UI The Movie: ಸಂಶಯವೇ ಬೇಡ ಡಿ. 20ಕ್ಕೆ ‌UI ಬಿಡುಗಡೆ ಆಗೋದು ಖಂಡಿತಾ; ಗೊಂದಲಕ್ಕೆ ತೆರೆ ಎಳೆದ ವಾರ್ನರ್!

UI The Movie: ಉಪೇಂದ್ರ ಅಭಿನಯದ ಮತ್ತು ನಿರ್ದೇಶನದ ‘UI’ ಚಿತ್ರವು ನಿಜಕ್ಕೂ ಡಿ. 20ರಂದು ಬಿಡುಗಡೆಯಾಗುತ್ತದಾ? ಎಂಬ ಪ್ರಶ್ನೆ ಎಲ್ಲರಲ್ಲೂ ಇತ್ತು. ಏಕೆಂದರೆ, ಚಿತ್ರದ ಬಿಡುಗಡೆಗೆ ಇನ್ನು 20 ಪ್ಲಸ್‍ ದಿನಗಳಿದ್ದರೂ, ಚಿತ್ರತಂಡ ಇನ್ನೂ ಚಿತ್ರದ ಪ್ರಚಾರವನ್ನೇ ಶುರು ಮಾಡಿಲ್ಲ. ಹಾಗಾಗಿ, ಚಿತ್ರ ಅಂದುಕೊಂಡಂತೆ ಬಿಡುಗಡೆಯಾಗುತ್ತದಾ? ಅಥವಾ ಮುಂದಕ್ಕೇನಾದರೂ ಹೋಗುವ ಸಾಧ್ಯತೆ ಇದೆಯಾ? ಎಂಬ ಪ್ರಶ್ನೆ ಉಪೇಂದ್ರ ಅಭಿಮಾನಿಗಳ ವಲಯದಲ್ಲಿತ್ತು.

ಈಗ ಕೊನೆಗೂ ಈ ಗೊಂದಲಕ್ಕೆ ತೆರೆಬಿದ್ದಿದೆ. ಚಿತ್ರತಂಡವು ಇಂದು (ನ. 28) ಸೋಷಿಯಲ್‍ ಮೀಡಿಯಾದಲ್ಲಿ ಹೊಸ ಪೋಸ್ಟರ್ ಬಿಡುಗಡೆ ಮಾಡಿದ್ದು, ಈ ಪೋಸ್ಟರ್‌ನಲ್ಲಿ ಜಗತ್ತಿನಾದ್ಯಂತ ಡಿಸೆಂಬರ್ 20ರಂದು ಬಿಡುಗಡೆಯಾಗಲಿದೆ ಎಂದು ಖಚಿತಪಡಿಸಿದೆ. ಅದಕ್ಕೂ ಮೊದಲು, ಡಿಸೆಂಬರ್ 02ರ ಸೋಮವಾರದಂದು ಬೆಳಿಗ್ಗೆ 11:07ಕ್ಕೆ ವಾರ್ನರ್ ಬಿಡುಗಡೆ ಎಂದು ಘೋಷಿಸಿದೆ.

ಇದನ್ನೂ ಓದಿ: ಅದು ಸೈಲೆಂಟ್, ಇದು ವೈಲೆಂಟ್‌; ಎಕ್ಕ ಚಿತ್ರದಲ್ಲಿ ದೊಡ್ಮನೆ ಕುಡಿ ಯುವ ರಾಜಕುಮಾರ್ ರಕ್ತಪಾತ

ಏನಿದು ವಾರ್ನರ್‌?

ಟೀಸರ್ ಗೊತ್ತು, ಟ್ರೇಲರ್ ಗೊತ್ತು, ಇದೇನಿದು ವಾರ್ನರ್ ಎಂಬ ಪ್ರಶ್ನೆ ಸಹಜವಾಗಿಯೇ ಬರುತ್ತದೆ. ಉಪೇಂದ್ರ ಮತ್ತೆ ಎಲ್ಲಾದರೂ ತಲೆಯಲ್ಲಿ ಹುಳ ಬಿಡುವ ಪ್ರಯತ್ನದಲ್ಲಿದ್ದಾರಾ ಎಂಬ ಸಂಶಯ ಬಂದು ಹೋಗುತ್ತದೆ. ಈ ವಾರ್ನರ್ ಎಂದರೇನು? ಎಂದು ಚಿತ್ರತಂಡದವರನ್ನು ಪ್ರಶ್ನಿಸಿದರೆ, ಅವರವರ ಭಾವಕ್ಕೆ ಅವರವರ ಭಕುತಿಗೆ ಎಂಬ ಉತ್ತರ ಬರುತ್ತದೆ. ಈ ಮೂಲಕ ವಾರ್ನರ್ ಎಂದರೇನು ಎಂಬ ಪ್ರಶ್ನೆಯನ್ನು ಪ್ರಶ್ನೆಯನ್ನಾಗಿಯೇ ಇಡುತ್ತಾರೆ.

