ವಾಂಖೆಡೆಯಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ 12 ವರ್ಷಗಳ ನಂತರ ಗೆದ್ದ ಕೆಕೆಆರ್; ಹಾರ್ದಿಕ್ ಪಡೆ ಪ್ಲೇಆಫ್ ಕನಸು ಭಗ್ನ
May 03, 2024 11:46 PM IST
ವಾಂಖೆಡೆಯಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ 12 ವರ್ಷಗಳ ನಂತರ ಗೆದ್ದ ಕೆಕೆಆರ್; ಹಾರ್ದಿಕ್ ಪಡೆ ಪ್ಲೇಆಫ್ ಕನಸು ಭಗ್ನ
- KKR beat MI : 17ನೇ ಆವೃತ್ತಿಯ ಐಪಿಎಲ್ನ 51ನೇ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ಕೋಲ್ಕತ್ತಾ ನೈಟ್ ರೈಡರ್ಸ್ 24 ರನ್ಗಳ ಭರ್ಜರಿ ಗೆಲುವು ಸಾಧಿಸಿತು.
ಮುಂಬೈ ಇಂಡಿಯನ್ಸ್ ವಿರುದ್ಧ ಕೋಲ್ಕತ್ತಾ ನೈಟ್ ರೈಡರ್ಸ್ (Mumbai Indians vs Kolkata Knight Riders) ಐತಿಹಾಸಿಕ ದಾಖಲೆಯ ಗೆಲುವು ಸಾಧಿಸಿತು. 2012ರ ನಂತರ ವಾಂಖೆಡೆ ಮೈದಾನದಲ್ಲಿ ಎಂಐ ವಿರುದ್ಧ ಕೆಕೆಆರ್ ಗೆಲುವಿನ ಕೇಕೆ ಹಾಕಿತು. 169 ರನ್ಗಳನ್ನು ಡಿಫೆಂಡ್ ಮಾಡಿಕೊಳ್ಳುವಲ್ಲಿ ಯಶಸ್ವಿಯಾದ ಶ್ರೇಯಸ್ ಅಯ್ಯರ್ ಪಡೆ, 24 ರನ್ಗಳಿಂದ ಗೆದ್ದು ಬೀಗಿತು. ಈ ಮೈದಾನದಲ್ಲಿ ಎಂಐ ವಿರುದ್ಧ ಕೆಕೆಆರ್ ಸಾಧಿಸಿದ ಎರಡನೇ ಗೆಲುವು ಇದಾಗಿದೆ. ಮತ್ತೊಂದು ಸೋಲಿಗೆ ಶರಣಾದ ಹಾರ್ದಿಕ್ ಪಾಂಡ್ಯ ಪ್ಲೇಆಫ್ ಕನಸು ಭಗ್ನಗೊಂಡಿತು. 5 ಬಾರಿಯ ಚಾಂಪಿಯನ್ ತಂಡ ಒಟ್ಟು 8 ಸೋಲು ಕಂಡು ಭಾರಿ ಮುಖಭಂಗಕ್ಕೆ ಒಳಗಾಯಿತು.
ಮುಂಬೈನ ಐಕಾನಿಕ್ ವಾಂಖೆಡೆ ಕ್ರಿಕೆಟ್ ಮೈದಾನದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಕೆಕೆಆರ್, ಸ್ಪರ್ಧಾತ್ಮ ಮೊತ್ತಕ್ಕೆ ಕುಸಿಯಿತು, ಮುಂಬೈ ಬೌಲರ್ಗಳ ಮಾರಕ ದಾಳಿಯ ನಡುವೆಯೂ ವೆಂಕಟೇಶ್ ಅಯ್ಯರ್ 70 ರನ್ ಸಿಡಿಸಿ ತಂಡವನ್ನು ರಕ್ಷಿಸಿದರು. 20 ಓವರ್ಗಳಲ್ಲಿ ಕೋಲ್ಕತ್ತಾ 169 ರನ್ಗಳಿಗೆ ಆಲೌಟ್ ಆಯಿತು. ನುವಾನ್ ತುಷಾರ ಮತ್ತು ಜಸ್ಪ್ರೀತ್ ಬುಮ್ರಾ ತಲಾ 3 ವಿಕೆಟ್ ಪಡೆದು ಮಿಂಚಿದರು. ಈ ಗುರಿ ಬೆನ್ನಟ್ಟಿದ ಮುಂಬೈ, ಗೆಲುವಿನ ಅಂಚಿಗೆ ತಲುಪಿಗೆ ಶರಣಾಯಿತು. 4 ವಿಕೆಟ್ ಪಡೆದ ಮಿಚೆಲ್ ಸ್ಟಾರ್ಕ್ ಮುಂಬೈ ತಂಡವನ್ನು 145 ರನ್ಗಳಿಗೆ ಆಲೌಟ್ ಮಾಡಿದರು.
