ಪುಷ್ಪ 2 ಟ್ರೇಲರ್ ವೀಕ್ಷಿಸಿ ಅಲ್ಲು ಅರ್ಜುನ್ ಹೊಗಳಿದ ಡೇವಿಡ್ ವಾರ್ನರ್; ಆಸೀಸ್ ಕ್ರಿಕೆಟಿಗನ ಸಿನಿಪ್ರೇಮಕ್ಕೆ ಫ್ಯಾನ್ಸ್‌ ಪುಳಕ
Nov 18, 2024 03:22 PM IST
Share
ಪುಷ್ಪ 2 ಟ್ರೇಲರ್ ವೀಕ್ಷಿಸಿ ಅಲ್ಲು ಅರ್ಜುನ್ ಹೊಗಳಿದ ಡೇವಿಡ್ ವಾರ್ನರ್
- Pushpa 2 Trailer: ಬಹುನಿರೀಕ್ಷಿತ ಪುಷ್ಪ 2: ದಿ ರೂಲ್ ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದೆ. ಇದರ ಬೆನ್ನಲ್ಲೇ ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಡೇವಿಡ್ ವಾರ್ನರ್, ಟ್ರೇಲರ್ ಕುರಿತು ಪ್ರತಿಕ್ರಿಯಿಸಿದ್ದಾರೆ. ನಟ ಅಲ್ಲು ಅರ್ಜುನ್ ಅವರನ್ನು ತನ್ನ 'ಸಹೋದರ' ಎಂದು ಕರೆದು, ಅವರ ಕೆಲಸವನ್ನು ಶ್ಲಾಘಿಸಿದ್ದಾರೆ.
ಅಲ್ಲು ಅರ್ಜುನ್ ಮತ್ತು ರಶ್ಮಿಕಾ ಮಂದಣ್ಣ ನಟನೆಯ ಬಹುನಿರೀಕ್ಷಿತ ಚಿತ್ರ ಪುಷ್ಪ 2: ದಿ ರೂಲ್ ಸಿನಿಮಾದ ಟ್ರೇಲರ್ ಬಿಡುಗಡೆಯಾಗಿದೆ. ಈಗಾಗಲೇ ಲಕ್ಷಾಂತರ ಜನರನ್ನು ತಲುಪಿರುವ ಟ್ರೇಲರ್, ಅಭಿಮಾನಿಗಳಿಗೆ ಇಷ್ಟವಾಗಿದೆ. ಟಾಲಿವುಡ್‌ ಮಾತ್ರವಲ್ಲದೆ, ಭಾರತದಾದ್ಯಂತ ಪುಷ್ಪ 2 ಚಿತ್ರದ ಬಗ್ಗೆ ನಿರೀಕ್ಷೆ ಹೆಚ್ಚಿದ್ದು, ಪುಷ್ಪರಾಜ್‌ ಪಾತ್ರದಲ್ಲಿ ತೆಲುಗು ನಟ ಅಲ್ಲು ಅರ್ಜುನ್ ಅವರ ಲುಕ್‌ ಈಗಾಗಲೇ ಮೋಡಿ ಮಾಡಿವೆ. ಈ ನಡುವೆ, ಭಾರತೀಯ ಚಿತ್ರರಂಗದ ದೊಡ್ಡ ಅಭಿಮಾನಿಯಾಗಿರುವ ಆಸ್ಟ್ರೇಲಿಯಾದ ಮಾಜಿ ಸ್ಟಾರ್‌ ಆಟಗಾರ ಡೇವಿಡ್ ವಾರ್ನರ್, ತಮ್ಮ ನೆಚ್ಚಿನ ನಟ ಅಲ್ಲು ಅರ್ಜುನ್‌ಗೆ ಶುಭ ಹಾರೈಸಿದ್ದಾರೆ.
