ಫಿಟ್ನೆಸ್​ನಲ್ಲಿ ಕಿಂಗ್ ಕೊಹ್ಲಿ-ಪಾಂಡ್ಯರನ್ನೇ ಮೀರಿಸಿದ ಗಿಲ್; ಯೋ-ಯೋ ಪರೀಕ್ಷೆಯಲ್ಲಿ ಶುಭ್ಮನ್ ಟಾಪರ್​

ಆಗಸ್ಟ್​ 30ರಿಂದ ಏಕದಿನ ಮಾದರಿಯ ಏಷ್ಯಾಕಪ್ ಟೂರ್ನಿಗೆ (Asia Cup 2023) ಅದ್ಧೂರಿ ಚಾಲನೆ ಸಿಗಲಿದೆ. ಅದಕ್ಕಾಗಿ ಭಾರತ ತಂಡ (Team India) ಭರ್ಜರಿ ಸಿದ್ಧತೆ ನಡೆಸುತ್ತಿದೆ. ಬೆಂಗಳೂರಿನ ಕೆಎಸ್​ಸಿಎ ಆಲೂರು ಮೈದಾನದಲ್ಲಿ ಟೂರ್ನಿಗೂ ಮುನ್ನ 1 ವಾರ ಪೂರ್ವ ಸಿದ್ಧತಾ ಶಿಬಿರದಲ್ಲಿ ಭಾಗಿಯಾಗಿದೆ. ಅದರಂತೆ ಏಷ್ಯಾಕಪ್​ಗಾಗಿ ಶ್ರೀಲಂಕಾಗೆ ಪ್ರಯಾಣಿಸುವ ಮೊದಲು ಭಾರತ ಆಟಗಾರರು, ಯೋ-ಯೋ ಫಿಟ್ನೆಸ್ ಪರೀಕ್ಷೆಗೆ (Yo-Yo Fitness Test) ಒಳಗಾಗಿದ್ದಾರೆ. ಇದೀಗ ಆಟಗಾರರು ಗಳಿಸಿದ ಅಂಕಗಳು, ಬಹಿರಂಗಗೊಂಡಿವೆ.

ಅಚ್ಚರಿ ಅಂದರೆ ಫಿಟ್​ನೆಸ್​ ಕಿಂಗ್ ಎನಿಸಿರುವ ವಿರಾಟ್ ಕೊಹ್ಲಿಯನ್ನೇ (Virat Kohli) ಶುಭ್ಮನ್ ಗಿಲ್ (Shubman Gill) ಮೀರಿಸಿದ್ದಾರೆ. ಕೊಹ್ಲಿಗಿಂತಲೂ ಶುಭ್ಮನ್​ ಗಿಲ್​ ಯೋ-ಯೋ ಟೆಸ್ಟ್​​​ನಲ್ಲಿ ಗರಿಷ್ಠ ಅಂಕ ಪಡೆದು ಅಚ್ಚರಿ ಮೂಡಿಸಿದ್ದಾರೆ. ಆಲ್​ರೌಂಡರ್​ ಹಾರ್ದಿಕ್ ಪಾಂಡ್ಯ (Hardik Pandya) ಕೂಡ ಉತ್ತಮ ಫಿಟ್​ನೆಸ್ ಕಾಯ್ದುಕೊಂಡಿದ್ದಾರೆ. ಆದರೆ, ಯಾರೂ ಗಿಲ್ ಪಡೆದಿರುವಷ್ಟು ಅಂಕ ಪಡೆಯಲು ಸಾಧ್ಯವಾಗಿಲ್ಲ.

ಆಟಗಾರರ ಅಂಕ ಹೀಗಿದೆ!

ಯೋ-ಯೋ ಫಿಟ್​ನೆಸ್​ ಟೆಸ್ಟ್​​ನಲ್ಲಿ ಅತಿ ಹೆಚ್ಚು ಅಂಕ ಪಡೆದ ಆಟಗಾರ ಶುಭ್ಮನ್ ಎನಿಸಿದ್ದು, ಪರೀಕ್ಷೆಯಲ್ಲಿ 18.7 ಅಂಕ ಗಳಿಸಿದ್ದಾರೆ. ವಿರಾಟ್ ಕೊಹ್ಲಿ 17.2 ಪಡೆದಿದ್ದಾರೆ. ರೋಹಿತ್ ಶರ್ಮಾ 16.5 ಅಂಕ ಪಡೆದಿದ್ದಾರೆ. ಉಳಿದ ಆಟಗಾರರು 16.5 ಮತ್ತು 18ರ ನಡುವೆ ಅಂಕ ಗಳಿಸಿದ್ದಾರೆ. ಯೋ-ಯೋ ಫಿಟ್​ನೆಸ್​ ಪರೀಕ್ಷೆಯಲ್ಲಿ ಪಾಸ್ ಆಗಲು ಕನಿಷ್ಠ ಸ್ಕೋರ್ 16.5 ಆಗಿದೆ. ಸದ್ಯ ಇನ್ನೂ ಕೆಲವು ಆಟಗಾರರು ಈ ಟೆಸ್ಟ್​​ನಲ್ಲಿ ಪಾಲ್ಗೊಳ್ಳಬೇಕಿದೆ ಎಂದು ಸುದ್ದಿ ಸಂಸ್ಥೆ ಪಿಟಿಐ ವರದಿ ಮಾಡಿದೆ.

