸ ಎಂದು ಮತ್ತೊಂದು ಪದವನ್ನು ಕನ್ನಡದಲ್ಲಿ ಹೇಳಿ, ಅದನ್ನು Work is Worship ಎಂದು ಇಂಗ್ಲಿಷ್​ಗೆ ಟ್ರಾನ್ಸಲೇಟ್ ಮಾಡಿದ್ದಾರೆ. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಅದರಲ್ಲೂ ದರ್ಶನ್​ ಅಭಿಮಾನಿಗಳು ತುಂಬಾ ಇಷ್ಟಪಟ್ಟಿದ್ದು, ವೈರಲ್ ಮಾಡುತ್ತಿದ್ದಾರೆ.

ಇತ್ತೀಚೆಗೆ ಹಾಲ್​ ಆಫ್ ಫೇಮ್ ಗೌರವ ಪಡೆದ ಎಬಿಡಿ

ಸೌತ್ ಆಫ್ರಿಕಾ ಕ್ರಿಕೆಟ್ ತಂಡದ ಪರ ಅಪಾರ ಸಾಧನೆ ಮಾಡಿರುವ ಎಬಿ ಡಿವಿಲಿಯರ್ಸ್ ಅವರಿಗೆ ಐಸಿಸಿ ಇತ್ತೀಚೆಗೆ ಹಾಲ್ ಆಫ್ ಫೇಮ್ ಗೌರವ ನೀಡಿತ್ತು. ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ದಾಖಲೆಗಳ ಸರದಾರನಾದ ಎಬಿ, ವಿಶೇಷ ಗೌರವಕ್ಕೆ ಪಾತ್ರವಾಗುವ ಮೂಲಕ ದಿಗ್ಗಜ ಸಾಲಿಗೆ ಸೇರಿದರು. ಇಂಗ್ಲೆಂಡ್​ನ ಅಲೆಸ್ಟರ್​ ಕುಕ್ ಮತ್ತು ಭಾರತದ ಮಹಿಳಾ ಆಟಗಾರ್ತಿ ನೀತು ಡೇವಿಡ್​ ಅವರೊಂದಿಗೆ ಎಬಿ ಈ ಗೌರವ ಪಡೆದರು. ಈವರೆಗೂ 115 ಕ್ರಿಕೆಟಿಗರು ಈ ಗೌರವಕ್ಕೆ ಪಾತ್ರರಾಗಿದ್ದಾರೆ. ಹಾಲ್ ಆಫ್ ಫೇಮ್ ಪಡೆದ ಸೌತ್ ಆಫ್ರಿಕಾದ 7ನೇ ಆಟಗಾರ ಎಬಿ.

ಕನ್ನಡದಲ್ಲಿ ಧನ್ಯವಾದ ಹೇಳಿದ ಎಬಿಡಿ

ಎಬಿಡಿ ಐಸಿಸಿ 'ಹಾಲ್ ಆಫ್ ಫೇಮ್ 2024' ಗೌರವ ಪಡೆದ ಬಳಿಕ ಆರ್​​ಸಿಬಿ ಎಕ್ಸ್‌ನಲ್ಲಿ ಪೋಸ್ಟ್ ಹಂಚಿಕೊಂಡಿತ್ತು. ಗೌರವ ಎನ್ನುವುದು ಬರುತ್ತದೆ, ಹೋಗುತ್ತದೆ. ಆದರೆ, ಈ ಫ್ರೇಮ್ ಯಾವಾಗಲೂ ನಿನ್ನ ಜೊತೆಯೇ ಇರುತ್ತದೆ ಎಂದು ಹಾಲ್ ಆಫ್ ಫೇಮ್ ಜತೆ ತೆಗೆದ ಫೋಟೊವನ್ನು ಶೇರ್​ ಮಾಡಿದೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಆರ್​​ಸಿಬಿ ಮಾಜಿ ಆಟಗಾರ, ಧನ್ಯವಾದ ಎಂದು ಕನ್ನಡದಲ್ಲೇ ರಿಪ್ಲೈ ಕೊಟ್ಟಿದ್ದಾರೆ. ಆ ಮೂಲಕ ಕನ್ನಡಿಗರ ಹೃದಯ ಗೆಲ್ಲುವಲ್ಲಿ ಮತ್ತೊಮ್ಮೆ ಯಶಸ್ವಿಯಾಗಿದ್ದಾರೆ.

ಇದನ್ನೂ ಓದಿ: ಕನ್ನಡ ರಾಜ್ಯೋತ್ಸವ 2024: ಟೀಮ್ ಇಂಡಿಯಾದಲ್ಲಿ ಮಿಂಚಿದ ಅಗ್ರ 10 ಖ್ಯಾತ ಕ್ರಿಕೆಟಿಗರಿವರು

ಆರ್​​ಸಿಬಿ ಫ್ರಾಂಚೈಸಿ ತಲೆಕೆಡಿಸಿಕೊಳ್ತಿಲ್ಲ

ಐಪಿಎಲ್ ತೊರೆದ ಕ್ಷಣದಿಂದಲೂ ವಿಲಿಯರ್ಸ್ ಅವರನ್ನು ಆರ್​ಸಿಬಿ ಕೋಚ್ ಅಥವಾ ಮೆಂಟರ್ ಆಗಿ ಸೇರಿಸಿಕೊಳ್ಳಬೇಕು ಎಂದು ಫ್ಯಾನ್ಸ್ ಒತ್ತಾಯ ಮಾಡುತ್ತಲೇ ಇದ್ದಾರೆ. ಆದರೆ ಅದ್ಯಾಕೋ ಆರ್​ಸಿಬಿ ಫ್ರಾಂಚೈಸಿ ಈ ಬಗ್ಗೆ ತಲೆ ಕೆಡಿಸಿಕೊಳ್ಳುತ್ತಿಲ್ಲ. ಈ ಹಿಂದೆ ಎಬಿಡಿ, ಆರ್​ಸಿಬಿ ಸೇರುವ ಆಸೆ ಇರುವುದಾಗಿ ಹೇಳಿದ್ದರು. ಇಷ್ಟಿದ್ದರೂ ಫ್ರಾಂಚೈಸಿ ನಿರ್ಲಕ್ಷ್ಯ ವಹಿಸಿರುವುದು ಅಚ್ಚರಿ ಮೂಡಿಸಿದೆ. ಮುಂದಿನ ದಿನಗಳಲ್ಲಾದರೂ ಅವರ ಆಯ್ಕೆಗೆ ಫ್ರಾಂಚೈಸಿ ಒಲವು ತೋರಿಸಲಿ ಎಂದು ಫ್ಯಾನ್ಸ್ ಹಾರೈಸಿದ್ದಾರೆ.

ಇದನ್ನೂ ಓದಿ: ನ್ಯೂಜಿಲೆಂಡ್ ವಿರುದ್ಧ ಟೆಸ್ಟ್ ಸರಣಿ ಸೋತರೂ ಭಾರತ ತಂಡ ಡಬ್ಲ್ಯುಟಿಸಿ ಫೈನಲ್‌ಗೆ ಅರ್ಹತೆ ಪಡೆಯಬಹುದು?