ಆಸೀಸ್ ಆರಂಭಿಕ ಆಟಗಾರ ಡೇವಿಡ್ ವಾರ್ನರ್, ಮೈದಾನದಲ್ಲಿ ತಮ್ಮ ಅಬ್ಬರದಾಟದ ಜೊತೆಗೆ ಸೋಷಿಯಲ್‌ ಮೀಡಿಯಾದಲ್ಲೂ ಫೇಮಸ್. ಬಗೆಬಗೆಯ ರೀಲ್ಸ್ ಮತ್ತು ಟಿಕ್ ಟಾಕ್‌ಗಳ ಮೂಲಕ ಅಭಿಮಾನಿಗಳಿಗೆ ಹತ್ತಿರವಾಗಿದ್ದಾರೆ. ಐಪಿಎಲ್‌ನಲ್ಲಿ ಈ ಹಿಂದೆ ಸನ್‌ರೈಸರ್ಸ್‌ ಹೈದರಾಬಾದ್‌ ಪರ ಆಡಿದ್ದ ವಾರ್ನರ್, ತೆಲುಗು ಚಿತ್ರರಂಗಕ್ಕೆ ಹತ್ತಿರವಾಗಿದ್ದಾರೆ. ಅಲ್ಲದೆ ತೆಲುಗು ಮಾತ್ರವಲ್ಲದೆ ಭಾರತದ ಅಭಿಮಾನಿಗಳ ನೆಚ್ಚಿನ ಆಟಗಾರನಾಗಿದ್ದಾರೆ. ತೆಲುಗು ಸಿನಿಮಾಗಳಿಗೆ ಸಂಬಂಧಿಸಿದ ಹಲವು ಪೋಸ್ಟ್‌ಗಳನ್ನು ಅವರು ಈ ಹಿಂದೆಯೂ ಹಂಚಿಕೊಂಡಿದ್ದರು.
ಈ ಹಿಂದೆ ತೆಲುಗು ಚಿತ್ರಗಳ ಮೇಲೆ ಹಲವು ರೀಲ್ಸ್ ಮಾಡಿರುವ ವಾರ್ನರ್, ಕ್ರಿಕೆಟ್ ಪಂದ್ಯಗಳ ಸಮಯದಲ್ಲಿ ಮೈದಾನದಲ್ಲೂ ಅಭಿಮಾನಿಗಳನ್ನು ರಂಜಿಸಿದ್ದಾರೆ. ಅದರಲ್ಲೂ ಪುಷ್ಪ ಚಿತ್ರದ ಜನಪ್ರಿಯ ಶೈಲಿಯನ್ನು ಅನುಕರಣೆ ಮಾಡುವ ಮೂಲಕ, ತೆಲುಗು ಚಿತ್ರಗಳ ಬಗ್ಗೆ ತಮ್ಮ ಆಕರ್ಷಣೆಯನ್ನು ವ್ಯಕ್ತಪಡಿಸಿದ್ದಾರೆ. ಇದೀಗ ಮತ್ತೊಮ್ಮೆ ಅಭಿಮಾನಿಗಳ ಮೆಚ್ಚುಗೆಗೆ ವಾರ್ನರ್ ಪಾತ್ರರಾಗಿದ್ದಾರೆ.
ಸಹೋದರನ ಕೆಲಸ ಮೆಚ್ಚಿದ ವಾರ್ನರ್
ಪುಷ್ಪ: ದಿ ರೈಸ್‌ ಚಿತ್ರದಲ್ಲಿ ನಟ ಅಲ್ಲು ಅರ್ಜುನ್ ಅವರ ಪಾತ್ರವನ್ನು ಇಮಿಟೇಟ್‌ ಮಾಡುತ್ತಿದ್ದ ವಾರ್ನರ್, ಇದೀಗ ಅದರ ಮುಂದುವರಿದ ಭಾಗವಾದ ಪುಷ್ಪ 2: ದಿ ರೂಲ್ ಚಿತ್ರದ ಬಗ್ಗೆಯೂ ತಾವು ಕುತೂಹಲ ಬೆಳೆಸಿಕೊಂಡಿರುವುದನ್ನು ತೋರಿಸಿದ್ದಾರೆ. ನವೆಂಬರ್‌ 17ರಂದು ಚಿತ್ರದ ಟ್ರೈಲರ್ ಬಿಡುಗಡೆಯೊಂದಿಗೆ, ಆಸ್ಟ್ರೇಲಿಯಾದ ಮಾಜಿ ಆಟಗಾರ ತನ್ನ 'ಸಹೋದರ' (ಅಲ್ಲು ಅರ್ಜುನ್)ನನ್ನು ಶ್ಲಾಘಿಸಿದ್ದಾರೆ.
