ಪುಷ್ಪ 3 ಚಿತ್ರದಲ್ಲಿ ನಟಿಸುತ್ತಾರಾ ತಿಲಕ್ ವರ್ಮಾ? ಅಲ್ಲು ಅರ್ಜುನ್‌ರಂತೆ ಉದ್ದ ಕೂದಲು ಬಿಟ್ಟ ಕುರಿತು ಶತಕವೀರ ಹೇಳಿದ್ದು ಹೀಗೆ
Nov 17, 2024 03:15 PM IST
Share
ಅಲ್ಲು ಅರ್ಜುನ್‌ರಂತೆ ಉದ್ದ ಕೂದಲು ಬಿಟ್ಟ ಕುರಿತು ಶತಕವೀರ ಹೇಳಿದ್ದು ಹೀಗೆ
- ದಕ್ಷಿಣ ಆಫ್ರಿಕಾ ವಿರುದ್ಧದ ಟಿ20 ಸರಣಿಯ ಹೀರೋ ತಿಲಕ್ ವರ್ಮಾ, ಉದ್ದ ಕೂದಲು ಬಿಟ್ಟು ಸ್ಟೈಲಿಶ್‌ ಆಗಿ ಕಾಣಿಸಿಕೊಂಡಿದ್ದಾರೆ. ಅವರ ಹೇರ್‌ ಸ್ಟೈಲ್‌ ಕುರಿತು ಸೂರ್ಯಕುಮಾರ್‌ ಯಾದವ್‌ ಪ್ರಶ್ನಿಸಿದ್ದಾರೆ. ಪುಷ್ಷ 3 ಚಿತ್ರದಲ್ಲಿ ನಟಿಸುತ್ತೀರಾ ಎಂದು ಕೇಳಿದ್ದಾರೆ.
ಜಾಗತಿಕ ಕ್ರಿಕೆಟ್‌ನಲ್ಲಿ ಸದ್ಯ ಹೆಚ್ಚು ಸದ್ದು ಮಾಡುತ್ತಿರುವ ಕ್ರಿಕೆಟಿಗ ತಿಲಕ್ ವರ್ಮಾ. ಭಾರತ ಕ್ರಿಕೆಟ್ ತಂಡದ ಯುವ ಎಡಗೈ ಬ್ಯಾಟರ್, ಭಾರತ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳ ನಡುವಿನ 4 ಪಂದ್ಯಗಳ ಟಿ20 ಸರಣಿಯಲ್ಲಿ ಅಬ್ಬರಿಸಿದರು. ಸರಣಿಯಲ್ಲಿ ಎರಡು ಸ್ಫೋಟಕ ಶತಕ ಸಿಡಿಸಿದ ತಿಲಕ್, ಭರ್ಜರಿ 280 ರನ್ ಗಳಿಸಿದರು. ಹೀಗಾಗಿ ಅರ್ಹವಾಗಿ ಸರಣಿ ಶ್ರೇಷ್ಠ ಪ್ರಶಸ್ತಿ ತಮ್ಮದಾಗಿಸಿಕೊಂಡರು. ಮೂರನೇ ಟಿ20 ಪಂದ್ಯದಲ್ಲಿ ಅಜೇಯ 107 ರನ್ ಗಳಿಸಿದ್ದ ತಿಲಕ್, ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಆ ಬಳಿಕ ನಾಲ್ಕನೇ ಟಿ20ಯಲ್ಲಿ ಮತ್ತೊಮ್ಮೆ ಅಜೇಯ 120 ರನ್ ಸಿಡಿಸಿದರು. ಇದರೊಂದಿಗೆ ಟಿ20 ಕ್ರಿಕೆಟ್‌ನಲ್ಲಿ ಸತತ ಎರಡು ಪಂದ್ಯಗಳಲ್ಲಿ ಎರಡು ಶತಕ ಸಿಡಿಸಿದ ಭಾರತದ ಎರಡನೇ ಬ್ಯಾಟರ್ ಎನಿಸಿಕೊಂಡರು.
ದಕ್ಷಿಣ ಆಫ್ರಿಕಾ ವಿರುದ್ಧ ಭಾರತವು 3-1 ಅಂತರದಿಂದ ಸರಣಿ ವಶಪಡಿಸಿಕೊಂಡಿತು. ಪಂದ್ಯ ನಂತರ ಟೀಮ್‌ ಇಂಡಿಯಾ ಟಿ20 ತಂಡದ ನಾಯಕ ಸೂರ್ಯಕುಮಾರ್‌ ಯಾದವ್‌, ನಾಲ್ಕನೇ ಪಂದ್ಯದ ಹೀರೋಗಳಾದ ತಿಲಕ್ ವರ್ಮಾ ಹಾಗೂ ಸಂಜು ಸ್ಯಾಮ್ಸನ್‌ ಜೊತೆಗೆ ಮಾತನಾಡಿದರು. ಈ ವೇಳೆ ತಿಲಕ್ ಉದ್ದ ಕೂದಲಿನ ಕುರಿತು ಪ್ರಶ್ನೆ ಕೇಳಿದ ಸೂರ್ಯ, ಪುಷ್ಷ 3ರಲ್ಲಿ ನಟಿಸುತ್ತೀರಾ ಎಂದು ಪ್ರಶ್ನೆ ಕೇಳಿದ್ದಾರೆ.
