ಪುಷ್ಪ 2 ಟ್ರೇಲರ್ ಬಿಡುಗಡೆ ಸಮಾರಂಭದಲ್ಲಿ ಜನಸಂದಣಿ; ಚಪ್ಪಲಿ-ಕಲ್ಲು ಎಸೆದ ಜನರು, ಪೊಲೀಸರಿಂದ ಲಾಠಿ ಚಾರ್ಜ್
Pushpa 2 Trailer: ಪಾಟ್ನಾದಲ್ಲಿ ನಡೆದ ಪುಷ್ಪ 2 ಟ್ರೇಲರ್ ಬಿಡುಗಡೆ ಸಮಾರಂಭದಲ್ಲಿ ಭಾರಿ ಸಂಖ್ಯೆಯಲ್ಲಿ ಜನ ಸೇರಿದ್ದರು. ಜನದಟ್ಟಣೆ ಹೆಚ್ಚಾಗಿ ಜನರು ಚಪ್ಪಲಿ ಹಾಗೂ ಕಲ್ಲು ಎಸೆದರು. ಜನಸಂದಣಿಯನ್ನು ನಿಯಂತ್ರಿಸಲಾಗದೆ ಪೊಲೀಸರು ಲಾಠಿ ಚಾರ್ಜ್ ಮಾಡಿದರು.
ಬಹುನಿರೀಕ್ಷಿತ ಪುಷ್ಪ 2 ಚಿತ್ರದ ಟ್ರೇಲರ್ ಇಂದು ಬಿಡುಗಡೆಯಾಗಿದೆ. ತೆಲುಗು ಸೂಪರ್‌ ಸ್ಟಾರ್‌ ಅಲ್ಲು ಅರ್ಜುನ್ ಅಭಿನಯದ 'ಪುಷ್ಪ 2 ದಿ ರೂಲ್' ಚಿತ್ರದ ಟ್ರೈಲರ್ ನವೆಂಬರ್ 17ರಂದು ಪಾಟ್ನಾದ ಗಾಂಧಿ ಮೈದಾನದಲ್ಲಿ ಬಿಡುಗಡೆ ಮಾಡಲಾಯಿತು. ಚಿತ್ರನಟರಾದ ಅಲ್ಲು ಅರ್ಜುನ್ ಮತ್ತು ರಶ್ಮಿಕಾ ಮಂದಣ್ಣ ಅವರನ್ನು ನೋಡಲು ಬರೋಬ್ಬರಿ ಎರಡು ಲಕ್ಷಕ್ಕೂ ಹೆಚ್ಚು ಜನರು ಮೈದಾನಕ್ಕೆ ಆಗಮಿಸಿದ್ದರು. ಆದರೆ ಜನಸಂದಣಿ ನಿಯಂತ್ರಣ ಮಾಡಲಾಗದೆ, ಅದ್ಧೂರಿ ಕಾರ್ಯಕ್ರಮದಲ್ಲಿ ಪೊಲೀಸರು ಲಾಠಿ ಪ್ರಹಾರ ನಡೆಸಬೇಕಾಯಿತು.
ಸೆಲೆಬ್ರಿಟಿಗಳು ಕಾರ್ಯಕ್ರಮದಲ್ಲಿ ಸೇರಿದ್ದರಿಂದ ಸಹಜವಾಗಿ ಜನದಟ್ಟಣೆ ಹೆಚ್ಚಿತ್ತು. ಪೊಲೀಸರು ಲಾಠಿ ಚಾರ್ಜ್ ಮಾಡಿದ್ದು ಒಂದೆಡೆಯಾದರೆ, ಜನರು ಚಪ್ಪಲಿ ಮತ್ತು ಕಲ್ಲುಗಳನ್ನು ಎಸೆದರು. ಜನರು ಚಪ್ಪಲಿ, ಇಟ್ಟಿಗೆ, ಕಲ್ಲು ಮತ್ತು ಬಾಟಲಿಗಳನ್ನು ಎಸೆದಿದ್ದರಿಂದ ಹಲವಾರು ಪೊಲೀಸರು ಗಾಯಗೊಂಡರು. ಘಟನೆಗೆ ಸಂಬಂಧಿಸಿದ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ.
ಜನಸಂದಣಿಯನ್ನು ನಿಯಂತ್ರಿಸಲಾಗದೆ ಬಿಹಾರದ ವಿಶೇಷ ಸಶಸ್ತ್ರ ಪೊಲೀಸರನ್ನು ಕರೆಸಬೇಕಾಯ್ತು. ಜನದಟ್ಟಣೆಯಿಂದ ಹಲವು ಬ್ಯಾರಿಕೇಡ್‌ಗಳು ಮುರಿದವು. ಕೆಲವು ಜನರು ವಾಚ್ ಟವರ್ ಏರಿ ನಿಂತರು.
