ರೋಹಿತ್ ಅಲ್ಲವೇ ಅಲ್ಲ; ಮುಂಬೈಗೆ ಮೊದಲ ನಾಯಕ, ಪ್ರಥಮ ಟ್ರೋಫಿ ಗೆದ್ದ ಕ್ಯಾಪ್ಟನ್ ಯಾರು? ಗೆಸ್ ಮಾಡಿ

2024ರ ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2024) ಮಿನಿ ಹರಾಜಿಗೆ ಕೇವಲ ನಾಲ್ಕು ದಿನಗಳ ಮೊದಲು, ಮುಂಬರುವ ಆವೃತ್ತಿಯಲ್ಲಿ ರೋಹಿತ್​ ಶರ್ಮಾ ಬದಲಿಗೆ ಹಾರ್ದಿಕ್ ಪಾಂಡ್ಯ ತಂಡವನ್ನು ಮುನ್ನಡೆಸಲಿದ್ದಾರೆ ಎಂದು ಮುಂಬೈ ಇಂಡಿಯನ್ಸ್ (Mumbai Indians) ಪ್ರಕಟಣೆ ಹೊರಡಿಸಿದೆ. ರೋಹಿತ್ ಇನ್ನು ಮುಂದೆ ಕೇವಲ ತಂಡದ ಆಟಗಾರ ಎಂದು ತಿಳಿಸಿದೆ. 2013ರಿಂದ 10 ವರ್ಷಗಳ ರೋಹಿತ್​ ನಾಯಕತ್ವ ಯುಗಾಂತ್ಯ ಕಂಡಿದೆ.

ಇದನ್ನೂ ಓದಿ : ರೋಹಿತ್​ರನ್ನು ಕೆಳಗಿಳಿಸಿ ಹಾರ್ದಿಕ್​ಗೆ ನಾಯಕತ್ವ: ಲಕ್ಷ, ಲಕ್ಷ‌ ಫಾಲೋವರ್ಸ್ ಕಳೆದುಕೊಂಡ ಮುಂಬೈ

2013ರಲ್ಲಿ ರಿಕಿ ಪಾಂಟಿಂಗ್‌ ಅವರಿಂದ ಟೂರ್ನಿಯ ಮಧ್ಯೆದಲ್ಲೇ ತಂಡದ ಜವಾಬ್ದಾರಿ ವಹಿಸಿಕೊಂಡ ನಂತರ ರೋಹಿತ್, ಮುಂಬೈಗೆ ಒಟ್ಟು ಐದು ಐಪಿಎಲ್​ ಟ್ರೋಫಿಗಳನ್ನು ಗೆದ್ದುಕೊಟ್ಟರು. ರೋಹಿತ್ ನಾಯಕತ್ವದಲ್ಲಿ ಬ್ಲೂ ಅಂಡ್ ಗೋಲ್ಡ್ ತಂಡವು 2013, 2015, 2017, 2019 ಮತ್ತು 2020ರ ಐಪಿಎಲ್‌ ಆವೃತ್ತಿಗಳಲ್ಲಿ ಟ್ರೋಫಿ ಗೆದ್ದಿದೆ. ಜೊತೆಗೆ 2013ರಲ್ಲಿ ಚಾಂಪಿಯನ್ಸ್ ಲೀಗ್ ಟ್ರೋಫಿಯನ್ನೂ ಗೆದ್ದರು.

ಮುಂಬೈಗೆ ಮೊದಲ ನಾಯಕ ಯಾರು?

2013ರಿಂದ ರೋಹಿತ್ ತಮ್ಮ 5 ಐಪಿಎಲ್ ವಿಜಯಗಳಲ್ಲಿ ಅಂಬಾನಿ ಬ್ರಿಗೇಡ್ ತಂಡವನ್ನು ಮುನ್ನಡೆಸಿದ್ದರೆ, 2008ರ ಚೊಚ್ಚಲ ಲೀಗ್​ನಲ್ಲಿ ಮುಂಬೈ ತಂಡವನ್ನು ಮುನ್ನಡಿಸಿದ್ದು ಯಾರು? ರೋಹಿತ್​ ಅವರಲ್ಲ ಎಂಬುದು ಎಲ್ಲರಿಗೂ ಗೊತ್ತಿರುವ ವಿಷಯ. ಕೆಲವರು ಸಚಿನ್ ಎಂದು ಊಹಿಸಿದ್ದಾರೆ. ಆದರೆ ನಿಮ್ಮ ಊಹೆ ತಪ್ಪು. ಅವರು ಯಾರೂ ಅಲ್ಲ, ಭಾರತದ ದಿಗ್ಗಜ ಸ್ಪಿನ್ನರ್ ಹರ್ಭಜನ್ ಸಿಂಗ್. ಮುಂಬೈಗೆ ಮೊದಲ ಟ್ರೋಫಿ ಗೆದ್ದುಕೊಟ್ಟ ನಾಯಕ ಕೂಡ ಇವರೇ!

ಇದನ್ನೂ ಓದಿ : ಯಾವುದೇ ಕಾರಣಕ್ಕೂ ಆ ಸಮಸ್ಯೆ ಉದ್ಭವಿಸಲ್ಲ; ಹಾರ್ದಿಕ್ ನಾಯಕನಾದ ಬಳಿಕ ರೋಹಿತ್ ಬಾಲ್ಯದ ಕೋಚ್ ಪ್ರತಿಕ್ರಿಯೆ

ಟ್ರೋಫಿ ಗೆದ್ದಿದ್ದು ಐಪಿಎಲ್​ನಲ್ಲಿ ಅಲ್ಲ..!