ಐರ್ಲೆಂಡ್​ ಪ್ರವಾಸ ಮುಗಿಸಿ ತಂಡವನ್ನು ಕೂಡಿಕೊಂಡಿರುವ ಜಸ್ಪ್ರಿತ್​ ಬುಮ್ರಾ, ಸಂಜು ಸ್ಯಾಮ್ಸನ್, ಪ್ರಸಿದ್ಧ್ ಕೃಷ್ಣ ಸೇರಿದಂತೆ ಹಲವರು ಇನ್ನೂ ಶೀಘ್ರದಲ್ಲೇ ಫಿಟ್​ನೆಸ್ ಪರೀಕ್ಷೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ. ಆದರೆ ಕೆಎಲ್ ರಾಹುಲ್​, ಈ ಟೆಸ್ಟ್​​​ನಲ್ಲಿ ಪಾಲ್ಗೊಳ್ಳಲಿಲ್ಲ. ಮತ್ತೊಮ್ಮೆ ಸಣ್ಣ ಗಾಯದ ಸಮಸ್ಯೆಗೆ ಸಿಲುಕಿರುವ ರಾಹುಲ್, ಶೀಘ್ರದಲ್ಲೇ ಚೇತರಿಕೆ ಆಗುವ ಸಾಧ್ಯತೆ ಇದೆ ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.

ಕೊಹ್ಲಿ ವಿರುದ್ಧ ಬಿಸಿಸಿಐ ಗರಂ

ತಮ್ಮ ಯೋ-ಯೋ ಫಿಟ್‌ನೆಸ್ ಟೆಸ್ಟ್ ಸ್ಕೋರ್ ಅನ್ನು ಇನ್‌ಸ್ಟಾಗ್ರಾಂ ಸ್ಟೋರಿಯಲ್ಲಿ ಬಹಿರಂಗಪಡಿಸಿದ ವಿರಾಟ್ ಕೊಹ್ಲಿಗೆ (Virat Kohli) ಬಿಸಿಸಿಐ ಖಡಕ್ ಎಚ್ಚರಿಕೆ ನೀಡಿತ್ತು. ಈ ಟೆಸ್ಟ್​​​ನಲ್ಲಿ ಉತ್ತೀರ್ಣರಾದ ವಿರಾಟ್​​, ತಾನು ಪಡೆದಿರುವ ಅಂಕಗಳನ್ನು ಇನ್​ಸ್ಟಾಗ್ರಾಂ ಸ್ಟೋರಿ ಮೂಲಕ ಬಹಿರಂಗಪಡಿಸಿದ್ದರು. ಕೊಹ್ಲಿಗೆ ಅಲ್ಲದೆ, ಗೌಪ್ಯ ಮಾಹಿತಿಯ ಅಡಿಯಲ್ಲಿ ಬರುವ ತಮ್ಮ ಯೋ-ಯೋ ಟೆಸ್ಟ್ ಸ್ಕೋರ್‌ಗಳನ್ನು ಸಾಮಾಜಿಕ ಮಾಧ್ಯಮಗಳಲ್ಲಿ ಪೋಸ್ಟ್ ಮಾಡದಂತೆ ಆಟಗಾರರಿಗೆ ಎಚ್ಚರಿಕೆ ನೀಡಲಾಗಿದೆ.

ಯೋ-ಯೋ ಟೆಸ್ಟ್​ ಎಂದರೇನು?

ಇದು ತಂತ್ರಾಂಶ ಆಧಾರಿತ ಪ್ರಕ್ರಿಯೆ. 20 ಮೀಟರ್​​ ಗುರಿ ಓಡುವ ಗುರಿ ಇರಲಿದೆ. ಆರಂಭ ಹಾಗೂ ಕೊನೆಯ ಗುರಿಯನ್ನು ನಿಗದಿತ ಅವಧಿಯಲ್ಲಿ ಓಡುವ ಮೂಲಕ ಪೂರ್ಣಗೊಳಿಸಬೇಕಿದೆ. ಬೀಪ್ ಆರಂಭದೊಡನೆ ಓಟದ ಆರಂಭ ಹಾಗೂ ಅಂತ್ಯಕ್ಕೆ ಸಮಯ ನಿಗದಿಯಾಗಿರುತ್ತದೆ. ಹಾಗೆಯೇ ಅಂಕಗಳೂ ಇರುತ್ತವೆ. ಈ ಫಿಟ್​ನೆಸ್ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಬೇಕೆಂದರೆ, 16.1 ರಷ್ಟಿದ್ದ ಉತ್ತೀರ್ಣ ಅಂಕ ಈಗ 16.5ಕ್ಕೆ ಹೆಚ್ಚಿಸಲಾಗಿದೆ.