5 ಗಂಟೆಗೆ ಕಾರ್ಯಕ್ರಮ ಆರಂಭ
ಸಂಜೆ 5 ಗಂಟೆಗೆ ಕಾರ್ಯಕ್ರಮ ಆರಂಭವಾಯಿತು. ನಟ ಅಲ್ಲು ಅರ್ಜುನ್, ರಶ್ಮಿಕಾ ಮಂದಣ್ಣ ಸೇರಿದಂತೆ ಇತರ ನಟರು ಆಗಮಿಸಿದರು. ನಾಯಕ ನಟರು ಗಾಂಧಿ ಮೈದಾನ ತಲುಪುತ್ತಿದ್ದಂತೆಯೇ ಜನರು ಕೂಡಾ ಅವರ ಹಿಂದೆಯೇ ಓಡಲು ಶುರು ಮಾಡಿದರು. ಟ್ರೇಲರ್ ಬಿಡುಗಡೆಯನ್ನು ಸಂಜೆ 6:30ಕ್ಕೆ ನಿಗದಿಪಡಿಸಲಾಗಿತ್ತು. ಆದರೆ ಕಾರ್ಯಕ್ರಮ ಸಂಜೆ 5 ಗಂಟೆಗೆ ಆರಂಭವಾಯಿತು.
ಪಾಟ್ನಾ ವಿಮಾನ ನಿಲ್ದಾಣದ ಮೂಲಕ ಮೈದಾನಕ್ಕೆ ಬಂದ ಅಲ್ಲು ಅರ್ಜುನ್, ಅಭಿಮಾನಿಗಳಿಗೆ ತಮ್ಮ 'ಪುಷ್ಪ' ಶೈಲಿಯ ಸಿಗ್ನೇಚರ್ ಪೋಸ್ ನೀಡಿದರು.
ಟ್ರೇಲರ್ ಬಿಡುಗಡೆ ಹಿನ್ನೆಲೆಯಲ್ಲಿ ನಗರದಲ್ಲಿ ಭಾರಿ ಭದ್ರತಾ ವ್ಯವಸ್ಥೆ ಮಾಡಲಾಗಿತ್ತು. ಗಾಂಧಿ ಮೈದಾನದಲ್ಲಿ ಪಾಟ್ನಾದ ಡಿಎಂ ಮತ್ತು ಎಸ್‌ಎಸ್‌ಪಿ ಕೂಡ ಉಪಸ್ಥಿತರಿದ್ದರು.
ಡಿಸೆಂಬರ್ 5ರಂದು ಚಿತ್ರ ಬಿಡುಗಡೆ
'ಪುಷ್ಪ 2' ಚಿತ್ರವು ಡಿಸೆಂಬರ್ 5 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ತೆಲುಗು, ಹಿಂದಿ, ತಮಿಳು, ಕನ್ನಡ, ಮಲಯಾಳಂ ಮತ್ತು ಬೆಂಗಾಲಿ ಭಾಷೆಗಳಲ್ಲಿ ಚಿತ್ರಮಂದಿರಗಳಲ್ಲಿ ತೆರೆಕಾಣಲಿದೆ. ಚಿತ್ರವನ್ನು ತೆಲುಗಿನ ಖ್ಯಾತ ನಿರ್ದೇಶಕ ಸುಕುಮಾರ್‌ ನಿರ್ದೇಶನ ಮಾಡಿದ್ದಾರೆ. ಚಿತ್ರದಲ್ಲಿ ಪ್ರಕಾಶ್‌ ರಾಜ್‌, ಫಹಾದ್ ಫಾಸಿಲ್, ಶ್ರೀಲೀಲಾ, ಅನುಸೂಯಾ ಭಾರದ್ವಾಜ್, ಸುನೀಲ್ ಮತ್ತು ಜಗಪತಿ ಬಾಬು ನಟಿಸಿದ್ದಾರೆ. ಈಗಾಗಲೇ ಟ್ರೇಲರ್‌ಗೆ ಭರ್ಜರಿ ಬೆಂಬಲ ವ್ಯಕ್ತವಾಗಿದೆ. 2021ರ ಡಿಸೆಂಬರ್ 17ರಂದು ಪುಷ್ಪ; ದಿ ರೈಸ್‌ ಸಿನಿಮಾ ತೆರೆಕಂಡಿತ್ತು. 200 ಕೋಟಿ ಬಜೆಟ್‌ನಲ್ಲಿ ನಿರ್ಮಾಣವಾಗಿದ್ದ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ 400ಕ್ಕೂ ಅಧಿಕ ಕೋಟಿ ಗಳಿಸಿತ್ತು.