ಸಚಿನ್​ ತೆಂಡೂಲ್ಕರ್ ನಾಯಕನ ಪಟ್ಟ ಅಲಂಕರಿಸಬೇಕಿತ್ತು. ಆದರೆ ಟೂರ್ನಿ ಆರಂಭಕ್ಕೂ ಮುನ್ನ ಸಚಿನ್ ಗಾಯದ ಸಮಸ್ಯೆಗೆ ಸಿಲುಕಿದ್ದರು. ಹಾಗಾಗಿ ತಂಡವನ್ನು ಭಜ್ಜಿ ಮುನ್ನಡೆಸಿದರು. ಅಲ್ಲದೆ, ಭಜ್ಜಿ ತನ್ನ ನಾಯಕತ್ವದಲ್ಲಿ ಮುಂಬೈಗೆ ಮೊದಲ ಟ್ರೋಫಿ ಗೆದ್ದುಕೊಟ್ಟರು. ಆದರೆ ಅದು ಐಪಿಎಲ್​ನಲ್ಲಿ ಅಲ್ಲ, ಬದಲಿಗೆ 2011ರ ಚಾಂಪಿಯನ್ಸ್​ ಲೀಗ್ಸ್​​ನಲ್ಲಿ ಮುಂಬೈ ತಂಡವನ್ನು ಚಾಂಪಿಯನ್ ಮಾಡಿದ್ದರು. ಮುಂಬೈಗೆ ಮೊದಲ ನಾಯಕ ಮತ್ತು ಮೊದಲ ಬಾರಿಗೆ ಮುಂಬೈ ಟ್ರೋಫಿ ವಿಜೇತ ನಾಯಕ ಎಂಬ ಹೆಗ್ಗಳಿಕೆಯನ್ನು ಅವರು ಹೊಂದಿದ್ದಾರೆ.

ರೋಹಿತ್ ನಾಯಕತ್ವದಲ್ಲಿ​ 6 ಟ್ರೋಫಿ ಗೆಲುವು

ಮುಂಬೈ ಇಂಡಿಯನ್ಸ್ ತನ್ನ ಇತಿಹಾಸದಲ್ಲಿ ಒಟ್ಟು 7 ಟ್ರೋಫಿಗಳನ್ನು ಗೆದ್ದುಕೊಂಡಿದೆ. ಈ ಪೈಕಿ 6 ಟ್ರೋಫಿಗಳು ರೋಹಿತ್ ನಾಯಕತ್ವದಲ್ಲಿ ಬಂದಿರುವುದು ವಿಶೇಷ. ಒಂದು ಪ್ರಶಸ್ತಿ ಹರ್ಭಜನ್ ನಾಯಕತ್ವದಲ್ಲಿ ಬಂದಿವೆ. ನಿಯಮಿತ ನಾಯಕ ಸಚಿನ್ ತೆಂಡೂಲ್ಕರ್ ಗಾಯದಿಂದ ಹೊರಗುಳಿದ ಕಾರಣ ಹರ್ಭಜನ್ ಪಟ್ಟ ಏರಿದ್ದರು. ಅಂದು ಪ್ರಮುಖ ಆಟಗಾರರ ಅಲಭ್ಯತೆಯಲ್ಲೂ ಭಜ್ಜಿ ಪ್ರಶಸ್ತಿ ಗೆದ್ದಿದ್ದರು.

ಇದನ್ನೂ ಓದಿ : ಹಾರ್ದಿಕ್ ಪಾಂಡ್ಯ ಮುಂಬೈ ಇಂಡಿಯನ್ಸ್ ತಂಡದ ನೂತನ ನಾಯಕ; ರೋಹಿತ್ 10 ವರ್ಷಗಳ ಕ್ಯಾಪ್ಟನ್ಸಿ ಅಂತ್ಯ

ಮುಂಬೈ ಇಂಡಿಯನ್ಸ್​ ಮೊದಲ ಕೆಲವು ಪಂದ್ಯಗಳಿಗೆ ಆಟಗಾರರಿಗೆ ವಿಶಿಷ್ಟ ಭತ್ಯೆಯನ್ನು ನೀಡಿತ್ತು. 5 ವಿದೇಶಿ ಆಟಗಾರರನ್ನು ಕಣಕ್ಕಿಳಿಸಲು ಅನುಮತಿಸಲಾಯಿತು. ಚೆನ್ನೈನ ಚೆಪಾಕ್​​ ಸ್ಟೇಡಿಯಂನಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಹರ್ಭಜನ್ ನೇತೃತ್ವದ ತಂಡವು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡವನ್ನು ಸೋಲಿಸಿ ವಿಜಯೋತ್ಸವ ಆಚರಿಸಿತ್ತು. 2013ರಲ್ಲಿ ರಿಕಿ ಪಾಂಟಿಂಗ್​ಗೆ ನಾಯಕತ್ವ ನೀಡಲಾಯಿತು. ಅದೇ ಆವೃತ್ತಿಯ ಮಧ್ಯದಲ್ಲಿ ರೋಹಿತ್​ರನ್ನು ಕ್ಯಾಪ್ಟನ್ ಮಾಡಲಾಯಿತು.