ಸಾಮಾಜಿಕ ಮಾಧ್ಯಮದಲ್ಲಿ ಈ ಬಗ್ಗೆ ವಾರ್ನರ್ ಪ್ರತಿಕ್ರಿಯಿಸಿದ್ದಾರೆ. ಈಗಾಗಲೇ ಟ್ರೇಲರ್ ನೋಡಿರುವ ಅವರು, ಅಲ್ಲು ಅರ್ಜುನ್ ಕೆಲಸಕ್ಕಾಗಿ ಶ್ಲಾಘಿಸಿದರು. ಇನ್‌ಸ್ಟಾಗ್ರಾಮ್‌ನಲ್ಲೂ ಸ್ಟೋರಿ ಹಾಕಿಕೊಂಡಿರುವ ವಾರ್ನರ್ “ಗ್ರೇಟ್‌ ವರ್ಕ್‌ ಬ್ರದರ್‌” ಎಂದು ಬರೆದುಕೊಂಡಿದ್ದಾರೆ. ಇದು ಇಂಟರ್ನೆಟ್‌ನಲ್ಲಿ ಭಾರಿ ಸದ್ದು ಮಾಡಿದೆ. ವಾರ್ನರ್ ಮತ್ತು ಅರ್ಜುನ್ ನಡುವೆ ಉತ್ತಮ ಬಂಧವಿದೆ ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ.
ಪುಷ್ಪ; ದಿ ರೈಸ್‌ ಚಿತ್ರ
2021ರ ಡಿಸೆಂಬರ್‌ 17ರಂದು ಪುಷ್ಪ; ದಿ ರೈಸ್‌ ಸಿನಿಮಾ ತೆರೆಕಂಡಿತ್ತು. ಈ ಸಿನಿಮಾ ಬರೋಬ್ಬರಿ 400 ಪ್ಲಸ್‌ ಕೋಟಿ ಗಳಿಸಿತ್ತು. ತೆಲುಗು ಜತೆಗೆ ಕನ್ನಡ, ಮಲಯಾಳಂ ಮತ್ತು ಹಿಂದಿ ಭಾಷೆಯಲ್ಲಿಯೂ ಬಿಡುಗಡೆ ಆಗಿ, ಉತ್ತರ ಭಾರತದಲ್ಲಿ ದೊಡ್ಡ ಮಟ್ಟದ ಸದ್ದು ಮಾಡಿತ್ತು. ಇದೀಗ ಪುಷ್ಟ 2 ಚಿತ್ರ ಕೂಡಾ ಕನ್ನಡ ಹಲವು ಭಾಷೆಗಳಲ್ಲಿ ಡಿಸೆಂಬರ್‌ 5ರಂದು ಬಿಡುಗಡೆಯಾಗುತ್ತಿದೆ.
ತಾರಾಗಣ
ಪುಷ್ಪ 2 ಚಿತ್ರವನ್ನು ಸುಕುಮಾರ್‌ ನಿರ್ದೇಶನ ಮಾಡಿದ್ದಾರೆ. ಅಲ್ಲು ಅರ್ಜುನ್ ಜತೆಗೆ ರಶ್ಮಿಕಾ ಮಂದಣ್ಣ, ಜಗದೀಶ್‌ ಪ್ರತಾಪ್‌ ಬಂಡಾರಿ, ಜಗಪತಿ ಬಾಬು, ಪ್ರಕಾಶ್‌ ರಾಜ್‌, ಫಹಾದ್‌ ಫಾಸಿಲ್‌, ಸುನೀಲ್‌, ಅನಸುಯಾ ಭಾರದ್ವಾಜ್, ರಾವ್‌ ರಮೇಶ್‌ ಸೇರಿ ಅನುಭವಿ ನಟರು ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದಾರೆ. ಕನ್ನಡದ ಅಜನೀಶ್‌ ಲೋಕನಾಥ್‌ ಮತ್ತು ಸ್ಯಾಮ್‌ ಸಿಎಸ್‌ ಹಿನ್ನೆಲೆ ಸಂಗೀತ ಸಂಯೋಜಿಸಿದ್ದಾರೆ.