ವಿತರಣೆ ಜವಾಬ್ದಾರಿ ಯಾರದ್ದು?

‘UI’ ಚಿತ್ರದ ವಿತರಣೆ ಹಕ್ಕುಗಳನ್ನು ಕರ್ನಾಟಕದಲ್ಲಿ ಕೆ.ವಿ.ಎನ್ ಸಂಸ್ಥೆ ಪಡೆದುಕೊಂಡಿದೆ. ಆಂದ್ರಪ್ರದೇಶ ಮತ್ತು ತೆಲಂಗಾಣದಲ್ಲಿ ಈಗಾಗಲೇ ದೊಡ್ಡ ಮಟ್ಟಕ್ಕೆ ಹೆಸರಿರುವ ಅಲ್ಲು ಅರವಿಂದ್‍ ಒಡೆತನದ ಗೀತಾ ಆರ್ಟ್ಸ್ ಸಂಸ್ಥೆ ವಿತರಿಸುತ್ತಿದೆ. ಕೇರಳದಲ್ಲಿ ಎಪಿ ಇಂಟರ್ನ್ಯಾಷನಲ್ ಪ್ರೊಡಕ್ಷನ್ ಹೌಸ್ ಬಿಡುಗಡೆ ಮಾಡಿದರೆ, ಹೊರದೇಶಗಳಲ್ಲಿ ಹೋಮ್ ಸ್ಕ್ರೀನ್ ಎಂಟರ್ಟೈನ್ಮೆಂಟ್ ವಿತರಣೆ ಹಕ್ಕುಗಳನ್ನು ತನ್ನದಾಗಿಸಿಕೊಂಡಿದೆ.

ಇದನ್ನೂ ಓದಿ: ತುಮಕೂರು ಹುಡುಗಿ, ಮಲೆನಾಡು ಹುಡುಗ; ಲಕ್ಷ್ಮೀ ನಿವಾಸ ಸೀರಿಯಲ್‌ ಚಂದನಾ ಅನಂತಕೃಷ್ಣ- ಪ್ರತ್ಯಕ್ಷ್‌ ಕಲ್ಯಾಣ

ಲಹರಿ ಫಿಲಂಸ್ ಹಾಗೂ ವೀನಸ್ ಎಂಟರ್‌ ಪ್ರೈಸಸ್ ಲಾಂಛನದಲ್ಲಿ ಜಿ.ಮನೋಹರನ್ ಹಾಗೂ ಕೆ.ಪಿ. ಶ್ರೀಕಾಂತ್ ಜೊತೆಯಾಗಿ ನಿರ್ಮಿಸಿರುವ ‘UI’ ಚಿತ್ರಕ್ಕೆ ಉಪೇಂದ್ರ ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆ ಬರೆದು ನಿರ್ದೇಶನ ಮಾಡಿದ್ದಾರೆ. ಇನ್ನು, ಈ ಚಿತ್ರಕ್ಕೆ ಅವರೇ ನಾಯಕ. ಜೊತೆಗೆ ರೀಷ್ಮಾ ನಾಣಯ್ಯ ರವಿಶಂಕರ್, ಅಚ್ಯುತ್‍ ಕುಮಾರ್, ಸಾಧು ಕೋಕಿಲ, ನಿಧಿ ಸುಬ್ಬಯ್ಯ, ಗುರುಪ್ರಸಾದ್ ಮುಂತಾದವರು ನಟಿಸಿದ್ದಾರೆ. ಅಜನೀಶ್‍ ಲೋಕನಾಥ್‍ ಸಂಗೀತ ಈ ಚಿತ್ರಕ್ಕಿದೆ.

ವರದಿ: ಚೇತನ್‌ ನಾಡಿಗೇರ್