‘ತಿಲಕ್, ನಾನು ನಿಮ್ಮಲ್ಲಿ ಒಂದು ಪ್ರಶ್ನೆ ಕೇಳಬೇಕು. ನಿಮ್ಮ ಕೂದಲನ್ನು ನೋಡಿ ಎಲ್ಲರೂ ಅಲ್ಲು ಅರ್ಜುನ್ ಎಂದೇ ಕರೀತಿದ್ದಾರೆ. ತೆಲುಗು ಸೂಪರ್ ಸ್ಟಾರ್ ಮತ್ತು ನಿಮಗೆ ಏನಾದರೂ ಕನೆಕ್ಷನ್‌ ಇದೆಯಾ’ ಎಂದು ಸೂರ್ಯ ಕೇಳಿದ್ದಾರೆ. ಇದಕ್ಕೆ ಉತ್ತರಿಸಿದ ತಿಲಕ್, ‘ಇದನ್ನು ಶುರು ಮಾಡಿದ್ದು ನೀವೇ, ನನ್ನ ಉದ್ದನೆಯ ಕೂದಲನ್ನು ನೋಡಿ ಅಲ್ಲು ಅರ್ಜುನ್ ಅಲ್ಲು ಅರ್ಜುನ್ ಎಂದು ಕರೆದಿದ್ದೀರಿ. ನೀವು ಅಲ್ಲು ಅರ್ಜುನ್ ರೀತಿ ಕಾಣುತ್ತಿದ್ದೀರಿ ಎಂದ ಬೆನ್ನಲ್ಲೆ ಅದು ಎಲ್ಲೆಡೆ ಹರಡಿದೆ. ಈಗ ಎಲ್ಲರೂ ಹಾಗೆಯೇ ಕರೀತಾರೆ. ಉದ್ದನೆಯ ಕೂದಲು ನನಗಿಷ್ಟ. ಅದರ ಮೇಲೆ ಹೆಲ್ಮೆಟ್ ಧರಿಸುವುದ ನನಗೆ ಇಷ್ಟ’ ಎಂದು ತಿಲಕ್ ಹೇಳಿದ್ದಾರೆ.
ಪುಷ್ಪ 3ರಲ್ಲಿ ನಟಿಸುತ್ತೀರಾ?
ಈ ವೇಳೆ ಮರುಪ್ರಶ್ನೆ ಕೇಳಿದ ಸೂರ್ಯ, “ಅಂದ್ರೆ ನೀವು ಹೇಳುತ್ತಿರುವ ಪ್ರಕಾರ, ನೀವು ಪುಷ್ಪ 3ರಲ್ಲಿ ನಟಿಸಲು ಬಯಸುತ್ತೀರಿ ಅಲ್ವಾ,” ಎಂದು ಕೇಳುತ್ತಾರೆ. ಇದಕ್ಕೆ ನಗುತ್ತಾ ಪ್ರತಿಕ್ರಿಯೆ ನೀಡಿದ ತಿಲಕ್ ವರ್ಮಾ, ಅಯ್ಯೋ ಹಾಗೆ ಏನಿಲ್ಲ. ನನ್ನ ಕೆಲಸ ಬ್ಯಾಟ್ ಮತ್ತು ಬಾಲ್‌ನೊಂದಿಗೆ ಆಡುವುದು. ಕಷ್ಟಪಟ್ಟು ಕೆಲಸ ಮಾಡುವುದು ಮಾತ್ರ. ಉಳಿದದ್ದೆಲ್ಲಾ ದೇವರಿಗೆ ಬಿಟ್ಟದ್ದು ಎಂದು ಹೇಳುತ್ತಾರೆ.
ತೆಲುಗು ಸೂಪರ್‌ಸ್ಟಾರ್ ಅಲ್ಲು ಅರ್ಜುನ್ ಅವರು ನಟಿಸಿದ ಸೂಪರ್ ಹಿಟ್ ಚಲನಚಿತ್ರ ಪುಷ್ಷಾ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ಭಾರಿ ಹಣ ಗಳಿಸಿತು. ಇಷ್ಟು ಮಾತ್ರವಲ್ಲದೆ ಅಭಿಮಾನಿಗಳ ಹೃದಯ ಗೆದ್ದಿತು. ಈಗ ಈ ಸಿನಿಮಾದ ಎರಡನೇ ಭಾಗ ಕೂಡಾ ಬರುತ್ತಿದೆ. ಪುಷ್ಪ 2 ಚಿತ್ರ ಡಿಸೆಂಬರ್ 5ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.