170 ರನ್ ಟಾರ್ಗೆಟ್ ಬೆನ್ನಟ್ಟಿದ ಮುಂಬೈ, ಪವರ್ಪ್ಲೇನಲ್ಲೇ ಪ್ರಮುಖ ಮೂರು ವಿಕೆಟ್ ಕಳೆದುಕೊಂಡಿತು. ಇಶಾನ್ ಕಿಶನ್ (13), ರೋಹಿತ್ ಶರ್ಮಾ (11), ನಮನ್ ಧೀರ್ (11) ಬೇಗನೇ ಔಟಾದರು. ಒಂದೆಡೆ ಸೂರ್ಯಕುಮಾರ್ ಕ್ರೀಸ್ ಕಚ್ಚಿನಿಂತು ಬೌಲರ್ಗಳ ವಿರುದ್ಧ ದಿಟ್ಟ ಹೋರಾಟ ನಡೆಸುತ್ತಿದ್ದರೆ, ಮತ್ತೊಂದೆಡೆ ಬ್ಯಾಟ್ ಹಿಡಿದು ಬಂದ ಬೌಲರ್ಗಳು ಪೆವಿಲಿಯನ್ ಪರೇಡ್ ನಡೆಸುತ್ತಿದ್ದರು. ಹಾರ್ದಿಕ್ ಪಾಂಡ್ಯ ಡಕೌಟ್ ಆದರೆ, ತಿಲಕ್ ವರ್ಮಾ (4), ನೇಹಾಲ್ ವದೇರಾ (6) ನಿರಾಸೆ ಮೂಡಿಸಿದರು.
ಇದರ ನಡುವೆಯೂ ಸೂರ್ಯಕುಮಾರ್ ಅರ್ಧಶತಕ ಸಿಡಿಸಿ ತಂಡಕ್ಕೆ ಗೆಲುವಿನ ಆಸೆ ಹೆಚ್ಚಿಸಿದರು. ಸೂರ್ಯಗೆ ಟಿಮ್ ಡೇವಿಡ್ ಸಾಥ್ ನೀಡಿದರು. ಆದರೆ, ಸ್ಕೈ 35 ಎಸೆತಗಳಲ್ಲಿ 6 ಬೌಂಡರಿ, 2 ಸಿಕ್ಸರ್ ಸಹಿತ 56 ರನ್ ಸಿಡಿಸಿ ಕೊನೆಯ ಹಂತದಲ್ಲಿ ಔಟಾದರು. ಇದರೊಂದಿಗೆ ಎಂಐ ಗೆಲುವಿನ ಕನಸು ಕೂಡ ಕಮರಿತು. ಟಿಮ್ ಡೇವಿಡ್ ಸಹ 24 ರನ್ಗಳಿಗೆ ಸುಸ್ತಾದರು. ಕೆಕೆಆರ್ ಬೌಲರ್ಗಳು ಆರಂಭದಿಂದ ಕೊನೆಯವರೆಗೂ ಅದ್ಭುತ ಪ್ರದರ್ಶನ ನೀಡಿದರು. ಮಿಚೆಲ್ ಸ್ಟಾರ್ಕ್ 4 ವಿಕೆಟ್, ವರುಣ್ ಚಕ್ರವರ್ತಿ, ಆಂಡ್ರೆ ರಸೆಲ್, ಸುನಿಲ್ ನರೇನ್ ತಲಾ 2 ವಿಕೆಟ್ ಪಡೆದರು.
ಮೊದಲು ಬ್ಯಾಟಿಂಗ್ ನಡೆಸಿದ ಕೆಕೆಆರ್ ಕೂಡ ಪವರ್ಪ್ಲೇನಲ್ಲೇ 4 ವಿಕೆಟ್ ಕಳೆದುಕೊಂಡಿತು. ಫಿಲ್ ಸಾಲ್ಟ್ (5), ಸುನಿಲ್ ನರೇನ್ (8), ಆಂಗ್ಕ್ರಿಷ್ ರಘುವಂಶಿ (13) ಮತ್ತು ಶ್ರೇಯಸ್ ಅಯ್ಯರ್ (6) ನಿರಾಸೆ ಮೂಡಿಸಿದರು. ಪವರ್ಪ್ಲೇ ಮುಕ್ತಾಯಗೊಂಡ ಮೊದಲ ಓವರ್ನಲ್ಲೇ ರಿಂಕು ಸಿಂಗ್ ಸಹ ಪೆವಿಲಿಯನ್ ಸೇರಿದರು. ಆಗ ತಂಡದ ಮೊತ್ತ 57/5. ಆ ಬಳಿಕ ಆದರೆ ವೆಂಕಟೇಶ್ ಅಯ್ಯರ್ ಮತ್ತು ಮನೀಶ್ ಪಾಂಡೆ 83 ರನ್ಗಳ ಪಾಲುದಾರಿಕೆ ಒದಗಿಸಿದರು. ಅದರಲ್ಲೂ ವೆಂಕಿ 70 ರನ್ ಸಿಡಿಸಿದರು. ಮನೀಶ್ 42 ರನ್ ಸಿಡಿಸಿದರು. ಪರಿಣಾಮ 19.5 ಓವರ್ಗಳಲ್ಲಿ 169 ರನ್ಗಳಿಗೆ ಆಲೌಟ್ ಆಯಿತು.